Kwar Jela Ke?

Eor ke kein kamol ko ijellokin Baibel eo im rej kwalok bwe Jisõs ear mour ijin ion lõl?

▪ Jet dri jeje bwebwenato ro im rar mour ebakelok tõre eo Jisõs ear mour rar jeje kin e. Juõn ian dri jeje rein kar Cornelius Tacitus, eo ear jeje bwebwenato ko kin ailiñ in Rom im iroij ro an. Tacitus ej kwalok bwe jet armij rar naruõn iroij eo elap an Rom etan Nero kin jorran eo ear walok ñõn Rom jen juõn kijeek ilo yiõ eo 64. Tacitus ej ba bwe Nero ear kajeoñ in naruõn kumi eo rar naetair dri Kristian. Tacitus ear jeje ilo bwebwenato eo an: “Kraist, eo me armij rein rar bõk ãt eo etair jene, kar liakelok e ñõn mij iomin pein Pontiõs Pailat ilo ien iroij eo an Tiberius.”​—Annals, XV, 44.

Dri jeje bwebwenato in dri Ju eo etan, Flavius Josephus ear bareinwõt jeje kin Jisõs. Ilo an bwebwenato kin men ko rar walok ikõtan ien mij eo an komja in Rom eo an Judia etan Festus ebakelok yiõ eo 62, im ien eo Albinus ear jino bõk jenkwon, Josephus ej ba bwe Pris eo Elap, Ananias ear “kõmõne juõn kwelok iben dri ekajet ro an Sanedrin im ear bõktok imair juõn eman etan James, leo jãtin Jisõs ãt eo juõn Kraist, im bar jet iben.”​—Jewish Antiquities, XX, 200 (ix, 1).

Etke kar naetan Jisõs, Kraist?

▪ Bwebwenato ko ilo Gospel ko rej kwalok bwe ilo ien eo enjel Gebriel ear weaklok ñõn Meri ear kennanek e bwe enaj bõroro, im ear jiroñ e bwe ej aikwij naetan ladrik eo nejin, Jisõs. (Luk 1:​31) Ãt in ear juõn ian ãt ko ekkã an kar dri Ju ro likit etan armij ro ilo ien ko. Ilo bwebwenato ko an dri Ju eo Josephus, eor 12 armij ro im etair ej Jisõs, im ejjab kitibuj ro ilo Baibel. Ladrik eo nejin Meri kar naetan “dri Nazeret,” men in ej kalikar bwe e ej Jisõs eo ear itok jen Nazeret. (Mark 10:47) Bareinwõt, kar lelok ñõne ãt in “Kraist,” ak Jisõs Kraist. (Matu 16:16) Ta melelen ãt in?

Nan in “Kraist” ej itok jen nan in Grik eo Khri·stosʹ, ilo kajin Hibru ej Ma·shiʹach (Messaia). Nan kein jimor rej melelen “Eo Emwij Kabite.” Nan in “eo emwij kabite” kar kajerbale ñõn ro jet moktalok jen Jisõs. Ñõn wanjoñok, Moses, Aron, im Kiñ Devid kar bareinwõt naetair ro emwij kabit ir, melelen bwe Anij ear jitõñ ir ñõn air tel im bõk erro ko. (Livitikõs 4:3; 8:​12; 2 Samuel 22:51; Dri Hibru 11:24-​26) Jisõs, Messaia eo kar kanan kake, ear armij eo elaptata im ear jutõk ilo etan Jeova. Kin men in, ear ekkar bwe Jisõs en bõk ãt in “Kraist, Nejin Anij emour.”​—Matu 16:16; Daniel 9:​25.

[Pija ilo peij 15]

Pija in Flavius Josephus