Anõke Joñak eo an Jijej kõn an Kar Ekkõl Wõt
Anõke Joñak eo an Jijej kõn an Kar Ekkõl Wõt
“Kom̦win ekkõl im jar.”—MATU 26:41.
EWI WÃWEEN AM̦ NAAJ UWAAK?
Ewi wãween jar ko ad rej kalikkar bwe jej ekkõl wõt?
Ilo wãween et jemaroñ kwal̦o̦k bwe jej ekkõl wõt ilo jerbal in kwal̦o̦k naan?
Ñe jej iioon wãween ko reppen, etke eaorõk bwe jen ekkõl wõt? Im ewi wãween jemaroñ kõm̦m̦ane men in?
1, 2. (1) Ta kajjitõk ko kwõmaroñ kajjitõkin eok make kõn joñak eo an Jijej kõn an kar ekkõl wõt? (2) Juon armej ejerawiwi emaroñ ke anõk joñak eo eweeppãn an Jijej? Jouj im kwal̦o̦k juon waanjoñak.
KWÕNAÑIN ke kajjitõk ippam̦ make: Imaroñ ke lukkuun anõke joñak eo an Jijej kõn an kar ekkõl wõt? Bõlen kwõmaroñ l̦õmn̦ak bwe kwõjjab maroñ kõm̦m̦ane men in kõnke Jijej ear juon armej eweeppãn. Ejjab men in wõt ak jet iien Jijej ear jel̦ã ta men ko im renaaj wal̦o̦k elõñ to̦ujin iiõ ko tokãlik. Innem, Jijej ear ke aikuj in ekkõl wõt? (Matu 24:37-39; Hibru 4:15) Jen etale kajjitõk kein ruo m̦okta bwe jen maroñ jel̦ã im mel̦el̦e kõn ewi joñan an aorõk bwe jen ekkõl wõt.
2 Juon armej ejerawiwi emaroñ ke katak jãn joñak eo an juon armej eweeppãn? Aet, emaroñ kõnke juon emaroñ katak jãn joñak eo an juon armej ekapeel. Ñan waanjoñak, l̦õmn̦ak m̦õk kõn juon likao me ej kab iten jino katak kaam̦tõ. Ejjab jim̦we wãween an m̦wijit rã eo kõn jidpãn eo. Kõn men in, ej kal̦apl̦o̦k an katak kilen jidpãn im elõñ alen ej kõmmãlmel. Bwe en lukkuun jel̦ã, ej aikuj katak jãn juon ri kaam̦tõ ekapeel. Likao in ej lale wãween an ri kaam̦tõ in jibwe rã eo im jidpãn eo. Jidik kõn jidik likao in ejel̦ãl̦o̦k kilen kõjerbale jidpãn eo, im ej wõnm̦aanl̦o̦k ilo an kate e. Kõnke likao in ej anõke joñak in an ri kaam̦tõ eo ekapeel, tokãlik enaaj jel̦ã kilen jidpãn. Ilo ejja wãween in wõt, Kũrjin ro rejjab bõjrak jãn aer kate er ñan kakõm̦anm̦anl̦o̦k wãween ko ippãer. Im rej kõm̦m̦ane men in ilo aer l̦oor naan in tõl ko an Jijej im anõke joñak eo an eweeppãn.
3. (1) Ta eo Jijej ear ba me ear kalikkar bwe e bareinwõt ear aikuj in ekkõl wõt? (2) Ta ko jenaaj etali ilo katak in?
