Kwõmaroñ Kakajoor Mour in M̦are eo Am̦

“Ñan ro em̦õj aer pãlele ij karoñ, jab ña, a Irooj.”​—1 KORINT 7:10.

KWÕMAROÑ KE KÕMEL̦EL̦E?

Ewi wãween Anij ej kobaik ri pãlele ro?

Ewi wãween em̦m̦aan ro rej lale eklejia eo remaroñ jipañ Kũrjin ri pãlele ro me ewõr apañ ilo mour in m̦are eo aer?

En ewi wãween ad watõk mour in m̦are?

1. Ewi wãween an Kũrjin ro watõk mour in m̦are? Etke?

 ÑE KŨRJIN ro rej m̦are, rej kõm̦m̦ane juon kallim̦ur ñan Anij. Innem kallim̦ur in rej kõm̦m̦ane ej juon aer eddo ekanooj aorõk. (Ekklisiastis 5:4-6) Jeova ear ejaake mour in pãlele, kõn men in, e eo ej “kobaik” armej ro em̦õj aer m̦are. (Mark 10:9) Ikijjeen m̦are, jet iien kien ko an juon aelõñ im kien ko ilo Baibõl̦ eo rej idaaptõk ippãn doon. Bõtab, ri karejar ro an Jeova rej l̦oore wõt l̦õmn̦ak eo an Anij ilo Baibõl̦ eo. Men in ej bar jerbal ñan ro im rejañin kar erom ri karejeran Anij ilo iien eo rar m̦are.

2. Ta kajjitõk ko jenaaj etali ilo katak in?

² Emaroñ l̦ap m̦õn̦õn̦õ ilo mour in m̦are. Bõtab, ñe jejjab lo m̦õn̦õn̦õ ilo mour in m̦are eo ad, ta eo jemaroñ kõm̦m̦ane? Jemaroñ ke kakajoore mour in m̦are eo ad? Ta eo emaroñ jipañ ri pãlele ro me rejjab lo m̦õn̦õn̦õ im aenõm̦m̦an ilo mour in m̦are eo aer?

ENAAJ JUON MOUR IN M̦ARE ELEM̦ÕN̦ÕN̦Õ KE AK JAAB?

3, 4. Ta eo emaroñ wal̦o̦k ñe jej kõm̦m̦ane juon pepe ejjab jim̦we kõn wõn eo jej m̦areiki?

³ Ñe epen im kajoor mour in m̦are eo an Kũrjin ri pãlele ro, erro naaj lukkuun m̦õn̦õn̦õ im mour in m̦are eo aerro enaaj nõbar Jeova. Ak el̦aññe ejjab pen im ejjab kajoor, enaaj lõñ men ko rekabũrom̦õjm̦õj rej wal̦o̦k. Juon Kũrjin me ej l̦õmn̦ak in m̦are enaaj maroñ lo m̦õn̦õn̦õ jãn jinoin mour in m̦are eo an ñe enaaj l̦oor naan in tõl ko an Anij. Bõtab, ñe juon ej kõm̦m̦ane juon pepe ejjab jim̦we kõn wõn eo ej m̦areiki, eokwe mour in m̦are eo an emaroñ jorrããn im kabũrom̦õjm̦õj. Ñan waanjoñak, jet jodrikdrik ro rar jino date meñe rejañin pojak ñan aer kõm̦m̦ani eddo ko an juon eo em̦õj an m̦are. Ro jet rar ellolo pãleer itok wõt jãn aer kar kappok ilo Internet im rar m̦õkaj in m̦are. Kõn men in, tokãlik rar jab lo m̦õn̦õn̦õ ilo  mour in m̦are eo aer. Bar jet rar kõm̦m̦an jerawiwi ilo iien eo wõt me rar date, im aer kar ãindein ear kõm̦m̦an bwe en dikl̦o̦k aerro kautieje doon. Innem, ñe erro ej pepe ñan m̦are, emaroñ jab kajoor pedpedin mour in m̦are eo aerro.

