Kate Wõt Eok im Kaorõk Jerbal in Kwal̦o̦k Naan

“Kwõn kwal̦o̦k naan, kwõn kate eok.”​—2 TIMOTE 4:2.

KWÕMAROÑ KE KÕMEL̦EL̦E?

Etke Kũrjin ro ilo jinoin rar kate er im kaorõk jerbal in kwal̦o̦k naan?

Ewi wãween jemaroñ kate wõt kõj im kaorõk jerbal in kwal̦o̦k naan?

Etke jerbal in kwal̦o̦k naan elukkuun l̦apl̦o̦k an aorõk kiiõ jãn kar m̦okta?

1, 2. Ta mel̦el̦ein an kar Paul ba bwe jen “kate” kõj ilo jerbal in kwal̦o̦k naan, im ta kajjitõk ko jenaaj etali?

 RO ME jerbal eo aer ej ñan jipañ lo̦mo̦o̦ren mour ko an armej ekkã aer kate er im kaorõk jerbal jab in aer. Ñan waanjoñak, ri jerbal ro me rej kune kijeek ko rej buul̦ l̦o̦k ñan ijo ewal̦o̦k jorrããn eo ie kõnke rejel̦ã bwe mour ko an armej ro repãd ilo kauwõtata.

² Kõj Ri Kõnnaan ro an Jeova jekõn̦aan jipañ armej ro bwe ren bõk lo̦mo̦o̦r. Eñin unin jej kaorõk jerbal in kwal̦o̦k naan im katakin armej ro kõn nuuj eo em̦m̦an kõn Aelõñ eo. Ak meñe jerbal in elukkuun aorõk, ejjab mel̦el̦ein bwe jej jeparujruj im kõm̦m̦ani men ko m̦okta jãn ad l̦õmn̦ak. Innem ta mel̦el̦ein naan in kakapilõk in an rijjelõk Paul ke ear ba: “Kwõn kwal̦o̦k naan, kwõn kate eok”? Juon eo ej jerbal im kate e eban aepedped ak kañ iien. (2 Timote 4:2) Ewi wãween jemaroñ kate kõj ilo jerbal in kwal̦o̦k naan? Im etke jerbal in ekanooj in aorõk?

ETKE JERBAL IN KWAL̦O̦K NAAN ELUKKUUN AORÕK?

3. Ta eo enaaj wal̦o̦k ñan ro rej roñjake nuuj eo em̦m̦an kõn Aelõñ eo im ro me rejjab roñjake?

³ Ñe kwõj l̦õmn̦ak kõn wãween jerbal in kwal̦o̦k naan emaroñ lo̦mo̦o̦ren mour ko an armej ro, kwõmaroñ kile joñan an aorõk ñan am̦ karoñ ro jet kõn nuuj eo em̦m̦an. (Rom 10:13, 14) Naan in Anij ej ba: “Ñe Ij ba ñan juon ri nana, ‘Ilo m̦ool kwõnaaj mej,’ im ej oktak jãn jerawiwi ko an, im ej kõm̦m̦an jim̦we im wãnõk, . . . enaaj mour im jab mej. Re ban keememej n̦ae e aolep jerawiwi ko an ko ear jerawiwi kaki.” (Ezekiel 33:14-16) Baibõl̦ eo ej ba naan kein ñan ro rej kwal̦o̦k naan kõn nuuj eo em̦m̦an: “Kwõ naaj make lo̦mo̦o̦ren eok, kab ro rej roñjake eok.”​—1 Timote 4:16; Ezekiel 3:17-21.