3 Jijej ear ke aikuj in ekkõl wõt? Aet. Ñan waanjoñak, ilo boñõn eo m̦okta jãn an kar mej, Jijej ear kakapilõk rijjelõk ro an retiljek: ‘Kom̦win ekkõl Ippa.’ Tokãlik ear ba: “Kom̦win ekkõl im jar, bwe kom̦win jab del̦o̦ñ ilo kapo.” (Matu 26:38, 41) Ke Jijej ear pãd ioon lal̦ in, aolep iien ear ekkõl wõt. Bõtab ilo boñõn in me ear kanooj pen ñan e, Jijej ear kõn̦aan buul̦ kate e ñan ekkõl wõt im atartar wõt ioon Jemen ilañ. Ear jel̦ã bwe rũkal̦oor ro an rar bareinwõt aikuj in ekkõl wõt, ejjab ilo iien in wõt, ak bareinwõt ilo raan ko rej pãd im̦aan. Kõn men in, jenaaj etale un eo unin an Jijej kõn̦aan bwe jen ekkõl wõt. Innem jenaaj katak kõn jilu wãween ko jemaroñ ekkõl wõt ãinwõt kar Jijej.
UNIN AN JIJEJ KÕN̦AAN BWE JEN EKKÕL WÕT
4. Etke jej aikuj ekkõl wõt?
4 Jijej ekõn̦aan bwe jen ekkõl wõt kõnke meñe ewõr jet men jejel̦ã kõn ilju im jekl̦aj, ak ejjab aolep men jejel̦ã kaki. Ke Jijej ear pãd ioon lal̦ in, ear jab jel̦ã kõn aolep men ko renaaj kar wal̦o̦k ilju im jekl̦aj. Ear make kam̦ool men in ilo an kar ba: “A raan eo im awa eo ejjel̦o̦k juon e jel̦ã kake, im jab enjel̦ ro i lañ, jab Nejin, a Jema wõt.” (Matu 24:36) Ilo iien in, Jijej eo ej “Nejin” Anij, ear jab jel̦ã ñããt enaaj itok jem̦l̦o̦kin jukjuk im pãd in enana. Ak ta kõn kõj rainin? Jejel̦ã ke kõn aolep men ko renaaj wal̦o̦k ilju im jekl̦aj? Alikkar bwe jejjab! Jejaje ñããt Jeova enaaj jilkintok Nejin bwe en ko̦kkure jukjuk im pãd in enana. Innem, kõnke jejjab jel̦ã aolep men ko kõn ilju im jekl̦aj, jej aikuj ekkõl wõt. Jijej ear kõmel̦el̦e im ba bwe jem̦l̦o̦kin jukjuk im pãd in enaaj wal̦o̦k ilo jidimkij ak ilo iien eo jejjab kõtmãne kake. Kõn men in, jej aikuj ekkõl wõt.—Riit Matu 24:43.
5, 6. (1) Ewi wãween ad jel̦ã kõn Aelõñ eo an Anij emaroñ jipañ kõj ñan ekkõl wõt? (2) Kõn ad jel̦ã kõn Setan im men eo ej kõm̦m̦ane, etke men in en kar kõm̦m̦an ad kõn̦aan ekkõl wõt?
5 Jijej ear jel̦ã kõn elõñ men ko rem̦m̦an im renaaj kar wal̦o̦k ilju im jekl̦aj. Bõtab, enañin aolep armej ro ipel̦aakin rar jab jel̦ã kõn men kein rem̦m̦an. Jejjab ãinwõt Jijej kõnke ejjab aolep men im jejel̦ã kake. Ikijjeen Jijej, jejel̦ã elõñ men ko kõn Aelõñ eo an Anij im ta eo Aelõñ in enaaj kõm̦m̦ane ilo raan ko rej pedotok. Enañin aolep armej ro rejjab jel̦ã kõn men kein ãinwõt ro ilo jikin jikuul̦, jikin jerbal, ak bukwõn ko jej kwal̦o̦k naan ie. Innem eñin unin jej aikuj bar ekkõl wõt. Ãinwõt Jijej, aolep iien jej aikuj ekkõl im lale iien ko repel̦l̦o̦k ñan ad maroñ jiroñ ro jet kõn men ko jejel̦ã kaki kõn Aelõñ eo an Anij. Iien kein repel̦l̦o̦k relukkuun aorõk, im jejjab kõn̦aan kajekdo̦o̦ni kõnke mour ko an armej ro repãd ilo kauwõtata!—1 Timote 4:16.
