Ruwaakl̦o̦k Ñan Anij

‘Rejamin Keememej Men ko M̦okta’

EMEMEJ ej juon menin jeraam̦m̦an. Etke? Kõnke ñe jej keememej iien ko ad me relukkuun em̦m̦an im kam̦õn̦õn̦õ ippãn ro jej yokwe er, men in ej kaenõm̦m̦an kõj. Ak jet iien, ememej emaroñ juon men ejjab em̦m̦an. Etke? Eokwe, kwõj ke bũrom̦õj ñe kwõj keememej men ko im kwaar iiooni me rar kõmetak eok? El̦aññe aet, bõlen kwõj l̦õmn̦ak ippam̦ make im ba, ‘Men kein ij keememeji me rej kõm̦m̦an aõ bũrom̦õj renaaj ke jako jãn l̦õmn̦ake aõ?’ Jenaaj lo uwaak eo ilo naan ko an ri kanaan Aiseia.​—Riit Aiseia 65:17.

Jeova ekõn̦aan jol̦o̦k men ko jej keememeji im rej kabũrom̦õj kõj. Ewi wãween enaaj jol̦o̦ki? Ej ikijjeen an naaj jol̦o̦k aolep men ko renana ilo jukjuk im pãd in ñan juon men ekanooj in em̦m̦anl̦o̦k. Jeova ear kallim̦ur ikijjeen Aiseia, im ba: “Ij kõm̦m̦an lañ ko re kããl im lal̦ ekããl.” Ñe jej mel̦el̦e kõn kallim̦ur in, ilo bũruod jenaaj lukkuun m̦õn̦õn̦õ kõnke ewõr ad kõjatdikdik.

Ta in lañ ko rekããl? Baibõl̦ eo ej kwal̦o̦k ruo men ko me renaaj jipañ kõj ñan mel̦el̦e kõn men in. Kein kajuon, ej kõn ta eo ruo ri jeje Baibõl̦ ro rar ba kõn men in. Ke erro jim̦or ar kwal̦o̦k kõn naan in lañ ko rekããl, rar jitõñl̦o̦k ñan oktak ko rel̦l̦ap ilo lal̦ in. (2 Piter 3:13; Revelesõn 21:1-4) Kein karuo, Baibõl̦ eo ej kwal̦o̦k bwe naan in “lañ” emaroñ bar jitõñl̦o̦k ñan tõl ak kien. (Aiseia 14:4, 12; Daniel 4:25, 26) Kõn men in, naan in lañ ko rekããl, ej mel̦el̦ein juon kien ekããl, eo im ewõr an maroñ ñan kõm̦m̦an bwe en wõr wãnõk ak bwe en em̦m̦an men ko rej wal̦o̦k ilo lal̦ in. Aelõñ eo wõt an Anij enaaj tõl im katõprak men in. Aelõñ in an Anij ej kien eo ilañ, im eñin kien eo me Jijej ear katakin kõj ñan jar kake. Kien in ak Aelõñ in enaaj kõm̦m̦an bwe en tõprak ankilaan Anij ijin ioon lal̦.​—Matu 6:9, 10.

Ta in lal̦ ekããl? Jen lale mel̦el̦e ko ralikkar ilo ruo eoon jãn Baibõl̦ eo im renaaj jipañ kõj ñan lo uwaak eo. Kein kajuon, ilo Baibõl̦ eo, jet iien ej kõnono kõn naan in “lal̦” im jitõñl̦o̦k ñan armej ro im ejjab kõn lukkuun lal̦ in. (Sam 96:1) Kein karuo, Baibõl̦ eo ej kanaan bwe ñe jenaaj pãd ium̦win tõl eo an Anij, armej ro rej tiljek renaaj katak kõn men ko rewãnõk. Im wãnõk enaaj pãdjake aolepen lal̦ in. (Aiseia 26:9) Kõn men in, lal̦ eo ekããl ej jitõñl̦o̦k ñan armej, ro im rej kõn̦aan bwe Anij en tõl er im rej mour ekkar ñan kien ko an.

Kwõj ke kiiõ kile ewi wãween Jeova enaaj jol̦o̦k men ko jej keememeji im rej kabũrom̦õj kõj? M̦õttan jidik, Jeova enaaj kajejjet aolepen kallim̦ur eo an kõn lañ ko rekããl im lal̦ ekããl. Im renaaj kõm̦m̦an bwe en wõr juon jukjuk im pãd ekããl ak lal̦ ekããl. * (Lale kõmel̦el̦e eo itulal̦.) Ilo naaj lal̦ in ekããl, men ko rej kabũrom̦õj kõj im kaeñtaan kõj renaaj men ko an jem̦aan. Ro rej tiljek renaaj lukkuun l̦ap aer m̦õn̦õn̦õ, im aolep men ko renaaj iiooni ilo iien in renaaj men ko rej keememeji me rekanooj em̦m̦an aolep raan.

Ak ta kõn men ko kiiõ im rej kabũrom̦õj kõj? Kallim̦ur eo an Jeova ikijjeen Aiseia ej wõnm̦aanl̦o̦k wõt im ba ‘rejamin keememej men ko m̦okta.’ Jabdewõt men ej kõmetak bũruod im kabũrom̦õj kõj ilo lal̦ in kiiõ renaaj jidik kõn jidik jakol̦o̦k. Kokõn̦aan ke iioone men in? El̦aññe kokõn̦aan, eokwe etke kwõjjab pukot ewi wãween bwe kwõn maroñ ruwaakl̦o̦k ñan Anij, eo im ej kallim̦ur kõn juon ilju im jekl̦aj eo ekanooj in em̦m̦an?

[Komel̦el̦e eo itulal̦]

[Naan ilo peij 12]

Jeova ekõn̦aan jol̦o̦k men ko jej keememeji im rej kabũrom̦õj kõj