Kar Wõn In Ebream?

EWÕR jet armej ro im el̦ap an kabuñ ko ipel̦aakin lal̦ in kautieje er. Ri Ju ro, Ri Muslim ro, im Kũrjin ro, er aolep el̦ap aer kautiej Ebream. * (Lale kõmel̦el̦e eo itulal̦.) Armej in ej juon eo ebuñbuñ ilo Baibõl̦ im ear kanooj l̦ap an tõmak. Baibõl̦ eo ej n̦aetan “jemen ro otemjej rej tõmak.”​—Rom 4:11.

Etke el̦ap an armej ro kautieje Ebream? Juon un ej kõnke Ebream ej armej eo wõt me Baibõl̦ eo ej kwal̦o̦k bwe ear jeran Anij. Im jilu alen an wal̦o̦k men in ilo Baibõl̦!​—2 Kronikel 20:7; Aiseia 41:8; Jemes 2:23.

Bõtab, wãween mour eo an Ebream ej ãinl̦o̦k wõt bar kõj. Ear iioon ejja apañ im mãlejjoñ ko wõt jej iiooni. Im ear maroñ lo tõprak ilo an kijenmej kõn men kein. Kokõn̦aan ke jel̦ã ewi wãween bwe en kar lo tõprak? Eokwe, jen lale ta eo Baibõl̦ eo ej kwal̦o̦k kake kõn armej in em̦m̦an.

Ijo Ear Dik im Rũttol̦o̦k Ie

Ebream ear l̦otak ilo iiõ eo 2018 m̦okta jãn Kũraij, im ear dik im rũttol̦o̦k ilo juon bukwõn etan Õr. (Jenesis 11:27-31) Õr ear juon jikin kweilo̦k el̦ap im ekanooj m̦weiie. Ear bareinwõt l̦ap kabuñ ñan ekjab ilo jikin in. Jemen Ebream etan Tira, emaroñ kar m̦õttan armej ro rar kabuñ ñan ekjab ko. (Joshua 24:2) Ak, Ebream ear peek ilo bũruon ñan kabuñ ñan Jeova wõt im ear jab kabuñ ñan ekjab kein im rej anij waan. * (Lale kõmel̦el̦e eo itulal̦.)

Ta eo ear kõm̦akũt Ebream bwe en kabuñ ñan Jeova wõt? Eokwe, Ebream ear l̦otak 150 iiõ ko m̦okta jãn an kar mej l̦eo nejin Noa etan Shem. El̦aññe ear pãd ippãn l̦al̦l̦ap in, emaroñ kar lõñ men ko ear katak jãn e. Ebream emaroñ kar roñ ippãn Shem kõn ta ko rar wal̦o̦k ke rar el̦l̦ã im mour jãn Ibwijleplep eo. Emaroñ kar bareinwõt katak bwe elukkuun aorõk kabuñ ñan Jeova, Anij eo im ear lo̦mo̦o̦ren Shem im baam̦le eo an ke ear Ibwijleplep lal̦ in.

Jekdo̦o̦n wõn eo Ebream ear roñ kõn Jeova jãn e ak ta eo bwe en kar jel̦ã kõn e, ak ear tõmaki men ko ear roñ kaki kõn Anij eo em̦ool. Ke Jeova, eo im ej “mãlejjoñ bõro ko,” ear loe m̦akũtkũt ko an Ebream, ear lo bwe ej juon armej em̦m̦an. Innem, Jeova ear jipañ Ebream bwe en l̦apl̦o̦k wõt an juon armej eo em̦m̦an.​—Jabõn Kõnnaan 17:3; 2 Kronikel 16:9.

Mour eo An

Elõñ men ko rekaitoktoklimo rar wal̦o̦k ilo mour eo an Ebream. Jet iien ear iioon apañ ko reppen bõtab ear lo jokwane im m̦õn̦õn̦õ wõt. Jen lale jet iaan men ko ear iiooni.

▪ Ke Ebream ear jokwe ilo Õr, Anij ear jiroñ e bwe en em̦m̦akũt jãn ãneo ear l̦otak ie im etal ñan juon ãne Enaaj bakajjien ñan e. Ebream im Sera rar pokake meñe rar jab jel̦ã ia eo renaaj etal ñane ak etke Anij ear kajjitõk ippãerro bwe ren em̦m̦akũt. Tokãlik, Ebream im Sera rar jokwe ilo im̦õn kabbed ko ak em̦ nuknuk ko ilo Kenean im rar mour ãinwõt ro ri itoitak im ruwamãejet m̦ae iien eo rar mej.​—Jerbal 7:2, 3; Hibru 11:8, 9, 13.

