Ki ko ñõn Kamõnõnõik Juõn Baamle

Katakin Ajiri ro bwe Ren Jela Kwonair

George: * “Aolep jota Michael, ladrik eo nejiõ emen an yiõ, ej kijiblikliki kein ikkure ko an ibelakin mweo. Iar kajeoñ kõmõn bwe en kakoni mokta jen aõ kakiki e. Bõtab, emõkõj an Michael illu im elap an ellamijmij im enanalok wõt tammwin. Jet ien ij lukkun illu im buroñe, bõtab men in ej kõmõn bwe en nana amro jimor mour. Iar kõnan bwe ien kiki en juõn ien emõn. Inem, iar bwijrõk jen aõ katakin e im iar mõke kakoni kein ikkure ko an.”

Emily: “Ear jino or abañ ke Jenny, ledrik eo nejiõ 13 yiõ ridtõn, ear bin an melele katak ko dri kaki eo an ear lilok. Ke Jenny ear roltok jen jikin jikuul, ear jõñ iomin juõn auõ. Iar rejañ e bwe en kajitõk jibõñ jen dri kaki eo an, bõtab Jenny ear ba bwe elej dri kaki eo an im emijõk in kennan iben. Iar kõnan etal ñõn imõn jikuul eo im luki dri kaki eo. Iar lemnok bwe ejelok en eor an maroñ ñõn kaburomõj ledrik eo nejiõ!”

EOR ke ien en im kwoj bõk ejja iñjake in wõt an George im Emily? Einwõt rein eor nejiir, elõñ ro jemen im jinen rejjab kõnan lo an ajiri ro nejiir iñtan ak inebata. Ej biktokin ro jemen im jinen bwe ren kejbãrok ro nejiir. Bõtab, abañ ko kar kwalok ilo jinoin rej kebellok juõn ien bwe rein eor nejiir ren katakin ajiri ro nejiir ñõn air jela kwonair. Emol, men ko ajiri eo 4 an yiõ im ledrik eo 13 an yiõ renaj katak reoktõk jen dron.

Bõtab, ilo mol eban aolep ien kwonaj maroñ kejbãrok ajiri eo nejõm jen abañ ko ilo mour. Ejjabto, ajiri ro renaj ilok jen jemeir im jineir im “mõke inek” erro ko air. (Dri Galetia 6:5; Jenesis 2:​24) Ñõn jibõñ ajiri ro bwe ren jela lale ir mõke, ro jemen im jinen rej aikwij katakin ir bwe ren jab lemnok kin ir mõke, ak ren erom ro rejoij im jela kwonair ñe reridto. Men in ejjab juõn jerbal ebiruru!

 Elukkun emõn bwe ro jemen im jinen remaroñ lor joñok eo an Jisõs im wãwen an kar kõmõn ñõn dri kalor ro an im katakin ir. Ear ejelok nejin Jisõs. Bõtab mejenkajik eo an ke ear kãlet dri kalor ro an im katakin ir ej bwe ren maroñ wõnmanlok wõt im kõmõne jerbal eo ear lelok ñõn ir ñe enaj joko jen ir. (Matu 28:19, 20) Men eo Jisõs ear kõtõbrõke ej einlok wõt kõtõbar eo ro jemen im jinen rej kõtõmene bwe renaj lo tõbrõk ie ke rej katakin ajiri ro nejiir bwe ren erom ro rejela kwonair. Jen etale wãwen ko jilu ro jemen im jinen remaroñ lori jen joñok eo an Jisõs.

‘Likit Juõn Joñok’ ñõn Eo Nejõm Ke ear ebaklok ien eo Jisõs enaj kar mij, ear ba ñõn dri kalor ro an: “I ar lewoj ñõn kom juõn joñok, bwe komin bareinwõt kõmõn einwõt I ar kõmõn ñõn kom.” (Jon 13:15) Eindrein, ro jemen im jinen rej aikwij kemelele im likit juõn joñok ñõn ro nejiir bwe ren jela kwonair.

Kajitõk ibõm mõke: ‘Ekkã ke aõ kennan kin erro ko aõ ilo juõn wãwen emõn? Ij ke kwalok aõ juburu ilo aõ kate iõ jerbal ñõn ro jet? Emakijkij ke aõ kwalok aõ abnõnõ im keiri iõ mõke ñõn ro im emõnlok mour ko air?’