6 Jijej ear jel̦ã kõn bar juon men me ear jipañe ñan ekkõl wõt. Ear jel̦ã bwe Setan ear kate e ñan kajjioñ kapoiki im kõm̦m̦an bwe en iioon jum̦ae im matõrtõr, im rupe tiljek eo an ñan Anij. Ri kõjdat in enana Setan ear jab bõjrak jãn an pukot “bar juon iien” ñan an mãlejjoñe Jijej. (Luk 4:13) Iien otemjej Jijej ear ekkõl wõt. Ear kõn̦aan bwe en pojak aolep iien ñan jabdewõt mãlejjoñ enaaj iioone, meñe ear juon menin kapo, jum̦ae, ak matõrtõr. Jej bareinwõt iioon ejja wãween in Jijej ear iioone. Jejel̦ã bwe Setan ej ãinwõt “juon l̦aiõn eo erorror, im ej reito reitak im lale wõn eo emaroñ kañe.” Im jejel̦ã bwe ej wõnm̦aanl̦o̦k wõt ilo an kõm̦m̦ane men in ñan rainin. Eñin unin Baibõl̦ eo ej jiroñ aolep Kũrjin ro: “Kom̦win ekkõl im kõjparok kom̦ make.” (1 Piter 5:8, UBS) Ak ewi wãween jemaroñ kõm̦m̦ane men in?
WÃWEEN JAR EJ JIPAÑ KÕJ ÑAN EKKÕL WÕT
7, 8. Ta naan in kakapilõk eo an kar Jijej kõn jar? Im ta eo jemaroñ katak jãn wãween an kar jar?
7 Baibõl̦ eo ej kwal̦o̦k ñan kõj bwe ñan ad ekkõl wõt, ekanooj aorõk bwe jen jar. Jemaroñ kõjparok kõtaan eo ad ippãn Jeova ilo ad kõm̦m̦ane men in. (Kolosse 4:2; 1 Piter 4:7, UBS) Ejjabto ãlikin an kar Jijej jiroñ rũkal̦oor ro an bwe ren ekkõl wõt ippãn, ear ba: “Kom̦win ekkõl im jar, bwe kom̦win jab del̦o̦ñ ilo kapo.” (Matu 26:41) Naan in jiroñ in an Jijej bwe ren ekkõl im jar ear ke jitõñl̦o̦k wõt ñan iien in me ear kanooj pen ñan er? Ejjab, naan in jiroñ in an ej juon naan in kakapilõk me kõj aolep jej aikuj jerbale raan otemjej.
8 Joñak eo an Jijej ej kwal̦o̦k ñan kõj kõn joñan aorõkin jar. Bõlen kwõj keememej kõn an kar Jijej jar ñan Jemen ium̦win juon boñ. (Riit Luk 6:12, 13, UBS.) Baj pijaik m̦õk iien in: Jijej ej bõlen pãd epaake bukwõn eo etan Kaperneum. Ke ej jok marok, Jijej ej wanlõñl̦o̦k ñan juon iaan tõl ko iturin Lom̦al̦o in Galili. Ke ej reilal̦l̦o̦k jãn tõl eo, bõlen ej lo meram in l̦aam̦ ko ilo Kaperneum im ilo bukwõn ko jet iturin. Innem Jijej ej jino jar im ejjel̦o̦k juon men ej kam̦ad e ke ej kõnono ippãn Jeova. Emootl̦o̦k elõñ awa im Jijej ejjab kile an jino kun kajjojo iaan lamp ko ilo bukwõn ko. Im ejjab kile an jino jakol̦o̦k allõñ ak roñ ainikien menin mour ko. Jijej ej bõlen jar kõn juon pepe eaorõk me ej aikuj kõm̦m̦ane. Ej aikuj pepe kõn wõn ro enaaj kããlõt er bwe ren rijjelõk ro an 12. Bõlen jemaroñ pijaik an Jijej buul̦ jar ñan Jemen bwe en tõl e im lel̦o̦k ñan e mãlõtlõt ke ej kwal̦o̦k ñan E aolep l̦õmn̦ak ko an im men ko ej inepata kaki kõn kajjojo iaan rũkal̦oor ro enaaj kããlõt er.
