Ta Lemnok eo an Anij kin Arkool?

DRI Kõmõnmõn eo ar ejela kin ta eo emõn ñõn kij, im ejjab kamo ar irak ñe ekkar wãwen ar kajerbale. * Ear jab kamoik an armij ro irak ak ear “kõmmõn wine kein kamõnõnõik burueir, im oil in olive kein kejjatõltõl turin mejeir, kab bread bwe en kakajur ir.” (Sam 104:15, UBS) Juõn ien, Jisõs Kraist ear kõmõn bwe juõn ien kõmare en lemõnõnõ ikijen an kar ukot dren ñõn “wain eo emõn.”​—Jon 2:​3-​10.

Ejime ñõn ar ba bwe Dri Kõmõnmõn eo elukkun melele im ejela kin wãwen an arkool jelet wãwen an enbwin im kamelij eo jerbal. Ikijen Baibel eo, Jemer ilõñ ej katakin kij ñõn ar bõk tokjen, im ej lukkun kakkil kij nae kajerbal dren ko rekajur ilo jakkar. (Aiseia 48:17) Jen etale nan in kakkil kein ralikar im mol nae wãwen in.

“Komin jab karek kin wain, ijo eor dõr.” (Dri Epesõs 5:​18) ‘Dri karek . . . ejamin bõk an jolit ailiñ in Anij.’ (1 Dri Korint 6:​9-​11) Nan in Anij ej kananaik “karek, airwaro ko, im men ko eirwõt.”​—Dri Galetia 5:​19-​21.

Jen kiõ etale jet ian kauwatata ko remaroñ walok ñõn juõn elañe ej le jen joñõn an irak.

Kauwatata ko kin Le Jen Joñõn Irak

Meñe emaroñ or tokjen arkool ilo jet wãwen ko, bõtab kar kãreiki jet men ko im rej ukot wãwen an kamelij im enbwin eo jerbal. Emaroñ walok jorran kein ilõl elañe juõn ej kajerbal arkool elap jen joñõn.

Irak le jen joñõn ej kamõjnoik maroñ in lolokjen, im kõmõn bwe lemnok ko an armij eo en ‘jab alikkar.’ (Ken. 23:33, UBS) Allen, eo kar kwalok kake ilo katak eo lok iman, ej kemelele: “Ekarekrek ejjab baj juõn nañinmij ilo enbwin wõt, ak ej bareinwõt juõn nañinmij ilo lemnok im mwilin juõn armij. Kwojjab lemnok kin joñõn an men in kõmetak ro jet.”

Irak le jen joñõn arkool emaroñ kõmõn bwe juõn en jab jok ak mijõk. Baibel eo ej kakkil kij: “Wine . . . im wine kãl rej ukõt lemnak ko an armij.” (Hosea 4:​11, UBS) Ilo wãwen  it? Elañe ej le jen joñõn ar irak, lemnok ak kõnan ko rekin nana iber mokta, remaroñ kiõ oktõk im einwõt ñe remõn. Men in emaroñ kõmõn bwe jokãlet eo ar ñõn kõmõni men ko rejime en mõjinolok. Arkool emaroñ kõmõn bwe jen kejekron mour erreo, im men in ekauwatata ñõn kõtan eo ar iben Anij.

Ñõn wanjoñok, John ear akwail iben lio belen im ear illu im ilok ñõn juõn imõn karek. Elikin jidrik ien juõn kõra ear kebake. Im elikin an bar irak jidrik, John ear ilok iben kõra eo im babu iben. Tokelik, John ear lukkun ajlok kin an kar kõmõne juõn men me eban kar kõmõne elañe ear jab karek.

