Jutak Pen im Jum̦ae Aujiid ko an Setan!

‘Kom̦win jutak im jum̦ae etao ko an Tepil̦.’​​—EPESÕS 6:​11, UBS.

EWI WÃWEEN KWÕNAAJ UWAAK?

Ewi wãween juon ri karejeran Jeova emaroñ kõjparok e jãn an po ilo aujiid eo kõn arõk m̦weiuk?

Ta eo enaaj jipañ juon Kũrjin ri pãlele bwe en jab po ilo aujiid eo kõn mour in lejen?

Ta jeraam̦m̦an ko renaaj wal̦o̦k ñe jejjab kõtl̦o̦k bwe jen l̦orak ilo aujiid ko kõn arõk m̦weiuk im mour in lejen?

1, 2. (1) Etke Setan edike ri kapit ro im ‘jiip ro jet’? (2) Ta aujiid ko ruo Setan ej bar kõjerbali me jenaaj etali ilo katak in?

 SETAN TEPIL̦ eo edike armej, el̦aptata ro im rej karejar ñan Jeova. Ilo m̦ool, Setan ej tarin̦ae ippãn bween ri kapit ro ijin ioon lal̦. (Revelesõn 12:​17) Kũrjin rein el̦ap aer peran in loloorjake jerbal in kwal̦o̦k naan kõn Aelõñ eo im karoñ ro jet kõn Setan bwe ej irooj in lal̦ in. Tepil̦ eo ej bareinwõt dike ‘jiip ro jet.’ Etke? Ej kõnke rein rej rejetake ri kapit ro ilo jerbal eo aer im kõjatdikdik eo aer ej ñan mour indeeo ijin ioon lal̦. (Jon 10:​16) Setan ear luuji jeraam̦m̦an eo ñan mour indeeo, innem eñin unin el̦ap an illu. Ej kõjdate kõj jekdo̦o̦n ñe jej uwaan ri kapit ro ak jiip ro jet. Im ekõn̦aan bwe jen jorrããn.​​​—1 Piter 5:⁠8.

² Setan ej kõm̦m̦ane men in ilo an kõjerbal aujiid ko. Ej buul̦ kate e ñan kapiloik armej ro bwe ren jab jel̦ã kõn nuuj eo em̦m̦an im bwe ren jab kile aujiid ko an. (2 Korint 4:​3, 4) Bõtab, Tepil̦ eo ej bareinwõt kajjioñ aujiidi ro me em̦õj aer katak im pokake nuuj eo em̦m̦an kõn Aelõñ eo. Ilo katak eo l̦o̦k juon, ear kwal̦o̦k kõn ewi wãween jemaroñ kõjparok kõj jãn jilu iaan aujiid ko an Setan. Ta aujiid kein jilu? (1) Ñe jejjab kõjparok wãween ad kõnnaan, (2) mijak armej im ijjiped ko, im (3) ñe jej eddodo kõn bõd ko jaar kõm̦m̦ani. Jen kiiõ etale ewi wãween jemaroñ jum̦ae aujiid ko ruo Setan ej bar kõjerbali. Aujiid kein ruo rej arõk m̦weiuk im kõn̦aan eo ñan lejen ak ellolo.

ARÕK M̦WEIUK EJ AUJIID EO ME EJ KAUTAMEIK KÕJ

3, 4. Ewi wãween inepata ko an mour in emaroñ kõm̦m̦an bwe jen l̦orak ilo aujiid eo kõn arõk m̦weiuk?

³ Ilo juon iaan waanjoñak ko Jijej ear kwal̦o̦ke, ear kõnono kõn juon ine me kar katõke ibwiljin kãlõklõk ko. Ear kõmel̦el̦e kõn an juon armej maroñ roñjake nuuj eo kõn Aelõñ eo, ‘ak kõn an inepata kõn mour in  im an yokwe m̦weiuk ko, men kein ekautameik naan eo im ejjab elle’ ak jebar ippãn. (Matu 13:​22, UBS) Arõk m̦weiuk ej juon aujiid jãn Setan, eo el̦ap an kõjdate kõj.