9. Ta eo jemaroñ katak jãn joñak eo an Jijej ke ear jar ium̦win juon boñ?
9 Joñak in an Jijej ej ke katakin kõj bwe jej aikuj jar ium̦win elõñ awa? Ejjab. Ilo jouj, Jijej ear ba men in kõn rũkal̦oor ro an: “An e kõn̦aan, a kanniõk e m̦õjn̦o̦.” (Matu 26:41) Meñe em̦ool men in, ak jemaroñ anõk joñak eo an Jijej. Ñan waanjoñak, jej ke jar ñan Jemedwõj ilañ m̦okta jãn ad kõm̦m̦an jabdewõt pepe ko me renaaj jelõt tõmak eo ad im ad tiljek ñan e, ekoba ko an ro ilo baam̦le eo ad ak ro ilo eklejia eo? Jej ke jar kõn ri tõmak ro jeid im jatid? Jej ke jar jãn bũruod, ak jej ke ãliji ejja naan ko wõt ñe jej jar? Bar juon men jemaroñ katak jãn Jijej ej bwe ear kaorõk iien an makel̦o̦k iaan im jar ñan Jemen. Ilo lal̦ in rainin me elõñ men armej rej poub kake, elukkuun pidodo ñan mel̦o̦kl̦o̦k men eo eaorõktata. Enaaj l̦apl̦o̦k ad maroñ ekkõl wõt el̦aññe jej kõjenolo̦k el̦ap iien ñan ad makel̦o̦k iaad im jar ñan Jeova jãn bũruod. (Matu 6:6, 7) Jenaaj epaakel̦o̦k Jeova ñe jej kate kõj kõm̦m̦ani aolep men ko me remaroñ kakajoor kõtaan in ad ippãn im kõjparok kõj jãn jabdewõt men im enaaj kam̦õjn̦o̦ik kõtaan in ad ippãn.—Sam 25:14, UBS.
WÃWEEN JEJ EKKÕL WÕT KÕN JERBAL IN KWAL̦O̦K NAAN
10. Ta waanjoñak eo im ej kwal̦o̦k wãween an kar Jijej ekkõl wõt im lale iien ko repel̦l̦o̦k ñan an kwal̦o̦k naan?
10 Jijej ear ekkõl wõt kõn jerbal eo Jeova ear lel̦o̦k bwe en kõm̦m̦ane. Bõlen ewõr jet jerbal ko me juon armej emaroñ m̦ad kake men ko jet ke ej jerbal im emaroñ jab wõr jorrããn. Bõtab, elõñ jerbal ko me ri jerbal ro rej aikuj ekkõl wõt im jab m̦ad kõn men ko jet ñe rej jerbal. Ãindein jerbal in kwal̦o̦k naan. Iien otemjej Jijej ear ekkõl wõt kõn jerbal in an. Ear ekkõl wõt im lale iien ko repel̦l̦o̦k ñan an jiroñ ro jet kõn nuuj eo em̦m̦an. Ñan waanjoñak, ke Jijej im rũkal̦oor ro an rar tõparl̦o̦k bukwõn eo etan Saikar ãlikin aer kar etetal aolepen jibboñin raan eo, rũkal̦oor ro rar ilo̦k im wia kijeer m̦õñã. Jijej ear pãd wõt iturin aebõj lal̦ eo ilo bukwõn eo im kakkije, bõtab ear ekkõl wõt im ear lo juon iien epel̦l̦o̦k ñan an kwal̦o̦k naan. Juon kõrã in Sameria ear itok ñan aebõj lal̦ eo im itõk dãn. Jijej emaroñ kar pepe ñan kiki jidik ilo iien in, ak emaroñ kar l̦õmn̦ak kõn elõñ men ko ñan an jekpen kaki bwe en jab bwebwenato ippãn kõrã in. Bõtab, Jijej ear jino bwebwenato ippãn im ear kwal̦o̦k naan ñan e im ennaan in an ear tokãlik jelõt elõñ armej ro ilo bukwõn eo. (Jon 4:4-26, 39-42) Jemaroñ ke kal̦apl̦o̦k ad kate kõj ñan anõk joñak eo an Jijej ilo ad ekkõl wõt im lale iien ko repel̦l̦o̦k bwe jen kwal̦o̦k naan ñan armej ro jej iioon er aolep raan?
