Ro rej Riiti buk ko ar rej Kajitõk . . .

Jisõs Ej ke Maikeel, Arkenjel Eo?

▪ Uak eo ñõn kajitõk in ej, aet. Ilo elõñ jikin ko, elõñ armij ro im elõñlok jen juõn etair. Wãwen in ej bareinwõt walok ilo Baibel eo. Ñõn wanjoñok, Jekõb kar bareinwõt naetan Israel. (Jenesis 35:10) Dri jilik Piter ear or lailim ãt ko etan einwõt Simeõn, Saimõn, Piter, Sipas, im Saimõn Piter. (Matu 10:2; 16:16; Jon 1:​42; Jerbal 15:7, 14) Ewi wãwen ar lukkun jela elañe Maikeel ej ãt eo juõn etan Jisõs? Eokwe jen lale kein kamol kein jen Baibel eo.

Eor lailim alen ilo Baibel ej kwalok kin enjel eo ekajur, Maikeel. Ilo buk in Daniel, ãt in ej walok jilu alen. Daniel 10:​13, 20, 21, ej kwalok bwe Maikeel, “juõn ian enjel ro reutiej” ak ‘enjel eo ej lale kom’ ej lomorene bar juõn enjel. Tokelik, ilo Daniel 12:​1, ej kwalok bwe ilo ran ko eliktata, “enaj itok Michael, enjel eo eutiej eo ej wõnake armij ro.”

Ãt in Maikeel ej bareinwõt walok ilo buk in Reveles̃õn 12:7, eo im ej kemelele bwe “Maikeel im enjel ro an”rej tõrinaek Setan im enjel ro an renana im jolõltak ir jen lõñ.

Ilo aolepen eon kein, rej jitõñlok Maikeel einwõt juõn enjel ekajur eo im ej tõrinae ñõn an kejbãrok armij ro an Anij, im ej bareinwõt jumae Setan, dri kijirãt eo elaptata an Jeova.

Ilo Jud eon 9 ej kwalok bwe Maikeel ej “arkenjel eo.” Nan eo ark (arch) ej melelen “elaptata” ak “jeban.” Ñe Baibel eo ej kajerbal nan in “arkenjel,” aolep ien ej konono kin juõn wõt enjel, im jab ruo ak lõñlok. Eon eo tok juõn im ej walok nan in arkenjel ej ilo buk in 1 Dri Tessalonika 4:​16. Ijin, dri jilik Paul ej kemelele kin Jisõs elikin an kar jerkakbiji, ilo an ba: “Bwe E Iroij e naj wõnlõltak jen lõñ, kin lamij, im ainiken arkenjel, im jilil an Anij.” Ilo eon in, ej kemelele bwe Jisõs Kraist ej arkenjel eo, ak eo ej jeban enjel otemjej.

Ekkar ñõn nan in kemelele kein, ta jemlok eo jemaroñ bõke? Jemaroñ ba bwe Jisõs Kraist ej Maikeel, arkenjel eo. Ãt kein jimor, Maikeel (melelen “Wõn Eo Ej Einwõt Anij?”) im Jisõs (melelen “Jeova Ej Dri Lomor”) rej kalikar kin jerbal eo an Jisõs einwõt dri jojomar eo elap ñõn Iroij Potata eo an Anij. Dri Pilippai 2:​9 ej ba: “Anij e ar kanuij koutiej E, im lelok ñõn E Ãt eo e utiej jen ãt otemjej.”

Elukkun aurõk ñõn ar kememej bwe Jisõs ear ber im mour ilõñ mokta jen an kar lotak im mour ijin ion lõl. Mokta jen an kar Jisõs lotak, juõn enjel ear lolok Meri im jiroñe bwe ikijen jitõb kwojarjar enaj bõroro, im enaj kar aikwij in naetan ajiri eo Jisõs. (Luk 1:​31) Ke Jisõs ear kwalok nan, ekkã an kar kennan kin mour eo an mokta jen an kar erom juõn armij.​—Jon 3:​13; 8:​23, 58.

Kin men in, mokta jen an kar Jisõs mour ion lõlin, kar naetan Maikeel, arkenjel eo. Elikin an kar jerkakbiji im jeblak ñõn lõñ, Jisõs ear bar bõk jerbal eo an einwõt Maikeel, ak eo im ej jeban enjel otemjej, ñõn an bõktok “aibujuij an Anij Jemen.”​—Dri Pilippai 2:​11.