Jar

1 Etke Jej Jar?

JAR. Ewor jet wõt katak ko ilo Baibel im elap air kaitoklimoik kij. Jen etale jiljilimjuõn kajitõk ko im ekkã an armij ro kajitõk kaki kin jar, inem jen etali uak ko ilo Baibel eo. Kar kõmmani katak kein ñan jibañ yuk ñan jino jar ak ñan am kakõmmanmanlok jar ko am.

ILO aolep ailiñ ko im kabuñ ko ibelakin lal, armij rej jar. Rej jar ibeir make im bareinwõt ibben kumi in armij ro. Rej jar ilo imõn jar ko, tempel ko, im imõn kwelok ko. Remaroñ kajerbal marmar ko, ekjab ko, ak book in jar ko.

Jar ej juõn ian wãwen ko ej kajenolok armij ro jen aolep menin mour ko jet ion lal. Emol, ewor wãwen ko ibbed im rej einlok wõt menin mour ko. Einwõt menin mour ko, jej aikwij kijed, limed, im jej aikwij bareinwõt menono. Im einwõt men kein jej lotak, mour, im mij. (Ekklisiastis 3:19) Bõtab, armij ro wõt remaroñ jar. Etke?

Bwelen uak eo ealikartata ej bwe ewor juõn aikwij ibbed ñan jar. Men in ej eindrein kinke armij ro rej tõmak bwe jar ej wãwen eo remaroñ kebake men eo rej watõke bwe ekwojarjar, eaurõk, im ej ñan indrio. Baibel eo ej kwalok bwe kar kõmmanman kij kin juõn kõnan kin men kein. (Ekklisiastis 3:11) Juõn ien Jisõs Kraist ear ba: “Emõnõnõ ro rejelã bwe rej aikwiji [katak ko an Anij].”—Matu 5:3, UBS.

Ñe jej lo aolep mõn jar ko, menin e ko, im an armij ro jar iomin elõñ awa ko, men in ej kalikar bwe ewor ibben armij kõnan eo ñan air bõk “katak ko an Anij.” Emol, jet armij rej atartar ioir make ak ion ro jet ñan air kõtõbrõk kõnan in air. Bõtab, kwoj ke kile bwe ejelok an armij maroñ ñan lukkun jibañ? Kij armij jemõjno, ekadu ad mour, im jej likjab in lemnaklok iman ñe jej kõmmani bebe ko. Eo wõt im elaplok an meletlet im kajur jen kij, im ej bed ñan indrio, emaroñ letok men eo jej aikwiji. Inem, ta jet ian menin aikwij kein im rej kamakõt kij ñan ad jar?

Lemnak mõk kin men in: Kwonañin ke kar kõnan bõk tel, meletlet, ak lo uak ko ñan kajitõk ko ebin an armij ro uaki? Kwonañin ke kar aikwij bõk kainemõn ke juõn eo ejitenburu ibõm ear mij, ak bõk nan in tel ke kwar aikwij kõmmane juõn bebe ebin? Ak kwonañin ke kar kõnan bõk jeorlok bwid kin an nana bõklikõt eo am kin juõn men kwar kõmmane?

Ekkar ñan Baibel eo, aolep men kein rej un ko rekkar ñan ad jar. Baibel eo ej book eo emmõntata jemaroñ liki kin katak eo kin jar, im ej kwalok kin jar ko an elõñ man im kõrã ro retiljek. Rar jar ñan bõk kainemõn, tel, jeorlok bwid, im kin uak ko ñan kajitõk ko relukkun bin.—Sam 23:3; 71:21; Daniel 9:4, 5, 19, UBS; Habakkuk 1:3, UBS.

Jar kein ilo Baibel eo rar oktak jen dron, bõtab ewor juõn men kar kobaiki ilo aolep jar ko. Ro im rar jar rar jelã kin juõn men eaurõk rar aikwij kajerbale ilo jar ko air bwe Anij en mõnõnõ in eoroñ ir im armij ro ilo lal in rainin rej kejekrone. Rein retiljek rar jelã wõn eo rar aikwij jar ñan e.