11, 12. (1) Ta eo Jijej ear ba ñan ro im rar kajjioñ kam̦ad e jãn jerbal eo an? (2) Ewi wãween an kar pel̦an mour eo an Jijej?
11 Jet iien, armej ro rem̦m̦an rar kajjioñ kam̦ad Jijej jãn jerbal eo an. Ilo Kaperneum, armej ro ie rar kõn̦aan bwe Jijej en pãd wõt ippãer kõnke Jijej ear kejmour ri nañinmej ro ilo kabwilõñlõñ. Jemaroñ mel̦el̦e unin aer kõn̦aan bwe Jijej en pãd wõt. Bõtab jerbal eo eaorõk an Jijej kar bwe en kwal̦o̦k naan ñan aolep “jiip rej jebwãbwe an nukũn Israel” im jab ilo juon wõt jikin. (Matu 15:24) Jijej ear bareinwõt jiroñ armej rein: “Iaikuj bareinwõt kwal̦o̦k Naan Em̦m̦an kõn Aelõñ in Anij ilo jikin ko jet, bwe eñin un eo Anij ear jilkintok eõ kake.” (Luk 4:40-44, UBS) Innem alikkar bwe men eo eaorõktata ilo mour eo an Jijej kar jerbal in kwal̦o̦k naan eo an. Ear jab kõtl̦o̦k bwe jabdewõt en kam̦ad e jãn jerbal in an.
12 Kõnke Jijej ear lukkuun poub ilo jerbal eo an, mel̦el̦ein ke bwe ear ejjel̦o̦k an iien ñan kakkije im kõm̦m̦ani men ko relimo? Im ear ke jaje kõn aikuj ko an armej ro kõn an kar poub ilo kwal̦o̦k naan? Jaab. Ear pel̦an mour eo an Jijej kõnke ear jab baj poub wõt ilo jerbal in kwal̦o̦k naan. Ear kõm̦m̦ani men ko relimo im ear kobal̦o̦k ippãn ro m̦õttan ilo iien kam̦õn̦õn̦õ ko. Ear tũriam̦okake baam̦le ko im ear l̦ap an mel̦el̦e kõn aikuj ko aer im apañ ko aer. Im ear jab eppat in kwal̦o̦k an yokwe im jiburlep ajri ro.—Riit Mark 10:13-16.
13. Ewi wãween jemaroñ anõk joñak eo an Jijej kõn ekkõl wõt im pel̦an ilo jerbal in kwal̦o̦k naan?
13 Ilo ad anõk joñak eo an Jijej kõn ekkõl wõt, ewi wãween jemaroñ kõm̦m̦an bwe mour eo ad en pel̦an ãinwõt kar e? Jen jab kõtl̦o̦k bwe men ko an lal̦ in ren kam̦ad kõj jãn jerbal in kwal̦o̦k naan. Ro m̦õttad im ro nukũd remaroñ jiroñ kõj ñan kadikl̦o̦k iien ko ad ilo jerbal in kwal̦o̦k naan ak ñan kõttõpar men ko me rejjab nana im remaroñ jipañ kõj. Bõtab, el̦aññe jej anõk Jijej, jerbal in kwal̦o̦k naan enaaj lukkuun aorõk ippãd im jenaaj watõke ãinwõt m̦õñã eo kijed. (Jon 4:34) Jerbal in kwal̦o̦k naan ej jipañ kõj ñan kakajoor kõtaan eo ad ippãn Jeova im ej kam̦õn̦õn̦õik kõj. Bõtab, jekõn̦aan bwe jen pel̦an im jab kõwãnõk kõj ak jab kõm̦m̦ani men ko relimo. Ãinwõt Jijej, jekõn̦aan bwe jen ri karejar ro an ‘Anij eo em̦õn̦õn̦õ’ me rej lañlõñ im pel̦an ilo mour ko aer.—1 Timote 1:11.
