Eban Bar Wõr Jorrããn!

EL̦AÑÑE juon ear jiroñ waj eok im ba: “M̦õttan wõt jidik im eban bar wõr jorrããn enaaj wal̦o̦k,” ta eo kwõnaaj kar ba? Bõlen kwõmaroñ kar ba, “Yokwe am̦ kõn̦aan. Enaaj baj ãindein wõt an wõr jorrããn kõnke ãindein mour in.” Ak bõlen kwõmaroñ kar l̦õmn̦ak, ‘Ta armej in ej kabwebweik eõ ke?’

Meñe emaroñ ãindein m̦aanl̦o̦k wõt an wal̦o̦k jorrããn ko ak ewõr juon kõjatdikdik bwe men kein renaaj jako. Bõtab, jekdo̦o̦n ewi joñan an armej ro kate er ak ejjab er eo renaaj kõjakoik men kein. Armej ro rejjab maroñ lukkuun mel̦el̦e kõn wãween an men ko ilo lal̦ in jerbal im etke rej make pãd im wal̦o̦k. Im ejjel̦o̦k aer maroñ ñan kõm̦adm̦õdi men kein ak kabõjraki. Ilo iien ko etto ilo Israel, Kiiñ Solomon, l̦eo ebuñbuñ kõn an mãlõtlõt im lol̦o̦kjen̦ ear ba: “Armej e ban kappukot jerbal eo em̦õj kõm̦m̦ane ium̦win al̦; bwe jekdo̦o̦n joñan an juon armej jerbal bwe en loe, a e jamin loe; aet, bar juon, meñe juon ri mãlõtlõt ej l̦õmn̦ak en jel̦ã kake, e jamin maroñ in loe.”​—Ekklisiastis 8:17.

El̦aññe armej ro rejjab maroñ kõjakoik jorrããn ko rej wal̦o̦k, innem wõn emaroñ? Baibõl̦ eo ej kwal̦o̦k bwe Ri Kõm̦anm̦an eo ad ej e eo im enaaj kõm̦m̦ane men in. E eo ear karõk wãween an men ko ilo lal̦ in m̦akũtkũt im jerbal. Ñan waanjoñak, wãween an dãn tõpar lo̦jet im oktak ñan dãnnin wõt. (Ekklisiastis 1:7, UBS) Anij eo enaaj kõjakoik jorrããn ko kõnke juon oktak ealikkar ikõtaan armej im Anij ej bwe Anij ekajoor otem ekajoor im ejjel̦o̦k joñan kajoor in an. Ri kanaan Jeremaia ear rejetake men in ke ear ba: “A, Irooj Jeova, lo, Kwe eo Kwaar kõm̦anm̦an lañ ko im lal̦ kõn Am̦ kajoor el̦ap im kõn peim̦ erl̦o̦ke. Ejjel̦o̦k men Kwõ bane.” (Jeremaia 32:17) Im kõnke Anij ear kõm̦anm̦an lal̦ in im aolep wãween ko ie, elukkuun jel̦ã wãween eo ñan karõk im lale aolep men bwe en maroñ aenõm̦m̦an im jokwane an armej ro mour ioon lal̦ in.​—Sam 37:11; 115:16.

Innem, ewi wãween an naaj Anij kõjakoik jorrããn ko rej wal̦o̦k? Aolep jorrããn ko rekaamijak rej wal̦o̦k ilo lal̦ in rainin rej m̦õttan kakõl̦l̦en “jem̦l̦o̦kin lal̦.” Jijej ear ba: “Ñe kom̦ij lo men kein re wal̦o̦k, kom̦win jel̦ã bwe aelõñ in Anij epaak.” (Matu 24:3; Luk 21:31) Aelõñ eo an Anij ej kien eo an Anij ilañ im enaaj kõm̦m̦an oktak ko rel̦ap ilo lal̦ in. Im bareinwõt enaaj kabõjrak men ko ilo lal̦ in ãinwõt kõto, lo̦jet, mejatoto im men ko ãierl̦o̦k wõt. Meñe ewõr ippãn Jeova Anij kajoor im maroñ eo ñan kõm̦m̦ane men in, ak ear kããlõt Nejin bwe en kõm̦m̦ane jerbal in. Ri kanaan Daniel ear ba kõn in Nejin Anij: “Em̦õj lel̦o̦k ñan E kajoor, aiboojoj, im bwe En Irooj, bwe aolep armej, ri aelõñ ko, im ruwamãejet ro ren karejar ñan E.”​—Daniel 7:14.

Em̦õj lel̦o̦k ñan Jijej Kũraij eo ej Nejin Anij, maroñ im kajoor otemjej ñan kõm̦m̦an aolep oktak ilo lal̦ in bwe en juon jikin ekam̦õn̦õn̦õ. Ilo 2,000 iiõ ko remootl̦o̦k, ke Jijej ear pãd ioon lal̦ in, ear kwal̦o̦k jidik kõn an maroñ kalur kõto im n̦o ko rel̦ap. Ñan waanjoñak, ke Jijej im rũkal̦oor ro an rar pãd ilo juon wa ilo Lom̦al̦o in Galili, ear ‘buñ juon kõto l̦apl̦ap im n̦o ko rar jino uwe ioon wa eo im eiten dioij.’ Kõn men in, rũkal̦oor ro an rar wiwijet im ñak ren ita. Im kõnke rar jab kõn̦aan jako, rar kajjitõk jipañ ippãn  Jijej. Ta eo Jijej ear kõm̦m̦ane? Jijej ear “kauwe kõto eo” im ba, “Kwõn ikõñ!” im “ear ba ñan n̦o ko, ‘Kom̦win jokwane!’ Im kõto eo ear jako im ear wal̦o̦k juon lur l̦apl̦ap.” Rũkal̦oor ro an rar lukkuun l̦o̦kjen̦aer im rar jino ba ñan doon, “Wõn armej in? Ke kõto im n̦o kein repokake!”​—Mark 4:37-41, UBS.

