Kwõj Ke Kaiboojoj ak Nõbar Etan Jeova?

“Inaaj kaiboojoj etam̦ ñan indeeo.”​—SAM 86:12.

TA UWAAK EO AM̦?

Meñe kõj ri jerawiwi, etke jemaroñ anõke wãween ko rem̦m̦an kõn Jeova im kõm̦m̦ani men ko rej bõktok nõbar ñan e?

Ewi wãween jar ko ad im kweilo̦k ko ad rej jipañ kõj ñan anõke Jeova im bõktok nõbar ñan e?

Ta eo emaroñ jipañ kõj ñan wõnm̦aanl̦o̦k wõt im kõm̦m̦ani men ko rej bõktok nõbar ñan Jeova?

1, 2. Etke kõj armej jemaroñ anõk wãween ko rem̦m̦an kõn Jeova?

 KÕJ aolep jej bõdañe jemed im jined ilo jet wãween ko. Bõlen em̦õj ad roñ an juon armej jiroñ l̦o̦k juon l̦addik naan kein, ‘Kwõlukkuun ãinwõt jemam̦.’ Ak bõlen em̦õj ad bar roñ an juon ba naan kein ñan juon leddik, ‘Kwõlukkuun kakeememej eõ kõn jinõm̦.’ Bareinwõt, ekkã an ajri ro kajjioñ in anõke men ko jemãer im jineer rej kõm̦m̦ani. Ak ta kõn kõj? Jemaroñ ke anõke Jeova, eo im ej Jemedwõj ilañ? Meñe jejjab maroñ lo e, ak jemaroñ jel̦ã kajjien im jel̦ã wãween ko rem̦m̦an kõn e ãinwõt yokwe, jouj im ko ãierl̦o̦k wõt. Jemaroñ kõm̦m̦ane men in ilo ad lukkuun lale im etale men ko ear kõm̦anm̦ani. Jemaroñ bareinwõt katak kõn wãween kein rem̦m̦an kõn Anij ilo ad katak Baibõl̦ im kõl̦mãnl̦o̦kjen̦ kake. Wãween eo el̦aptata jemaroñ jel̦ã kajjien Anij ej ikijjeen ad riit kõn kõm̦m̦an ko im naan ko an Jijej, eo im ej Nejin Anij. (Jon 1:18; Rom 1:20) Kõn men in, kõj armej jemaroñ anõk wãween ko rem̦m̦an kõn Jeova. Ilo ad kõm̦m̦ane men in, jej kaiboojoje ak nõbar e.

² M̦okta jãn an kar Anij kõm̦anm̦an armej, ear jel̦ã bwe armej renaaj maroñ kõm̦anm̦an ankilaan, anõke wãween ko rem̦m̦an kõn e, im nõbar e. (Riit Jenesis 1:26, 27.) Kõj Kũrjin ro jekõn̦aan anõke wãween ko rem̦m̦an kõn Anij eo ad. El̦aññe jej kõm̦m̦ane men in, jej kaiboojoje ak nõbar e im men in ej juon jeraam̦m̦an el̦ap ñan kõj. Jekdo̦o̦n aelõñ ta eo jej itok jãne ak ewi joñan jel̦ãl̦o̦kjen̦ eo ewõr ippãd, kõj aolep jemaroñ anõk wãween ko rem̦m̦an kõn Anij. Etke? Ej kõnke “Anij e jab l̦õmn̦ak kõn okõtan armej, a ilo aelõñ otemjej eo ej mijak E, im jerbale kwõjarjar, ej kabuñbũruon.”​—Jerbal 10:34, 35.