⁴ Jet Kũrjin rejjab m̦are “ilo Irooj wõt,” kõn men in, rej eñtaan kõnke eo rejetaer ejjab juon eo ej karejar ñan Jeova. (1 Korint 7:39) El̦aññe kwõj iioon wãween in, kwõn jar ñan Anij bwe en jol̦o̦k am̦ bõd im bwe en jipañ eok. Jeova ejjab jol̦o̦k men ko juon armej ej m̦adm̦õdi itok wõt jãn bõd ko ear kõm̦m̦ani. Bõtab, ñe ej kwal̦o̦k bõd eo an im m̦ool an ukel̦o̦k, Jeova ej jipañ armej eo bwe en kijenmej. (Sam 130:1-4) Kõn men in, lukkuun kate eok ñan kabuñbũruon Anij. Innem ‘lañlõñ eo Jeova ej lewõj ñan eok enaaj kõm̦m̦an bwe kwõn kajoor.’​—Nihimaia 8:10, UBS.

ÑE MOUR IN M̦ARE EO EJ PÃD ILO KAUWÕTATA

5. Ta ko ro rejjab m̦õn̦õn̦õ ilo mour in m̦are eo aer rej aikuj jab l̦õmn̦ak kaki?

⁵ Ñe jet rejjab m̦õn̦õn̦õ ilo mour in m̦are eo aer, bõlen remaroñ l̦õmn̦ak im ba: ‘Ij ke aikuj kõjparok mour in m̦are eo aõ? Bõlen inaaj m̦õn̦õn̦õ l̦o̦k ñe inaaj m̦areik bar juon.’ Remaroñ l̦õmn̦ak in ilo̦k jãn eo rejetaer im bõk l̦õmn̦ak in: ‘Ikõn̦aan bwe in bar anemkwoj. Bõlen imaroñ jepel jãn e. Ak ñe ejjab ekkar ñan Baibõl̦ eo, eokwe imaroñ kõjenolo̦k eõ jãn e. Ilo wãween in, imaroñ bar limo ãinwõt kar jinoin ke iar lukkuun anemkwoj.’ Kũrjin ro ren jab bõk l̦õmn̦ak rot kein im l̦õmn̦ak kõn wãween an naaj oktak mour eo aer ñe renaaj kõm̦m̦ane wãween kein. Ak rej aikuj kate er joñan wõt aer maroñ ilo wãween eo epen rej iioone ilo mour in m̦are eo aer. Im ren l̦oore naan in tõl ko an Anij.

6. Ta mel̦el̦ein naan ko an Jijej ilo Matu 19:9?

⁶ El̦aññe juon Kũrjin ej jepel jãn eo pãleen, emaroñ ak emaroñ jab bar m̦are ekkar ñan kien ko ilo Baibõl̦. Jijej ear ba: “Jabdewõt eo enaaj jol̦o̦k lio pãleen, el̦aññe e jab kõn l̦õñ, im e naaj pãleek bar juon, ej l̦õñ.” (Matu 19:9) L̦õñ ej kitibuj lejen ak ellolo im jerawiwi ko jet rel̦l̦ap kõn mour ettoon. Ñe juon Kũrjin ej l̦õmn̦ak in jepel jãn eo pãleen el̦aññe ejjab kõn l̦õñ, eokwe elukkuun aorõk bwe en jar ñan Anij bwe en tõl e im jipañ e.

7. Ta eo armej ro remaroñ l̦õmn̦ak kake ñe ejjab em̦m̦an mour in m̦are eo an ro rej Kũrjin?

⁷ Ñe ri pãlele ro rej jepel men in emaroñ mel̦el̦ein bwe juon iaerro ejjab kajoor kõtaan eo an ippãn Anij. Rijjelõk Paul ear kwal̦o̦k kajjitõk in eaorõk: “Ñe ejjab jel̦ã karõk nukũn eo an, enaaj kõjkan an naaj jel̦ã karõk eklejia eo an Anij?” (1 Timote 3:5, UBS) Ñe ri pãlele ro rej ba er Kũrjin ak ejjañin de em̦m̦an mour in m̦are eo aerro, eokwe armej ro renaaj ba bwe rejjab jerbali men ko rej kwal̦o̦k naan kaki.​—Rom 2:21-24.

8. Ñe Kũrjin ro rej pepe ñan jepel, ta eo men in ej kalikkar kõn kõtaan eo aerro ippãn Jeova?

