Aolep Ro Remõn Rej Ke Wõnliñlok ñõn Lõñ?

ELIKIN kejota eo eliktata an Jisõs iben dri jilik ro an, ilo boñin eo mokta jen an kar mij, Jisõs ear kalimur bwe enaj lelok ñõn ir jinekjij eo ñõn mour ilõñ. Ear ba: “Ilo imõn Jema elõñ jikin: elañe jab ein drein, I naj kar kennanek kom mokta; bwe Ij ilen kapojõk jikõmi.” (Jon 14:2) Etke Jisõs ear kepoj jikiir ilõñ? Ta eo rein renaj kõmõne ijo?

Jisõs ear lemnok in lelok ñõn dri jilik ro an juõn jerbal ejejuan. Ilo ejja boñin eo wõt, ear ba: “Komeo, ro r’ar ber iba ilo men ko r’ar kabo Iõ kaki. Im Ij likit ñõn kom juõn ailiñ einwõt Jema e ar likit ñõn Iõ.” (Luk 22:28, 29) Anij ear kalimuri Jisõs bwe enaj erom Kiñ eo me enaj lelok ñõn armij ro juõn ian men ko elaptata air aikwiji, eñin juõn kien emõn. Jisõs enaj lomoren armij ro jen iñtan im enaj kokkure ro rej mone ir. Meñe ro Jisõs enaj iroij ioir rej jen “jemlokõn ko jemlokõn lõl,” ak tron eo an enaj ber ilõñ.​—Sam 72:​4, 8; Daniel 7:​13, 14, UBS.

Bõtab, Jisõs ejamin iroij mõke ian. Kin men in, ear kalimuri dri jilik ro an bwe enaj kõmõn jikiir ilõñ. Rein kar ro moktata kar kãlet ir ñõn iroij einwõt “kiñ ion lõl.”​—Reveles̃õn 5:​10.

Jete oran armij ro renaj wõnliñlok ñõn lõñ? Einwõt ilo kien ko an lõl, oran ro im renaj iroij ilo Ailiñ eo an Anij ilõñ reiet ñe keiri iben armij ro im renaj mour iomin maroñ eo an. Ñõn ro renaj iroij iben, Jisõs ear ba: “Bwij erik, komin jab mijõk; bwe ebuñburuen Jememiuij kin An lewoj ailiñ eo ñõn kom.” (Luk 12:32) ‘Bwij in erik’ enaj tõbar joñõn in 144,000. (Reveles̃õn 14:1) Oran in eiet ñe keiri iben elõñ million armij ro im renaj lõñliñ kin mour indrio ion lõl einwõt dri korijer ro retiljek an Ailiñ eo.​—Reveles̃õn 21:4.

Kin men in, ejjab aolep ro remõn renaj wõnliñlok ñõn lõñ. Ikijen Kiñ eo emõn etan Devid, dri jilik Piter ear kalikar im ba: “Devid e ar jab wõnliñlok ñõn lõñ ko.” (Jerbal 2:​34) Jon dri Baptais eo ear juõn armij emõn, bõtab Jisõs ear kalikar bwe ejamin iroij einwõt juõn kiñ ilõñ. Jisõs ear ba, “Ejelok juõn e ar walok ian ro rej lotak jen kõra, elap jen Jon dri baptais: a eo ej erik wõt i ailiñ in lõñ ej elap jen e.”​—Matu 11:11.

Kwonaj Ke Bõk Jerammõn eo Naj Lelok ñõn Ro Remõn?

Ñõn bõk jerammõn eo ñõn mour indrio ion lõl, ta eo juõn armij ej aikwij kõmõne? Jisõs ear ba: “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:​16) Kwomaroñ kile bwe yokwe eo an Anij ñõn lõl ear kamakõt e ñõn kõmõn bwe aolep ren maroñ bõk mour indrio, bõtab ro wõt im rej “liki E” renaj bõk jerammõn in.

Tõmak ak liki eo am ej aikwij berber ion jelalokjen eo ejime. (Jon 17:3) Kwomaroñ kwalok bwe kwoj juõn armij emõn ilo am kalaplok am katak kin karõk eo an Jeova ñõn armij ro. Kwon kõtlok bwe tõmak eo am en kamakõt yuk ñõn jerbali men ko kwoj katak kaki. Im kwon liki bwe jerammõn eo ñõn bõk mour indrio ej bellok wõt ñõn yuk.

 [Box ilo peij 23]

Ta eo Baibel eo Ej Ba?

Kajitõk:

Ta eo ej walok ñõn ro remõn ñe remij?

Uak eo:

“A ro re mij ejelok air jela.”​—EKKLISIASTIS 9:5.

Kajitõk:

Ta kejatrikrik eo ej bellok ñõn ro remõn

ilo ran ko renaj itok?

Uak eo:

“Auõ ej itok, ilo eo ro otemjej rej ber

ilo lũp ko, re naj roñ ainiken [Jisõs],

im naj drioijtok.”​—JON 5:​28, 29.

Kajitõk:

Ia eo enañin aolep armij ro remõn renaj jokwe ie?

Uak eo:

“Ro remõn re naj jolit ene eo, im

jokwe iloan ñõn in drio.”​—SAM 37:29.