Juõn Abañ Ej Jelet Aolepen Lõl, Juõn Wãwen Kamarmire

IÑTAN ej juõn men jej loe ijoko otemjej, im elõñ ro ilo tiriamokake rej jibõñ ro rej iñtan. Ñõn wanjoñok, ro im rej jerbal ilo hospital ko rej jerbal iomin elõñ auõ ko ñõn jibõñ ro renañinmij ak jorran. Dri ikkun kijeek ro, police man ro, dri kõmõn kien ro, im ro rej emakõt moktata ñõn lomoren armij elañe mour ko air ej ber ilo kauwatata, rein aolep rej kate ir ñõn kadriklok ak kejbãrok bwe ro jet ren jab iñtan. Jibarbar kein remaroñ jibõñ armij ro kajjojo elañe rej aikwij jibõñ, bõtab armij ak rolul ko an armij rejjab maroñ jolok iñtan kein rej walok iaolepen lõl. Bõtab, Anij eor an maroñ im enaj bõktok mejelan abañ kein ibelakin lõl.

Buk eo eliktata ilo Baibel ej kwalok kalimur eo kin men in: “Im [Anij] E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”  (Reveles̃õn 21:4) Lemnok kin oran armij ro renaj bõk tokjen jen kalimur in. Ej lukkun kalikar kin karõk eo an Anij ñõn bõktok jemlok ñõn aolep iñtan ko. Enaj kõmõne men in ikijen an jolok tõrinae, kwuli, nañinmij, jab ekajet jime, ekoba aolep armij ro renana. Ejelok armij remaroñ kõtõbrõk men kein.

Ta eo Ailiñ eo an Anij Enaj Kõmõne

Anij enaj kajejit kalimur in ikijen an kajerbal armij eo juõn ekajur ilõñ im ilõl, Jisõs Kraist. Mõtõn jidrik Jisõs enaj iroij einwõt Kiñ ion aolepen lõl in. Im Kiñ, president, ak dri kien ro an lõl rejamin bar iroij ion armij. Ak armij ro renaj ber iomin juõn wõt Kiñ im juõn wõt kien, aet iomin Kien ak Ailiñ eo an Anij.

Ailiñ in enaj jolok aolep kien ko an armij. Ilo ien ko etto, Baibel eo ear kanan: “Anij in lõñ enaj kajutak juõn ailiñ eo ejamin jebeblok, ak enaj kejebeblok aoleben ailiñ ko jet, im enaj bed ñõn indrio.” (Daniel 2:​44, UBS) Armij otemjej ion lõl renaj mour ilo burukuk iomin juõn wõt kien ewãnik, aet Ailiñ eo an Anij.

Ke Jisõs ear ber ion lõl, elõñ alen an kar konono kin Ailiñ in. Ear konono kake ilo jar eo an, im ear katakin dri kalor ro an bwe ren jar ilo wãwen in: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:10) Jisõs ear kwalok ijin bwe Ailiñ eo ej ekkejellok iben ankilan Anij bwe en jejit ijin ion lõl, im ej ankilan Anij bwe iñtan en joko jen aolepen lõl.

Kien eo ewãppen an Anij enaj bõktok jerammõn ko me kien ko an lõl rejjab maroñ bõktoki. Kememej bwe Jeova ear letok Nejin einwõt juõn binmour bwe armij ren maroñ bõk mour indrio. Iomin Iroij eo ejoij an Ailiñ eo, armij ro renaj mour manlok mae ien eo rej tõbar wãppen. Im ta tokjen men in? Jeova enaj “warõñlok mij ñõn in drio; im Iroij Jeova e naj kõmraik dren in kemjalal jen mejeir otemjej.”​—Aiseia 25:8.