Ilo mol, aolep armij rejjab wãppen. Kij aolep elõñ ien elap ar mõk. Bõtab, joñok eo am ej wãwen eo emõntata im kwomaroñ katakin ajiri ro nejõm bwe ren jela kwonair.

KAJEOÑ MEN IN: Elañe kwomaroñ, jet ien kwon bõk ajiri eo nejõm ñõn jikin jerbal eo am ñõn kwalok ñõn e ewi wãwen kwoj jerbal ñõn kabwe aikwij ko an baamle eo. Kwon bõk kwonam iben ajiri eo nejõm ilo amiro jibõñ juõn armij eo ej aikwij jibõñ. Elikin, kwon kennan iben kin an juburuõm kin am kar jibõñ armij eo.​—Jerbal 20:35.

Jab Kõtõmene Elap jen Ajiri eo Nejõm Jisõs ear kile bwe enaj kar bõk ien ñõn an dri jilik ro an mõke kõmõni jerbal ko im ear kõtõmene bwe renaj kar kõmõni. Juõn ien ear ba ñõn ir: “Ebar lõñ men ko ibba bwe in jiroñ kom kaki, ak elab jen joñan ami maroñ bõk kiõ.” (Jon 16:12, UBS) Jisõs ear jab mõkõj im kajitõk iben dri jilik ro an ñõn air mõke kõmõni jerbal ko. Ijellokin men in, ear bõk ien ñõn katakin ir elõñ men ko. Ilo ien eo wõt im rar pojõk, Jisõs ear jilkinlok ir ilo air mõke iair.

Ilo wãwen in lok wõt, ejjab juõn men emõn bwe ro jemen im jinen ren lelok erro ko im ro nejiir reban maroñwi. Mekarta, ilo an ajiri ro ridtolok, jemeir im jineir rej aikwij bebe kin ta erro ko im renaj ekkar ñõn ajiri ro. Ñõn wanjoñok, rej aikwij katakin ajiri ro nejiir bwe ren erreo, jela karreoik rum ko air mõke, mõkõj ñõn ien, im kajerbale jããn ko air ilo meletlet. Ilo ien eo ajiri eo ej jino an jikuul, ro jemen im jinen rej aikwij kõtõmene bwe ajiri eo en kaurõk katak ko an ilo jikin jikuul einwõt juõn erro eaurõk.

Ro jemen im jinen rej aikwij kõmõn elaplok jen air baj lelok wõt jerbal ko ñõn ajiri eo nejiir. Rej aikwij jibõñ ajiri eo ilo an kate bwe en lo tõbrõk. George, eman eo ilo jinoin katak in, ear kile bwe unin an Michael illu im jab kõnan kakoni kein ikkure ko an ej kinke men in ej juõn jerbal ejjab maroñ mõke kõmõne. George ear ba: “Ijellokin aõ buroñe bwe en kakoni kein ikkure ko an, iar katakin e juõn wãwen bwe en maroñ kõmõne men in.”

Ta eo ear kõmõne? George ear ba: “Mokta, iar karõk juõn ien me ej aikwij kakoni kein ikkure ko an kajjojo boñ. Inem, iar jibõñ Michael, im kimro ar jidrik kin jidrik karõke loan rum eo. Iar kõmõn bwe ien in en juõn ien elimo, im kimro kin lale wõn eo emõkõj an kakoni kein ikkure ko. Ejjabto, kimro ar kõmõne men in aolep boñ. Iar kalimuri Michael bwe elañe enaj mõkõj an kõmõne jerbal eo an, inaj bar kobaiklok juõn bwebwenato ilo ien aõ riit bwebwenato ñõn e mokta jen an kiki. Bõtab elañe erumij an kõmõne men in, enaj karulok ien aõ riiti bwebwenato ko ñõn e.”

KAJEOÑ MEN IN: Elañe kwonaj etale ewi joñõn maroñ ko an ajiri ro nejõm, men in enaj jiboñ kõmõn bwe en emõn am jerbal  ibeir. Kwon kajitõk ibõm mõke, ‘Eor ke men ko ij kõmõni ñõn ajiri ro nejiõ im remaroñ kõmõne ibeir mõke?’ Elañe aet, kwon jiboñ ajiri ro nejõm mae ien kwoj kile bwe remaroñ kõmõne jerbal in ibeir mõke. Kwon kalikar ñõn ajiri ro nejõm bwe enaj or leen jerbal ko air meñe enaj nana ak emõn wãwen air jerbal. Inem elañe ejjab emõn air jerbal, kwon katakin ir, ak elañe emõn, kwon kõmõne juõn men ñõn kamolol ir.