3. Ta eñjake eo jej bõke ke jej karejar ñan Jeova?

³ Kũrjin ri kabit ro rej kwal̦o̦k kõn aiboojoj eo an Jeova. Rej kõm̦m̦ane men in ilo aer anõke wãween ko rem̦m̦an kõn e ilo mour ko aer im rej nõbar e ilo jerbal in kwal̦o̦k naan. Rijjelõk Paul, eo im ear bar juon ri kabit, ear je, “A kõj otemjej, ejjel̦o̦k veil im̦aan mejed, jej kallimjek [kwal̦o̦k, NW], ãinwõt ilo glass,  aiboojoj an Irooj [Jeova], im jej kõjakkõlkõl ñan wãween eo jãn aiboojoj ñan aiboojoj.” (2 Korint 3:18) Ilo eoon in, Paul ej kõnono kõn iien eo me Moses ear wanlall̦o̦k jãn Tol̦ Sainai ippãn Kien ko Joñoul me Anij ear lel̦o̦ke. Ear ejatõltõl turin mejen Moses kõnke Anij ear kõnono ñan e. (Exodus 34:29, 30) Em̦ool bwe Kũrjin ro rar jab iioone ejja men in wõt me Moses ear iioone im ejjab ejatõltõl turin mejeir. Bõtab, armej remaroñ lo aer lukkuun lañlõñ ñe rej kõnono kõn Jeova, im wãween ko rem̦m̦an kõn e, im karõk eo an em̦m̦an kõn armej. Innem meñe jej juon iaan ri kabit ro ak ro me renaaj mour indeeo ioon lal̦, kõj aolep jej ãinwõt kilaaj kõnke jej anõke wãween ko rem̦m̦an kõn Jeova ilo mour ko ad im jej nõbar e ilo jerbal in kwal̦o̦k naan. (2 Korint 4:1) Kwõj ke kwal̦o̦k kõn aiboojoj eo an Jeova ilo am̦ mour ilo wãween eo ej buñbũruon kake im ilo am̦ niknik in kwal̦o̦k naan?

JEKÕN̦AAN ANÕKE WÃWEEN KO REM̦M̦AN KÕN ANIJ IM NÕBAR E

4, 5. (1) Ãinwõt kar Paul, ta men eo ewõr ippãd im jej aikuj jum̦aeiki? (2) Ewi wãween an jerawiwi jelõt kõj?

⁴ Kõj ri karejar ro an Jeova jekõn̦aan anõke wãween ko rem̦m̦an kõn Anij im nõbar e ilo men otemjej jej kõm̦m̦ani. Bõtab, ekkã ad kõm̦m̦ane men eo ebõd meñe jelukkuun kõn̦aan kõm̦m̦ane men eo ejim̦we. Paul ear bar iioone ejja apañ in wõt. (Riit Rom 7:21-25.) Paul ej kõmel̦el̦e etke kõj aolep jej aikuj jum̦ae kõn̦aan ko ad renana ke ear ba: “Bwe otemjej rar jerawiwi im rej likjab jãn aiboojoj an Anij.” (Rom 3:23) Adam ear jerawiwi ilo an kar jab pokake Anij, im eñin unin aolep armej rej l̦otak tok im ri kam̦akoko ñan jerawiwi. Jerawiwi ej ãinwõt juon irooj elãj me armej ro rej pãd ium̦win maroñ eo an.​—Rom 5:12; 6:12.

⁵ Ta in jerawiwi? Jerawiwi ej kitibuj jabdewõt men me elukkuun oktak jãn wãween ko rem̦m̦an kõn Jeova, im men ko rem̦m̦an ippãn, kab men ko ekõn̦aan bwe jen kõm̦m̦ani. Jerawiwi ej ko̦kkure kõtaan eo an juon armej ippãn Anij. Ej bõbrae ad anõke wãween ko rem̦m̦an kõn Anij im nõbar e, ãinwõt an juon men bõbrae an juon ri libon kajejjete ijo me m̦ade eo an en kar kajejjete. Jet iien, jej jerawiwi ak kõm̦m̦ane men eo ebõd kõnke jaar make pepe ñan kõm̦m̦ane. Bõtab ilo iien ko jet, jej jirilo̦k im kõm̦m̦ane men eo ebõd. (Bõnbõn 15:27-31, UBS) Jerawiwi el̦ap an jelõt armej kõnke rej jolõte im ej kõjenolo̦k er jãn Ri Kõm̦anm̦an eo aer. (Sam 51:5; Aiseia 59:2; Kolosse 1:21) Enañin aolep armej rej mour ilo wãween eo me ej lukkuun kalikkar aer jenolo̦k jãn Anij. Rein rejerata kõnke rejjab anõke wãween ko rem̦m̦an kõn Anij me ej juon jeraam̦m̦an ekanooj in em̦m̦an. Innem alikkar bwe jerawiwi ej men eo el̦aptata an nana an jelõt armej.

