Ewõr Ke En̦ Ej Roñjake Jar ko Ad?

“Ikar jab tõmak bwe ewõr Anij. Mekarta, jet iien ij jar. Iar jab lukkuun jel̦ã el̦aññe ewõr en̦ ej roñjake jar ko aõ. Bõtab, ear wõr aõ eñjake bwe ewõr juon ej roñjake. Iar jab m̦õn̦õn̦õ ilo mour eo aõ im l̦õmn̦ak bwe ejjel̦o̦k tokjãn mour. Iar mijak in tõmak ilo Anij kõnke iar l̦õmn̦ak bwe armej ro wõt me rem̦õjn̦o̦ rej tõmak ilo Anij.”​​​—PATRICIA, jãn IRELAND. * (Lale kõmel̦el̦e eo itulal̦.)

KWÕNAÑIN ke kar bõk ejja l̦õmn̦ak im eñjake rot in an Patricia? Kwõj ke jar meñe kwõjjab tõmak bwe ewõr Anij? El̦aññe aet, eokwe ejjab kwe wõt kwõj l̦õmn̦ak rot in. Jen lale jet iaan etale kein rar loi.

◼ Ilo Iñlen, rar kajjitõk ippãn 2,200 armej ro im lo bwe enañin 500 iaan armej rein rej tõmak bwe ewõr juon Anij eo ear kõm̦anm̦an lal̦ in im ej roñjake jar ko an armej. Bõtab, elõñl̦o̦k jãn 1,200 iaan rein me kar kajjitõkin er, elukkuun jeja aer jar ñan Anij.

◼ Kar kõm̦m̦ane etale ko im loe bwe iaan 10,000 armej ro jãn kajjojo aelõñ ko, enañin 3,000 rej ba rejjab tõmak bwe ewõr Anij bõtab rej jar.

Etke Rejjab Tõmak ilo Anij?

Juon em̦m̦aan in Iñlen etan Allan ej ba: “Ikõn ba bwe ijjab tõmak ilo Anij kõnke iar l̦õmn̦ak bwe kar ejaake kabuñ ko ñan kibel armej ro bwe ren kõm̦m̦an jããn. Bareinwõt, iar l̦õmn̦ak bwe ñe ewõr juon Anij, eban kar l̦ap nana. Mekarta, jet iien ikõn jijet im kõl̦mãnl̦o̦kjen̦ im kajjitõk ippa make, ‘Ekõjkan bwe in kar pãd im wal̦o̦k?’ ”

Armej ro me ewõr aer eñjake rot kein ewõr un ko aer make kõn unin aer jab tõmak bwe ewõr juon ej roñjake jar ko. Ekkã an jarjar im wal̦o̦k l̦õmn̦ak rot kein jãn aer jab maroñ loi uwaak ko ñan kajjitõk kein ãinwõt:

◼ Ewõr ke juon Ri Kõm̦anm̦an?

◼ Etke ekkã an nana etan kabuñ ko ippãn armej?

◼ Etke Anij ej kõtl̦o̦k an wal̦o̦k eñtaan?

Ñe kwaar jel̦ã uwaak ko ñan kajjitõk kein, en ke kar l̦apl̦o̦k am lõke im tõmak bwe ewõr juon eo ej roñjake am̦ jar?

[Kamelele eo itulal]