Lelok Nan in Tel Jisõs, einwõt aolep dri kaki ro remõn, ejela bwe wãwen eo emõntata ñõn katak kin juõn men ej ilo ar kõmõne. Ñõn wanjoñok, ke Jisõs ear kile bwe dri jilik ro an repojõk, ear jilkinlok ir “karuolok iman mejen ilo jikin kwelok im ene otemjej, ijo E naj ilok ie lok.” (Luk 10:1) Mekarta, ear jab baj jilkinlok ir wõt im jab jibõñ ir. Mokta jen an kar jilkinlok ir, ear lelok ñõn ir nan in tel ko ralikar. (Luk 10:​2-​12) Ke dri jilik ro an rar jeblak im kwalok kin tõbrõkin jerbal eo air, Jisõs ear nebar im kõkãtõk ir. (Luk 10:17-​24) Ear kwalok an liki joñõn maroñ ko air im ear kwalok an buñburuen kake ir.

Elañe ajiri ro nejõm ebin air kõmõne juõn jerbal, ta eo kwoj kõmõne? Kwoj ke kajeoñ kejbãrok ajiri ro nejõm jen men ko rej mijõk in kõmõni bwe ren jab jok im kwalok bwe rebane jerbal eo? Bwelen men eo moktata kwokõnan kõmõne ej ñõn jibõñ ajiri ro nejõm ak kõmõne jerbal eo ñõn ir.

Bõtab, baj lemnok mõk: Aolep ien kwoj mõkõj im jibõñ ajiri eo nejõm ilo jet wãwen ko, ta eo kwoj kajeoñ kwalok ñõn ajiri eo? Kwoj ke kalikar bwe kwoj liki e im tõmak bwe emaroñ karerelok jerbal eo? Ak kwoj ke kwalok ñõn ir bwe kwoj lemnok wõt bwe rej einwõt niñniñ ro im rej aikwij am jibõñ aolep ien?

Ñõn wanjoñok, ewi wãwen Emily, eo kar kwalok kake ilo jinoin, ear kamarmire abañ eo an ledrik eo nejin? Ijellokin an bõk kwonan, ear bebe bwe en kõtlok bwe Jenny en ilok im kennan iben dri kaki eo an. Emily im Jenny rar je jet kajitõk ko bwe Jenny en bõki im kajitõk iben dri kaki eo. Inem irro ear konono kin ñãt eo Jenny emaroñ kebake dri kaki eo an. Irro ar bareinwõt kamelmel kin wãwen emaroñ kennan iben dri kaki eo. Emily ear ba: “Ilo beran, Jenny ear kebake dri kaki eo an, im dri kaki eo ear nebar e kin kajitõk ko an. Ear lap an Jenny mõnõnõ elikin men in, im ear bareinwõt lap aõ mõnõnõ kake e.”

KAJEOÑ MEN IN: Kwon je juõn abañ ajiri eo nejõm ej jelmae. Iturinlok abañ in, kwon je juõn wãwen kwomaroñ jibõñ ajiri eo nejõm ñõn kamarmire abañ eo ijellokin am mõke kõmõne ñõn e. Kwon kamelmel iben ajiri eo nejõm ewi wãwen emaroñ anjo ion abañ in an. Kwalok bwe kwoj liki ajiri eo bwe emaroñ kamarmire abañ eo an.

Elañe kwoj kejbãrok ajiri ro nejõm bwe ren jab iion abañ ko, ilo mol kwojjab jibõñ ir bwe ren maroñ mõke kamarmire abañ ko air ilo mour. Jen am eindrein, kwon katakin ajiri ro nejõm bwe ren jela kõmõne ijo kwonair. Ilo am kõmõne men in, kwoj katakin ir kin juõn men elap an aurõk.

[Kamelele eo itulal]

KAJITÕK IBÕM MÕKE . . .

▪ Men ko ij kõtõmene jen ro nejiõ rej ekkar ke ñõn joñõn maroñ ko air?

▪ Ij ke jiroñ ir im kwalok ñõn ir ta ko rej aikwij kõmõni bwe ren maroñ lo tõbrõk ilo men ko rej kõmõni?

▪ Kar ñãt eo eliktata iar kõkãtõk ak nebare ajiri eo nejiõ?