Jar

7 Anij Enaj Ke Eoroñ Jar ko Ad?

KAJITÕK eo itulõñ ej lukkun kaitoklimoen armij ro im kõmman bwe ren kõnan jelã uak eo. Baibel eo ej kwalok bwe Jeova ej mõnõnõ in roñjake jar ko rainin. Ak elañe enaj eoroñ jar ko ad ak jaab, men in ej wawa ion kij make.

Jisõs ear kananaik dri tel in kabuñ ro ilo ran ko an kin air jar ilo etao. Rein rar kõnan kowãnik ir make iman mejen armij ro. Ear ba bwe rein renaj “bõk wõnair,” melelen bwe renaj kõtõbrõk wõt men eo rekõnan, eñin bwe armij ren nebar ir. Bõtab, rejamin bõk men eo rar aikwiji im men in ej ñan an Anij eoroñ ir. (Matu 6:5) Eindrein rainin, elõñ armij ro rej jar ekkar ñan men ko rekõnan im jab ekkar ñan ankilan Anij. Kin air kejekron nan in kakabilek ko ilo Baibel eo me jar konono kaki moktalok, ealikar bwe Anij ejamin eoroñ jar ko air.

Ak ta kin kwe? Anij enaj ke eoroñ jar ko am? Uak eo ejjab wawa ion an oktak kilõm jen ro jet, ailiñ eo kwoj itok jene, ak ewi joñan am utiej ak mweie. Baibel eo ej kalimur ñan kij: “Anij e jab lemnok kin okõtõn armij: A ilo ailiñ otemjej eo ej mijõk E, im jerbale kwojarjar, ej kabuñburuen.” (Jerbal 10:34, 35) Kwoj ke jerbale nan kein? Mijak Anij ej melelen bwe elap am kautiej e im kwoj mijak in kõmmane men ko rejjab kabuñburuen. Jerbale kwojarjar ej melelen bwe kwoj bukot wãwen ko ñan am kõmmani men ko Anij ej ba rejimwe, ijellokin am lor kõnan ko am ak an ro mõttam. Kwokõnan ke bwe Anij en eoroñ jar ko am? Baibel eo ej kwalok ñan yuk kin wãwen eo kwomaroñ jar bwe Anij en eoroñ yuk. *

Emol, elõñ armij ro rekõnan bwe Anij en uaki jar ko air ilo kabwilõñlõñ. Meñe ilo kar ien ko etto, ejeja an Anij kõmmani menin bwilõñ ko. Jet ien emaroñ motlok elõñ buki yiõ ko mokta jen an Anij kõmmane bar juõn menin bwilõñ. Bareinwõt, Baibel eo ej kalikar bwe ien ko kar kõmman menin bwilõñ ko ear jemlok elikin an kar mij aolep dri jilik ro. (1 Dri Korint 13:8-10) Inem men in ej ke melelen bwe Anij ejjab eoroñ jar ko rainin? Jab ñan jidrik! Jen etali jet jar ko Anij ej uaki.

Anij ej letok meletlet. Jeova ej Unjen aolep meletlet ko remol. Ej mõnõnõ in lelok men in ilo ejelok wõnan ñan ro im rekõnan bõk tel eo an im rej kate ir ñan mour ekkar ñane.—Jemes 1:5.

Anij ej lelok kajur eo an im aolep tokjen ko rej walok jene. Ejelok juõn men ekajurlok jen kajur eo an Anij. Emaroñ jibañ kij kijenmij iomin melejoñ ko im kainemõn kij ñe jej inebata. Emaroñ bareinwõt jibañ kij ñan kadrek ibbed kadkad ko jet remmõn. (Dri Galetia 5:22, 23) Jisõs ear kalimuri dri kalor ro an bwe Anij ej mõnõnõ in lelok ñan ir menin letok in.—Luk 11:13.

Anij ej lelok jelãlokjen ñan ro rej kabukot e. (Jerbal 17:26, 27) Ibelakin lal in, ewor armij ro im rej bukot mol eo. Rekõnan jelã kin Anij im ãt eo etan, karõk eo an kin lal in im armij ro, im ewi wãwen remaroñ druaklok ñan e. (Jemes 4:8) Ekkã an Dri Kennan ro an Jeova iion kain armij rõt in im rej mõnõnõ in kwalok uak ko jen Baibel eo ñan kajitõk rõt kein.

Eñin ke unin am kar kõnan bõke book in? Kwokõnan ke jelã kin Anij? Bwelen eñin wãwen eo Anij ej uake jar eo am.

[Kamelele eo itulal]