Druaklok ñõn Anij

Eo Ej Kajejit Kitien Kalimur Ko

JOSHUA 23:14

EBIN ke ñõn am liki ro jet? Ekaburomõjmõj bwe jej jokwe ilo juõn lõl me ebin ar liki armij ro ie. Elañe juõn eo kwoj ebake ej kõmetak yuk kinke ej riõp ak ear rupe kalimur ko an, ejelok berre bwe liki eo am ñõn armij in enaj joko. Mekarta, eor juõn eo im kwomaroñ liki im ejamin kaburomõj yuk. Buk in Jabõn Kennan 3:5 ej rejañ kij: “Kwon liki Jeova kin aolepen buruõm.” Etke ekkar bwe jen liki Jeova? Ñõn uake kajitõk in, jen etale nan ko an Joshua, juõn eo im ear lukkun liki Jeova, ilo buk in Joshua 23:4.

Lemnok mõk kin wãwen in ear walok. Joshua, eo im ear binej jenkwon Moses ñõn tel ailiñ in Israel, mõtõn jidrik ej 110 yiõ ridtõn. Ilo yiõ kein raetok in an mour, Joshua ear lo jerbal ko an Jeova ñõn armij in Israel, ekoba ien eo ekabwilõñlõñ im Jeova ear lomoren armij ro an ilo Lomalo Ekilmir, 60 yiõ ko moktalok. Kiõ, ilo an reiliklok im kalomõnlokjen kin mour eo an, ej kokweloktok “ridto ro air, im jiõb ro, im dri ekajet ro air, im ro dri kabwijrõk” an Israel. (Joshua 23:2) Nan in rejañ kein an rejjab kwalok wõt kin an meletlet kinke eridto, ak ej bareinwõt kwalok bwe ear bõk ien ñõn an kalomõnlokjen im buruen eobrõk kin tõmak.

Joshua ej ba: “Ranin ña ij ilok ilo ial an ro dri lõl otemjej.” Nan in “ial an ro dri lõl otemjej” ej juõn nan rej kajerbale ñõn kõkkar kin mij. Melelen men in bwe Joshua ej ba, “mõtõn jidrik inaj mij.” Ilo an jela bwe mõtõn wõt jidrik im enaj mij, ejelok berre bwe Joshua ear jolok elap ien ñõn an kalomõnlokjen kin mour eo an. Ta nan in rejañ ko an eliktata ñõn dri kabuñ rein mõtõn?

Joshua ej wõnmanlok im ba: “E ar jab likjõp juõn men ian men ko remõn Jeova ami Anij e ar ba kin kom; men otemjej re jejit ñõn kom, ejelok juõn iair e ir.” Erkein ej jet ian nan ko an juõn eman eo im ear lukkun liki Anij. Etke ear kennan ilo wãwen in? Ilo an reiliklok ñõn aolep men ko ear loe, Joshua ejela bwe aolep ien Jeova ej kajejit kitien kalimur ko an. * Elukkun alikar ta unin an Joshua kennan ilo wãwen in: Joshua ear kõnan bwe aolep dri Israel ro ren lukkun tõmak im liki bwe aolep kalimur ko an Jeova ñõn ir kin ilju im jeklaj eo air renaj jejit kitieir.

Juõn buk in kemelele kin Baibel ej ba nan kein kin Joshua 23:14: “Bõkmantak aolep kalimur ko jen Baibel, inem lukkun etale aolepen bwebwenato ko an armij bwe kwon lale elañe Anij ear rupe ak meloklok in kajejit kitien kalimur kein an.” Elañe jenaj kar kõmõne juõn etale ilo wãwen in, jenaj jela im kile einwõt kar Joshua bwe, aolep kalimur ko an Jeova, ien otemjej rej jejit im mol.​—1 Kiñ 8:​56; Aiseia 55:10, 11.

Baibel eo ej kwalok kin kalimur ko an Anij im emwij air jejit kitieir, im jet ian kalimur kein rej jejit kitieir ilo ran kein ar. Bareinwõt jej lo ilo Baibel eo, kalimur ko raibujuij an Anij kin ilju im jeklaj eo ar. * Etke kwojjab mõke etale kalimur kein ibem mõke? Am etale im katak Baibel eo, men in enaj jibõñ yuk bwe kwon liki Eo ej Kajejit Kitien Kalimur ko.

[Kamelele ko Itulal]