 ⁸ Ñe Kũrjin ri pãlele ro rej pepe ñan jab jokwe ippãn doon ak kõm̦m̦an aer peba in jepel im ejjab ekkar ñan kien ko ilo Baibõl̦ eo, eokwe mel̦el̦ein bwe ejjab em̦m̦an kõtaan eo aerro ippãn Jeova. Bõlen erro jim̦or ak juon iaerro ejjab jerbali naan in kakapilõk ko jãn Baibõl̦ eo. El̦aññe erro jim̦or ej lõke Jeova kõn aolepen bũrueerro, eokwe erro maroñ kõjparok mour in m̦are eo aerro.​—Riit Jabõn Kõnnaan 3:5, 6.

9. Ewi wãween jet Kũrjin rar jeraam̦m̦an kõn aer kar pãdwõt ippãn eo pãleer?

⁹ Elõñ ri pãlele ro rar iioon elõñ apañ ko, jonãn rar l̦õmn̦ak bwe enaaj kar jorrããn mour in m̦are eo aer. Bõtab, jet iaaer rar lo tõprak. Kũrjin ro me rej iioon apañ ko ilo mour in m̦are eo aer ak rejjab m̦õkaj in jepel jãn eo rejetaer, ekkã aer lo jeraam̦m̦an tokãlik. Ñan waanjoñak, l̦õmn̦ak m̦õk kõn ta eo emaroñ wal̦o̦k ñe l̦eo ejjab juon ri tõmak. Rijjelõk Piter ear je im ba: “Lim̦aro, kom̦win kõttãik kom̦ ñan l̦õm̦aro pãleõmi; bwe el̦aññe jabdewõt e jab pokake naan eo, en reel bũruon ñe ejjel̦o̦k naan, kõn an pãleer pãd im kõm̦m̦an, ñe rej lo ami etetal e kwõjarjar ilo mijak.” (1 Piter 3:1, 2) Ri pãlele eo ejjab pãd ilo tõmak emaroñ oktak ñan m̦ool eo kõn an em̦m̦an m̦wilin ak kõm̦m̦an ko an eo rejetan. Kũrjin ro me rej kõjparok mour in m̦are eo aer im pãdwõt ippãn eo pãleer rej nõbar im kautiej Anij. Bareinwõt, men in ej bõktok jeraam̦m̦an ko ñan aolepen baam̦le eo.

10, 11. Ta oktak ko remaroñ wal̦o̦k ñan ri pãlele ro? Ta eo juon Kũrjin emaroñ lõke bwe enaaj bõk jipañ jãne?

¹⁰ Ñe Kũrjin ro rej kõn̦aan m̦are, enañin aoleper rej kããlõt ñan m̦areik ro em̦õj aer peptaij kõnke rekõn̦aan kabuñbũruon Jeova. Meñe ãindein ak emaroñ wõr oktak ko im rar jab l̦õmn̦ak bwe enaaj kar wal̦o̦k ñan er. Ñan waanjoñak, juon iaan ri pãlele ro emaroñ jino wõr an nañinmej me ej jelõt wãween an l̦õmn̦ak im eñjake. Ak juon iaerro emaroñ jako an kwal̦o̦k naan im ej jino m̦õjn̦o̦ ilo tõmak. Ear wal̦o̦k men in ñan juon kõrã etan Linda. * (Lale kõmel̦el̦e eo itulal̦.) Kõrã in ear juon Kũrjin eo ekijejeto im el̦ap an yokwe baam̦le eo an. Ear lukkuun bũrom̦õj im ebbeer ke l̦eo pãleen ear jino kõm̦m̦ani men ko rejjab jim̦we. L̦ein ear jab ukel̦o̦k jãn men ko ear kõm̦m̦ani, im kar aikuj bukwel̦o̦k e. Kũrjin ri pãlele ro me rej bar iioon ejja wãween kein wõt remaroñ l̦õmn̦ak bwe ejjel̦o̦k tokjãn mour in m̦are eo aer. Ak ta eo rej aikuj kõm̦m̦ane?

