Jemaroñ Tõmak ilo Anij im Bar Pokake Kien Ewi Wãween?

TA RUO iaan men ko raorõk im Jijej ear kõm̦m̦ani ilo kar jerbal in kwal̦o̦k naan eo an? M̦oktata, Jijej ear jipañ armej ro bwe ren kõm̦m̦an oktak ilo mour ko aer. Ear jab kõm̦m̦an oktak ilo kien ko an armej. Ñan waanjoñak, jen lale ta ko Jijej ear kõnnaan kaki ilo Katak eo an ioon Tol̦ eo. M̦okta jãn an kar ba bwe armej ro rej aikuj ãinwõt jo̦o̦l̦ im meram, ebar wõr jet men ko ear kõnnaan kaki. Ear ba bwe armej ro me rej kile bwe rej aikuji katak ko an Anij renaaj lukkuun m̦õn̦õn̦õ ilo mour ko aer. Ear bar ba: “Em̦õn̦õn̦õ ro ettã bũrueer; . . . ro erreo bũrueer, . . . ro rej kõm̦m̦an aenõm̦m̦an.” (Matu 5:​1-11, UBS) Jijej ear jipañ rũkal̦oor ro an bwe ren kile aorõkin aer aikuj ukot l̦õmn̦ak im eñjake ko aer bwe ren jab oktak jãn l̦õmn̦ak ko an Anij kõn men ko rem̦m̦an im men ko renana. Ear bar jipañ er bwe ren kile aorõkin aer aikuj jerbal ñan Anij kõn aolepen bũrueer.

Kein karuo, ke Jijej ear loe an armej ro eñtaan, ear lukkuun bũrom̦õj kake er. Men in ear kõm̦m̦an bwe en ilo̦k in jipañ er im kadikl̦o̦k aer eñtaan. Bõtab, ke ear pãd ioon lal̦ in, ear jab itok bwe en jol̦o̦k aolep men ko me rej kaeñtaan armej ro. (Matu 20:​30-​34) Ear kõmour ri nañinmej ro, bõtab armej ro jet rar wõnm̦aanl̦o̦k wõt im nañinmej. (Luk 6:​17-​19) Ear kaenõm̦m̦an armej ro me el̦ap an ro jet nana aer kõm̦m̦an ñan er. Bõtab, ear nana wõt an armej ro kõm̦m̦an ñan ro jet. Jijej ear naajdik ro rekwõle, bõtab ear jab jem̦l̦o̦k an wal̦o̦k ñũta.​​—Mark 6:​41-​44.

Jipañ Armej ro Kõm̦m̦an Oktak im Kadikl̦o̦k Aer Eñtaan

Jijej ear jipañ armej ro bwe ren kõm̦m̦an oktak ko ilo mour ko aer im ear kadikl̦o̦k aer eñtaan. Ak etke ear jab kakõm̦anm̦anl̦o̦k kien ko bwe en em̦m̦an aer jipañ armej? Im etke ear jab kajju jol̦o̦k eñtaan? Eokwe, Jijej ear jel̦ã bwe em̦õj an kar Anij karõkl̦o̦k im̦aan bwe juon iien enaaj bõktok Aelõñ eo an im jol̦o̦k aolep kien ko an armej im aolep men ko me rej kõm̦m̦an an armej ro eñtaan. (Luk 4:​43; 8:⁠1) Ke rũkal̦oor ro an rar kajjitõk ippãn bwe en kal̦apl̦o̦k iien an kõmour ri nañinmej ro, Jijej ear ba ñan er: “Jej aikuj ilo̦k ñan bukwõn ko jet ipel̦aakid. Ij aikuj in kwal̦o̦k naan ñan er bareinwõt, bwe eñin unin aõ kar itok.” (Mark 1:​32-38, UBS) Jijej ear jipañ ro renañinmej im kadikl̦o̦k aer eñtaan, bõtab ear wõr juon jerbal eaorõkl̦o̦k im ear kõm̦m̦ane. Ta jerbal in? Ej jerbal in kwal̦o̦k naan im katakin armej ro kõn naan in Anij.

