Men ko Jemaroñ Kõm̦m̦ani ilo Iien Jorrããn

Jej loe an ikutkutl̦o̦k an wal̦o̦k jorrããn ko rel̦l̦ap im an l̦apl̦o̦k aer ko̦kkure men ko ilo lal̦ in. Innem ta eo juon armej emaroñ kõm̦m̦ane m̦okta im ãlikin an wal̦o̦k jorrããn ko rel̦ap ilo jikin eo ej pãd ie? Jen lale jet men ko jemaroñ kõm̦m̦ani.

Ko jãn jorrããn ko. Baibõl̦ eo ej ba: “Juon ri jel̦ãl̦o̦kjen̦ emaroñ kile an itok jorrããn ñane im ko jãne, ak juon ri jajel̦o̦kjen̦ ej wõnm̦aanl̦o̦k wõt ñane innem bũrom̦õj tokãlik.” (Jabõn Kõnnaan 22:3, UBS) Naan kein rej jet naan in kakapilõk me jemaroñ jerbali m̦okta jãn an wal̦o̦k jorrããn ko rel̦l̦ap. El̦aññe kar kakkõl aolep bwe m̦õttan jidik enaaj wal̦o̦k juon ibwijleplep, juon n̦o kileplep, ak juon taibuun ak l̦añ, innem ej juon menin aikuj bwe ro rej jokwe ilo jikin ko me jorrããn kein renaaj wal̦o̦k ie ren ko im pukot juon jikin kone. El̦apl̦o̦k an aorõk mour ko ad jãn m̦oko im̦õd ak m̦weiuk ko ad.

Jet armej remaroñ pepe ñan jab jokwe ilo jikin ko me el̦ap aer kauwõtata. Juon ri utiej ear ba bwe ilo jikin ko me eobrak kõn elõñ armej ro, epidodo an wal̦o̦k jorrããn ko rel̦l̦ap ie. Kõn men in, el̦ap an kauwõtata jikin jab kein. Ear bar ba bwe ilo jet jikin ko ilo lal̦ in el̦ap an kauwõtata jãn jikin ko jet im ilju im jekl̦aj jorrããn ko rel̦l̦ap renaaj wal̦o̦k ilo jikin kein. Ñan waanjoñak, emaroñ kauwõtata jikin ko me rettã ak rebũl̦ããt im rej pãd iturin lo̦jet ak jikin ko me rej pãd ijo me epidodo an wal̦o̦k m̦akũtkũt lal̦ ko ie. El̦aññe kwõmaroñ ilo̦k jãn jikin kein im em̦m̦akũtl̦o̦k ñan jikin ko me rejjab kauwõtata, innem ilo wãween in kwõj bõbrae am̦ naaj iioon eñtaan kõn jorrããn ko rel̦l̦ap.

Kwõn m̦aanjãppopo kõn ilju im jekl̦aj. Meñe kwaar kanooj kate eok ñan kõjparok bwe kwõn jab iioon jorrããn ko rel̦l̦ap ak bõlen kwaar baj iioone men in ilo jidimkij im ilo am kar jab kõtmãne kake. Enaaj pidodo am̦ jel̦ã ta eo kwõn kõm̦m̦ane ilo iien in el̦aññe kwaar pojakl̦o̦k im̦aan kake. Men in ej errã ippãn naan in kakapilõk eo ilo Jabõn Kõnnaan 22:3 me kar kwal̦o̦k kake ilo jinoin. Em̦õj ke am̦ kõpooje jet men ko kwõnaaj aikuji ñe ewal̦o̦k juon jorrããn? Juon bok ej kõmel̦el̦e bwe jemaroñ kõpooje jet men ko ãinwõt kein karreo kinej, teep in kinej, bato in aebõj, m̦õñã ko ilo kuwat, im peba ko reaorõk. Enaaj bar juon men em̦m̦an ñe kwõj bwebwenato ippãn eo pãleem̦ im ro nejõm̦ kõn kajjojo kain jorrããn ko rel̦l̦ap rej wal̦o̦k im ta ko kom̦ maroñ kõm̦m̦ani ñe ej wal̦o̦k jorrããn kein rel̦l̦ap.

Kõjparok juon jem̦jerã epaak ippãn Anij. Juon jem̦jerã epaak ippãn Anij emaroñ jipañ eok ilo jabdewõt kain wãween ko kwõj iiooni. Baibõl̦ eo ej kwal̦o̦k kõn Anij ãinwõt ‘Jemen tũriam̦okake im Anij in aenõm̦m̦an otemjej, eo ej kaenõm̦m̦ane kõj ilo ad jorrããn otemjej.’ Bar juon eoon ilo Baibõl̦ ej kwal̦o̦k kõn Anij ãinwõt eo ej “kaenõm̦m̦an ro rej bũrom̦õj.”​—2 Korint 1:3, 4; 7:6, UBS.