¹¹ Bõlen kwõmaroñ l̦õmn̦ak im ba: ‘Ij aikuj ke kate wõt eõ ñan kõjparok mour in m̦are eo aõ jekdo̦o̦n ta eo ej wal̦o̦k?’ Ejjel̦o̦k juon ej aikuj kõm̦m̦an pepe ñan kwe. Bõtab, ewõr un ko rem̦m̦an ñan jab ebbeer ñe ejjab em̦m̦an mour in m̦are eo am̦. Jeova ej kaorõk Kũrjin ro me rej kijenmej wõt kõnke men ko rar katak jãn Baibõl̦ rej jipañ er ñan jab jepel jãn eo pãleer. (Riit 1 Piter 2:19, 20, UBS.) Ñe Kũrjin ro rej kate er im kõm̦m̦an jabdewõt men me enaaj kakajoor mour in m̦are eo aer, Jeova enaaj jipañ er ikijjeen an kõjerbale Naan eo an im kajoor eo an.

REPOJAK ÑAN JIPAÑ EOK

12. Enaaj ewi l̦õmn̦ak eo an em̦m̦aan ro rej lale eklejia eo ñe jej kajjitõk jipañ jãn er?

¹² Ñe ewõr apañ ilo mour in m̦are eo am̦, kwõmaroñ kajjitõk jipañ jãn Kũrjin ro im rekajoor ilo tõmak. Em̦m̦aan ro rej lale eklejia eo renaaj m̦õn̦õn̦õ in kwal̦o̦k ñan eok naan  in kakapilõk ko an Anij ilo Baibõl̦ eo. (Jerbal 20:28; Jemes 5:14, 15) Ñe komiro eo pãleem̦ ej kwal̦o̦k apañ eo amiro ñan rein im kajjitõk jipañ jãn er, ejjab mel̦el̦ein bwe enaaj jako aer kautiej komiro. Bõtab, enaaj l̦ap aer lukkuun yokwe im kwal̦o̦k kautiej ñan komiro kõnke rejel̦ã bwe komiro ej kõn̦aan kabuñbũruon Anij.

13. Ta naan in kakapilõklõk eo an Paul ilo 1 Korint 7:10-16?

¹³ Ñe juon Kũrjin me ej pãleek juon eo ejjab ri tõmak ej kajjitõk jipañ, em̦m̦aan ro rej lale eklejia eo remaroñ kõjerbal naan in kakapilõk in an Paul: “Ñan ro em̦õj aer pãlele ij karoñ, jab ña, a Irooj, lio en jab jepel [kamakel̦o̦k] jãn l̦eo pãleen, (A el̦aññe ej jepel, en pãd wõt im jab bar pãlele, ak en bar yokwe l̦eo pãleen), im l̦eo en jab ilo̦k jãn lio pãleen. . . . Bwe ekõjkan am̦ jel̦ã, O kõrã, el̦aññe kwõnaaj lo̦mo̦o̦ren l̦eo pãleem̦? Ak ekõjkan am̦ jel̦ã, O m̦aan, el̦aññe kwõnaaj lo̦mo̦o̦ren lio pãleem̦?” (1 Korint 7:10-16) Ej juon jeraam̦m̦an ñe ri pãlele eo juon me ejjab ri tõmak ej oktak im erom ri karejeran Jeova.

14, 15. Ta ko remaroñ kõm̦m̦an an juon Kũrjin kõrã ilo̦k jãn l̦eo pãleen? Etke ej aikuj lukkuun etale im jar kake men in?

¹⁴ Ta ko remaroñ kõm̦m̦an an juon Kũrjin kõrã maroñ kamakel̦o̦k ak ilo̦k jãn l̦eo pãleen? Jet rar kããlõt ñan ilo̦k jãn eo pãleer kõn un kein jilu. Kein kajuon, l̦eo ejjab kõke aikuj ko an baam̦le eo im ekõm̦m̦an an ejjel̦o̦k aer jããn im kijeer m̦õñã. Kein karuo, el̦ap an l̦eo m̦an e, im ekõm̦m̦an bwe mour eo an lio en pãd ilo kauwõtata. Im kein kajilu, l̦eo ej lukkuun dike an lio karejar ñan Anij im ej kapañ e jãn an kõm̦m̦ane men in.

