Ekkar ñõn Baibel Eo

Anij Ej Ke Lukkun Kea Kin Ajiri Ro?

KAJJOJO yiõ elõñ buki million ajiri ro rej kejorran ir, kokkure ir, im lej ñõn ir. Elõñ rej jerbal einwõt dri kamakoko ro ilo jikin ko rekauwatata, im wãwen ko rekauwatata. Jet iair rej kwote ir im jibed ir bwe ren erom dri tõrinae ro ak ajiri ro rej wiakake enbwinir ñõn mour etton. Kõpa im mõnit ko jet rekanuij nana rar kõmõni ñõn ajiri ro ear kõmõn bwe en joko an ajiri ro liki jabrewõt.

Alikar, armij ro emol air itoklimo im kea rej inebata kin wãwen ber eo ekaburomõjmõj an ajiri ro. Meñe rej kile bwe elap ruõn armij ro rekibbon im renana kin air kokkure ajiri ro, jet rej inebata im kajitõk, etke juõn Anij in yokwe emaroñ kõtlok bwe men kein renana ren walok? Remaroñ lemnok bwe emwij an Anij kejole ajiri rein im bwe bwelen ejjab lukkun kea kake ir. Emol ke men in? Wãwen in ekaburomõjmõj kin air kejorran im kokkure ajiri ro ej ke melelen bwe Anij ejjab kea kin ir? Ta eo Baibel ej ba?

Anij Ej Drike Ro Renana

Jeova Anij ear jab karõk bwe armij ro renana ren kokkure ajiri ro. Kokkure ajiri ro ej juõn ian tokjen ko rekaburomõjmõj rar waloktok jen an kar armij ro jumae ilo jikin kallip in Iden. Kin air kar jumae iroij potata eo an Anij, ear tellok ñõn an armij ro kokkure dron.​—Jenesis 3:​11-​13, 16; Ekklisiastis 8:9.

 Anij ej drike ro rej kokkure ro remõjno im ejelok air maroñ ñõn jojomare ir mõke. Elõñ ailiñ ko ilo ien ko etto im rar jab jerbal ñõn Jeova rar katok kin ajiri ro, bõtab Jeova ear ba bwe ear ‘jab jiroñ ir bwe ren kõmmõne men in, im ear ejjelok an lemnak kake ñõn jidrik.’ (Jeremaia 7:​31, UBS) Anij ear kakkil armij ro an ilo ien ko etto: “Elañe kwoj kejorran [ro ratajinemjen] ilo jabrewõt wãwen, meñe jirik wõt air kir ñõn Iõ, emol I naj eoroñ air kir; im Aõ illu e naj bwil.”​—Exodus 22:​22-​24.

Jeova Ej Yokwe Ajiri Ro

An Anij itoklimo kin ajiri ro ej alikar ilo nan in jiroñ ko remeletlet ear lilok ñõn ro jemeir im jineir. Ajiri ro rar drik im ridtolok ilo juõn baamle eo ejokõne, ekkã air erom ro rekabel im rejela kamarmir abañ ko air ñe reridto. Kin men in, Dri Kõmõnmõn eo ar ear karõk mour in mare bwe en juõn karõk me “leo e naj likit jemen im jinen, im edrep na iben lio belen: im irro naj juõn wõt kõniek.” (Jenesis 2:​24) Ilo Baibel eo, kar kamelim mour in belele ñõn ro wõt emwij air mare kinke elañe eor ajiri remaroñ kejbãrok ir ilo juõn baamle ejokõne.​—Dri Hibru 13:⁠4.

Jeje ko ilo Baibel eo rej bareinwõt kalikar aurõkin an ro jemen im jinen katakin ro nejiir. Baibel eo ej ba: “Ajiri rõn men in jolit jen Jeova, im leen lojien kõra men in letok jen E. Einwõt mõri ko ilo pein armij ekajur, ein drein ajiri ro nejin eo emõn drer.” (Sam 127:​3, 4) Ajiri ro rej menin letok ko raurõk jen Anij, im ekõnan bwe ren lo jerammõn ilo mour ko air. Anij ej rejañ ro jemen im jinen bwe ren tel ajiri ro nejiir ilo ial eo emõn, einwõt an juõn dri libon lukkun alej ñe ej libon. Nan in Anij ej ba: “Ro jemeir, komin jab biuktõke ro nejimi ñõn illu: a komin kakajiririik ir ilo kaje im kowe an Iroij.”​—Dri Epesõs 6:⁠4.

Bar juõn wãwen Jeova ear kwalok an yokwe ajiri ro ej ikijen an katakin ro jemen im jinen ñõn kejbãrok ajiri ro nejiir jen dri nana ro rej kokkure ajiri ro. Ilo kar Israel, kar kakien ‘ajiri ro’ bareinwõt bwe ren roñjake Kien eo, eo ear bar kitibuj mõnit ko rekkar im rejakkar kin belele. (Duteronomi 31:12; Livitikõs 18:​6-​24) Anij ekõnan bwe ro jemen im jinen ren kate ir ñõn kejbãrok ro nejiir jen jabrewõt eo emaroñ kokkure ir.

Juõn Kejatrikrik ñõn Ajiri Ro

Jisõs, eo ear wãppen ilo an kwalok karkar ko karkarin Jemen, ear lukkun kalikar yokwe eo an Jeova ñõn ajiri ro. (Jon 5:​19) Ke dri jilik ro an rar lemnok bwe rej kajeoñ jibõñ Jisõs ilo air bõprae an ridto ro bõktok ajiri ro nejiir ñõn e, Jisõs ear illu im ear koweik ir. Ear ba: “Komin likit ajiri rõn bwe ren itok ñõn iba; . . . Im Ej jiburlep ir, im likit pein ioir, im jar kin ir.” (Mark 10:​13-​16) Ajiri ro relukkun aurõk iman mejen Jeova Anij im Nejin.

Ilo mol, ejjabto jen kiõ, Anij enaj kanemkwoj aolep ajiri ro rej kokkure ir ikijen Kiñ eo emwij kabiti, Jisõs Kraist. Armij ro rekibbon im nana ilo lõl in renaj joko ñõn indrio. (Sam 37:​10, 11) Ikijen ro etã burueir im rej kabukot Jeova, Baibel eo ej ba: “E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Reveles̃õn 21:​3, 4.

Ilo kõtan in, Anij ej kwalok yokwe eo an kiõ ikijen an letok katak ko ilo Baibel im kainemõn aolep ro me rej kejorran ir im kokkure ir. Ej kalimur: “Inaj bukõt sheep ko rar jako, im kejeblaktok ko rar jebwãbwe, im kwor ko rekkinejnej, im kejmour ko rar nañinmij, ak inaj kokkure ko rematõk im kajur.” (Ezekiel 34:16, UBS) Jeova ej kainemõn ajiri ro enana air kõmõn ñõn ir im rej kejerataik ir, ikijen Nan eo an, kajur eo an, im congregation eo an Kristian. Ej juõn menin kalõñliñ ñõn jela bwe kiõ ‘Jemen tiriamokake, im Anij in ainemõn otemjej, ej kainemõne kij ilo ar jorran otemjej,’ einwõt an naj kõmõne ilo ran ko rej ber iman.​—2 Dri Korint 1:​3, 4.

[Etan eo Ear Kõmõn Pija]

© Mikkel Ostergaard /Panos Pijas