WÃWEEN JEJ EKKÕL WÕT ÑE JEJ IIOON WÃWEEN KO REPPEN
14. Ñe jej iioon wãween ko reppen, ta eo jejjab aikuj mel̦o̦kl̦o̦ke? Etke?
14 Ãinwõt ad kar etale, jet iaan naan in kakapilõk ko an Jijej kõn ekkõl wõt ear wal̦o̦k ilo iien ko ear iioon wãween ko reppen. (Riit Mark 14:37.) Ñe jej iioon wãween ko reppen, ekanooj aorõk bwe en l̦ap ad keememej joñak eo an Jijej. Ilo iien jab kein, ekkã an armej ro mel̦o̦kl̦o̦k juon men em̦ool me bok in Jabõn Kõnnaan ej ãliji ruo alen. Ej ba: “Ewõr ial̦ ãinwõt ial̦ e jim̦we ñan juon armej; a jem̦l̦o̦kin, ial̦ ko in mej.” (Jabõn Kõnnaan 14:12; 16:25) El̦aññe jej atartar ioon jel̦ãl̦o̦kjen̦ eo ad make, el̦aptata ñe jej iioon wãween ko relukkuun pen, jemaroñ likũt mour eo ad im ro rejitõnbõro ippãd ilo kauwõtata.
15. Ta eo juon bõran baam̦le me epen an kabwe aikuj ko an baam̦le eo an emaroñ kõn̦aan kõm̦m̦ane?
15 Ñan waanjoñak, emaroñ lukkuun pen ñan an juon bõran baam̦le kabwe aikuj ko an “baam̦le eo an make.” (1 Timote 5:8, UBS) Men in emaroñ kõm̦m̦an an kõn̦aan bõk juon jerbal me emaroñ kõm̦m̦an an jako jãn iien kweilo̦k ko. Ak emaroñ kõm̦m̦an an kajejtokjãn eddo eo an ñan katak ippãn lio pãleen im ajri ro nejierro ak bõk kun̦aan ilo jerbal in kwal̦o̦k naan. El̦aññe bõran baam̦le in ej kõm̦m̦ani men ko me ej l̦õmn̦ak rejim̦we, innem enaaj l̦õmn̦ak bwe an bõk jerbal in ej juon men ejim̦we ñan an kõm̦m̦ane. Emaroñ luuji jem̦jerã eo an ippãn Jeova ak oktak im jum̦aeiki. Enaaj l̦apl̦o̦k an em̦m̦an ñe ej l̦oor naan in kakapilõk eo ilo Jabõn Kõnnaan 3:5, 6. Solomon ear ba: “Kwõn lõke Jeova kõn aolepen bũruom̦, im kwõn jab atartar ioon jel̦ãl̦o̦kjen̦ eo am̦. Kwõn kwal̦o̦k E ilo ial̦ ko am̦ otemjel̦o̦k, innem Enaaj ba kajjien ial̦ ko am̦.”
16. (1) Ta eo jej katak jãn joñak eo an Jijej ke ear atartar wõt ioon jel̦ãl̦o̦kjen̦ eo an Jeova? (2) Ewi wãween an elõñ bõran baam̦le ko anõke joñak eo an Jijej ñe rej iioon wãween ko reppen?