Jet remaroñ kajitõk: ‘Etke Anij ear jab emakõt moktalok? Ta eo ej kõtare?’ Jeova emaroñ kar julok ak bõprae iñtan ko otemjej jen air walok. Ak, ear kõtlok bwe men kein ren wõnmanlok wõt, jab kinke ej lemnok kin e mõke, ak bwe aolep ro nejin ion lõl ren maroñ bõk jerammõn ko rej indrio. Ridto rej yokwe ajiri eo nejir renaj kõtlok bwe en jelmae men ko rebin elañe rej jela bwe enaj or tokjen ñõn ajiri eo ilo ilju im jeklaj. Ilo ejja wãwen in wõt, eor un ko remõn unin Jeova ear kõtlok bwe armij ro ren jelmae iñtan ko jidrik ien, im un kein rej kemelele kaki ilo Baibel eo. Men kein rej kitibuj anemkwoj in kãlet, jerawiwi, im kin aituerõk eo kin wãwen an Jeova Iroij. Baibel eo ej bareinwõt kemelele bwe kar kõtlok Setan bwe en iroij ion lõl iomin jidrik wõt ien. *

Meñe jejjab maroñ kemelele kin aolepen un kein ilo jejjo wõt peij ijin, eor ruo kein kamol ko me remaroñ letok ñõn kij kejatrikrik im kõkãtõk kij. Eo moktata ej eñin: Jeova enaj kejerammõn kij elaplok jen jabrewõt iñtan ko jar iioni. Bareinwõt, Anij ej kalimuri kij bwe: “Ejjelok en enaj kememeji men ko rar walok ilo ien ko rej motlok.” (Aiseia 65:17, UBS) Anij enaj julok aolep buromõj im iñtan ko ñõn indrio, ko rar walok itok jen an kar kõtlok bwe nana en walok jidrik ien.

Menin kamol eo kein karuo ej eñin: Emwij an Anij karõk juõn ien ñõn an kajemlok iñtan im ejamin oktõk. Kememej bwe dri kanan Habakkuk ear kajitõk kin ewi toõn an Jeova naj kõtlok bwe lej, jorran ak kiojõljõl, en wõnmanlok wõt. Jeova ear uak im ba ñõn e bwe vis̃õn eo ‘ejjañin ien ñõn an jejjet kitiein, . . . enaj jejjet kitiein ilo ien eo ej karõke, im ejjelok menin bõbraiki.’ (Habakkuk 2:3, UBS) Jenaj lo ilo katak in tok juõn bwe ‘ien eo ej karõke’ ej lukkun ebak.

[Kamelele eo itulal]

 [Box ilo peij 15]

Eon ko Me Rej Kwalok kin Juõn Ilju im Jeklaj Elemõnõnõ

NAJ EJELOK BAR TÕRINAE:

“Komin iten lo jerbal ko an Jeova; ta kokkure ko E ar kõmõni ilo lõl. Ej kejemlok tõrinae ko ñõn jemlokõn lõl; Ej kabwilok libon eo, im bukwe mõri, E tili jariõt ko kin kijeek.”​—Sam 46:​8, 9.

RO JEJ YOKWE IR RENAJ JERKAKBIJI:

“Bwe ro remõn im ro renana re naj jerkakbiji.”​—Jerbal 24:15.

NAJ LÕÑ MÕÑA ÑÕN AOLEP:

“Eneo en obrak kin wheat; Keinikkan ko ren kabwe ion tol ko.”​—Sam 72:16, UBS.

NAJ EJELOK BAR NAÑINMIJ:

“Dri jokwe ie e jamin ba, I nañinmij.”​—Aiseia 33:24.

RO RENANA RENAJ JOKO:

“A ro re nana, naj kamõkit ir jen eneo, im ro re jela mon, naj totõk ir jen e.”​—Jabõn Kennan Ko 2:​22.

NAJ OR EKAJET JIME:

“Lo, juõn kiñ [Kraist Jisõs] e naj iroij ilo wãnik, im iroij ro re naj iroij ilo ekajet jime.”​—Aiseia 32:1.

[Kamelele in juõn pija ilo peij 15]

Ailiñ eo an Anij enaj kamarmiri im jolok aolep iñtan ko jej iioni