Ilo raan kein, Ri Kõnnaan ro an Jeova rej l̦oore joñak eo an Jijej ilo jerbal in kwal̦o̦k naan. Rej jipañ armej ro im kadikl̦o̦k aer eñtaan ilo aer lel̦o̦k jipañ ñan er ñe rej pãd ilo aikuj. Bõtab, Ri Kõnnaan ro an Jeova rejjab kajjioñ in jol̦o̦k aolep men ko renana im rej wal̦o̦k ilo lal̦ in. Rej tõmak bwe Aelõñ eo an Anij enaaj itok im jol̦o̦k aolep men ko rej kõm̦m̦an an armej ro eñtaan. (Matu 6:​10) Ãinwõt kar Jijej, Ri Kõnnaan ro an Jeova rej jipañ armej ro bwe ren kõm̦m̦an oktak ko ilo mour ko aer. Rejjab kajjioñ kõm̦m̦an oktak ko ilo kien ko an armej. Men in rej kõm̦m̦ane elukkuun em̦m̦an kõnke unin an armej ro iioon el̦ap apañ ko ejjab kõn kien ko. Apañ ko aer rej itok jãn kõm̦m̦an im jerbal ko an armej ro.

Rej Pokake Kien

Ri Kõnnaan ro an Jeova rej bareinwõt kate er ñan pokake kien ko im rej tõmak bwe ej aer eddo ñan kõm̦m̦ane men in. Eñin unin rej kautiej kien ko ilo aelõñ ko rej pãd ie. Ñe rej ilo̦k im kwal̦o̦k naan ippãn armej ro, rej rõjañ er bwe ren  pokake kien. Rej bareinwõt kõm̦m̦ane men in ilo bok ko aer. Bõtab, el̦aññe kien ej ba bwe ren kõm̦m̦ane juon men me ej idaaptõk ippãn kien ko an Anij, eokwe Ri Kõnnaan ro an Jeova reban kõm̦m̦ane men eo kien ej ba. Etke? Kõnke rej “pokake Anij el̦ap jãn armej.”​—Jerbal 5:29; Rom 13:​1-7, UBS.

Ri Kõnnaan ro an Jeova rej lol̦o̦k aolep armej ro ilo bukwõn ko aer im lale el̦aññe rekõn̦aan katak Baibõl̦ eo ilo ejjel̦o̦k on̦ean. Kõn wõt men in, elõñ milien armej ro rar kõm̦m̦an oktak ko ilo mour ko aer. Kajjojo iiõ, Ri Kõnnaan ro an Jeova rej jipañ elõñ to̦ujin armej ro bwe ren bõjrak jãn m̦anit ko renana ãinwõt kõbaatat, kadek, kõjerbal uno ko rekajoor, iukkure kõn jããn, im mour in l̦õñ. Armej rein rej kiiõ jet armej ro rem̦m̦an im el̦ap aer pokake kien ko an aelõñ eo rej pãd ie kõn wõt aer jerbali katak ko jãn Baibõl̦ eo.

Baibõl̦ eo ej bar jipañ l̦eo, lio im ajri ro nejier bwe en l̦apl̦o̦k aer kautiej doon im en em̦m̦anl̦o̦k wãween aer kõnnaan ñan doon. Men in ej kõm̦m̦an bwe ren epaake doon ãinwõt juon baam̦le. Ñe baam̦le ko rej m̦õn̦õn̦õ, eokwe bukwõn eo rej jokwe ie enaaj juon jikin elem̦õn̦õn̦õ.

Kiiõ ke em̦õj ad etali aolep mel̦el̦e kein ilo katak kein, jouj im l̦õmn̦ak kõn kajjitõk kein. Ekkar ñan Baibõl̦ eo, ejim̦we ke ñe kabuñ ko rej bõk kun̦aaer ilo m̦akũtkũt ko an kien? Uwaak eo elukkuun alikkar. Elukkuun bõd men in. Ak Kũrjin ro rem̦ool rej aikuj ke pokake kien? Aet, rej aikuj. Ewi wãween remaroñ kõm̦m̦ane men in? Ilo aer l̦oore kien eo an Jijej bwe ren ãinwõt jo̦o̦l̦ im meram ñan armej ro ilo lal̦ in.

Ro me rej l̦oore naan in kakapilõk kein an Jijej renaaj lo jeraam̦m̦an. Baam̦le ko aer im bareinwõt armej ro ilo bukwõn ko aer renaaj jeraam̦m̦an. Ri Kõnnaan ro an Jeova ilo bukwõn eo am̦ renaaj m̦õn̦õn̦õ in kwal̦o̦k ñan eok kilen aer katak Baibõl̦ ippãn armej ro. * (Lale kõmel̦el̦e eo itulal̦.)

[Kamelele eo itulal]

[Blurb ilo peij 7]

Jijej ear jipañ armej ro bwe ren kõm̦m̦an oktak ilo mour ko aer. Ear jab kõm̦m̦an oktak ilo kien ko an armej

[Blurb ilo peij 8]

Ri Kõnnaan ro an Jeova rej tõmak bwe ej aer eddo ñan pokake kien