Ro Remij Remaroñ Ke Jibõñ Ro Remour?

TAMBA, juõn ladrik jodrikdrik ear pojõk in bõk juõn test ilo jikin jikuul eo an ilo Africa. * Jinen ear akwelap bwe ej aikwiji jibõñ eo an ro nukin remij ñõn an maroñ lo tõbrõk ilo test eo. Ilo juõn bukwon etan Palermo, ilo ailiñ in Sicily, elõñ armij ro rej ilok im aluije jikin ko rej ber iomin brij me rej likit im kejbãrok enbwinin elõñ buki armij ro rar mij. Jet rej tõmak bwe enbwinin rein rar mij remaroñ kejbãrok armij ro remour. Kajjojo yiõ, armij ro rej lolok juõn bukwon ej ber ilo New York etan Lily Dale, ilo Amerika. Jikin in ekanuij in buñbuñ kin an lõñ dri marmir ro rej jokwe ie. Elõñ ro rej lolok jikin kein kinke rej kejatrikrik bwe remaroñ in bar iion ro nukiir im mõtair rar mij im kajitõk jibõñ jen ir.

Ibelakin lõl in, ej wõnmanlok wõt tõmak eo bwe ro remij remaroñ jibõñ ro remour. Ak ewi wãwen am lemnok kin men in? Bwelen kar katakin yuk kin tõmak in ak bwelen kwoj ebake juõn eo me ej lukkun kaurõk tõmak in. Ej biktokin armij ñõn air kõnan bar lo ro rej yokwe ir im rar mij. Dri marmir ro rej ba bwe remaroñ in kõmõne men in. Ilo Time magazine kar likit nan ko an juõn dri marmir ilo an kar ba kin jikin eo an jitõb ro bwe “aolep ien ej bellok elañe jej kajitõk kin jibõñ.” Emol ke men in? Ro remij remaroñ ke lukkun jibõñ armij ro remour? Kwomaroñ bwilõñ kin wãwen an Baibel eo uak.

Ro Remij Rej Ke Mour ilo Bar Juõn Jikin?

Baibel eo ej kemelele ilo juõn wãwen ekanuij biruru melele kake kin ta eo ej walok ñõn ro remij. Lale ta eo Ekklisiastis 9:5 ej ba: “Ro re mour re jela bwe re naj mij: a ro re mij ejelok air jela.” Eor ke an ro remij iñjake? Eon 6 ej uak ilo an ba: “Air yokwe, im bareinwõt air kijirãt im junmar, re joko eto; im ejelok air kij ñõn in drio ilo jabrewõt men emwij kõmõne iomin al.” Bareinwõt lale eon 10 ilo ejja japter in wõt ijo ej kwalok bwe “ejelok jerbal, ak men in kine, ak jela, ak meletlet, ilo Hedis, ijo kwoj ilok ñõn e.” Nan in Grik eo “Hedis” me rej kajerbale ijin ej melelen “lũp eo lũpõn armij otemjej.” Ekaitoktoklimo bwe nan in Hibru eo Sheol im nan in Grik eo “Hedis” eor juõn wõt meleleir. Baibel eo ej kalikar bwe Jisõs Kraist ear ilok ñõn “Hedis” elikin an mij.​​—Jerbal 2:​31.

Jisõs ear jibõñ elõñ armij ro ke ear mour, bõtab ear jela bwe enaj kar aikwij in mij. Ear kõtõmene ke bwe enaj kar maroñ jibõñ armij ro ilo ien eo enaj mij? Alikar jab. Jisõs ear keiri ien mij eo an ñõn juõn ien eboñ im marok, ilo ien eo ñe ejelok jabrewõt jerbal jemaroñ kõmõne. (Jon 9:⁠4) Jisõs ear jela bwe elañe armij rej mij, “re joko.”​​—Aiseia 26:⁠14.

Jisõs ear keiri mij ilo juõn wãwen einlok wõt in. Ke leo jeran etan Lazarus ear mij, Jisõs ear kõkkar kake mij einwõt ñe juõn ej kiki. (Jon 11:​11-​13) Jejjab kõtõmene bwe juõn eo ej kiki enaj jibõñ kij. Juõn eo ej kiki eñaklokjen im ejjab maroñ jibõñ jabrewõt.

An Armij Ej Ke Mour Manlok Elikin Mij?

Elõñ armij rar katakin ir ñõn tõmak bwe an armij ej mour manlok wõt elikin mij. Bõtab, eoktõk wãwen an Baibel eo katakin. Ilo Sam 89:48 ej ba: “Armij õt e naj mour im jamin lo  mij, im kõtlok an jen kajur in Hedis?” Ekkar ñõn eon in, armij ak an otemjej renaj mij. Elukkun alikar bwe elañe juõn armij ej mij, an eo ej bareinwõt mij.