4. Etke Timote ear aikuj in lukkuun kate wõt e?

⁴ Ñan ad maroñ mel̦el̦e kõn unin an kar Paul lukkuun kakapilõk Timote bwe en kate wõt e, jej aikuj riiti eoon eo an katak in im eoon ko jet ilo jebta 4. Ilo 2 Timote 4:2-4 ej  ba: “Kwõn kwal̦o̦k naan, kwõn kate eok ilo iien em̦m̦an im e nana; kajim̦we, im en̦o̦ik, im kauwe kõn meanwõd otemjej im katakin. Bwe iien enaaj itok ñe renaaj dike katak em̦m̦an, a kõn m̦õm̦ ko aer renaaj koorl̦o̦k ro ri kaki ñan er make, ro renaaj kwal̦o̦k men ko re kõn̦aan roñ, im renaaj oktakl̦o̦k lo̦jilñier jãn m̦ool.” Jijej ear kanaan bwe enaaj wõr ro im renaaj jum̦ae m̦ool eo. (Matu 13:24, 25, 38) Eñin unin an kar aorõk bwe Timote en bareinwõt “kwal̦o̦k naan” ilowaan eklejia eo kõnke ro rej jum̦ae m̦ool eo ren jab maroñ kareel Kũrjin ro im m̦on̦e er kõn katak ko reriab. Mour ko an Kũrjin rein ear pãd ilo kauwõtata. Ak ta kõn kõj rainin?

5, 6. Ta katak ko rebuñbuñ me armej ro jej iioon er ilo kwal̦o̦k naan rej tõmaki?

⁵ Ri jum̦ae ro rar orl̦o̦k im jeededl̦o̦k ñan elõñ jikin ko. (2 Tessalonika 2:3, 8) Ta katak ko rebõd me rej kareel armej ro rainin? Ñan waanjoñak, elõñ jikin ko me el̦ap an armej ro tõmak katak eo bwe armej rej itok jãn menin mour. Joñan kajoor in tõmak in aer ej ãinwõt armej ro me ewõr aer kabuñ. Ro im rej tõmak bwe armej rar itok jãn menin mour ekkã aer kõjerbale katak ko an science ñan rejetake tõmak in aer. Tõmak in aer ear oktak im ãinwõt juon aer kabuñ meñe rejjab tõmak ilo Anij. Men in rej tõmake ej jelõt wãween aer l̦õmn̦ak kõn Anij im wãween aer l̦õmn̦ak kõn armej ro jet. Bar juon katak me elõñ armej rej tõmake ej bwe Anij ejjab kea kake kõj, im kõn men in jejjab aikuj in jel̦ã kõn e. Etke elõñ milien armej ro rej roñjake katak kein me rej bõbrae er jãn aer bõk juon jem̦jerã em̦m̦an ippãn Anij? Katak kein ruo rej kõm̦m̦an an armej ro l̦õmn̦ak bwe remaroñ kõm̦m̦an jabdewõt men rekõn̦aan kõnke reban bõk ekajet kõn kõm̦m̦an ko aer. Eñin men eo elõñ rekõn̦aan roñ im tõmake.​—Riit Sam 10:4.

⁶ Ewõr bar katak ko jet me armej ro rej tõmaki. Ro me rej etal wõt ñan im̦õn jar ko aer rekõn̦aan roñ bwe Anij ej yokwe er jekdo̦o̦n ta men ko rej kõm̦m̦ani. Ro jet rekõn̦aan roñ an ri tõl ro an kabuñ eo aer jiroñ er bwe Anij enaaj kajeraam̦m̦an er ñe rej jar ñan ekjab ko, im pãd ilo m̦akũtkũt im kwõjkwõj ko an kabuñ eo, im ilo iien Mass ko. Armej rein rejjab kile bwe elukkuun kauwõtata wãween in rej pãd ie. (Sam 115:4-8) Bõtab, rein remaroñ bõk jeraam̦m̦an ko jãn Aelõñ eo an Anij el̦aññe jej karuj er jãn aer kiki ilo kõkkar im jipañ er ñan mel̦el̦e kõn katak ko rem̦ool ilo Baibõl̦.

EWI WÃWEEN JEJ KAORÕK JERBAL IN KWAL̦O̦K NAAN RAININ?

