Ro Rej Riiti Buk ko Ar Rej Kajitõk . . .

Kwoj Aikwij Ke Tõmak ilo Trinity bwe Ren Watõk Yuk Juõn Kristian?

▪ Juõn buk im ear drioijtok ilo 2007 im rej kajerbale ilo high-school etan, Kabuñ ko Relap ilo Denmark (World Religions in Denmark), ear kemelele bwe Dri Kennan ro an Jeova rej juõn kumi edrik in Kristian im rej lukkun lor Baibel eo. Ilo mol, Dri Kennan ro an Jeova rej kumi in kabuñ eo kain kajilu elaptata ilo Denmark.

Bõtab, juõn dri tel in kabuñ an Danish National Church ear lukkun kananaiki dri jeje eo kinke ear kobaiki Dri Kennan ro an Jeova ilo buk in. Etke? Eokwe dri tel in kabuñ in ear ba, “Ijañin iione juõn dri meletlet kin kabuñ me ej watõk [Dri Kennan ro an Jeova] bwe rej dri Kristian. . . . Rej kariõp Trinity, eo im ej unjen tõmak eo an ro rej kabuñ in Kristian.”

Eo ear je buk in ej juõn eo ej ekkatak kin kabuñ etan, Annika Hvithamar, ej kwalok bwe elañe rej kajitõk iben armij etke rej watõk ir bwe rej dri Kristian, ekkã air jab uak im ba ej kinke rej tõmak bwe Anij ej juõn Trinity [ak jilu anij ilo juõn]. Bareinwõt, ilo juõn ian mõtõn ko ilo buk in im title in “Kwoj ke Juõn Kristian?” ej kwalok nan kein: “Katak eo kin Trinity ej juõn ian katak ko an kabuñ in Kristian me elukkun bin ñõn kemeleleiki.” Buk in ej wõnmanlok wõt im ba: “Ñõn ro rejañin ber ilo jikuul in Baibel, ien otemjej elukkun bin ñõn kemeleleik ñõn ir etke Anij eo an dri Kristian ej juõn wõt anij im jab jilu anij.”

An Baibel eo katakin kin Anij im Jisõs elukkun alikar im biruru ñõn melele kake. Nan eo “Trinity” im katak eo kin men in rejjab walok ilo Nan eo an Anij. Baibel eo ej lukkun kalikar bwe Jisõs Kraist ej manjien nejin Anij. (Dri Kolosse 1:​15) Ej bareinwõt kalikar bwe Jisõs ej “dri Kilajrõk ikõtan Anij im armij rõn.” (1 Timote 2:⁠5) Bõtab, ikijen Jemen, Baibel eo ej ba: “Bwe Kwe wõt, im etõm Jeova, Kwo eo eutiejtata ion aolepen lõlin.”​—Sam 83:⁠18.

Dri Kennan ro an Jeova rej kile bwe tõmak ilo Jisõs ekanuij aurõk. (Jon 3:​16) Kin men in, rej lukkun tõmak im bokake nan in jiroñ ko an Jisõs: “Bwe ar je, Kwon kabuñ ñõn [Jeova] am Anij, im kwon jerbal ñõn E wõt.” (Matu 4:​10) Aet, jemaroñ naetan juõn eo ej kate ñõn an bokake nan in jiroñ kein an Jisõs, bwe ej juõn dri Kristian.

[Kareelel eo ilo peij 18]

“Katak eo kin Trinity ej juõn ian katak ko an kabuñ ko rej watõk ir dri Kristian im elukkun bin kemeleleiki”