“Iar Kwal̦o̦k Etam̦”

“Iar kwal̦o̦k Etam̦ ñan armej ro Kwaar letok ñan Eõ jãn lal̦. . . . Im Iar kwal̦o̦k Etam̦ ñan er, im I naaj kwal̦o̦k e.”​—JON 17:6, 26.

Mel̦el̦ein Men In: Jijej ear kõjerbal etan Anij ke ear kwal̦o̦k naan. Ke Jijej ear riiti Jeje ko Rekwõjarjar im ekkã an kõm̦m̦ane men in, emaroñ kar ba ãt eo etan Anij. (Luk 4:16-21) * (Lale kõmel̦el̦e eo itulal̦.) Ear katakin rũkal̦oor ro an bwe ren jar im ba: “Jememwõj, En Kwõjarjar Etam̦.”​—Luk 11:2.

Wãween Kũrjin ro M̦okta Rar Jerbale Men In: Rijjelõk Piter ear kwal̦o̦k ñan l̦õm̦aro rerũtto ilo Jerusalem bwe Anij em̦õj an bõk armej jãn aelõñ otemjej “kõn etan.” (Jerbal 15:14) Rijjelõk ro im ro jet rar kwal̦o̦k bwe “ro otemjej rej kũr etan Irooj [Jeova, NW] renaaj mour.” (Jerbal 2:21; Rom 10:13) Rar bareinwõt kõjerbale etan Anij ñe rej jeje. Juon bok an Ri Ju im kar je kien ko aer ie me ear dedel̦o̦k aer je enañin 300 iiõ ko ãlikin Kũraij, ej kwal̦o̦k kõn an kar ri jum̦ae ro tile bok ko an Kũrjin ro. Bok in ej ba bwe aolep bok ko an ri kwal̦o̦k naan ro im Ri Ju ro im rar Kũrjin im ewõr etan Anij ie rar tili.

Wõn Ro Rainin Rej Kwal̦o̦k Ejja Wãween in Wõt? Ukok in Baibõl̦ eo etan Revised Standard Version, me National Council of the Churches of Christ ilo Amedka ear kamãlimi, ej kwal̦o̦k kõmel̦el̦e kein ilo peij ko jinoin Baibõl̦ in: “M̦okta jãn raan ko an Kũrjin ro, Ri Ju ro rar bõjrak jãn aer kõjerbale jabdewõt ãt ko etan Anij. Ejjel̦o̦k unin ad kõjerbal etan kõnke ejjel̦o̦k bar anij ñan ad kajenolo̦k e jãn er. Innem kõnke ekar bõjrak aer kõjerbale etan Anij m̦okta jãn raan ko an Kũrjin ro, ejakkar an armej ro kõjerbale ilo jabdewõt kabuñ in Kũrjin.” Eñin unin rar kõjerbale taitõl̦ in “IROOJ” ñan bõk jikin ãt eo etan ekwõjarjar. Jet iien ko rej kab mootl̦o̦k, bũrij eo el̦ap an kabuñ in Katlik me ej pãd ilo Rom ear jiroñ aolep ri tõl ro jet rettãl̦o̦k an kabuñ in im ba: “Jab kõjerbal ak ba ãt in etan Anij YHWH * ilo al ko im jar ko.”​—Lale kõmel̦el̦e eo itulal̦.

Wõn ro rainin rej kõjerbal ãt eo etan Anij im kajededl̦o̦k? Juon em̦m̦aan etan Sergey ilo Kyrgyzstan ej ba bwe ke ear jodrikdrik ear alwõje juon pija me ej kwal̦o̦k kõn ãt eo etan Anij Jeova. Bõtab tokãlik ear jab bar roñ kõn ãt in ium̦win joñoul jim̦a iiõ. Tokãlik ke ear em̦m̦akũt ñan Amedka im jokwe ie, ear wõr ruo Ri Kõnnaan ro an Jeova rar kwal̦o̦k naan ilo m̦weo im̦õn. Rein rar kwal̦o̦k ñan e ãt eo etan Anij ilo Baibõl̦ eo. Sergey ear lukkuun m̦õn̦õn̦õ bwe ear wõr juon kumi me rej kõjerbale ãt in Jeova. Ekabwilõñlõñ bwe ilo tikjinere eo etan Webster’s Third New International Dictionary ej kwal̦o̦k kõn mel̦el̦ein ãt in Jeova. Ej ba bwe ej “juon anij eutiej bõtata im anij eo wõt me Ri Kõnnaan ro an Jeova rej kabuñ ñan e.”

[Komel̦el̦e ko itulal̦]