6. Meñe kõj ri jerawiwi, ak etke jemaroñ anõke wãween ko rem̦m̦an kõn Jeova im kõm̦m̦ani men ko rej bõktok nõbar ñan e?

⁶ Meñe jaar l̦otak tok ãinwõt ri jerawiwi ak Jeova ear letok juon ad kõjatdikdik. (Rom 15:13, UBS) Ke Jeova ear letok Jijej ãinwõt juon menin katok kõn jerawiwi ko ad, ear kõm̦m̦an juon ial̦ ñan ad anemkwoj jãn jerawiwi. Kõn ad jerbale tõmak eo ad ilo katok eo an Jijej, jemaroñ anjo̦ ioon “jerawiwi.” Bareinwõt, jemaroñ kaiboojoj ak nõbar Jeova, anõke wãween ko rem̦m̦an kõn e im erom ro jeran. (Rom 5:19; 6:6; Jon 3:16) El̦aññe jej wõnm̦aanl̦o̦k wõt im jem̦jerãik Anij, eokwe jemaroñ lõke bwe enaaj kajeraam̦m̦an kõj kiiõ. Im ilo raan ko rej pedotok, Anij enaaj kõm̦m̦an bwe jen weeppãn im mour ñan indeeo. Meñe jej armej ri jerawiwi, ak el̦ap ad jeraam̦m̦an kõnke Anij ej watõk bwe kõj armej jemaroñ anõke wãween ko rem̦m̦an kõn e im kõm̦m̦ani men ko rej bõktok nõbar ñan e.

MEN KO REJ JIPAÑ KÕJ ÑAN ANÕKE ANIJ IM NÕBAR E

7. El̦aññe jekõn̦aan anõk wãween ko rem̦m̦an kõn Anij im bõktok nõbar ñan e, ta eo jej aikuj kile ippãd make?

⁷ Kõj aolep ewõr ad m̦õjn̦o̦ kõn ad jab weeppãn. El̦aññe jekõn̦aan anõke wãween ko rem̦m̦an kõn Anij im bõktok nõbar ñan e, kõj kajjojo jej aikuj jel̦ã ta m̦õjn̦o̦ ko ad. (2 Kronikel 6:36) Bwe jen maroñ lel̦o̦k wõt nõbar ñan Anij, jej aikuj m̦ool ñan kõj make im kile m̦õjn̦o̦ ko ad. Innem, jen kate kõj bwe jen anjo̦ ioon m̦õjn̦o̦ kein. Ñan waanjoñak, el̦aññe m̦õjn̦o̦ eo ad ej alwõje pija ko  rettoon, jej aikuj kile bwe jej aikuj jipañ jãn m̦aan ro rej lale eklejia. Innem, jej aikuj kepaake er im kajjitõk jipañ jãn er. (Jemes 5:14, 15) Eñin men eo m̦oktata jej aikuj kõm̦m̦ane el̦aññe jekõn̦aan bõktok nõbar ñan Anij. Aolep iien jen etale kõj make im lale ñe wãween mour eo ad ej ekkar ñan wãween eo ej kabuñbũruon Jeova. (Jabõn Kõnnaan 28:18; 1 Korint 10:12) Innem, jekdo̦o̦n ta m̦õjn̦o̦ ko ewõr ippãd, jen wõnm̦aanl̦o̦k im jum̦aeiki m̦õjn̦o̦ kein bwe jen maroñ anõke wãween ko rem̦m̦an kõn Anij im bõktok nõbar ñan e.

