Katak jãn Naan in Anij

Ro Remej Renaaj Ke Bar Mour?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Ta kõjatdikdik eo em̦m̦an ñan ro remej?

Ke Jijej ear tõparl̦o̦k jikin eo etan Betani, l̦eo jeran etan Lazerõs em̦õj an mej. El̦ak de emãn raan in an pãd ilo lũp. Jijej ear etal ippãn lim̦aro jein im jatin Lazerõs ñan wũliej eo. Ejjabto, jar in armej ro rej itok. Kwõmaroñ ke l̦õmn̦akel̦o̦k joñan an Marta im Meri m̦õn̦õn̦õ ke Jijej ej kõmour Lazerõs?​​​—Riit Jon 11:​20-​24, 38-​44.

Marta ear tõmak bwe ro remej renaaj bar mour. Jãn kar etto, ri karejar ro retiljek an Jeova rej tõmak bwe juon iien Anij enaaj kõmour ro remej bwe ren bar mour ijin ioon lal̦.​​​—Riit Job 14:​14, 15.

2. Ta eo ej wal̦o̦k ñan armej ñe rej mej?

Ejjel̦o̦k juon jetõb ak aan iloan armej im ej mour m̦aanl̦o̦k ãlikin an mej. Ãnbwinid ej kanniõk im kar kõm̦anm̦an kõj jãn bũñalñal. (Jenesis 2:7; 3:​19) Ñe jej mej ejjab jerbal kamelij eo ad, kõn men in aolep l̦õmn̦ak ko ad rejako. Eñin unin, ke Lazerõs ear bar mour, ear jab ba kõn ta eo ear wal̦o̦k ñan e ke ear mej kõnke ro remej ejjel̦o̦k men en rejel̦ã kake.​​​—Riit Sam 146:4; Ekklisiastis 9:​5, 10.

Ealikkar bwe ñe armej rej mej rejjab eñtaan. Kõn men in, katak eo bwe Anij ej kaeñtaan armej ro ilo kijeek ejjab m̦ool. Katak in eriab im el̦ap an Anij kitõtõiki.​​​—Riit Jeremaia 7:​31, UBS.

  3. Jemaroñ ke kõnnaan ippãn ro remej?

Ro remej rejjab maroñ kõnnaan. (Sam 115:​17) Enjel̦ ro renana im rar jum̦aeik Anij rej arin ro me rar mej im kõnnaan ippãn armej ro. (2 Piter 2:⁠4) Jeova edike ñe armej ro rej kajjioñ kõnnaan ippãn ro remej.​​​—Riit Duteronomi 18:​10, 11.

4. Wõn ro renaaj bar mour?

Ilo lal̦ eo ekããl, elõñ armej ro me rar mej renaaj bar mour. Ro me rar kõm̦m̦ani men ko renana kõn aer kar jaje kõn Jeova renaaj bar mour.​​​—Luk 23:43; Jerbal 24:⁠15.

Ro renaaj bar mour renaaj katak kõn Anij im kwal̦o̦k bwe rej tõmak Jijej ilo aer pokake e. (Revelesõn 20:​11-​13) Rein im renaaj bar mour im kõm̦m̦ani men ko rem̦m̦an, renaaj mour ñan indeeo ijin ioon lal̦. Bõtab, enaaj wõr ro im renaaj wõnm̦aanl̦o̦k wõt im kõm̦m̦ani men ko renana. Kõn men in, naaj “ekajete” er ekkar ñan kõm̦m̦an ko aer.​​​—Riit Jon 5:​28, 29.

5. Kõjatdikdik eo bwe ro remij renaaj bar mour ej kalikkar ta kõn Jeova?

Anij ear jilkintok Nejin bwe en mej kõn armej, eñin unin ewõr an ro remij kõjatdikdik bwe Anij enaaj bar kõmour er. Men in ej kalikkar bwe Anij el̦ap an jouj im yokwe.​​​—Riit Jon 3:​16; Rom 6:​23.

Ñan bõk mel̦el̦e ko jet, jouj im lale bok in, ilo jebta 6 im 7. Ri Kõnnaan ro an Jeova rar kõm̦m̦ane bok in. Ta Eo Baibel ej Lukkun Katakin?

[Pija ilo peij 16]

Kar kõm̦anm̦an Adam jãn bũñalñal