Men ko Jisõs Ear Katakin Kaki kin Ailiñ eo an Anij

“Ej ilok ilo jikin kwelok otemjej relap im redrik, im Ej kwalok . . . gospel an ailiñ in Anij.”​—LUK 8:1.

KIJ aolep jej mõnõnõ in konono kin men ko me elap air aurõk iber. Einwõt an kar Jisõs ba, “kin buru eobrõk ej konono i loñin.” (Matu 12:34) Ñe jej etali men ko Jisõs ear konono kaki ilo ien jerbal in kwalok nan eo an, jemaroñ kile bwe Ailiñ in Anij ear men eo me ear lukkun aurõk iben.

Ta in Ailiñ in Anij? Juõn ailiñ ej juõn kien me juõn kiñ ej iroij ie. Inem Ailiñ in Anij ej juõn kien me Anij ear kajutõke. Elap an kar Jisõs konono kin Ailiñ eo an Anij, im kõmõn bwe en unleplep in ennan eo an. Ilo Gospel ko emen ej konono kin Ailiñ in Anij elõñlok jen 110 alen. Jisõs ear katakin kin Ailiñ in Anij im kin ta eo enaj kõmõne jab kin nan ko wõt ak bareinwõt kin men ko ear kõmõni.

Wõn eo ej Kiñ? Kiñ eo an Ailiñ in Anij ej kãlet in Anij im jab armij. Ilo katak eo an Jisõs, ear kwalok bwe Anij ear kãlet e bwe en Kiñ.

Jisõs ear jela bwe kanan ko ilo Baibel rar kwalok bwe Messaia eo kar kalimur kake enaj kar iroij ion juõn Ailiñ me enaj ber ñõn indrio. (2 Samuel 7:​12-​14; Daniel 7:​13, 14, UBS; Matu 26:63, 64) Kememej bwe Jisõs ear kwalok ilo alikar bwe e eo ej Messaia eo kar kanan kake. Ilo wãwen in Jisõs ear kamol bwe Anij ear kãlet e bwe en Kiñ. (Jon 4:​25, 26) Inem ear jime an kar Jisõs kajerbale nan kein “ailiñ eo Aõ.”​—Jon 18:36.

Jisõs ear bareinwõt katakin bwe enaj or ro jet im renaj iroij iben ilo Ailiñ eo. (Luk 22:28-​30) Ear naetan rein “bwij erik” kinke eiet orair. Ear ba kin ir: “Ebuñburuen Jememiuij kin An lewoj ailiñ eo ñõn kom.” (Luk 12:32, UBS) Buk eo eliktata ilo Baibel ej kwalok bwe enaj or joñõn in 144,000 ro im renaj bõk jerammõn eo ñõn air iroij iben Kraist.​—Reveles̃õn 5:​9, 10; 14:1.

Ailiñ eo ej ber ia? Jisõs ear ba ñõn iroij eo an Rom etan Pontiõs Pailat: “Ailiñ eo Aõ e jab jen lõl in.” (Jon 18:36) Alikar Jisõs ejamin kajerbal armij ro ñõn air iroij ilo Ailiñ eo an Anij me ej ber iomin maroñ eo an. Elõñ alen Jisõs ear konono kin Ailiñ eo an Anij einwõt “ailiñ in lõñ.” * (Matu 4:​17; 5:​3, 10, 19, 20) Kin men in, Ailiñ eo an Anij ej juõn kien ilõñ.

Jisõs ear kõtõmene bwe enaj kar jeblak ñõn lõñ elikin an ber ion lõl. Ñõn ro im renaj iroij  iben, Jisõs ear kebellok ial eo ñõn air koba iben ke ear ba bwe enaj ilen ‘kapoje jikiir’ ilõñ.​—Jon 14:​2, 3.

Ta eo Ailiñ eo enaj kõtõbrõke? Jisõs ear katakin dri roñjake ro an ñõn air jar ñõn Anij: “En itok Am ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:​9, 10) Anij ej wõnmanlok wõt ñõn kajejit ankilan ilõñ. Ailiñ in ej wãwen eo naj kajejite karõk eo an Anij kin lõl. Ñõn kõtõbrõke men in, Ailiñ in enaj kõmõn oktõk ko relap ion lõl in.

Ta eo Ailiñ in enaj kõmõne ion lõl? Jisõs ear katakin bwe Ailiñ eo an Anij enaj jolok nana ilo an kokkure ro rej kõmõni mõnit ko renana. (Matu 25:31-​34, 46) Men in enaj melelen jemlokõn nana otemjej. Jisõs ear katakin bwe lõl in enaj obrõk kin armij ro “etã burueir,” rewãnik, retiriamokake, “erreo burueir,” im rej kõmõn ainemõn.​—Matu 5:​5-9.

