“Kom̦win Yokwe Doon”

“Kien ekããl Ij lewõj ñan kom̦, kom̦win yokwe doon; ãinwõt Iar yokwe kom̦, kom̦win bareinwõt yokwe doon. Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.”​—JON 13:34, 35.

Mel̦el̦ein Men In: Kũraij ear jiroñ rũkal̦oor ro an bwe ren yokwe doon ãinwõt an kar yokwe er. Ewi wãween an kar Jijej yokwe er? Ear yokwe aolep kain armej jãn jabdewõt aelõñ, im kõrã im em̦m̦aan ro rar joñan wõt juon ippãn. Ear oktak jãn l̦õmn̦ak ko an armej ro rekalijekl̦o̦k ilo raan ko an. (Jon 4:7-10) Yokwe in ear kõm̦akũt Jijej bwe en kõjerbal iien eo an im kajoor eo an ñan jipañ ro jet. Im ear bar kaarmejjete an kar em̦m̦an kõjeãn mour eo an. (Mark 6:30-34) Ãliktata, Kũraij ear kwal̦o̦k yokwe ilo juon wãween eo ekanooj in l̦ap. Ear ba: “Ña jabõt em̦m̦an. Jabõt em̦m̦an ej lel̦o̦k an mour kõn jiip ko.”​—Jon 10:11.

Wãween Kũrjin ro M̦okta Rar Jerbale Men In: Kũrjin ro m̦okta rar ãñinñin doon im ba jeiõ ak jatũ. (Pailimõn 1, 2, UBS) Armej ro jãn aelõñ otemjej rar ruwainenetok ñan lowaan eklejia eo an Kũrjin kõnke rar tõmak bwe ejjel̦o̦k oktak “ikõtaan ri Ju im ri Grik; bwe juon wõt Irooj ioon otemjej.” (Rom 10:11, 12) Ãlikin raan in Pentekost eo ilo iiõ eo 33, rũkal̦oor ro ilo Jerusalem rar “wiakaki men ko im m̦weiuk ko m̦weier, im kajim̦we aer ajej ñan er otemjej, ãinwõt jabdewõt armej ej aikuj.” Etke rar kõm̦m̦ane men in? Kõnke ro rekããl me rar peptaij remaroñ pãd wõt ilo Jerusalem im niknik wõt ilo katak ko an rijjelõk ro. (Jerbal 2:41-45) Ta eo ear kõm̦akũt er ñan kõm̦m̦ani men kein? Enañin 200 iiõ ko ãlikin an kar mej rijjelõk ro, ri jeje Tertullian ear ba kõn men ko ro jet rekõn ba kõn Kũrjin ro: “Elukkuun l̦ap aer yokwe doon . . . im repojak in mej kõn doon.”

Wõn Ro Rainin Rej Kwal̦o̦k Ejja Wãween in Wõt? Juon bok (The History of the Decline and Fall of the Roman Empire) me ej bwebwenato kõn jorrããn eo an aelõñ in Rom ilo 1837, ej kwal̦o̦k bwe ilo aolepen iiõ ko m̦aantak ro im rej ba rej Kũrjin “el̦ap aer kar ko̦kkure doon im m̦an doon jãn ro me rejjab [Kũrjin].” Ilo juon ekkatak jãn Amedka, rar lo bwe elõñ armej el̦ap aer kõttõmakmak im rej ba er Kũrjin bõtab el̦ap kalijekl̦o̦k ippãer. Armej ro me ekkã aer jar ilo juon wõt kabuñ rejjab jel̦ã kajjien armej ro me rej bar uwaan kabuñ eo wõt jãn aelõñ ko jet. Kõn men in, rejjab maroñ ak rejjab itoklimo in jipañ ri tõmak ro m̦õttaer ilo iien aer aikuj.

Ilo iiõ eo 2004, ãlikin an kar jorrããn Florida jãn l̦añ ko emãn rar wal̦o̦k ilowaan ruo allõñ ko, chairman eo an kumi eo ej loloorjake jorrããn in l̦añ ko rel̦l̦ap ear lale bwe en jim̦we aer kõjerbal menin aikuj ko. Ear ba bwe ejjel̦o̦k bar juon doulul ebolemen im jejjet an jerbal ãinwõt Ri Kõnnaan ro an Jeova, im ear m̦õn̦õn̦õ in lel̦o̦k menin aikuj ko renaaj kar aikuji. M̦oktal̦o̦k ilo iiõ eo 1997, juon kumi in jipañ an Ri Kõnnaan ro an Jeova rar bõkl̦o̦k uno, m̦õñã, im nuknuk ko ñan jipañ Kũrjin ro jeier im jatier im ro jet ilo Democratic Republic an Congo ilo Africa. Ri Kõnnaan ro an Jeova ilo Europe rar lel̦o̦k menin aikuj kein tarrin on̦ean aoleper kar juon milien tal̦a.