Ta eo Jej Aikwij Jela kin Melelen Etan Anij?

EOR ke melelen ãt eo etam? Ilo jet ailiñ ko, ej juõn mõnit bwe ren lelok juõn ãt eor melelen ñõn juõn ajiri. Ãt eo rar kãlete emaroñ kwalok kin tõmak ak men ko jemen im jinen ajiri eo rej kaurõki. Emaroñ bareinwõt kin kejatrikrik im kõnan eo an rein kin ilju im jeklaj eo an ajiri eo nejiir.

Mõnit in kin lelok ãt ko eor meleleir ejjab juõn men ekãl. Ilo ien ko etto ilo Baibel, ekkã air lelok ñõn armij ro ãt ko im eor meleleir. Ãt kein rej kwalok kin men ko armij ro rej kejatrikrik bwe armij in enaj kõmõni ilo ien an mour. Ñõn wanjoñok, ke Jeova ear kwalok ñõn Devid kin men ko leo nejin etan Solomon enaj kõmõni, ear ba: “Naj etan in Solomon [ej itok jen juõn nan im ej melelen “Ainemõn”], kinke ñe enaj iroij inaj lelok ainemmõn im jokane ñõn ri Israel.”​—1 Kronikel 22:9, UBS.

Jet ien Jeova ej lelok juõn ãt ekãl ñõn juõn armij eo ej pojõk im bõk juõn jerbal ekãl. Kar naetan kõra eo ewar belen Ebream, Sera, melelen “Leroij.” Etke? Jeova ear kemelele: “Inaj kejerammõn e, im I naj bareinwõt lewoj nejõm man kin e: aet, I naj kejerammõn e, im e naj jinen elõñ bwij; im kiñ ro an armij re naj walok jen e.” (Jenesis 17:16) Ealikar bwe unin an kar Sera bõk juõn ãt ekãl ej kinke Jeova ear lelok ñõn e juõn jerbal ekãl.

Ta kin ãt eo Jeova, ãt eo eaurõklok jen ãt otemjej? Ta melelen ãt in? Ke Moses ear kajitõk iben Anij kin ãt eo Etan, Jeova ear uake im ba: “Ña Eo, Ña E.” (Exodus 3:​14) Elõñ ukok in Baibel ko rar ukote nan kein ilo wãwen in. Bõtab, juõn ukok in Baibel etan Rotherham, ear ukot nan kein ilo wãwen in: “Inaj Erom Jabrewõt men eo ikõnan erom.” Melelen etan Jeova ej kalikar bwe ej juõn Anij elõñ jerbal ko ej kõmõni. Ñõn wanjoñok: Juõn jinen emaroñ kõmõni elõñ jerbal ko ñõn kabwe aikwij ko an ajiri ro nejin. Emaroñ erom juõn nõj, juõn dri kõmat, juõn dri kaki, ak jabrewõt men ekkar ñõn aikwij eo an ro nejin. Ej eindreinlok wõt iben Jeova, bõtab ilo juõn wãwen elaplok. Bwe en maroñ kajejit karõk eo an ñõn armij ro, emaroñ erom jabrewõt men bwe en kabwe aikwij ko air. Inem, ar jela kajen Jeova im melelen etan, ej koba ar melele im kamolol kin aolep jerbal ko an.

Ekaburomõjmõj bwe karkar ko rekanuij emõn karkarin Anij renojõk jen ro im rejaje kajen im rejaje melelen etan. Bõtab, ilo am katak Baibel eo, enaj lap am kamolol Jeova kin jerbal ko an einwõt juõn Dri Kakabilek emeletlet, juõn Dri Lomor ekajur, im juõn Dri Letok ejoij, im bar jerbal ko an jet. Aet, ãt in Jeova elap melelen im ekabwilõñlõñ.

Mekarta, ejjab aolep ien ej biruru ñõn ar jela kajen Anij im ejaak juõn kõtan iben. Katak eo tok juõn enaj kwalok etke eindrein.