Rein retiljek renaj ke mour ion juõn lõl etton im elap jorran ie? Jaab! Jisõs ear kalimur bwe iomin Ailiñ eo an Anij, elõñ oktõk ko remõn renaj walok ion lõl. Eman eo me ear pojõk in mij iturin Jisõs ear kajitõk iben bwe en kememej e ñe enaj ber ilo Ailiñ eo an, inem Jisõs ear uak im ba: “Emol Ij ba ñõn yuk ranin, kwonaj ber iba ilo paredais.” (Luk 23:43, NW) Aet, Ailiñ eo an Anij enaj kõmõn bwe aolepen lõl in en erom juõn paredais me enaj einlok wõt jikin kallip in Iden.

Bar ta eo Ailiñ eo enaj kõmõne ñõn armij ro? Jisõs ear jab baj kalimur wõt kin ta eo Ailiñ eo an Anij enaj kõmõne. Ear bareinwõt kwalok kin ta eo enaj kõmõne. Jisõs ear kõmõn elõñ menin bwilõñ ko ilo an kemour ro renañinmij, im ilo wãwen in ear kwalok kin ta eo enaj kõmõne ilo ran ko rej ber iman iomin ien eo enaj iroij. Gospel eo emwij kakõrmole ej ba kin Jisõs: “Ej etetal ilo aolepen Galili im katakin ilo imõn kwelok ko air, im kwalok gospel an ailiñ in lõñ, im kemour nañinmij  otemjej im mõjino otemjej iben armij rõn.”​—Matu 4:​23.

Jisõs ear kemour armij ro jen elõñ kain nañinmij ko. Ear “kebellok mejen eo ej bilo ke e ar lotak.” (Jon 9:​1-7, 32, 33) Jisõs ear kemour juõn eman jen nañinmij in leper ilo an kar uñire. (Mark 1:​40-​42) Ke kar bõktok ñõn e “juõn e jaroñroñ, im e allo,” Jisõs ear kwalok bwe emaroñ kõmõn bwe “ro rej jaroñroñ ren roñlokjen, im ro re jaje konono ren konono.”​—Mark 7:​31-​37.

Bareinwõt, Kiñ in emwij an Anij kabite ear or iben maroñ eo ñõn kemour ro remij. Einwõt emwij kar je ilo Baibel eo, ear or jilu ien ko ke Jisõs ear kejerkakbiji ro rar mij. Ear kejerkakbiji ladrik eo nejin kõra eo ejoko belen, juõn ledrik 12 an yiõ, im Lazerõs, eo jeran ejitenburu iben.​—Luk 7:​11-​15; 8:​41-​55; Jon 11:38-​44.

Ilo an kwalok kin ilju im jeklaj eo eaibujuij me enaj walok ñõn ro rej ber iomin Ailiñ eo an Anij, Jisõs ear kanan ikijen dri jilik Jon: “Lo, imõn Anij ej iben armij rõn, im E naj jokwe ibeir, im re naj driloabjen, im Anij e naj ber ibeir, im naj air Anij: Im E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.” (Reveles̃õn 1:1; 21:​3, 4) Baj lemnok mõk, enaj or juõn lõl me ejelok buromõj, iñtan, im mij ie! Inem jar eo bwe ankilan Anij en jejit kitien ion lõl einwõt kar ilõñ enaj tõbrõk.

Ñãt eo Ailiñ eo an Anij enaj itok? Jisõs ear katakin bwe jinoin iroij eo an enaj walok ilo ejja ien eo wõt me ej naetan ‘itok ak ber eo an.’ Jisõs ear letok juõn kanan me ej kwalok ilo tibrik kin ñãt eo enaj jino iroij. Kakõlõn ien in enaj alikar ikijen abañ ko rej jelet ibelakin lõl, ekoba tõrinae ko, ñitta ko, makõtkit lõl, nañinmij ko relap, im an laplok nana. (Matu 24:​3, 7-​12; Luk 21:10, 11) Aolep kakõle kein im kakõle ko jet Jisõs ear kanan kaki rar jino alikar ilo 1914, yiõ eo ke Bata eo an Lõl ken kajuõn ear walok. Kin men in, Jisõs ej iroij kiõ einwõt juõn Kiñ. Mõtõn jidrik ien eo enaj walok ñe Ailiñ eo enaj itok im kajejit kitien ankilan Anij ion lõl. *

Ta melelen itok eo an Ailiñ in Anij ñõn kwe? Men in ej wawa ion wãwen am emakõt ñõn ennan eo an Jisõs.

[Kamelele ko itulõl]