7. Ewi wãween jemaroñ kwal̦o̦k bwe jej kaorõk im kate kõj ilo jerbal in kwal̦o̦k naan?

⁷ Juon taktõ in m̦wijm̦wij ej kalikkar bwe ej kaorõk jerbal eo an ñe ej lukkuun lale wõt im m̦ad kake kõnke ejel̦ã bwe mour eo an ri nañinmej eo ej pãd ilo kauwõtata. Ilo jerbal in kwal̦o̦k naan, jemaroñ kwal̦o̦k bwe jej kate kõj im kaorõke jerbal in ilo ad m̦ad kake wõt im jab ilo men ko jet. Ewi wãween? Eokwe, ñe jej kwal̦o̦k naan jen lukkuun l̦õmn̦ak kõn ta ko jenaaj kõnono kaki, ta kajjitõk ko jenaaj kwal̦o̦ki ak mel̦el̦e ko me renaaj kaitoklimoik armej ro. Bareinwõt, kõn ad jel̦ã bwe elukkuun aorõk jerbal in, jemaroñ kõm̦m̦an oktak ko ikijjeen m̦akũtkũt ko ad bwe jen maroñ lol̦o̦k armej ro ilo iien ko me renaaj m̦õn̦õn̦õ in roñjake kõj.​—Rom 1:15, 16; 1 Timote 4:16.

8. Ewi wãween jej bar kalikkar bwe jej kaorõk jerbal eo ad?

⁸ Jej bar kalikkar ad kaorõk im kate kõj ilo jerbal eo ad ñe jej kõm̦m̦ane men ko relukkuun aorõk m̦oktata. (Jenesis 19:​15) Ñan waanjoñak, kwaar etal ñan aujpitõl̦ bwe taktõ eo am̦ en kakõlkõl eok. Ãlikin an etale, taktõ eo am̦ ej kũr eok ñan opij eo an im ej jiroñ eok: “Ewõr juon am̦ nañinmej ekauwõtata, im kwõj aikuj jino kõjparoke ãjmour n̦e am̦ kiiõ. Ewõr wõt juon allõñ ñan am̦ kõm̦m̦ane juon men kõn nañinmej n̦e am̦.” Kiiõ ta eo kwõnaaj kar kõm̦m̦ane? Alikkar kwõban kar m̦õkaj im diwõj jãn opij eo an bwe kwõn jino lale ta eo kwõnaaj kõm̦m̦ane kõn nañinmej eo am̦. Ak kwõnaaj kar m̦okta lukkuun roñjake an taktõ eo kwal̦o̦k ta eo kwõj aikuj kõm̦m̦ane, innem ro̦o̦l ñan m̦weo im̦õm im l̦õmn̦ak kõn men eo eaorõk kwõj aikuj kõm̦m̦ane m̦oktata.

9. Etke jejel̦ã bwe Paul ear kaorõk jerbal in kwal̦o̦k naan ke ear pãd ilo Epesõs?

⁹ Paul ear kaorõk jerbal in kwal̦o̦k naan. Jemaroñ  katak jãn joñak in an ilo ad riiti ennaan eo ear ba kõn jerbal in kwal̦o̦k naan ilo Eijia ñan em̦m̦aan ro rar lale eklejia eo ilo Epesõs. (Riit Jerbal 20:18-21, UBS.) Jãn raan eo jinointata in an kar tõpar tok jikin in, Paul ear poub in kwal̦o̦k naan ñan armej ro jãn em̦ ñan em̦ kõn nuuj eo em̦m̦an. Bareinwõt, ‘raan otemjej Paul ear kõmmel̦el̦e ilo jikuul̦ an Turannõs.’ Im ear kõm̦m̦ane men in ium̦win ruo iiõ. (Jerbal 19:1, 8-10) Kõnke Paul ear kaorõk jerbal in kwal̦o̦k naan, men in ear lujur e bwe en niknik in kõm̦m̦ane jerbal in. Naan in kakapilõk eo bwe jen kate kõj im kaorõk jerbal in kwal̦o̦k naan en kar jab kõm̦m̦an ad l̦õmn̦ak bwe jerbal in elukkuun eddo ñan kõj. Bõtab, jej aikuj kõm̦m̦an bwe jerbal in en men eo eaorõktata ilo mour ko ad.