Karek emaroñ kõmõn bwe en walok nan im kõmõn ko rejakkar. Baibel eo ej ba, “Wõn ro emmakijkij air aol im kõmmõn puktak?. . . Ro elap air idrak drennin kadrek, im ro mejlokier kãreiki drennin kadrek ko rekajur.”(Jabõn Kennan Ko 23:29, 30, UBS) Irak ele jen joñõn emaroñ kõmõn “einwõt ñe kwar bed ilometo im ellao, im kwonaj ellãle einwõt ñe kwar bed ijeban juõn kiju in juõn wa.” (Jabõn Kennan Ko 23:34, UBS) Juõn eman eo ear karek emaroñ ruj im ba: “Bwelen rar dreñloke iõ ak iar jab iñjake. Bwelen rar mõn iõ, ak ijjab ememeje.”​—Jabõn Kennan 23:35.

Karek emaroñ kokkure ejmour eo ar. “Ilo jemlokõn [arkool] ej kiji einwõt juõn serpent, im ej wie einwõt juõn adder.” (Jabõn Kennan Ko 23:32) Ro rej katak kin ejmour emwij air kile bwe emol jabõn kennan in. Elañe ej lap an juõn irak arkool emaroñ kõmõn bwe en walok elõñ kain nañinmij ko einwõt cancer, nañinmij ko im rej kejorran aj, pancreatitis, tõñal, niñniñ ko reutame ñe rej lotak, mij rãjetin, im jorran menono. * Men kein rej baj jet wõt ian nañinmij ko remaroñ walok. Bareinwõt, ekarekrek emaroñ kõmõn bwe juõn armij en maroñ ber ilo coma ak bwelen mij. Bõtab, jorran ko relaptata im rej itok jen an juõn ekarekrek rejjab walok ilo buk ko an taktõ ro.

Kauwatata eo elaptata. Meñe juõn emaroñ jab karek, ak kõtan eo an iben Anij emaroñ ber ilo kauwatata elañe ej le jen joñõn an irak. Baibel eo ej ba: “Wo ñõn ro rej jerkak ke e jiboñ wõt, bwe ren lore dren in karek; ro eto air mar ilo boñ mae ien wain ej tile ir!” Etke?  Aiseia ej kalikar kin jorran ko remaroñ walok elañe ele jen joñõn an armij irak: “Re jab lale jerbal in Jeova, im rar jañin kalomõnlokjen kin men in kõmõn an pein.”​—Aiseia 5:​11, 12.

Nan in Anij ej rejañ kij bwe jen jab “kobalok ibben armij ro elab air idrak wine.” (Jabõn Kennan Ko 23:20, UBS) Kar kakkil kõra ro reridto bwe ren jab ber im “ijol wain.” (Taitõs 2:3, UBS) Etke kar kakkil rein? Kinke jidrik kin jidrik, ilo air jab kile emaroñ jino emakijkij air irak arkool meñe jidrik wõt. Ejjab to armij in, enaj jiktok wõt bwe en kajitõk “Etke ijaje ruj? Iaikwij bar idrak.” (Ken. 23:35, UBS) Ro ekkã air irak arkool rej ber ilo juõn wãwen ekau watata elañe rej rujlok in jiboñ im bar kõnan irak ñõn jolok air mõk jen air kar irak boñin eo juõn.

Baibel eo ej kakkil bwe ro elap air “irak wain, [bõk kwonair ilo] eep ko, karek ko. . . re naj kwalok kin air kõmõn ñõn Eo e pojõk bwe En ekajet ro remour im ro remij.” (1 Piter 4:​3, 5) Im kin ran kein eliktata im jej mour ie, Jisõs ear kakkil kij: “Komin kejbarok kom! Komin jab kamad kom kin ien mõñã ko rellab im drennin kadrek ko rekajur, im kin inebata ko an mour in, ñe Ran eo [an Jeova] eab walokwõj ilo jidrimkij. Kinke enaj itok einwõt aujid.”​—Luk 21:34, 35, UBS.

Ta eo ro elap air irak remaroñ kõmõne ñõn bõprae bwe ren kejbãrok ir jen arkool?

[Kamelele eo Itulal]

[Pija ilo peij 4]

Irak arkool ele jen joñõn emaroñ tellok ñõn elõñ jorran ko