Jar

5 Jej Aikwij Jar Ñãt im Ia?

EJELOK berre kwar lo bwe elõñ kabuñ ko rej kalikar bwe ej aikwij wor imõn jar ko relap im aibujuij im rej kõmman lajrakin awa ko ilo juõn ran ñan air aikwij jar. Baibel eo ej ke kwalok bwe ewor jet wõt jikin ko im ien ko rekkar ñan ad jar?

Baibel eo ej kwalok bwe ewor ien ko rekkar ñan ad jar. Ñan wanjoñok, mokta jen an kar Jisõs mõñã ibben dri kalor ro an, ear kamolole Anij ilo jar. (Luk 22:17) Im ke dri jilik ro an rar kweloklok ñan air kabuñ, rar jar ibben dron. Ilo wãwen in, rein rar kowõnmanlok manit eo me eto an kar walok ilo imõn kabuñ eo an dri Ju ro im ilo tempel eo ilo Jerusalem. Anij ear kõnan bwe tempel eo en “imõn jar” eo ñan dri ailiñ ko otemjej.—Mark 11:17.

Ñe dri karejar ro an Anij rej kweloklok im jar ibben dron, kajitõk ko air remaroñ tõbrak. Anij ej mõnõnõ ñe kumi in dri karejar ro an rej buru wõt juõn ilo wãwen air lemnak, im jar eo air ej ekkar ñan nan in kakabilek ko ilo Baibel eo. Jar eo air emaroñ kamakõt e ñan an kõmmane men eo me ear jab lemnak in kõmmane. (Dri Hibru 13:18, 19) Dri Kennan ro an Jeova rej jar ilo kajjojo ien kwelok ko air. Kimij karuwaineneik yuk ñan am ilok ñan Imõn Kwelok eo ebake yuk im roñjake jar ko air.

Bõtab, Baibel eo ejjab ba bwe ewor jet wõt jikin im ien ko jej aikwij jar. Ilo Baibel eo, jej lo bwe dri karejar ro an Anij rar jar ilo jabrewõt ien im jikin ko. Jisõs ear ba: “Ñe kwoj jar, kwon dreloñ iloan jikõm etino im ñe emwij kil am aur, kwon jar ñõn Jemõm ej ber ijo etino; im Jemõm ej lo ijo etino, E naj nawõnãm.”—Matu 6:6.

Eon in ej ke kamakõt yuk ñan am jar ñan Anij? Kwomaroñ kebake Iroij Bõtata eo ilo jabrewõt ien kwoj make iam, im kwomaroñ liki bwe enaj roñjake yuk. Inem ej alikar bwe unin an kar Jisõs kõnan kamakelok ian ej bwe en maroñ jar! Juõn ien, ear jar aolepen boñin eo ñan Anij ñan an bõk nan in tel kin juõn bebe elap an aurõk.—Luk 6:12, 13.

Baibel eo ej kwalok kin jet man im kõrã ro im rar jar ke rar aikwij kõmman bebe ko relap ak ke rar jelmae melejoñ ko. Jet ien rar jar ilo burueir ak ilo ien ko jet ilo juõn ainiken elaj, im rar jar ke rar bed ibben juõn kumi in armij ro ak ibeir make. Men eo eaurõk ej bwe rar jar. Anij ej rejañ dri karejar ro an: “Jar ien otemjej.” (1 Dri Tessalonika 5:17, UBS) Anij ej mõnõnõ in roñjake ro rej kõmmanman ankilan. Nan in rejañ in ej kalikar kin yokwe eo an Jeova.

Emol, kin an bin an armij ro rainin liki jabrewõt men, elõñ rej lemnak elañe ewor tokjen ñan air jar. Kwomaroñ kajitõk, ‘Jar enaj ke lukkun jibañ iõ?’

[Pija ilo peij 9]

Jemaroñ jar ilo jabrewõt ien im ilo jabrewõt jikin