▪ Ke Ebream im Sera rar jab maroñ neje, Jeova ear kallim̦ur bwe enaaj kõm̦m̦an bwe juon aelõñ el̦ap en wal̦o̦k jãn Ebream. Ear bareinwõt ba bwe kõn Ebream armej otemjej  ioon lal̦ in renaaj jeraam̦m̦an. (Jenesis 11:30; 12:1-3) Tokãlik Jeova ear bar kalikkar bwe enaaj kajejjet wõt kallim̦ur in an. Ear jiroñ Ebream bwe ro ineen renaaj kanooj lõñ ãinwõt iju ko ilañ.​—Jenesis 15:5, 6.

▪ Ke Ebream ear 99 an iiõ im Sera ear kepaak 90 an iiõ, Jeova ear kallim̦ur bwe enaaj wõr juon nejierro l̦addik. Emaroñ kar pen ñan tõmake men in, bõtab tokãlik Ebream im Sera rar katak im jel̦ã bwe ejjel̦o̦k men en̦ “Jeova ejjab maroñ e.” (Jenesis 18:14) Juon iiõ tokãlik, ke Ebream ear 100 an iiõ ear wõr juon nejin l̦addik im ear n̦aetan Aisak. (Jenesis 17:21; 21:1-5) Anij ear kallim̦ur bwe ikijjeen Aisak, enaaj kajeraam̦m̦an armej otemjej.

▪ Elõñ iiõ ko tokãlik, Jeova ear kajjitõk ippãn Ebream ñan kõm̦m̦ane juon men epen. Ear kajjitõk ippãn Ebream bwe en katok kõn Aisak, likao eo im ej make wõt nejin. Jeova ear kajjitõk ippãn men in meñe Aisak ejañin kar eppãlele im wõr nejin ilo iien in. Ebream emaroñ kar bũrom̦õj bwe enaaj mej likao eo nejin, bõtab ear pojak in pokake Jeova im katok kõn Aisak. Ebream ear lukkuun tõmak bwe Anij ewõr an maroñ ñan bar kõmour Aisak bwe En kajejjet kallim̦ur ko an. (Hibru 11:19) Ke Ebream ear iten jino katok kõn l̦eo nejin, Anij ear kabõjrake im ba en jab m̦an Aisak. Ear nõbar Ebream kõn an kar pokake meñe ekar pen ñan e. Innem, Jeova ear bar ãliji kallim̦ur ko an ñan Ebream.​—Jenesis 22:1-18.

▪ Ke Ebream ear 175 an iiõ, ear mej. Baibõl̦ ej ba kõn Ebream: “E mej ilo an l̦al̦l̦ap em̦m̦an, armej e rũtto im lõñ an iiõ.” (Jenesis 25:7, 8) Innem, Ebream ear lo an jejjet juon iaan kallim̦ur ko an Anij ñan e bwe enaaj lõñ iiõ in an mour m̦okta jãn an mej.​—Jenesis 15:15.

An Buñbuñ

Ebream ear jab baj juon armej ebuñbuñ ilo iien ko etto ilo Baibõl̦. Bwebwenatoun Ebream ej buñbuñ tok wõt ñan rainin im joñak eo an ekanooj aorõk ñan kõj. (Hibru 11:8-10, 17-19) Jen lale emãn iaan men ko rem̦m̦an me Ebream ear kwal̦o̦ki ilo mour eo an. Kiiõ jenaaj etale men eo el̦ap an buñbuñ kake. Ta in? Ej tõmak eo an.

[Komel̦el̦e eo itulal̦]

[Bo̦o̦k eo ilo peij 4]

Juon Armej Ebuñbuñ ilo Baibõl̦

Ilo bok in Jenesis jebta 1 ñan 10, Baibõl̦ ej kwal̦o̦k kõn bwebwenatoun elõñ em̦m̦aan ro im ear l̦ap aer tõmak, ekoba Ebel, Inok, im Noa. Bõtab, ilo jebta 11 ñan 25 el̦ap wõt an kõnnaan kõn mour eo an juon wõt em̦m̦aan, ej Ebream.

Bareinwõt, Baibõl̦ eo ej kwal̦o̦k jet naan ko raorõk me jinointata in aer wal̦o̦k ilo Baibõl̦, ej ilo bwebwenatoun Ebream. Ñan waanjoñak, ilo bwebwenatoun mour eo an Ebream jej lo . . .

▪ eoon eo jinointata im ej kwal̦o̦k bwe Anij ej Likõpejñak ak Ri Kõjparok ro doon.​—Jenesis 15:1; lale Duteronomi 33:29; Sam 115:9; Jabõn Kõnnaan 30:5.

▪ eoon eo jinointata me ej kwal̦o̦k kõn tõmak ilo Anij.​—Jenesis 15:6.

▪ eoon eo jinointata im ej kwal̦o̦k kõn naan in ri kanaan.​—Jenesis 20:7.

▪ eoon eo jinointata im ej kwal̦o̦k yokwe eo an juon jemen im jinen ñan nejin.​—Jenesis 22:2.