¹⁵ Ej an juon make pepe ñan ilo̦k jãn eo pãleen. Ak ñe ejjab kõn̦aan eokwe ej an bar make pepe. Bõtab, ñe Kũrjin ro rej pepe kake men in, ren lukkuun etale im rej aikuj jar kake. Ñan waanjoñak, eo pãleem̦ me ejjab ri tõmak ej e eo wõt ke me ej kõm̦m̦an bwe en pen am̦ karejar ñan Jeova? Ak emaroñ ke bwe ejjab ikutkut am̦ katak Baibõl̦ ippam̦ make, im kwõj jakkeini am̦ kweilo̦k im kwal̦o̦k naan?

16. Etke Kũrjin ro ren jab m̦õkaj in pepe ñan jepel jãn eo pãleer?

¹⁶ Jen jab m̦õkaj in pepe in jepel jãn eo pãleed. El̦ap an aorõk kõtaan eo ad ippãn Anij im kõn men in, jen kaorõk mour in m̦are eo ad, eo im ej menin letok eo an Anij. Kõnke jej ri karejar ro an Jeova, jekõn̦aan bwe en kwõjarjar wõt etan im jab ettoon. Jej kõm̦m̦ane men in ilo ad jab kõm̦m̦ani pepe ko me renaaj kõm̦m̦an an armej ro kananaik etan Anij. Kõn men in, jeban kõm̦m̦ane men eo enana ñan eo rejetad ilo ad pepe in ilo̦k jãn e ak jepel kõnke jekõn̦aan m̦areik bar juon.​—Jeremaia 17:9; Malakai 2:13-16.

17. Ta wãween eo jemaroñ iioone im ej tõll̦o̦k ñan an Anij kũr kõj ñan mour ilo aenõm̦m̦an?

¹⁷ Kũrjin ro me ro pãleer ejjab ri tõmak, rej aikuj kate er ñan kakajoor mour in m̦are  eo aer. Bõtab, ñe rejjab lo tõprak meñe rej lukkuun kate er, eokwe ejjab aikuj nana aer mour im ren jab l̦õmn̦ak bwe ej aer bõd ñe eo pãleer ejjab ri tõmak ej etal jãn er. Rijjelõk Paul ear je: “El̦aññe eo ejjab tõmak ekõn̦aan jepel jãn ri Kũrjin eo pãleen, en ilo̦k. Ilo wãween rot kein, eanemkwoj. Bwe Anij ear karõk ñan kom̦ bwe kom̦win mour ilo aenõm̦m̦an.”​—1 Korint 7:15, UBS.

LÕKE JEOVA

18. Ta men ko rem̦m̦an renaaj wal̦o̦k meñe jej kate kõj ilo mour in m̦are eo ad ak jejjab lo tõprak?

¹⁸ Ñe ewõr apañ ilo mour in m̦are eo ad, jej aikuj jar ñan Jeova bwe en kaperan kõj im aolep iien jen lõke e. (Riit Sam 27:14, UBS.) Ilo kar jinoin katak in, jaar kõnono kõn kõrã eo Linda. Elõñ iiõ in an kar lukkuun kate bwe en kõjparok mour in m̦are eo an, bõtab ear jab lo tõprak. Erro l̦eo pãleen ar lukkuun jepel. Linda ear ke l̦õmn̦ak bwe ejjel̦o̦k tokjãn an kar kate e ñan kõjparok mour in m̦are eo an? Eokwe liin ej ba, “Jaab ñan jidik. Aõ kar kate eõ joñan wõt aõ maroñ ear juon wãween me iar kwal̦o̦k naan ñan ro jet. Ijjab n̦aruo ak nana aõ mour. Im el̦aptata aolepen iiõ ko me iar kijenmej im kate eõ, ear jipañ leddik eo nejũm̦ro bwe en pen wõt ilo tõmak. Tokãlik ear juon Ri Kõnnaan an Jeova ekijejeto.”

