Jisõs Kraist Wãwen Ennan eo An Ej Jelet Yuk

“Ña Ij itok bwe ren bõk mour, im bwe ren bõk elõñ.”​—JON 10:10.

UNLEPLEP in an kar Jisõs Kraist itok ñõn lõl ej bwe en lelok im jab bõk. Ikijen jerbal in kwalok nan eo an, ear lelok ñõn armij ro juõn menin lelok eaurõk. Men in ej ennan eo me ej kwalok mol eo kin Anij im ankilan. Ro rej emakõt ñõn ennan in remaroñ lõñliñ kin juõn wãwen mour emõnlok ranin, einwõt ej alikar ilo mour ko an elõñ million dri Kristian ro remol kiõ. * Bõtab, menin letok eo eaurõktata ilo ennan eo Jisõs ear kwalok kake ej ikijen mour wãppen eo ear lelok ilo etad. Mour eo ar indrio ej wawa ion wãwen ar emakõt ñõn mõtõn in eaurõktata ilo ennan eo an.

Men eo Anij im Kraist rar letok Jisõs ear jela bwe enaj kar iion juõn mij ekaiñtanan ilo pein dri kijirãt ro an. (Matu 20:17-​19) Meñe eindrein, ilo nan ko an ilo Jon 3:​16 me elõñ rejela kaki, ear ba: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” Jisõs ear bareinwõt ba bwe ear itok bwe en “lelok An mour bwe En binmour ñõn ro relõñ.” (Matu 20:28) Etke ear ba bwe naj lelok mour eo an ijellokin bõke?

Yokwe eo elap an Anij ear kamakõt e ñõn an lomoren armij ro jen jerawiwi eo rar jolite im jen tokjen ko renana rej walok jene, jab wãppen im mij. Anij ear kõmõne men in ilo an jilkintok Nejin ej mõke wõt ñõn lõl bwe en mij einwõt juõn menin katok. Jisõs ear mõnõnõ in bokake, im ear lelok mour wãppen eo an kin kij. Menin letok in elaptata an Anij ñõn armij ro kar naetan binmour eo. * Ej juõn menin letok me emaroñ tel kij ñõn mour indrio.

Men eo kwoj aikwij kõmõne Kwoj ke bõk binmour eo einwõt juõn menin lewoj ñõn yuk? Men in ej am bebe. Ñõn kwalok juõn wanjoñok kin men in: Lemnok kin an juõn armij kajeoñ in lewoj ñõn yuk juõn menin lewoj. Ilo mol, ejamin am mae ien eo kwoj mõnõnõ in bõke. Eindrein lok wõt, Jeova ej kajeoñ in lewoj binmour eo ñõn yuk, bõtab ejamin am mae ien eo kwoj mõnõnõ in bõke. Ewi wãwen?

Jisõs ear ba bwe ro rej “liki E” ak jerbale tõmak eo air ilo e, renaj bõk mour indrio. Tõmak ej kitibuj wãwen am mour. (Jemes 2:​26) Kin men in, jerbale tõmak ilo Jisõs ej melelen am mour ekkar ñõn men ko ear ba im kõmõni. Ñõn kõmõne men in, kwoj aikwij lukkun jela kajen Jisõs im Jemen. Jisõs ear ba, “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.”​—Jon 17:3.

Ilo enañin 2,000 yiõ ko remotlok, Jisõs Kraist ear kwalok juõn ennan me ear ukot mour ko an elõñ million armij ro ibelakin lõl. Kwo kõnan ke kalaplok am jela kin ennan in im kin ewi wãwen kwe im ro rejitenburu ibõm kom maroñ bõk tokjen men in, jab kiõ wõt, ak ñõn indrio? Dri Kennan ro an Jeova renaj mõnõnõ in jibõñ yuk.

Ilo katak ko tok iman, renaj jibõñ yuk kalaplok am jela kin Jisõs Kraist, eo ear kwalok ennan eo me emaroñ ukote mour eo am ñõn indrio.

[Kamelele ko itulõl]