“Eñin Mour Indeeo”

“Eñin mour indeeo: bwe armej ren jel̦ã kwe, juon wõt Anij em̦ool, im bwe ren jel̦ã Jijej Kũraij, eo kwaar jilkintok.”​​—JON 17:⁠3.

AD JEL̦Ã kõn juon men emaroñ lo̦mo̦o̦ren mour an juon armej. Ilo iien eo Nouhou ej joñoul allõñ dettan, ear nañinmej im ear m̦õrã ãnbwinnin. Jinen, eo ear jerbal ilo jikin lale ri nañinmej ilo Niger, ear jel̦ã ta eo en kõm̦m̦ane. Ear teiñi juon aebõj im kãreiki ippãn juka im jo̦o̦l̦, innem kaidaake ajri in kake. Ekkar ñan juon doulul me ej kõjparok ajri ro, etan UNICEF, ear ba bwe “an kar kõrã in jerbal ilo jikin lale ri nañinmej eo, ear kõm̦m̦an bwe en jel̦ã ta eo en kõm̦m̦ane ñan niñniñ eo nejin ilo m̦õkaj. Men in ear kõm̦m̦an bwe en m̦õkaj an niñniñ eo mour.”

Ad jel̦ã Baibõl̦ eo emaroñ lo̦mo̦o̦ren kõj. Moses, armej eo jinointata me ear jino je Baibõl̦ eo, ear ba: “Katak kein rejjab naan ko ejjel̦o̦k kobbair; rej unin mour ñan kom̦. Kom̦win pokaki innem enaaj to ami mour.” (Duteronomi 32:​47, UBS) Baibõl̦ eo emaroñ ke kõm̦m̦an bwe en to ad mour? Ewi wãween emaroñ lo̦mo̦o̦ren mour ko ad?

Jaar etale bwe Baibõl̦ eo eoktak jãn bok ko jet. Katak ko l̦alem m̦oktal̦o̦k rar kwal̦o̦k bwe kanaan ko ilo Baibõl̦ rar jejjet kitieer, bwebwenato ko ie rem̦ool, ejejjet ekkar ñan ekkatak ko an ri mãlõtlõt ro, ejjab idaaptõk kobban, im naan in tõl ko ie rejejjet ñan raan kein. Men kein aolep rej kwal̦o̦k bwe Baibõl̦ eo eoktak im ejejuan. Innem, ke Baibõl̦ ej kwal̦o̦k kõn wãween kwõmaroñ bõk mour indeeo, men in ej ke kõm̦m̦an bwe kwõn kõn̦aan roñjake?

Jej rõjañ eok ñan katak Baibõl̦ kõnke el̦aññe kwõnaaj jel̦ã kõn katak ko rem̦ool ilo Baibõl̦, men in enaaj tõll̦o̦k eok ñan lo aenõm̦m̦an kiiõ im bõk juon mour ekam̦õn̦õn̦õ ilju im jekl̦aj. Ri Kõnnaan ro an Jeova renaaj m̦õn̦õn̦õ in katak Baibõl̦ ippam̦.

[Pija ilo peij 9]

Baibõl̦ eo ebar oktak kõnke ej bok eo wõt me ej kwal̦o̦k uwaak ko ñan kajjitõk kein raorõk:

• Ta unin jej mour?

• Etke el̦ap bũrom̦õj im eñtaan?

• Inaaj ke bar lo ro rejitõnbõro ippa me remej?

Kwõmaroñ lo uwaak in kajjitõk kein jãn Baibõl̦ ilo bok in me Ri Kõnnaan ro an Jeova rar je.

KATAK KO REM̦OOL JÃN BAIBÕL̦ EO