Ebream​—Juon Armej El̦ap An Peran

Ebream ej pãd im lale an lio pãleen im ro nukũn kab ri karejar ro an kam̦weiuk ñan aer pojak in ilo̦k ñan Kenean. (Jenesis 12:1-5) Jarlepju in armej rein rej atartar ioon Ebream ñan kabwe aikuj ko aer. Im ke ej reil̦o̦k im lale jarlepju in, ej kile bwe ej an eddo ñan kõjparok armej lõñlõñ rein. Enaaj ewi wãween an kabwe aikuj ko aer ñe renaaj pãd ilo ãne eo im rejaje kake? Emaroñ ke kar pidodol̦o̦k an Ebream kabwe aikuj ko aer ilo Õr ijo kapijukuneer, ijo me el̦ap mel̦an ko ie, em̦m̦an bwidej eo ie ñan ekkat, im el̦ap dãn ie? Ak ta el̦aññe Ebream enaaj nañinmej ak mej ilo ãne eo ekããl rej jibadekl̦o̦k? Wõn eo enaaj kiiõ kõjparok baam̦le eo an? Meñe Ebream emaroñ kar inepata kõn aolep men kein, ak ear jab kõtl̦o̦k bwe an inepata en kabõjrak e jãn an pokake Anij. Em̦õj an Ebream peek ilo bũruon ñan pokake Anij jekdo̦o̦n ta eo emaroñ wal̦o̦k ak iioone. Men in ear kalikkar bwe Ebream ear lukkuun peran.

TA IN PERAN? Juon eo eperan ekajoor atin im ejjab pikõt ak puwal̦. Meñe juon armej emaroñ peran, jet iien enaaj mijak in kõm̦m̦ane jet men. Bõtab, el̦aññe Anij ej lel̦o̦k peran ñan armej ro an, renaaj wõnm̦aanl̦o̦k wõt im kõm̦m̦ane men eo ejim̦we meñe remijak.

EWI WÃWEEN EBREAM EAR KWAL̦O̦K AN PERAN? Ebream ear m̦õn̦õn̦õ in pokake Anij meñe men in ear kwal̦o̦k an oktak jãn armej ro jet. Ebream ear dik im rũttol̦o̦k ilo juon jikin me armej ro ie rar kabuñ ñan elõñ anij im ekjab ko. Ebream ear jab ãinwõt armej rein, im ear jab kõtl̦o̦k bwe mijak armej en bõbraiki jãn an kõm̦m̦ane men eo ejim̦we. Ebream ear kwal̦o̦k an peran ilo an kar kããlõt ñan kabuñ ñan juon wõt Anij, ej Jeova, ‘Anij eo Eutiejtata.’​—Jenesis 14:21, 22.

Ebream ear likũt an kabuñ ñan Anij eo em̦ool bwe en men eo m̦oktata jãn m̦weiuk ko. Ebream ear m̦õn̦õn̦õ in ilo̦k jãn Õr, ijo ear em̦m̦an kõjeãn ie kõnke ear kanooj lõke bwe Jeova enaaj lale im kabwe aikuj ko an. Elõñ iiõ ko remootl̦o̦k, bõlen Ebream ear eml̦o̦ke an kar em̦m̦an kõjeãn ilo Õr. Meñe ãindein, ak ear jel̦ã bwe iien otemjej Jeova enaaj kabwe aikuj ko an im baam̦le eo an. Ebream ear watõk Jeova ãinwõt Eo eaorõktata ilo mour eo an im men in ear kaperan e ñan pokake kien ko an Anij.

TA KO JEMAROÑ KATAK JÃN MEN IN? Jemaroñ anõke Ebream ilo ad peran in pokake Jeova meñe ro jet rejjab pokake e. Ñan waanjoñak, Baibõl̦ ej ba bwe ro im rej jutak pen kõn tõmak eo aer ilo Jeova Anij remaroñ iioon jum̦ae. Bõlen jet ro m̦õttaer ak ro nukũer remaroñ jum̦ae er kõnke rej l̦õmn̦ak bwe rej jipañ  er. (Jon 15:20) Ak ñe el̦ap ad tõmaki men ko jaar katak kõn Jeova, jenaaj jutak pen kõn tõmak in ad, bõtab ilo juon wãween im ej kwal̦o̦k kautiej.​—1 Piter 3:15.

Jemaroñ bareinwõt lõke naan in kallim̦ur eo an Anij bwe enaaj kõke aikuj ko an ro im rej likũt aer tõmak ilo e. Ñe jej lõke Anij ilo men in, innem jenaaj peran in likũt Jeova m̦oktata ilo mour eo ad im jab m̦weiuk ko ak aikuj ko ad. (Matu 6:33) Jen lale ewi wãween an kar juon baam̦le kõm̦m̦ane men in.

Ewõr ruo l̦addik nejin Doug im Becky. Erro ar kõn̦aan bwe aoleper ren em̦m̦akũtl̦o̦k ñan juon aelõñ me el̦ap an aikuj jipañ ñan kwal̦o̦k naan kõn nuuj eo em̦m̦an ilo Baibõl̦. Ãlikin aer kar lukkuun etale men in im jar kake, rar wõnm̦aanl̦o̦k wõt kake pepe in aer. Doug ear ba, “Kõnke kõmar jaje el̦aññe enaaj tõprak karõk ko am, kõmar aikuj kwal̦o̦k peran ke kõmar bõk ajri ro im em̦m̦akũt ñan bar juon aelõñ. Bõtab, ilo jinoin ameãñ kar pepe kõn men in, kõmar bwebwenato ippãn doon kõn joñak eo an Ebream im Sera. Ilo amim kar etale wãween aerro kar lõke Jeova im an kar Jeova jab likjab jãn an lale er, men in ear lukkuun jipañ kõm.”