Mekarta, elõñ rej kajitõk, ‘Ta kin bwebwenato ko an armij me rej ba bwe rej roñ ainiken im lo ro remij?’ Kain bwebwenato rõt kein kin ro remij ekkã air walok ibelakin lõlin. Bwebwenato kein rej kamakõt ro im rej buromõj kin ro nukiir rejoko ilo mij ñõn air ilok iben dri marmir ro me rej ba bwe remaroñ konono iben ro dri mij.

Emol ke bwebwenato kein? Elañe aet, inem rej ke errã iben ta eo Baibel ej katakin? Jisõs Kraist ear ba bwe Nan in Anij ej mol eo. (Jon 17:​17) Mol eo ejjab idaptõk wãwen an katakin. Ilo mol, eor nan in kaiñi ko ralikar ilo Baibel eo kin ewi wãwen jej aikwij watõk bwebwenato ko an ro rej ba bwe ro remij remaroñ jibõñ ro remour. Ilo Baibel eo ej jiroñ kij kin juõn armij eo ear kajeoñ in bõk jibõñ jen ro remij. Elañe jej lukkun etale bwebwenato in, jenaj lukkun lo mol eo.

Juõn Kiñ Ear Kajitõk Jibõñ jen Ro Remij

Ien in kar juõn ien tõrinae ilo ailiñ in Israel. Jarin tõrinae eo ekajur an dri Pilistia ro ear itok bwe ren jumae Saul im jarin tõrinae eo an. Ke Saul ear lo dri Pilistia rein, ear jino an “mijõk, im elap an buruen kubarbar” ak lelñoñ. Ilo tõre in , emwij an Kiñ Saul ellok jen kabuñ eo emol. Tokjen men in, Jeova ear jab uake Saul ke ear eowor kin jibõñ. Kiõ Saul enaj bõk jibõñ jen ia? Emwij an mij dri kanan Samuel.​​—1 Samuel 28:​3, 5, 6.

Saul ear kajitõk jibõñ iben juõn dri marmir jen Endor. Ear akwelap ñõn dri marmir in bwe en “ãñiñintok Samuel” jen mij. Kõra in ear kirtok juõn jitõb. Jitõb in me kar watõke bwe ej “Samuel,” ear jiroñ Saul bwe dri Pilistia ro renaj anjo ion, im Saul kab lõmaro nejin renaj mij ilo tõrinae. (1 Samuel 28:​7-​19) Emol ke bwe lukkun Samuel in ear jeblaktok einwõt juõn jitõb elikin an mij?

Baj lemnok mõk kin men in. Baibel eo ej ba bwe armij ej “jeblak ñõn bũdrej” elikin an mij, im “lemnok ko an rejokolok.” (Sam 146:​4, UBS) Samuel im Saul rar jimor jela bwe Jeova ear kamoiki jerbal in marmir. Kinke ilo jinoin, Saul ear tel armij ro ilo an kadrioijlok dri marmir im dri bubu ro jen Israel!​​—Livitikõs 19:⁠31.

Jen kalomõnlokjen kake men in. Elañe Samuel ear mour wõt einwõt juõn jitõb, enaj ke kar rupe kien Anij ilo an waloklok ñõn juõn dri marmir bwe en maroñ kennan iben Saul? Jeova ear bwijrõk jen an konono iben Saul. Juõn dri marmir emaroñ ke iun Anij Laplap ñõn an uak Saul ikijen an kajerbal Samuel eo emij? Jab. Ealikar bwe jitõb eo ear walok ear jab Samuel, dri korijer eo etiljek an Jeova. Jitõb in ear juõn dimon eo im ear walok ilo nememen wõt Samuel.

Dimon rein rej enjel ro renana im rar jumae Iroij Potata eo an Anij ilo jinoin bwebwenato in mour an armij. (Jenesis 6:​1-4; Jud 6) Im dimon rein rej lale im jela kin wãwen an kajjojo armij ro kennan, makõtkit, biktokiir ilo ien eo rej mour, inem elikin an armij rein mij rej maroñ  anõk wãweir. Rej lukkun kijejeto ilo air kwalok bwe Baibel eo ejjab mol. Eñin unin Baibel eo kakkil kij jen ar kajitõk jibõñ iben jitõb rein renana! (Duteronomi 18:​10-​12) Jitõb rein renana rej jerbal im boub wõt ranin.

