“Naaj Kwal̦o̦k Gospel in an Aelõñ in Lañ Iaolepen Lal̦”
“Naaj Kwal̦o̦k Gospel in an Aelõñ in Lañ Iaolepen Lal̦”
“Naaj kwal̦o̦k gospel in an aelõñ in lañ iaolepen lal̦ kõn men in kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.”—MATU 24:14.
Mel̦el̦ein Men In: Luk, eo me ear je juon iaan Gospel ko, ear ba bwe Jijej ear “ilo̦k ilo jikin kweilo̦k otemjej rel̦l̦ap im reddik, im Ej kwal̦o̦k im kõnono gospel an aelõñ in Anij.” (Luk 8:1) Jijej make ear ba: “In kwal̦o̦k naan em̦m̦an an aelõñ in Anij ñan jikin kweilo̦k ko jet; bwe ar jilkintok Eõ kõn men in.” (Luk 4:43) Jijej ear jilkinl̦o̦k rũkal̦oor ro an bwe ren kwal̦o̦k kõn gospel eo ak nuuj eo em̦m̦an ilo bukwõn ko im tokãlik ear jiroñ er: “Kom̦ naaj Aõ ri kõnnaan ilo . . . ãne eo ettol̦o̦k tata ilal̦.”—Jerbal 1:8; Luk 10:1.
Wãween Kũrjin ro M̦okta Rar Jerbale Men In: Rũkal̦oor ro an Jijej rar m̦õkaj im kõm̦m̦ane men eo Jijej ear jiroñ er bwe ren kõm̦m̦ane. “Raan otemjej rar wõnm̦aanl̦o̦k wõt im katakin ilowaan Tampel̦ kab ilo m̦oko im̦õn armej im kwal̦o̦k kõn Ennaan eo Em̦m̦an kõn Jijej Messaia eo.” (Jerbal 5:42, UBS) Ejjab armej ro reutiej wõt rar kõm̦m̦ane jerbal in kwal̦o̦k naan in ak aolep ro ilo eklejia eo rar bõk kun̦aaer. Neander, eo ej katak kõn bwebwenato in etto, ej ba kõn ri jeje eo m̦oktata etan Celsus me ear kõjdate Kũrjin ro bwe l̦ein ear kwal̦o̦k wõn ro rekar bõk kun̦aaer im kijejeto ilo kwal̦o̦k naan. Ear ba bwe rein rej ro im jerbal ko aer ej kõm̦m̦an nuknuk jãn kool̦an jiip, ri kõm̦m̦an juuj, ro rej kõm̦m̦ani men ko jãn kilin kau, ro rejaje riit im jeje im ro rettã. Jean Bernardi ear je naan kein ilo bok eo an etan The Early Centuries of the Church: “[Kũrjin ro] rar ilo̦k im kõnono ñan aolep armej ro im ilo aolep jikin ko. Rar kwal̦o̦k naan iturin ial̦ ko im ilo jikin kweilo̦k ko, ilo joko elõñ armej ie, im ilo m̦oko im̦wier. Jekdo̦o̦n ñe armej ro rar karwaineneik er ak jab. . . . Rein rar kwal̦o̦k naan l̦o̦k ñan ãne ko rettol̦o̦k.”
Wõn Ro Rainin Rej Kwal̦o̦k Ejja Wãween in Wõt? Juon bũrij etan David Watson ilo kabuñ in Anglican ear je: “Kõnke kabuñ ko rejjab lukkuun kaorõk jerbal in kwal̦o̦k naan im katakin armej ro, eñin ej juon iaan un ko unin an elõñ armej ro rainin jab kõn̦aan karejar ñan Anij.” Juon em̦m̦aan etan José Luis Pérez Guadalupe ear je men ko kabuñ ko rej kõm̦m̦ani ãinwõt kabuñ in Evangelical, im Seventh-Day Adventist, im bareinwõt kabuñ ko jet ilo bok eo an etan Why Are the Catholics Leaving? Im ear bar je bwe kabuñ kein rejjab etal ñan em̦ ñan em̦ im kwal̦o̦k naan. Ak ikijjeen kabuñ eo an Ri Kõnnaan ro an Jeova, ear je im ba bwe elet im reniknik in kwal̦o̦k naan jãn em̦ ñan em̦.
Ilo bok eo etan Cato Supreme Court Review, 2001-2002, Jonathan Turley ear kwal̦o̦k juon men ekaitoktoklimo me ear kile. Ear ba: “Ñe armej rej roñ ãt in Ri Kõnnaan ro an Jeova, men eo m̦oktata rej l̦õmn̦ak kake ej bwe rein rej ri kwal̦o̦k ro me rej etal ñan m̦oko im̦õd ilo iien ko jej poub ie. Bõtab, ippãn Ri Kõnnaan ro an Jeova, aer kwal̦o̦k naan elukkuun aorõk ñan tõmak ko aer.”
[Bo̦o̦k ilo peij 9]
Kwõj Ke Kile Wõn Ro Rej Kalikkar bwe Rej Kũrjin ro Rem̦ool?
Ekkar ñan eoon ko jaar etali ilo katak in im katak ko l̦o̦k m̦okta, wõn ro kwõj l̦õmn̦ak bwe rej Kũrjin ro rem̦ool rainin? Meñe elõñ to̦ujin kabuñ ko reddik im kabuñ ko rel̦l̦ap me rej ba rej Kũrjin, bõtab keememej naan kein an Jijej ñan rũkal̦oor ro an ke ear ba: “Jab otemjej rej ba ñan Eõ, ‘Irooj, Irooj,’ re naaj del̦o̦ñtok ilo aelõñ in lañ, a eo ej kõm̦anm̦an ankilaan Jema ej pãd ilañ.” (Matu 7:21) Ñe jej kile ro rej kõm̦anm̦an ankilaan Jemedwõj ilañ me ej kakõl̦l̦en Kũrjin ro rem̦ool, jej aikuj kobal̦o̦k ippãer. Men in emaroñ tõl kõj ñan ad bõk jeraam̦m̦an ko me rej ñan indeeo ium̦win Aelõñ eo an Anij. Kõmij rõjañ eok ñan kajjitõk ippãn Ri Kõnnaan ro an Jeova, ro rar lewõje bok in, kõn mel̦el̦e ko jet kõn Aelõñ eo an Anij im jeraam̦m̦an ko me renaaj wal̦o̦ktok jãne.—Luk 4:43.
