Katak Jãn Naan In Anij

Etke Jej Aikuj Kõjerbal Etan Anij?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Etke Anij ear kõm̦m̦an bwe en wõr etan?

Em̦m̦anl̦o̦k ke ippam̦ ñe armej ro rej kũr etam̦ ak ñe rej kũr eok im ba, l̦eiõ, ak liiõ, em̦m̦aan ak kõrã? Ejjel̦o̦k pere bwe kokõn̦aan bwe armej ro ren ãñiñin eok kõn etam̦. Ãt eo etam̦ ej kalikkar wõn kwe. Ilo Baibõl̦ eo, rej kõjerbal naan kein ãinwõt, “Irooj,” “Anij L̦apl̦ap,” im “Ri Kõm̦anm̦an” ñe ej jitõñl̦o̦k ñan Anij. (Jenesis 15:2; 17:1; Ekklisiastis 12:⁠1) Bõtab, Anij ear kõm̦m̦ane juon etan ñan jipañ kõj bwe jen maroñ jel̦ã kajjien im jem̦jerãik E. Ãt eo etan Anij ej Jeova.​​—Riit Aiseia 42:⁠8.

Em̦õj an elõñ ri ukok ro jol̦o̦k etan Anij jãn Baibõl̦ ko im likũt naan ak taitõl̦ kein “Anij” ak “Irooj.” Bõtab, ke rar je Baibõl̦ eo ilo kar jinoin ilo kajin Hibru, etan Anij ekar wal̦o̦k enañin 7,000 alen. Alikkar bwe Anij ekõn̦aan bwe armej ro ren jel̦ã etan.​​—Riit Aiseia 12:⁠4.

2. Etke eaorõk ñan jel̦ã etan Anij?

Ta mel̦el̦ein ñan jel̦ã etan Anij? Eokwe, ejabwe wõt ñan baj jel̦ã kilen ba etan Anij. Kwõj aikuj jel̦ã mel̦el̦ein etan im ejaake juon jem̦jerã epaak ippãn. Ãt in Jeova ej mel̦el̦ein bwe “emaroñ erom jabdewõt men ej aikuj erom.” Kõnke Anij ej bõk ãt in Jeova, men in ej kalikkar bwe enaaj erom ak kõm̦m̦an jabdewõt men me ej aikuji bwe en kajejjet ankilaan. Kõn men in, ñe juon ejel̦ã etan Anij ej mel̦el̦ein bwe ej aikuj tõmak bwe enaaj kajejjet aolep kallim̦ur ko an. (Sam 9:​10) Ñe armej ro rejel̦ã etan Anij im rej kõjerbale, tõmak eo aer enaaj lujur er ñan aer lõke e im likũt e m̦oktata ilo mour ko aer. Jeova Anij enaaj kõjparok armej rein.​​—Riit Sam 91:⁠14.

  3. Etke Anij ekõn̦aan bwe armej ro ren jel̦ã etan?

Ewõr men ko rem̦m̦an renaaj wal̦o̦k ñan armej ro el̦aññe rejel̦ã etan Anij. Ñan waanjoñak, renaaj maroñ erom ro jeran Anij im bõk jeraam̦m̦an eo ñan mour indeeo. Eñin unin Anij ekõn̦aan bwe jen kwal̦o̦k etan ñan aolep armej ro!​​—Riit Jon 17:3; Rom 10:​13, 14.

Jijej ear kwal̦o̦k etan Anij ñan armej ro. Ear kõm̦m̦ane men in ilo an kar katakin armej ro kõn wãween an Anij kõm̦m̦ani men ko. Bareinwõt, ear katakin armej ro kõn kien ko an Anij im men ko me Ear kallim̦ur kaki. Rainin, rũkal̦oor ro an Jijej rej wõnm̦aanl̦o̦k wõt im kwal̦o̦k kõn etan Anij ñan armej ro otemjej. Rej kõm̦m̦ane men in ãinwõt juon kumi in armej ebõrokuk im rej jutak “kõn etan [Anij].”​​—Riit Jerbal 15:14; Jon 17:⁠26.

4. Ewi wãween Anij enaaj kõm̦m̦an bwe armej ro ren nõbar etan?

Jeova Anij ekõn̦aan bwe armej ro ren nõbar etan kõnke em̦õj an ro jet kananaiki. Ñan waanjoñak, jet armej ro rej ba bwe Anij ear jab kõm̦anm̦an men ko otemjej im bwe jejjab aikuj pokake e. Ro jet rej ba bwe Anij ejjab yokwe kõj im bwe men ko renana me rej wal̦o̦k rej ankilaan. Ñe armej ro rej ba men kein, rej kananaik Anij im kõm̦m̦an bwe en nana etan. Bõtab, m̦õttan jidik Anij enaaj ko̦kkure rein me rejjab kautiej etan.​​—Riit Sam 83:​17, 18.

Jeova enaaj kõm̦m̦an bwe armej ro ren nõbar etan ñe Aelõñ eo an ej jol̦o̦k aolep kien ko an armej ro im kõm̦m̦an bwe en bar wõr aenõm̦m̦an im jokwane ibwiljin armej ro. (Daniel 2:​44) M̦õttan wõt jidik, aolep armej ro renaaj jel̦ã bwe Jeova ej Anij eo em̦ool.​​—Riit Ezekiel 36:23; Matu 6:⁠9.

Kõn men in, ta ko kwõj aikuj kõm̦m̦ani? Eokwe, jouj im katak Naan in Anij im kobal̦o̦k ippãn armej ro me rej yokwe e. El̦aññe kwõj kõm̦m̦ane men kein, kwõnaaj maroñ in epaakel̦o̦k Anij. Ñe Jeova ej kõm̦m̦an bwe aolep ren nõbar etan, enaaj keememej ri karejar ro an retiljek.​​—Malakai 3:​16.

Ñan kal̦apl̦o̦k am̦ mel̦el̦e, jouj im lale Katak 1 ilo bok in me Ri Kõnnaan ro an Jeova rar kõm̦m̦ane.

KATAK KO REM̦OOL JÃN BAIBÕL̦ EO

[Pija ilo peij 10]

Etan Anij ilo jeje ko m̦okta ilo kajin Hibru