10. Etke jej m̦õn̦õn̦õ bwe Ri Katak Baibõl̦ ro rar jino kate er im kaorõk jerbal in kwal̦o̦k naan?

¹⁰ M̦okta jãn iiõ eo 1914, juon kumi in Ri Katak Baibõl̦ rar jino kõm̦m̦ane jerbal in kwal̦o̦k naan. Joñak in aer ej katakin kõj ta mel̦el̦ein ñe juon ej kaorõk im kate e ilo juon jerbal. Meñe kar jet wõt to̦ujin oraer, ak rein rar jel̦ã bwe rar mour ilo raan ko ãliktata. Kõn men in, rar jino kijejeto in kwal̦o̦k naan kõn Aelõñ eo. Ear wõr katak ko rar kõm̦m̦ani im likũti ilo elõñl̦o̦k jãn 2,000 nuujpeba ko, im rar bareinwõt kwal̦o̦k ennaan eo an Anij ilo juon pija. * (Lale kõmel̦el̦e eo itulal̦.) Elõñ milien armej ro rar maroñ roñ kõn nuuj eo em̦m̦an ikijjeen jerbal ko an Ri Katak Baibõl̦ rein. Kõn aer kar kate er im kaorõk jerbal in kwal̦o̦k naan, elõñ iaad jaar maroñ roñ kõn Aelõñ eo.​—Riit Sam 119:⁠60.

JAB BÕJRAK JÃN AM̦ KATE WÕT EOK IM KAORÕK KWAL̦O̦K NAAN

11. Etke ear jako an jet kate er im kaorõk jerbal in kwal̦o̦k naan?

¹¹ Men ko me rej kam̦ad kõj jãn jerbal in kwal̦o̦k naan remaroñ kabõjrak ad l̦õmn̦ak bwe elukkuun aorõk jerbal in. Setan ej kõjerbal men ko an jukjuk im pãd in ñan kam̦ad kõj jãn jerbal eo an Jeova. Ej kõm̦m̦ane men in ilo an kajjioñ in kam̦ad kõj kõn men ko me jej itoklimo kaki im rejjab aorõk. (1 Piter 5:8; 1 Jon 2:15-17) Jet armej rekõn likũt jerbal eo an Jeova m̦oktata ilo mour ko aer ak tokãlik ear jako aer kate er im kaorõk jerbal in. Ñan waanjoñak, juon Kũrjin etan Dimas ekõn kar jerbal ippãn rijjelõk Paul, ak tokãlik ear oktak im m̦ad kõn men ko an lal̦ in. Ke Paul ear iioon juon mãlejjoñ, Dimas ear jab wõnm̦aanl̦o̦k im kõketak e ak ear ilo̦k jãn e.​—Pailimõn 23, 24; 2 Timote 4:10.

12. Ta eo epel̦l̦o̦k ñan ad kõm̦m̦ane kiiõ? Ta ko enaaj l̦ap iien ñan ad kõm̦m̦ani ilo raan ko im̦aan?

¹² Bwe jen maroñ wõnm̦aanl̦o̦k wõt im kate kõj im kaorõk jerbal in kwal̦o̦k naan, jej aikuj jum̦ae kõn̦aan eo ad ñan kõm̦m̦ani men ko me rej kam̦ad kõj jãn jerbal in. Jej aikuj buul̦ kate kõj ñan “bõk mour eo e m̦ool.” (1 Timote 6:18, 19) Ejjel̦o̦k pere kwõj tõmak bwe ñe jenaaj mour indeeo ium̦win Aelõñ eo an Anij, enaaj l̦ap iien ñan ad kõm̦m̦ani men ko relimo im rekam̦õn̦õn̦õ. Bõtab kiiõ, ej iien eo wõt epel̦l̦o̦k ñan ad jipañ ro jet bwe ren el̦l̦ã im mour jãn Armagedon.