Tokãlik Jijej ear wanlõñl̦o̦k ñan lañ im kiiõ em̦õj lel̦o̦k kajoor im maroñ otemjej ñan e. Kõnke e eo ej Kiiñ ilo Aelõñ eo an Anij, ej an eddo im ewõr an maroñ ñan kõm̦m̦ani aolep oktak ko ioon lal̦ in bwe armej ro ren maroñ mour ie ilo aenõm̦m̦an im jokwane.

Bõtab, ãinwõt ad loe, elõñ apañ ko im jorrããn ko rej wal̦o̦k itok jãn kõm̦m̦an ko an armej ro. Rej kõm̦m̦ani men ko me rej ko̦kkure lal̦ in kõn aer kũbbon̦ im l̦õmn̦ak kõn er make. Ta eo Aelõñ eo an Anij enaaj kõm̦m̦ane ñan ro im rej wõnm̦aanl̦o̦k ilo aer kõm̦m̦ane men in im remakoko in bõjrak? Baibõl̦ eo ej kwal̦o̦k kõn an Jijej naaj “weaaktok jãn lañ ippãn enjel̦ ro an rekajoor, kõn urur in kijeek, bwe en kajeik ro rejaje Anij kab ro rejjab pokake Naan eo Em̦m̦an kõn ad Irooj Jijej.” Aet, Jijej enaaj “ko̦kkure ro rej ko̦kkure lal̦.”​—2 Tessalonika 1:7, 8, UBS; Revelesõn 11:18.

Tokãlik, Jijej Kũraij eo ej “Kiiñ in Kiiñ ro,” enaaj kõjerbale maroñ eo an ñan kabõjrak men ko ilo lal̦ in ãinwõt lo̦jet, kõto, mejatoto, im ko ãierl̦o̦k wõt. (Revelesõn 19:16) Eban bar kõtl̦o̦k bwe ro rej pãd ium̦win Aelõñ eo an Anij ren bar eñtaan kõn jorrããn ko rej wal̦o̦k jãn kõto im l̦añ ko. Enaaj kõjerbal kajoor eo an ñan kõm̦m̦an bwe mejatoto in lal̦ in en em̦m̦an im bareinwõt armej ro ren bõk tokjãn iien añõneañ im añõnrak. Men in me enaaj wal̦o̦k enaaj ãinwõt men eo Jeova ear kallim̦ur kake ñan ro doon ilo iien ko etto. Ear ba: “Inaaj lewõj wõt ko ilo iien ko aer, im ãneo enaaj lewõj an orl̦o̦k, im wõjke ko in jikin kallib renaaj jebar leir.” (Livitikõs 26:4) Armej ro renaaj maroñ kalõk m̦oko im̦wier im rejamin inepata kõn an juon jorrããn el̦ap itok im ko̦kkuri. “Renaaj kalõk m̦oko, im jokwe ilo er; im renaaj kallib jikin kallib in grep, im m̦õñã jãn leen.”​—Aiseia 65:21.

Ta eo Kwõj Aikuj Kõm̦m̦ane?

Ãinwõt ro jet, ejjel̦o̦k pere bwe el̦ap am̦ itoklimo kõn l̦õmn̦ak in bwe jenaaj mour ilo juon lal̦ me eban bar wal̦o̦k jorrããn ko ie. Bõtab, ta eo kwõj aikuj kõm̦m̦ane bwe kwõn maroñ bõk jeraam̦m̦an in? Eokwe m̦õttan wõt jidik enaaj jejjet kitien men in. Bõtab, “ro rejaje Anij kab ro rejjab pokake Naan eo Em̦m̦an” rejamin mour ilo iien in me eban bar wal̦o̦k jorrããn ko ioon lal̦. Innem, ealikkar bwe ñan an juon maroñ bõk jeraam̦m̦an in, ej aikuj katak kõn Anij im rejetake eo ear kããlõte bwe en irooj ioon lal̦ in. Anij ekõn̦aan bwe jen jel̦ã kajjien im pokake nuuj eo em̦m̦an kõn Aelõñ eo an me ear kajutake ikijjeen Nejin.

Wãween eo em̦m̦antata jemaroñ katak ñan kõm̦m̦ane men in ej ilo ad lukkuun liñõri im etale Baibõl̦ eo. Baibõl̦ eo ej kwal̦o̦k kõn ta eo jej aikuj kõm̦m̦ane bwe jen maroñ mour ilo juon lal̦ eaenõm̦m̦an im jokwane ium̦win irooj eo an Aelõñ eo an Anij. Etke kwõjjab kajjitõk ippãn juon iaan Ri Kõnnaan ro an Jeova bwe en jipañ eok ñan jel̦ã kõn katak ko ilo Baibõl̦? Rein renaaj m̦õn̦õn̦õ in kõm̦m̦ane men in ñe kwõnaaj kajjitõk jipañ ippãer. El̦aññe kwõj kate eok ñan jel̦ã kajjien Anij im pokake nuuj eo em̦m̦an, innem kwõmaroñ lõke bwe naan kein ilo Jabõn Kõnnaan 1:33 (UBS) rej jerbal ñan kwe. Eoon in ej ba: “Ak jabdewõt eo ej eo̦roñ eõ enaaj lo jokwane. Enaaj mour ilo aenõm̦m̦an im ejjel̦o̦k an lõl̦ño̦ñ.”