16 Ke Jijej ear iioon mãlejjoñ ko reppen, ear jab atartar ioon jel̦ãl̦o̦kjen̦ eo an make. Baj l̦õmn̦ak m̦õk kõn men in. Armej eo emãlõtlõt tata ioon kar lal̦ in ear kããlõt ñan jab atartar ioon jel̦ãl̦o̦kjen̦ eo an make. Ñan waanjoñak, ke Setan ear kajjioñ kapoiki, elõñ alen Jijej ear uwaak im ba: “Ar jeje.” (Matu 4:4, 7, 10) Jijej ear atartar ioon jel̦ãl̦o̦kjen̦ eo an Jemen ñan jum̦aeiki menin kapo ko. Ilo an kar kõm̦m̦ane men in, Jijej ear kwal̦o̦k ettã bõro. Eñin men eo ejjel̦o̦k ippãn Setan im ekanooj dike. Jej ke atartar ioon jel̦ãl̦o̦kjen̦ eo an Jeova? Juon bõran baam̦le me ej ekkõl wõt ãinwõt kar Jijej ej kõjerbale Naan in Anij ñan tõl e, el̦aptata ilo iien ko reppen. Ilo pel̦aakin lal̦ in, elõñ to̦ujin bõran baam̦le ko rej kõm̦m̦ane men in. Meñe emaroñ pen ñan aer kabwe aikuj ko an baam̦le ko aer, ak rej likũt m̦okta Aelõñ eo an Anij im kabuñ eo em̦ool. Ilo aer kõm̦m̦ane men in, rej kalikkar bwe el̦ap aer kea im kaorõke baam̦le ko aer. Im ãinwõt an kar Jeova kallim̦ur, enaaj kajeraam̦m̦an rein kõn aer pukot kilen ñan kabwe aikuj ko an baam̦le ko aer.—Matu 6:33.
17. Ta eo ej kõm̦akũt eok ñan anõke joñak eo an Jijej kõn ekkõl wõt?
17 Ejjel̦o̦k pere bwe joñak eo an Jijej kõn ekkõl ej joñak eo em̦m̦antata. Joñak eo an emaroñ jipañ im lo̦mo̦o̦ren mour ko an armej ro. Keememej bwe Setan ekõn̦aan kam̦ad eok, kam̦õjn̦o̦ik tõmak eo am̦, kadikl̦o̦k am kijejeto ilo kabuñ eo an Jeova, im kõm̦m̦an bwe en jako am̦ tiljek ñan Anij. (1 Tessalonika 5:6, UBS) Jab kõtl̦o̦k bwe Setan en wiin! Kwõn ekkõl wõt ãinwõt kar Jijej. Kõm̦m̦an iien ñan am̦ jar jãn bũruom̦, lale iien ko repel̦l̦o̦k ñan am̦ kwal̦o̦k naan, im lõke Jeova ñe kwõj iioon wãween ko reppen. Ilo am̦ kõm̦m̦ane men in, kwõnaaj lo m̦õn̦õn̦õ kiiõ ke kwõj kõttare wõt an itok jem̦l̦o̦kin jukjuk im pãd in enana. El̦aññe kwõj ekkõl wõt, innem ñe Jijej enaaj itok im ko̦kkure jukjuk im pãd in enana enaaj lo bwe kwõjjab m̦ad im kwõj poub wõt ilo am̦ jerbal ñan Anij. Jeova enaaj lukkuun m̦õn̦õn̦õ in kajeraam̦m̦an eok kõn am̦ tiljek!—Revelesõn 16:15.
[Kajitõk ko ñan katak]
[Pija eo ilo peij 16]
Jijej ear kwal̦o̦k naan ñan kõrã eo iturin aebõj lal̦ eo. Kwõj ke kortokjãn iien ko repel̦l̦o̦k kajjojo raan ñan am̦ kwal̦o̦k naan?
[Pija eo ilo peij 17]
El̦aññe kwõj jipañ baam̦le eo am̦ bwe en kajoor kõtaan eo aer ippãn Jeova, kwõj kwal̦o̦k bwe kwõj ekkõl wõt
