Katak eo Ejjab Mol Ken Kajiljino: Emõn Iben Anij Ñe Jej Kajerbal Ekjõp ko ilo ien Ar Kabuñ
Katak eo Ejjab Mol Ken Kajiljino: Emõn Iben Anij Ñe Jej Kajerbal Ekjõp ko ilo ien Ar Kabuñ
Ewi wãwen an kar katak in ejjab mol jino walok? “Dri Kristian ro mokta rar jab kajerbal ekjõp ko ilo ien air kabuñ . . . Enañin 1,600 lok ñõn 1,700 yiõ ko remotlok, kar kamelim air jino kajerbal ekjõp ko ilo kabuñ eo kinke rar lemnok bwe enaj birurulok an ro edrik air jela kin Anij katak jen ekjõp ko kin katak ko an kabuñ in Kristian, jen air riiti buk ko ak roñjake katak ko dri tel ro rej kwalok iman.” *
Ta eo Baibel ej katakin kake? “Kwon jab kõmõnmõn im jekjek ekjõp ñõn yuk, ak jabrewõt men in e wãwen men ko ilõñ, ak ilõl iomin, ak ilo dren iomin lõl: kwon jab barikrik jen ir, ak jerbal ñõn ir.” (Exodus 20:4, 5) Dri jilik Jon ear je ñõn dri Kristian ro mokta: “Ajiri ro nejiõ, komin kejbãrok kom jen ekjõp ko.”—1 Jon 5:21.
Ekjõp ko, rej ke baj juõn wãwen ñõn ar kebak im koutiej men eo rej jutõk ikijen, einwõt an kabuñ ko ba? Juõn encyclopedia kin kabuñ ej ba, “Ilo jinoin, kabuñ eo emaroñ kar kajerbal ekjõp ko einwõt kein katakin im kainõknõk; ilo mol, eñin kemelele eo rar kajerbale ñõn naunin air kajerbal ekjõp ko. Bõtab ejjab to tokelik, rar jino kajerbal ekjõp ko einwõt kein kabuñ. Men in ear lukkun mol ikijen annañ ko me ear oktõk im lap air kajerbali ilo kabuñ in Eastern Orthodoxy.” Bõtab, ejime an kar dri kanan Aiseia kajitõk: “Kom naj jajoñjoñ Anij iben wõn? ak wãwen õt kom naj keiri ñõn E?”—Aiseia 40:18.
Keiri eon kein ilo Baibel: Aiseia 44:13-19; Jerbal 10:25, 26; 17:29; 2 Dri Korint 5:7
MOL EO:
Anij ejjab buñburuen ñe jej kajerbal ekjõp im annañ ko
ILOK JEN KATAK KO REJJAB MOL, EDREP WÕT ÑÕN MOL EO
Ta jemlok eo jemaroñ bõke jen etale ko jar kõmõne ilo tukaru kin katak ko rejjab mol me elõñ kabuñ ko rej katakin wõt kake ñõn ranin? “Bwebwenato [my ʹthos ilo kajin Greek,] wan ko an dri kabel” ro relukkun oktõk jen mol ko relamwan im rekainemõn ilo Baibel.—2 Piter 1:16.
Kin men in, kin juõn lemnok epojõk ñõn bõk katak ko rekãl, kwon jab mijõk in keiri Nan eo an Anij, eo ej unjen mol eo, iben men ko kwar katak kaki. (Jon 17:17) Inem, kwonaj lo an mol kalimur in: “Kom naj jela mol, im mol e naj kõmõnmõn anemkwojami.”—Jon 8:32.
[Kamelele eo itulal]
^ Cyclopedia of Biblical, Theological, and Ecclesiastical Literature, an McClintock im Strong, Volume 4, peij 503 im 504.
[Kamelele in juõn pija ilo peij 9]
Pictorial Archive (Near Eastern History) Est.