Eñin unin jej roñ an elõñ ba kiõ bwe rar “roñ” ak “lo” ro nukiir me rar mij. Meñe jitõb rein me armij ro rej loe remaroñ in joij, bõtab kõtõbar eo an jitõb rein ej ñõn mone armij ro. * (Dri Epesõs 6:​12) Bareinwõt, lemnok kin men in: Jejela bwe Jeova ej juõn Anij eyokwe im ej kea kake kij. Elañe ro remij rej bar mour ilo juõn jikin elikin air mij im rej maroñ in jibõñ ro mõtair im baamle ko air, inem Anij emaroñ ke kar kamoiki air konono iben rein im ba bwe ej ‘jõjõiki’ jerbal kein? Alikar jab! (1 Piter 5:⁠7) Inem, eor ke juõn jikin jemaroñ bõk jibõñ eo emol jene?

Jibõñ eo Emol ñõn Ro Remour im Ro Rar Mij

Kemelele ko ej kab mwij ar etali rar jibõñ kij ñõn ar kile bwe ro remij ejelok air maroñ ñõn jibõñ ro remour. Im an armij ro jolok ien im maroñ ko air ñõn bukot jibõñ jen ro remij ejelok tokjen im elukkun kauwatata, kinke men in ej nae kien ko an Anij im emaroñ kõmõn bwe jen ber iomin kajur eo enana an dimon ro.

Baibel eo ej kwalok ñõn kij bwe Jeova wõt emaroñ jibõñ kij. Emaroñ lomoren kij jen mij. (Sam 33:​19, 20) Ranin, Jeova ej pojõk ñõn an jibõñ kij. Ej letok ñõn kij juõn kejatrikrik emol, im jab einwõt dri marmir ro rejjab mol.

Tamba, eo kar konono kake ilo peij ko iman, ear katak im kile oktõk eo ikõtan nan ko rejjab mol an dri marmir ro im mol eo Jeova ej letok ñõn kij. Dri marmir ro rar jiroñe bwe elañe ejjab katok ñõn ro nukin remij, eban lo tõbrõk ilo test eo an. Tamba ear jino katak iben Dri Kennan ro an Jeova moktalok wõt jen ien eo ear bõk test eo. Inem ear jela kin ta eo ej lukkun walok ñõn ro remij im bareinwõt kin jitõb ro renana me rej kajeoñ in einwõt ro rar mij etto. Meñe Tamba ear iion elap ijjibed jen jinen ñõn an kajitõk jibõñ jen dri marmir ro, ak ear jutõk bin wõt ilo an kar ba, “Elañe ijjab lo tõbrõk ilo test eo, inaj kate iõ ilo yiõ in lõl.”

Ta eo ear walok? Ear utiejtata ilo test eo! Men in ear lukkun kabwilõñ jinen, im kõmõn bwe en jab bar tõmak ak konono kin dri marmir ro. Tamba ear katak bwe Jeova ej kakkil kij bwe jen jab “katoke ro remij ilo etan ro remour!” (Aiseia 8:​19, UBS) An Tamba katak Baibel eo, men in ear kalaplok liki eo an bwe elañe ej mõnõnõ in lor kien Anij, enaj lo tõbrõk ilo mour eo an.​​—Sam 1:​1-3.

Bõtab, ta kin ro im rejitenburu iber im rar joko ilo mij? Eor ke juõn kejatrikrik ñõn ir? Emwij an Jeova ear kalimur bwe enaj jibõñ ro rej mij im rej ber ilo lũp ko. Elikin an kemelele bwe mij ejelok an kajur, lale ta eo dri kanan Aiseia ej kwalok kake ilo japter 26, eon 19: “Ro Am remij re naj mour. . . . Komin ruj im al, komeo komij jokwe ilo bõñõlñõl.” Kanan in ej kalikar bwe ro remij renaj bar mour.

Pijaik mõk ilo lemnok eo am, an billion ro im rej kiki ilo lũp bar jeblaktok im mour! Ilo mol, Baibel ej kwalok bwe Jeova ej “kõnan” lelok mour ñõn ro rar mij. (Job 14:​14, 15) Enaj ke jejit kitien kalimur kein? Jisõs Kraist ear lukkun tõmak ilo kejatrikrik in, im ear kwalok bwe ro remij, iman mejen Jeova rej einwõt ñe remour.​​—Luk 20:​37, 38.

Kwokõnan ke bõk kejatrikrik in? * Eokwe wõnmanlok wõt ilo am bõk jelalokjen eo ejime jen Baibel. Ilo am katak, men in enaj kalaplok tõmak im liki eo am bwe Jeova emaroñ jibõñ ro remour im ro rar mij im bareinwõt bwe kalimur ko an “retiljek im remol.”​​—Reveles̃õn 21:​4, 5.

[Kamelele ko Itulal]

[Kareelel ilo peij 19]

Ej biktokin armij ñõn air kõnan bar lo ro rej yokwe ir im rar mij

[Pija ilo peij 20]

Samuel ear ke bar jeblaktok jen mij im konono iben Kiñ Saul?