19. Ta tokjãn ko renaaj wal̦o̦k ñe jej kate kõj ñan kõjparok mour in m̦are eo ad?

¹⁹ Juon kõrã ej Kũrjin etan Marilyn em̦õn̦õn̦õ bwe ear lõke Anij im kate wõt e ñan kõjparok mour in m̦are eo an. Ej ba bwe ear l̦õmn̦ak in ilo̦k jãn eo pãleen kõn an l̦eo jab kabwe aikuj ko an im ear kõm̦m̦an an m̦õjn̦o̦ kõtaan eo an ippãn Jeova. Kar m̦okta, l̦eo ippãn ear juon iaan ro rar lale eklejia eo. Tokãlik ear bõk kun̦aan ilo jet wãween ko rejjab jim̦we kõn jerbal in peejnej. Innem ear jino jako jãn kweilo̦k ko, im ear jako aerro bwebwenato ippãn doon. Bareinwõt, ear wal̦o̦k juon jorrããn el̦ap jãn ri nana ro ijo erro ej jokwe ie, im joñan an kar men in kamijake ear pen an pãd ippãn ro jet. Liin ear kile bwe ej an bar bõd kõn unin an wõr apañ ilo mour in m̦are eo aerro. Kõn men in, erro ar bar jino bwebwenato ippãn doon, katak Baibõl̦ ippãn doon im jino keini aerro pãd ilo kweilo̦k ko. Em̦m̦aan ro rej lale eklejia eo rar kwal̦o̦k jouj im l̦ap aer jipañ erro. Tokãlik, ear bar lukkuun em̦m̦an mour in m̦are eo aerro. Erro ar lukkuun m̦õn̦õn̦õ. Im tokãlik kar lel̦o̦k jerbal ko ilo eklejia eo ñan l̦eo. Marilyn ej ba bwe men in me erro l̦eo pãleen ar iioone im katak jãne ear jab pidodo ak ewõr tokjãn ko erro ar iiooni.

20, 21. Ta eo jen peek in kõm̦m̦ane ilo mour in m̦are eo ad?

²⁰ Meñe kõj ri pãlele ak jab, jej aikuj peran im lõke Jeova aolep iien. Ñe ewõr apañ ilo mour in m̦are eo ad, jen kõm̦m̦an jabdewõt men me enaaj jipañ kõj ñan kõm̦adm̦õdi apañ ko. Im jen keememej bwe ro em̦õj aer m̦are “erro re jab ruo, a juon wõt kanniõk.” (Matu 19:6) Im ñe jej pãd wõt ippãn eo pãleed me ejjab ri tõmak meñe ewõr apañ ko rej wal̦o̦k, bõlen juon iien enaaj oktak im karejar ñan Jeova, im men in enaaj l̦ap an kalañlõñ kõj.

²¹ Jekdo̦o̦n ta eo jej iioone, kõm̦m̦an ko ad ren em̦m̦an kõnke ilo wãween in jej kwal̦o̦k naan ñan ro rejjab pãd ilo m̦ool eo. Ñe ewõr apañ ko rel̦l̦ap ilo mour in m̦are eo ad im jekõn̦aan etal jãn eo pãleed, eokwe jen lukkuun etali un ko unin ad kõn̦aan kõm̦m̦ane men in. Jen lukkuun jar, etale Baibõl̦ eo im kõl̦mãnl̦o̦kjen̦ kake. Im jen kajjitõk jipañ jãn em̦m̦aan ro rej lale eklejia eo. El̦aptata, jen peek ilo bũruod bwe aolep men ko jej kõm̦m̦ani jen kabuñbũruon Jeova Anij. Mour in m̦are ej juon menin letok jãn Anij, innem jen kwal̦o̦k ad kaorõk im kam̦m̦oolole Anij kõn menin letok in.

[Komel̦el̦e eo itulal̦]

[Kajitõk ko ñan katak]

[Naan ko ilo peij 20]

Kũrjin ri pãlele ro me rej iioon apañ ilo mour in m̦are eo aer ak rejjab m̦õkaj in jepel, ekkã aer lo jeram̦m̦an tokãlik

[Naan ko ilo peij 22]

Jen aolep iien lõke Jeova im kajjitõk bwe en kaperan kõj

[Pija eo ilo peij 19]

Jeova ej kajeraam̦m̦an Kũrjin ri pãlele ro me rej kate er ñan kakajoor mour in m̦are eo aer

[Pija eo ilo peij 21]

Eklejia eo an Kũrjin emaroñ kaenõm̦m̦an kõj im kakajoor kõtaan eo ad ippãn Jeova