13. Ta eo emaroñ jipañ kõj bwe jen jab bõjrak jãn ad kate kõj im kaorõk jerbal in kwal̦o̦k naan?

¹³ Enañin aolep armej ro ipel̦aakid rejaje kõn Jeova. Innem, ta eo jemaroñ kõm̦m̦ane bwe jen jab bõjrak jãn ad kate kõj im kaorõk jerbal in kwal̦o̦k naan? Jej aikuj keememej bwe ilo jinoin jaar bareinwõt jaje kõn Anij im ear ejjel̦o̦k ad jel̦ã kõn ta ko renaaj wal̦o̦k ilju im jekl̦aj. Bõtab, jaar katak m̦ool eo kõn Jeova im Jijej, im kiiõ ewõr ippãd jeraam̦m̦an eo ñan katakin ro jet kõn m̦ool eo. (Riit Epesõs 5:14.) Paul ear je: “Kom̦win kanooj lale ekõjkan ami etetal, jab ãinwõt ri jaje, a ãinwõt ri mãlõtlõt, im wiaik iien, bwe raan ko re nana.” (Epesõs 5:15, 16) Ilo jukjuk im pãd in enana, eaorõk bwe jen kõjerbal iien ko ad ñan men ko me remaroñ jipañ kõj ñan dãpij wõt juon kõtaan epaak ippãn Jeova.

JEJ MOUR ILO IIEN KO RAORÕK

14-15. Ta men ko rej likũt mour ko an elõñ bilien armej ro ilo kauwõtata?

¹⁴ Jãn jinoin, jerbal in kwal̦o̦k naan ear aorõk, bõtab kiiõ ej kab l̦apl̦o̦k wõt an aorõk. Jãn iiõ eo  1914, jaar lo elõñ men ko rar wal̦o̦k ioon lal̦ in me relukkuun jejjet ippãn kanaan ko ilo Baibõl̦. (Matu 24:3-51) El̦apl̦o̦k an kauwõtata mour ko an armej ro kiiõ jãn kar m̦okta. Meñe aelõñ ak kien ko me rekajoor rar kõm̦m̦an kon̦ ñan kwal̦o̦k aenõm̦m̦an, ak ewõr wõt aer tarrin in 2,000 kein tarin̦ae ko ãinwõt mijel̦ me remaroñ ko̦kkure jabdewõt jikin ilo lal̦ in. Elõñ alen an ri jerbal ro ilo kien kõjjel̦ã kõn an jako kein tarin̦ae ko. Emaroñ ke bwe ri nana ro im rej kaamijak armej rar bũki jet iaan kein tarin̦ae kein? Jet armej rej ba bwe ñe juon ri nana enaaj jinoe juon tarin̦ae, emaroñ pidodo an jako aolep armej. Bõtab, ejjab tarin̦ae ko wõt rej likũt mour ko an armej ro ilo kauwõtata.

¹⁵ Ilo 2009, juon bok etan “The Lancet,” jãn juon college ilo Iñlen ej ba men in ikijjeen raan kein ad: “An oktakl̦o̦k mejatoto in lal̦ in ej men eo im el̦aptata an likũt mour ko ad ilo kauwõtata.” Ripoot in ej bar ba bwe men ko rej wal̦o̦k jãn an oktakl̦o̦k mejatoto in lal̦ in renaaj jelõt ãjmour ko an enañin aolep armej im likũt mour ko an elõñ bilien armej ro ilo kauwõtata. Elõñ jikin ko renaaj jorrããn kõn an wal̦o̦k l̦añ ko, nañinmej ko, ejjel̦o̦k dãn, an wõr tarin̦ae kõn wõt an jabwe kein mour, im an ibwijleplep im uwe dãn. Alikkar bwe tarin̦ae ko im jorrããn ko rej wal̦o̦k rekauwõtata ñan mour ko an armej ro.