8. Ta eo jej aikuj kõm̦m̦ane meñe jejjab weeppãn?

⁸ Jijej ear armej eo wõt me ear kabuñbũruon Anij aolep iien. Im ear jejjet an kar anõke wãween ko rem̦m̦an kõn Anij im kõm̦m̦ani men ko rej bõktok nõbar ñan E. Meñe jejjab weeppãn ãinwõt kar Jijej, ak jej aikuj kate kõj ñan anõke joñak eo an. (1 Piter 2:21) Jeova ejjab baj lo wõt wõnm̦aanl̦o̦k ko jej kõm̦m̦ani ak ej bareinwõt lo ad kate kõj ñan bõktok nõbar ñan e im kõn men in ej kajeraam̦m̦an kõj.

9. Ewi wãween an Baibõl̦ eo jipañ kõj ñan kakõm̦anm̦anl̦o̦k wãween ad anõke Anij im bõktok nõbar ñan e?

⁹ Baibõl̦ eo emaroñ jipañ kõj ñan jel̦ã kõn wãween ko me jemaroñ kakõm̦anm̦anl̦o̦k wãween ad anõke Anij im bõktok nõbar ñan e. Kõn men in, jej aikuj liñõri Baibõl̦ eo ñe jej katak im kõl̦mãnl̦o̦kjen̦ kõn ta eo ej ba. (Sam 1:1-3) Ñe jej riiti Baibõl̦ eo kajjojo raan, jej katak kõn oktak ko jej aikuj kõm̦m̦ani bwe jen maroñ kakõm̦anm̦anl̦o̦k mour ko ad ãinwõt Kũrjin ro. (Riit Jemes 1:22-25.) Men ko jej katak jãn Baibõl̦ ej kakajoor tõmak eo ad. Ej bareinwõt kapen pepe eo ad ñan kabuñbũruon Jeova im jab kõm̦m̦ani jerawiwi ko rel̦l̦ap.​—Sam 119:11, 47, 48.

10. Ewi wãween jar ko ad remaroñ jipañ kõj kakõm̦anm̦anl̦o̦k wãween ad jerbal ñan Jeova?

¹⁰ Bwe jen anõke wãween ko rem̦m̦an kõn Anij im kõm̦m̦ani men ko rej bõktok nõbar ñan e, jej aikuj bareinwõt “niknik ilo jar.” (Rom 12:12) Jej aikuj jar ñan Jeova bwe en jipañ kõj ñan karejar ñan e ilo wãween eo ej buñbũruon kake. Jemaroñ kajjitõk ippãn bwe en letok kajoor eo an, im bwe en kal̦apl̦o̦k ad tõmak im bareinwõt ñan kakajoor kõj bwe jen jum̦ae menin kapo ko. Jemaroñ bareinwõt kajjitõk ippãn bwe en jipañ kõj ñan jel̦ã kilen katakin ro jet kõn Baibõl̦ eo. (Matu 6:13; Luk 11:13; 17:5; 2 Timote 2:15) Ãinwõt an juon ajri lõke jemen, ãindein jen lõke bwe Jemedwõj ilañ Jeova enaaj jipañ kõj. El̦aññe jej kajjitõk ippãn Jeova bwe en jipañ kõj kakõm̦anm̦anl̦o̦k wãween ad karejar ñan e, eokwe jemaroñ lõke bwe enaaj jipañ kõj ñan kõm̦m̦ane men in. Jen jab bõk l̦õmn̦ak eo bwe jar ko ad rej kabn̦õn̦õik Jeova. Ak, jen nõbar Anij ilo jar ko ad, kam̦m̦oolol e, im kajjitõk ippãn bwe en tõl kõj el̦aptata ilo iien ko me jej iioon apañ ko. Bareinwõt, jen kajjitõk ippãn Jeova bwe en jipañ kõj ñan jerbal ñan e ilo wãween ko me rej bõktok nõbar ñan etan.​—Sam 86:12; Jemes 1:5-7.

