Ebream​—Juon Armej El̦ap An Yokwe

El̦ap an Ebream bũrom̦õj. Sera, lio pãleen im ejitõnbõro ippãn ear mej. Elõñ men ko rem̦m̦an l̦al̦l̦ap in ej emel̦ake tok ke ej kalibwini lel̦l̦ap in pãleen. Kõn an bũrom̦õj, Ebream ej jañ. (Jenesis 23:1, 2) Bõtab, men in ejjab kajook e. Dãnin kemjalal ko an Ebream ej kein kam̦ool bwe e juon armej el̦ap an yokwe. Men in ej juon iaan men ko rem̦m̦antata kõn Ebream.

TA IN YOKWE? Yokwe ej juon eñjake ekajoor kõn juon men ak juon armej. Juon armej ej kwal̦o̦k an yokwe ro jet ilo men ko ej kõm̦m̦ani. Enaaj kwal̦o̦k wõt yokwe meñe enaaj aikuj kaarmejjete kõn̦aan ko an.

EWI WÃWEEN AN KAR EBREAM KWAL̦O̦K YOKWE? Ebream ear kwal̦o̦k bwe ear yokwe baam̦le eo an. Em̦ool bwe Ebream ear juon em̦m̦aan epoub. Meñe ãindein, ear jab likjab jãn an katakin baam̦le eo an kõn Jeova. Im ear jab kõjekdo̦o̦n eñjake im l̦õmn̦ak ko an baam̦le eo an. Jeova make ear kile bwe Ebream ear juon bõran baam̦le me ear tõl baam̦le eo an bwe ren kabuñ ñan Anij. (Jenesis 18:19) Ejjab men in wõt ak Jeova ear kwal̦o̦k bwe ewõr yokwe ippãn Ebream. Jeova ear kwal̦o̦k kõn men in ke ear ba ñan Ebream: “Aisak, eo kwõj yokwe.”​—Jenesis 22:2.

Jemaroñ bareinwõt kile yokwe eo an Ebream ilo men eo ear kõm̦m̦ane ke ear mej Sera, lio pãleen im ejitõnbõro ippãn. Ebream ear jañũti Sera. Meñe ear juon eo eperan im ekajoor, ak ear jab jook in kwal̦o̦k an bũrom̦õj. Ebream ear kalikkar bwe juon eo ekajoor ejjab m̦õjn̦o̦ im puwal̦ ñe ej kwal̦o̦k an bũrom̦õj.

 Ebream ear kwal̦o̦k bwe ear yokwe Anij eo an. Ilo aolepen mour eo an Ebream, ear kwal̦o̦k an yokwe Anij. Ewi wãween an kar kõm̦m̦ane men in? Bõlen jemaroñ keememej men eo Baibõl̦ ej ba ilo 1 Jon 5:⁠3. Ej ba: “Eñin yokwe Anij, bwe jen kõjparok kien ko An.” Ebream ej juon joñak ekanooj em̦m̦an kõn an kar kwal̦o̦k an yokwe Anij.

Kajjojo iien ke Jeova ear lel̦o̦k kakien ko ñan Ebream, Ebream ear m̦õkaj im pokake. (Jenesis 12:4; 17:22, 23; 21:12-14; 22:1-3) Ebream ear pokake jekdo̦o̦n ñe ear pidodo ak pen kien eo im meñe ear jab jel̦ã taunin an Jeova jiroñe bwe en l̦oore kien eo. Ear jab watõk men kein. El̦aññe Anij eo an ear kõn̦aan bwe en kõm̦m̦ane juon men, innem ear m̦õn̦õn̦õ in l̦oore. Ebream ear watõk kajjojo iaan kakien ko Jeova ear lil̦o̦k ñan e ãinwõt juon iien epel̦l̦o̦k ñan an kwal̦o̦k an yokwe E.

TA KO JEMAROÑ KATAK JÃN MEN IN? Jemaroñ anõk Ebream ilo ad kwal̦o̦k ad yokwe ro jet, el̦aptata ro im rej uwaan baam̦le eo ad. Jejjab kõn̦aan kõtl̦o̦k bwe ijjiped ko an mour in ren kõm̦m̦an bwe en ejjel̦o̦k ad iien ippãn ro rejitõnbõro ippãd.

Jej aikuj bareinwõt kal̦apl̦o̦k ad yokwe Jeova kõn aolepen bũruod. Yokwe in emaroñ kõm̦akũt kõj ñan kõm̦m̦ani elõñ men ko ilo mour ko ad. Ñan waanjoñak, emaroñ lujur kõj ñan kõm̦m̦an oktak ko ilo wãween ad kõnono, ad l̦õmn̦ak, im ilo kõm̦m̦an ko ad bwe jen maroñ kabuñbũruon Anij.​—1 Piter 1:14-16.

Em̦ool bwe ejjab aolep iien epidodo ñan pokake kien ko an Jeova. Bõtab, Jeova ear jipañe Ebream, eo im ear ãñiñin e im ba “jera.” Kõn men in, jemaroñ lõke bwe enaaj bar jipañ kõj. (Aiseia 41:8) Baibõl̦ eo ej kallim̦ur bwe Anij ‘enaaj kapen im kakajoor’ eok. (1 Piter 5:10) Eñin ej kallim̦ur eo an Jeova, eo im ear Jeran Ebream!

[Bo̦o̦k eo ilo peij 10]

Ñe Juon Em̦m̦aan Ej Jañ Mel̦el̦ein Ke bwe Em̦õjn̦o̦ im Puwal̦?

Elõñ remaroñ uwaak im ba aet ñan kajjitõk in. Bõtab, armej rein remaroñ bwilõñ ñe renaaj katak im jel̦ã bwe ejjab Ebream wõt ak elõñ bar em̦m̦aan ro rekajoor im retiljek me Baibõl̦ ej kwal̦o̦k bwe rar jañ ke rar iioon wãween ko reppen. Rein ekitibuj Josep, Devid, rijjelõk Piter, em̦m̦aan ro rar lale eklejia eo ilo Epesõs, im bareinwõt Jijej. (Jenesis 50:1; 2 Samuel 18:33; Luk 22:61, 62; Jon 11:35; Jerbal 20:36-38) Innem alikkar bwe Baibõl̦ eo ejjab ba bwe em̦m̦aan ro rem̦õjn̦o̦ im repuwal̦ ñe rej jañ.