16. Etke jerbal in kwal̦o̦k naan kõn Aelõñ eo el̦apl̦o̦k an aorõk kiiõ jãn kar m̦okta?

¹⁶ Jet armej rej l̦õmn̦ak bwe juon tarin̦ae me rej kõjerbale aolep kein tarin̦ae ko rekajoor emaroñ etal ñan an kajejjet kanaan eo an Jijej kõn raan ko ãliktata. Bõtab, enañin aolep armej ro rejjab lukkuun mel̦el̦e kõn mel̦el̦ein kanaan eo an Jijej. Ium̦win elõñ iiõ ko, elukkuun alikkar ñan kõj men ko me rej kalikkar pãd eo an Kũraij kiiõ im bwe jem̦l̦o̦kin jukjuk im pãd in epaak. (Matu 24:3) El̦apl̦o̦k an alikkar men kein jãn kar m̦okta. Armej ro rej aikuj kile kiiõ bwe rej aikuj bõk juon kõtaan em̦m̦an im epaak ippãn Anij. Ewi wãween remaroñ kõm̦m̦ane men in? Eokwe, ad jerbal in kwal̦o̦k naan emaroñ jipañ armej rein ñan kõm̦m̦ane men in.

17, 18. (1) Ewi wãween mour ilo raan kein ãliktata ej jelõt kõj? (2) Ta eo emaroñ kõm̦m̦an an juon oktak im kõn̦aan roñjake ennaan eo an Aelõñ eo?

¹⁷ Ewõr wõt jidik iien ñan ad kam̦oole yokwe eo ad ñan Jeova im kam̦õjl̦o̦k jerbal in kwal̦o̦k naan eo me ear letok bwe jen kõm̦m̦ane ilo raan kein ãliktata. Men eo Paul ear ba ñan Kũrjin ro ilo Rom el̦apl̦o̦k an aorõk ñan kõj ilo raan kein. Ear ba: “[Kom̦] jel̦ã iien, bwe awa in ruj jãn kiki e mottok; bwe [ami] mour epaake kiiõ jãn ke jaar tõmak m̦okta.”​—Rom 13:11.

¹⁸ Men ko kar kanaan kaki kõn raan ko ãliktata remaroñ kõm̦m̦an an armej ro kile bwe rej aikuj jel̦ã kõn Anij im ruwaakl̦o̦k ñan e. Jet armej rar jino itoklimo kõn ennaan eo an Aelõñ eo ke rar jino kõl̦mãnl̦o̦kjen̦ kõn an kien ko aer likjab. Kien ko rejañin kõm̦adm̦õde an pen mour, rejañin jol̦o̦k kein tarin̦ae ko rekajoor me rej kaamijak armej ro, kowadoñ, im rejjab bõbrae an armej ko̦kkure lal̦ in. Bar jet rar kõn̦aan roñjake ennaan eo an Aelõñ eo kõn aer iioon apañ ko ilo baam̦le ko aer make, ãinwõt nañinmej ko rel̦l̦ap, ri pãlele ro rej jepel, ak bwe rar luuji juon eo ejitõnbõro ippãer ilo mej. Kõn men in, ñe jej kwal̦o̦k naan, jemaroñ jipañ armej rein me rej itoklimo in roñjake.

AD KAORÕK JERBAL IN KWAL̦O̦K NAAN EJ LUJUR KÕJ

19, 20. Elõñ Kũrjin ro rej kate er im kaorõk jerbal in kwal̦o̦k naan. Ewi wãween men in ear lujur er ñan kõm̦m̦an oktak ko ilo mour ko aer?