11. Ewi wãween kweilo̦k ko ad rej jipañ kõj ñan anõke wãween ko rem̦m̦an kõn Anij im bõktok nõbar ñan e?

¹¹ Anij ear jitõñ “ri karejar e tiljek im mãlõtlõt” bwe en an eddo ñan lale im kõjparok armej ro doon me rej ãinwõt jiip ko nejin. (Matu 24:45-47; Sam 100:3) Kumi in ri karejar eo etiljek im mãlõtlõt ekõn̦aan jipañ kõj aolep bwe jen anõke wãween ko rem̦m̦an kõn Jeova im kõm̦m̦ani men ko rej bõktok nõbar ñan e. Juon wãween jemaroñ bõk jipañ ej ilo ad pãd ilo kweilo̦k ko ad. Ãinwõt an juon ri keke kajim̦we im kakõm̦anm̦an nuknuk ko ad bwe en jejjet im em̦m̦an ñan kõj, eokwe ãindein bareinwõt kweilo̦k ko ad. Kweilo̦k ko rej jipañ kõj ñan kõm̦m̦an oktak ko im ñan kakõm̦anm̦anl̦o̦k mour ko ad ãinwõt Kũrjin ro. (Hibru 10:24, 25) Eñin unin jej aikuj m̦õkaj ñan iien kweilo̦k ko. El̦aññe ekkã ad rum̦wij ñan iien kweilo̦k ko, eokwe jeban bõk tokjãn jãn jet iaan katak ko me jej aikuji im remaroñ kar jipañ kõj.

JEN ANÕKE ANIJ

12. Ewi wãween jemaroñ anõke Anij?

¹² Bwe jen kaiboojoj ak nõbar Jeova, jej aikuj “kajjioñe” e. (Epesõs 5:1) Juon wãween jej kajjioñe ak anõke Jeova ej ilo ad kõm̦m̦an bwe l̦õmn̦ak ko ad ren errã ippãn l̦õmn̦ak ko an. El̦aññe jej kõjekdo̦o̦n l̦õmn̦ak ko an Anij im kõm̦m̦ani men ko ekkar ñan l̦õmn̦ak ko ad make, eokwe jejjab kwal̦o̦k ad kautiej Anij im jej kajorrããn kõj make. Kõnke jej mour ilo lal̦ in an Setan, jej aikuj  kate kõj ñan dike men ko Jeova ej diki im yokwe ak kaorõk men ko Jeova ej kaorõki. (Sam 97:10; 1 Jon 5:19) Jej aikuj tõmak im lõke bwe wãween eo wõt ejim̦we ñan karejar ñan Anij ej ilo ad bõktok nõbar ñan e ilo aolep men ko jej kõm̦m̦ani.​—Riit 1 Korint 10:31.

13. Etke jej aikuj dike men ko rebõd? Ñe jej diki, ta eo jenaaj kõm̦m̦ane?

¹³ Jej aikuj dike men ko rebõd kõnke Jeova ej diki. El̦aññe jej diki, jenaaj kattol̦o̦k kõj jãn jabdewõt men me emaroñ kõm̦m̦an ad kõm̦m̦ani men ko rebõd. Ñan waanjoñak, jej aikuj kattol̦o̦k kõj jãn katak ko rej n̦ae m̦ool eo. Ro rej oktak im jum̦ae m̦ool eo, ejako aer anõke wãween ko kõn Anij im bõktok nõbar ñan e. (Duteronomi 13:6-9) Kõn men in, jej aikuj kattol̦o̦k kõj jãn ri jum̦ae rein ak jabdewõt eo im ej ba e jeid im jatid ilo tõmak bõtab ej kattoon etan Anij. Jej aikuj kõjparok kõj jãn er meñe rej uwaan baam̦le eo ad. (1 Korint 5:11) Jen jab kajjioñ in kam̦ool bwe ri jum̦ae rein im ro jet me rej kananaik doulul eo an Jeova rebõd kõnke men in eban jipañ kõj. Ilo m̦ool, jejjab kõn̦aan jel̦ã ñan jidik ta eo ri jum̦ae rein rej ba ilo bok ko aer ak ilo Internet kõnke men in emaroñ ko̦kkure kõtaan eo ad ippãn Jeova.​—Riit Aiseia 5:20; Matu 7:6.