Doug ej kwal̦o̦k kõn mour eo aer ilo jikin eo rar em̦m̦akũtl̦o̦k ñane. Ej ba: “Ekanooj l̦ap amim jeraam̦m̦an. Wãween mour elukkuun pidodol̦o̦k. Enañin aolep raan kõmeãñ ej maroñ in kõm̦m̦ani elõñ men ko ippãn doon ãinwõt juon baam̦le. Kõmeãñ ej kwal̦o̦k naan, bwebwenato ippãn doon, im iukkure ippãn l̦addik ro nejũm̦ro. El̦ap amim m̦õn̦õn̦õ kõn men in.”

Em̦ool bwe ejjab aolep remaroñ em̦m̦akũt ñan bar juon aelõñ ñan jipañ ilo jerbal in kwal̦o̦k naan. Bõtab, kõj aolep jemaroñ anõke joñak eo an Ebream. Ewi wãween? Ikijjeen ad likũt bwe ad kabuñ ñan Anij en m̦oktata ilo mour ko ad im ilo ad lõke bwe enaaj jipañ kõj. Ñe jej kõm̦m̦ane men in, jej l̦oor naan in rõjañ eo ilo Baibõl̦ bwe jen “peran im ba, ‘Jeova ej aõ Ri jipañ, I jamin mijak.’”​—Hibru 13:5, 6.

[Bo̦o̦k/Pija eo ilo peij 7]

Juon Kõrã Ear Kanooj Em̦m̦an im Kabuñbũruon Anij

Sera ear pãleek juon em̦m̦aan eo ear l̦ap an tiljek. Kõrã in me ear mour ekkar ñan wãween eo ej kabuñbũruon Anij ear bar likũt juon joñak em̦m̦an ñan kõj aolep. Ilo m̦ool, jilu alen an Baibõl̦ eo kwal̦o̦k kõn etan ke ej kõnono kõn joñak eo an em̦m̦an. Aolep kõrã ro im rekõn̦aan mour ilo wãween eo ej kabuñbũruon Anij rej aikuj l̦oor joñak eo an Sera. (Aiseia 51:1, 2; Hibru 11:11; 1 Piter 3:3-6) Meñe ejjab l̦ap an Baibõl̦ eo kwal̦o̦k kõn Sera, ak jemaroñ kile bwe ear juon kõrã ekanooj em̦m̦an.

Ñan waanjoñak, baj l̦õmn̦ak m̦õk kõn eñjake im l̦õmn̦ak eo an Sera ke Ebream ear jiroñe bwe Anij ear kõn̦aan bwe ren em̦m̦akũt jãn Õr. Sera ear ke kõn̦aan jel̦ã ia eo renaaj jibadeke im taunin aer em̦m̦akũt? Ear ke inepata kõn aikuj ko aer? Ear ke bũrom̦õj in ilo̦k jãn ro m̦õttan im baam̦le eo an ke ear jaje ñe enaaj bar lo er? Ejjel̦o̦k pere bwe Sera ear l̦õmn̦ak kõn aolep men kein. Mekarta, ear m̦õn̦õn̦õ in em̦m̦akũt jãn Õr kõnke ear lõke bwe Anij enaaj kajeraam̦m̦an e kõn an pokake e.​—Jerbal 7:2, 3.

Sera ear juon ri karejaran Anij, eo ear pokake. Ejjab men in wõt, ak Sera ear bar juon lio pãlele ekanooj em̦m̦an. Sera ear jab jiãiiki l̦eo ippãn ilo an kajjioñ kõm̦m̦an bwe e eo en tõl baam̦le eo. Ijello̦kun an kõm̦m̦ane men in, Sera ear kautiej l̦eo ippãn im ear rejetak l̦eo ke ear tõl baam̦le eo aerro. Ilo an kar Sera kõm̦m̦ane wãween kein rem̦m̦an, ear kalikkar an em̦m̦an bũruon.​—1 Piter 3:1-6.

Joñak in an Sera emaroñ ke jipañ lim̦aro ri pãlele rainin? Juon kõrã etan Jill ej ba, “Joñak eo an Sera ear katakin eõ bwe in jab ãliklik in kwal̦o̦k l̦õmn̦ak ko aõ ñan l̦eo ippa. Ak ilo ejja iien eo wõt, ij kile bwe kõnke l̦eo ippa ej bõran baam̦le eo, ej an eddo ñan kõm̦m̦an pepe. Ãlikin an kõm̦m̦ane pepe eo, ij aikuj kõm̦m̦ane ijo kun̦aaõ ñan kate eõ rejetake pepe eo bwe en tõprak.” Elõñl̦o̦k jãn 30 iiõ in an Jill im l̦eo ippãn pãlele, im erro ej m̦õn̦õn̦õ wõt ippãn doon.

Ewõr bar juon men jemaroñ katak jãn Sera im bõlen men in emaroñ l̦aptata an tõpar bũruod. Ta in? Eokwe, meñe Sera ear kanooj deo̦, ak ear jab kõtl̦o̦k bwe men in en kõm̦m̦an an utiej bũruon. (Jenesis 12:10-13) Sera ear kõttãik bũruon ilo an kar rejetake Ebream aolep iien jekdo̦o̦n ta men ko rar wal̦o̦k. Alikkar bwe Ebream im Sera rar tiljek, ettã bũrueerro, im kwal̦o̦k yokwe. Rej jet ri pãlele me el̦ap aerro kar jeraam̦m̦an kake doon.