 Aet, Anij ejel̦ã kõn wãween ko me ro rej lõke e rej iiooni. Anij ej juon Anij in yokwe im ej kakajoor im kõketak kõj ilo elõñ wãween ko. (1 Jon 4:8) Ad jar kõn kajoor eo an Anij emaroñ jipañ kõj ilo jabdewõt wãween jej iioone. Kajoor eo an Anij emaroñ kakeememej ro rej eñtaan im bũrom̦õj kõn eoon ko ilo Baibõl̦ ñan kaenõm̦m̦an im kakajoor er. Ri karejar rein retiljek an Anij renaaj ãinwõt Devid, kiiñ eo etto an Ri Israel ro. Ear ba: “Meñe ij etal ilo kom̦lal̦ in annañin mej, ijãmin mijak jabdewõt nana, bwe Kwõj pãd ippa; Am̦ al̦al̦ im jokon̦õm̦, rej kaenõm̦m̦an eõ.”​—Sam 23:4.

Kũrjin ro rem̦ool rej jipañ doon. Ilo iien ko an rijjelõk ro, juon Kũrjin etan Agebõs ear kanaan bwe ‘enaaj l̦ap ñũta i ãne otemjej ilal̦, eñin men eo ear wal̦o̦k ilo raan ko an Klaudiõs.’ Ñũta in el̦ap ear jelõt elõñ rũkal̦oor ro an Jijej ilo Judia. Ta eo rũkal̦oor ro ilo jikin ko jet rar kõm̦m̦ane ke rar roñ kõn men in me Kũrjin ro m̦õttaer rar iioone? Baibõl̦ eo ej ba: “Im ro rũkal̦oor otemjej rar pepe bwe ãinwõt aer maroñ ren jilkinl̦o̦k menin jipañ jemjein jem̦jãten rej jokwe i Judia.” (Jerbal 11:28, 29) Rein rar kwal̦o̦k aer yokwe im m̦õn̦õn̦õ in jilkinl̦o̦k jet menin jipañ ko.

Ri karejar ro an Anij rainin rej bar ãindein ñe ej wal̦o̦k jorrããn ko rel̦l̦ap. Ri Kõnnaan ro an Jeova rebuñbuñ ippãn elõñ armej kõn aer jipañ ri tõmak ro m̦õttaer. Ñan waanjoñak, ke juon m̦akũtkũt lal̦ ear wal̦o̦k ilo Chile ilo Pãpode 27, 2010, Ri Kõnnaan ro an Jeova rar m̦õkaj im jipañl̦o̦k ro rar jorrããn ilo jikin in. Karla, eo me juon n̦o kileplep ear to̦o̦re m̦weo im̦õn, ear ba: “El̦ap an kar kaenõm̦m̦an eõ im kakajoor eõ ke iar lo an ri tõmak ro m̦õttam [Ri Kõnnaan ro an Jeova] itok jãn jikin ko jet ñan jipañ kõm. Em̦ool bwe Jeova ej kõjerbal ro rej m̦õn̦õn̦õ in jipañ ñan kaenõm̦m̦an kõj. Iar kile bwe Jeova ej yokwe eõ im kõjparok eõ.” Jim̦m̦an Karla eo me ejjab juon iaan Ri Kõnnaan ro an Jeova, ear bwilõñ kõn an rein m̦õn̦õn̦õ in jipañ. Ear ba: “Ium̦win elõñ iiõ, ijañin kar lo jipañ rot in ilo kabuñ en̦ aõ.” Men in me l̦al̦l̦ap in ear loe ear kõm̦m̦akũt e bwe en kajjitõk ippãn Ri Kõnnaan ro an Jeova ñan katak Baibõl̦ ippãn.

Ad pãd ippãn ro rej yokwe Anij emaroñ lukkuun jipañ kõj ilo iien ko jej iioon jorrããn ko rel̦l̦ap.

[Pija eo ilo peij 6]

Em̦õj ke am̦ kõpooje jet men ko kwõnaaj aikuji ñe ewal̦o̦k juon jorrããn?

[Pija eo ilo peij 7]

Jen jar, jab kõn menin kabwilõñlõñ ko, ak kõn kajoor eo an Anij im emaroñ jipañ kõj ilo jabdewõt wãween jej iioone

[Pija eo ilo peij 7]

Kũrjin ro rem̦ool rej jipañ doon ñe ewal̦o̦k jorrããn ko rel̦l̦ap

[Pija eo ilo peij 7]

“Iar kile bwe Jeova ej yokwe eõ im kõjparok eõ”