14. Ta juon iaan wãween ko raorõktata me jemaroñ anõke Jeova? Etke?

¹⁴ Juon iaan wãween ko raorõktata me jemaroñ anõke Jeova ej ilo ad kwal̦o̦k yokwe. (1 Jon 4:16-19) Ilo m̦ool, ad kwal̦o̦k yokwe ñan doon ej kam̦ool bwe jej rũkal̦oor ro an Jijej im ri karejar ro an Jeova. (Jon 13:​34, 35) Kõnke jejjab weeppãn, jet iien emaroñ pen ñan ad kwal̦o̦k yokwe. Bõtab, jej aikuj kate kõj ñan kwal̦o̦k yokwe aolep iien. Ñe jej kate  kõj ñan kõm̦m̦ane men in im wãween ko jet me rej kabuñbũruon Anij, men in enaaj kõjparok kõj jãn ad kõm̦m̦ani men ko rebõd im renana.​—2 Piter 1:5-7.

15. El̦aññe jej yokwe ro jet, ewi wãween men in enaaj jelõt wãween ad kõm̦m̦an ñan er?

¹⁵ Yokwe ej kõm̦akũt kõj ñan kõm̦m̦ani men ko rem̦m̦an ñan armej ro jet. (Rom 13:8-10, UBS) Ñan waanjoñak, el̦aññe l̦eo im lio ri pãlele rej yokwe doon, erro jim̦or renaaj tiljek wõt ñan doon. Bareinwõt, el̦aññe jej yokwe m̦aan ro rej lale eklejia im kwal̦o̦k kautiej ñan er kõn jerbal ko rej kõm̦m̦ani, jenaaj pokake im kõttãik kõj ñan er. Im ajri ro me rej yokwe jemãer im jineer, rej pokake im jel̦ãn̦ae er im rejjab kananaiki er. El̦aññe jej yokwe ro jet, jeban l̦õmn̦ak bwe rettãl̦o̦k jãn kõj im eban nana im eddo wãween ad kõnono ñan er. (Jemes 3:9) Bareinwõt, ñe m̦aan ro ilo eklejia eo rej yokwe jiip ro nejin Anij ak ro doon Anij, rein renaaj kwal̦o̦k jouj im tũriam̦o ilo aer lale er.​—Jerbal 20:28, 29.

16. Ewi wãween yokwe enaaj jipañ kõj ilo jerbal in kwal̦o̦k naan?

¹⁶ Yokwe ej aikuj bar kõm̦akũt kõj ñan kõm̦m̦ane jerbal in kwal̦o̦k naan. Etke? Kõnke ad yokwe Jeova enaaj jipañ kõj ñan jab ebbeer ñe armej ro rejjab kõn̦aan roñjake ak rejjab itoklimo kõn ennaan eo jej bõkl̦o̦k ñan er. Ijello̦kun ad ebbeer, jenaaj wõnm̦aanl̦o̦k wõt im kwal̦o̦k kõn nuuj eo em̦m̦an. Yokwe enaaj bar kõm̦akũt kõj ñan kapojakl̦o̦k im̦aan m̦okta jãn ad ilo̦k im kwal̦o̦k naan. Im enaaj kõm̦m̦an ad kate kõj bwe jen ro ebolemen wãween aer katakin ro jet kõn Naan in Anij. El̦aññe em̦ool ad yokwe Anij im armej ro, jeban watõk jerbal in kwal̦o̦k naan ãinwõt juon eddo. Bõtab, jenaaj watõke ãinwõt juon jeraam̦m̦an el̦ap im jenaaj lañlõñ ilo ad kõm̦m̦ane.​—Matu 10:7.