¹⁹ Elõñ Kũrjin ro rej kate er im kaorõk jerbal in kwal̦o̦k naan. Men in ear kõm̦akũt er ñan kal̦apl̦o̦k ijo kun̦aaer ilo jerbal in kwal̦o̦k naan. Ñan waanjoñak, ruo ri pãlele me em̦m̦an dettaer ilo aelõñ in Ecuador, rar pepe ñan kõm̦m̦an oktak ilo mour ko aer ãlikin aerro kar pãd ilo kweilo̦k eo el̦ap ilo iiõ eo 2006. Kweilo̦k in el̦ap ear kwal̦o̦k kõn katak ko ñan jipañ kõj jol̦o̦k men ko rejjab aorõk me rej kam̦ad kõj. Erro ar je laajrakin men ko rejjab aikuji. Im jilu allõñ tokãlik, rar em̦m̦akũt jãn apartment eo aerro me ewõr jilu ruum̦ in kiki ie ñan bar juon apartment me juon wõt an ruum̦ in kiki. Rar wiakake jet m̦weiuk ko aer im kõl̦l̦ãik  aolep m̦uri ko aerro. Ejjabto, rar jino auxiliary pioneer im tokãlik rar l̦oor naan in rõjañ eo jãn m̦aan eo ej lol̦o̦k eklejia ko bwe remaroñ jipañ juon eklejia me el̦ap aikuj ie.

²⁰ Juon jeid im jatid m̦aan ilo Amedka ear je naan kein: “Ke kõmro lio pãleeõ ar pãd ilo kweilo̦k eo el̦ap ilo iiõ eo 2006, ear wõt tarrin 30 iiõ ko in am̦ro pãd ilo m̦ool eo. Ke kõmro ej ro̦o̦l jãn kweilo̦k in el̦ap, kõmro ar kõnono kõn wãween kom̦ro maroñ jerbale naan in kakapilõk eo kar kwal̦o̦k kake ñan kõm̦m̦an oktak ilo mour ko ad.” (Matu 6:19-22) Ri pãlele rein ear wõr jilu m̦wierro, aer wãto, ewõr waerro wa ko me el̦ap on̦aer, waerro l̦oon, im ewõr waerro wa rot eo me ewõr jikin kiki ie. Ri pãlele rein rar kile bwe el̦ap aerro jol̦o̦k iien ko aerro ñan m̦weiuk ko. Kõn men in, erro ar kõm̦m̦an aerro mejãnkajjik ñan kal̦apl̦o̦k ijo kun̦aaerro ilo jerbal in kwal̦o̦k naan. Ilo iiõ eo 2008, rar kobal̦o̦k ippãn leddik eo nejierro im erjil ar regular pioneer ippãn doon. Ej juon men ekalañlõñ ñan rein ke rej loe an armej ro lukkuun m̦õn̦õn̦õ ñe rej roñ kõn Naan in Anij im mel̦el̦e kake. M̦aan in jeid im jatid ilo tõmak ej wõnm̦aanl̦o̦k wõt im ba: “Ej juon jeraam̦m̦an ñan jerbal ippãn ro jeid im jatid. Kõmar maroñ jerbal ilo juon jikin el̦ap aikuj jipañ ie. Bareinwõt, kõn ad kal̦apl̦o̦k ad kõm̦m̦ani jerbal ko rej an Jeova, men in ear karuakl̦o̦k kõm ñan e.”

21. Ta men eo jejel̦ã kake im ej lujur kõj ñan kate kõj im kaorõk jerbal in kwal̦o̦k naan?

²¹ Jejel̦ã bwe m̦õttan jidik “raan in ekajet im ko̦kkure an armej re nana” enaaj kajem̦l̦o̦ke jukjuk im pãd in enana. (2 Piter 3:7) Kõnke jejel̦ã kõn Naan in Anij, jej kijejeto in kwal̦o̦k naan kõn eñtaan eo el̦ap im lal̦ eo ekããl me renaaj wal̦o̦k. Jejjab bõjrak jãn ad kate kõj im kaorõk jerbal eo ñan karoñ armej ro kõn men ko renaaj lukkuun wal̦o̦k ilo raan ko rej pedotok. Ñe jej kamaat ad maroñ ñan kõm̦m̦ane jerbal in kwal̦o̦k naan, jej kalikkar bwe jej lukkuun yokwe Anij im armej ro.

[Komel̦el̦e eo itulal̦]

[Kajitõk ko ñan katak]