Ruwaakl̦o̦k ñan Anij

‘O Jeova, Kwo Jel̦ã Wãweeõ’

RI JEJE Arthur H. Stainback ej ba, “Elukkuun eddo ñan juon armej ñe ejjel̦o̦k juon ej kaorõke ak mel̦el̦e kõn e.” Kwõj ke errã ilo l̦õmn̦ak in an? Kwõnañin ke l̦õmn̦ak bwe ejjel̦o̦k juon ej kea ak mel̦el̦e kõn apañ ko kwõj iioni? El̦aññe aet, eokwe, kwõmaroñ bõk kaenõm̦m̦an ñe kwõjel̦ã bwe joñan an Jeova kaorõke ro rej karejar ñan e ej lale aolep men ko me rej wal̦o̦k ñan er kajjojo raan. Naan ko an Devid ilo Sam 139 ej kam̦oole men in.

Devid ear lukkuun lõke bwe Jeova ear kõn̦aan jel̦ã kõn e. Ear ba, ‘O Jeova, kwaar etale eõ, im kwo jel̦ã wãweeõ.’ (Eoon 1, UBS) Devid ear kõjerbale naan in “etale.” Ilo kajin Hibru, naan in emaroñ jitõñl̦o̦k ñan jilu men ko. Kein kajuon, ñe juon ej “kõb” ñan kappukot dekã ko raorõk (Job 28:​3, UBS). Kein karuo, “etale” ak lale tok juon ãne (Ri Ekajet 18:​2, UBS). Im kein kajilu, ñe juon ej “lukkuun etale” juon ennaan (Duteronomi 13:​14). Em̦õj an Jeova lukkuun etale kõj, mel̦el̦ein bwe ekanooj jel̦ã kõn kõj ak jel̦ã kajjied. Ilo an kar Devid kõjerbale naan in “eõ,” ej kalikkar bwe el̦ap an Jeova etale im kaorõke kõj kajjojo.

Devid ej wõnm̦aanl̦o̦k im ba, ‘Kwo jel̦ã men otemjej ij kõm̦m̦ani; Jãn ijo ettol̦o̦k kwo jel̦ã l̦õmn̦ak ko aõ otemjej.’ (Eoon 2, UBS) Kõn an Jeova pãd ilõñ, jemaroñ ba bwe “ettol̦o̦k” jãn kõj. Bõtab, ejel̦ã ad pãd im kõm̦m̦an, meñe jej jijet, jutak im ruj in jibboñ. Ejel̦ã ta ko jaar kõm̦m̦ani ilo aolepen raan eo. Jeova ebar jel̦ã kõn l̦õmn̦ak ko ad, kõn̦aan ko ad im men ko jekõn̦aan kõm̦m̦ani im rej pãd ilo bũruod. Devid ear ke mijak bwe Jeova ej kanooj etale bũruon? Ear jab. Ear kõn̦aan bwe Jeova en kõm̦m̦ane men in. (Eoon 23, 24, UBS) Etke?

Devid ear jel̦ã bwe unin an Jeova etale bũruon ro rej karejar ñan E ej ñan jipañ er. Eñin unin Devid ear je naan kein: ‘Kwõj lo eõ ñe ij jerbal ak kakkije; Kwo jel̦ã m̦akũtkũt ko aõ otemjej.’ (Eoon 3, UBS) Kajjojo raan, Jeova ‘ejel̦ã aolep m̦akũtkũt ko ad’ ekoba likjab ko ad im jerbal ko ad rem̦m̦an. Ej ke kallimjeke men ko rem̦m̦an ippãd ak men ko jej likjab kaki? Ilo ukok in Baibõl̦ in M̦ajel̦ ej ba “kwõj lo eõ.” Bõtab, ilo ukok eo m̦okta ilo kajin Hibru rar kõjerbale naan eo “liklik.” Ãinl̦o̦k wõt ñe juon ri kallib ej liklik wit ñan an jol̦o̦k ettoon ko jãne. Im naan kein, ‘ejel̦ã m̦akũtkũt ko ad’ ilo ukok in kajin Hibru, rar kõjerbale naan in “kaorõke.” Ñe Jeova ej etale naan im jerbal ko an ro doon kajjojo raan, ej kaorõke men ko rej ba im kõm̦m̦ani me rem̦m̦an. Etke? Kõnke ej kaorõke jibadbad ko aer ñan kabuñbũruon.

Sam 139 ej katakin kõj bwe el̦ap an Jeova kaorõke ri karejar ro an. Ej etale bũrueer im lale er aolep raan. Ejel̦ã kõn apañ ko rej iioni kajjojo raan. Emel̦el̦e kõn inepata ko ilo l̦õmn̦ak ko aer im men ko rej kõmetak bũrueer. Mel̦el̦e kein el̦ap aer lujur bũruod bwe jen kabuñ ñan Jeova! Jouj im keememej men in: Jeova eban ‘mel̦o̦kl̦o̦k am̦ jerbal im yokwe, ko kwaar kwal̦o̦k kõn Etan.’​​—Hibru 6:​10.