WÕNM̦AANL̦O̦K WÕT IM NÕBAR JEOVA

17. Kõnke jejel̦ã bwe jerawiwi ej bõbrae kõj jãn ad bõktok nõbar ñan Anij, ta eo jej aikuj kõm̦m̦ane?

¹⁷ Enañin aolep armej ilo lal̦ in rejjab jel̦ã im kile bwe ad jolõt jerawiwi ej juon men ekanooj in l̦ap an nana. Bõtab, ñan kõj jelukkuun mel̦el̦e kõn men in. Eñin unin jejel̦ã bwe jej aikuj kate kõj ñan jum̦ae kõn̦aan ko ad ñan kõm̦m̦ani men ko rebõd. Jejel̦ã bwe jej aikuj katak kilen kõjerbal ilo jim̦we maroñ eo ad kõn jel̦ã em̦m̦an im nana. Etke? Kõnke ad kõm̦m̦ane men in enaaj jipañ kõj ñan kõm̦m̦ane men eo ejim̦we ilo iien eo wõt ñe ejino wal̦o̦k ippãd juon kõn̦aan ñan kõm̦m̦ane men eo ebõd. (Rom 7:22, 23) Em̦ool bwe kõj armej jem̦õjn̦o̦, bõtab Anij emaroñ kakajoor kõj bwe jen kõm̦m̦ane men eo ejim̦we ilo jabdewõt wãween ko jej iiooni.​—2 Korint 12:10.

18, 19. (1) Ta eo ej jipañ kõj ñan anjo̦ ioon Setan im enjel̦ ro an renana? (2) Ta eo jej aikuj peek ilo bũruod ñan kõm̦m̦ane?

¹⁸ Jekõn̦aan bõktok nõbar ñan Jeova, kõn men in jej aikuj jum̦ae Setan im enjel̦ ro an renana. Jemaroñ anjo̦ ioon rein ikijjeen “kein tarin̦ae an Anij.” (Epesõs 6:11-13) Meñe ej tõllo̦kũn wõt Jeova ñan bõk nõbar ak Setan ej lukkuun kate bwe en ejjel̦o̦k juon ej bõktok nõbar ñan Jeova,. Setan ej bareinwõt kate e ñan ko̦kkure jem̦jerã eo ad ippãn Anij. Bõtab, Setan ejjab lo anjo̦ kõnke elõñ milien m̦aan im kõrã ro kab ajri ro rejjab weeppãn rej tiljek wõt ñan Anij im kõm̦m̦ani men ko rej bõktok nõbar ñan e. Innem jen wõnm̦aanl̦o̦k wõt ilo ad bõktok nõbar ñan Jeova ãinwõt enjel̦ ro ilañ me rej ba: “Ekkar ñan Kwe, O Irooj im am Anij, bwe Kwõn bõk aiboojoj im nõbar im kajoor; bwe Kwaar kõm̦anm̦an men ko otemjej im kõn ankil Am̦ rar pãd im em̦õj kõm̦anm̦an.”​—Revelesõn 4:11.

¹⁹ Iien otemjej jen peek ilo bũruod ñan wõnm̦aanl̦o̦k wõt im bõktok nõbar ñan Jeova. El̦ap an Jeova m̦õn̦õn̦õ ñe ej lo an aolep ri karejar ro an kate er ñan anõke im kõm̦m̦ani men ko rej bõktok nõbar ñan e. (Jabõn Kõnnaan 27:11) L̦õmn̦ak eo ad en ãinwõt l̦õmn̦ak eo an Devid, eo ear nõbar Jeova jãn aolepen bũruon ilo an al: “Inaaj kaiboojoj etam̦ ñan indeeo.” (Sam 86:12) Armej ro rej pokake Jeova renaaj weeppãn ilo aer anõke wãween ko kõn e im kõm̦m̦ani men ko rej bõktok nõbar ñan e ñan indeeo. Enaaj kanooj in em̦m̦an ñe jepãd ilo iien in. Innem, kwõj ke anõke wãween ko rem̦m̦an kõn Jeova Anij im kõm̦m̦ani men ko rej bõktok nõbar ñan e kiiõ? Im kwõj ke l̦õmn̦ak in kõm̦m̦ane men in ñan indeeo?

[Kajitõk ko ñan katak]

[Pija eo ilo peij 31]

Kwõj ke anõke Jeova im bõktok nõbar ñan e ilo am̦ kõm̦m̦ane wãween kein?