⁴ Ewõr ruo men ko me remaroñ jim̦or ‘kautameik naan eo.’ Juon ej “inepata kõn mour in.” Ilo raan kein ekanooj “pen mour” ie, elukkuun lõñ men ko me remaroñ kainepataik eok. (2 Timote 3:​1, UBS) Emaroñ pen ñan wiaiki aikuj ko am̦ kõn an lukkuun l̦ap on̦aer ak kõnke epen am̦ ellolo jerbal. Ak bõlen kwõmaroñ bar inepata kõn raan ko im̦aan. Kõn men in, kwõj l̦õmn̦ak ippam̦ make im ba, ‘Enaaj ke bwe jããn ko inaaj aikuji ñe ijjab maroñ jerbal kõn aõ rũttol̦o̦k im bwijwol̦ãl̦o̦k?’ Jet armej rar kajjioñ kõm̦m̦an bwe ren m̦weiie kõnke rej l̦õmn̦ak bwe ñe ebwijjin aer jããn, innem enaaj bwe aikuj ko aer aolep iien.

5. Ewi wãween l̦õmn̦ak eo ejjab jim̦we kõn m̦weiuk emaroñ m̦on̦e kõj?

⁵ Men eo juon Jijej ear ba ej “yokwe m̦weiuk ko” ak l̦õmn̦ak eo ejjab jim̦we kõn m̦weiuk. Men in kab inepata remaroñ kõm̦m̦an ad l̦orak ilo aujiid eo kõn arõk m̦weiuk. Baibõl̦ ej ba bwe “m̦ani ej kõm̦m̦an bwe kwõn jab aikuj.” (Ekklisiastis 7:​12) Etke ej ba men in? Ej kõnke m̦ani ej jipañ kõj ñan katõprak aikuj ko ad. Bõtab, ejjab juon men em̦m̦an im mãlõtlõt ñan kajjioñ in kõm̦m̦an bwe jen m̦weiie ak l̦ap ad jããn. Elõñ armej rar kile bwe ke rar kal̦apl̦o̦k aer kate er ñan kõm̦m̦an bwe ren m̦weiie, ear l̦apl̦o̦k wõt aer po ilo aujiid eo kõn arõk m̦weiuk. Jet rar oktak im ãinwõt ri kam̦akoko ñan m̦weiuk ko aer.​​—Matu 6:​24.

6, 7. (1) Ewi wãween aujiid eo kõn arõk m̦weiuk emaroñ wal̦o̦k ilo jikin jerbal ko ad? (2) Ta ko juon Kũrjin ej aikuj in l̦õmn̦ak kaki ñe kar kajjitõk ippãn bwe en kaitokl̦o̦k awa in an jerbal?

⁶ Bõlen kwõjjab kile ak emaroñ wõr am̦ kõn̦aan bwe en l̦ap am̦ m̦weiuk ak jããn. L̦õmn̦ak m̦õk kõn waanjoñak in. Bo̦o̦j eo am̦ ej iwõj ippam̦ im ba: “Ewõr juon nuuj em̦m̦an! Ewõr juon jerbal el̦ap kom̦bani in enaaj kõm̦m̦ane. Mel̦el̦ein bwe elõñ alen kwõnaaj aikuj in kaitokl̦o̦k awa in am̦ jerbal ilo allõñ ko rej pedotok. Ak ij kallim̦uri eok bwe enaaj l̦ap on̦eam̦.” Ta eo kwõnaaj kar kõm̦m̦ane el̦aññe kwaar iioone men in? Em̦ool bwe elukkuun aorõk ñan am̦ kabwe aikuj ko an eo pãleem̦ im ro nejõm̦ kõnke men in ej am̦ eddo. Bõtab, ejjab ede in wõt am̦ eddo. (1 Timote 5:⁠8) Ebar wõr eddo ko jet kwõj aikuj bar l̦õmn̦ak kaki. Enaaj jete awa kwõnaaj jol̦o̦k ñe kwõnaaj kaitokl̦o̦k awa in am̦ jerbal? Jerbal eo am̦ enaaj ke kautameik eok jãn am̦ jerbal ñan Anij, pãd ilo iien kweilo̦k ko an eklejia kab katak ippãn baam̦le eo am̦?

⁷ L̦õmn̦ak kõn ta men eo eaorõktata ñan kwe. Eaorõk bwe en lõñ am̦ jããn ke ak  kõtaan eo am̦ ippãn Jeova? Kwõnaaj ke bõjrak jãn am̦ likũt men ko an Aelõñ eo m̦oktata ilo mour eo am̦ kõnke kokõn̦aan kabwijinjin am̦ jããn? Kwõj ke kile wãween arõk m̦weiuk emaroñ jelõt eok ñe kwõj kõjekdo̦o̦n kõtaan eo am̦ im baam̦le eo am̦ ippãn Jeova? El̦aññe men in ej wal̦o̦k ñan eok kiiõ, ewi wãween kwõmaroñ kõjparok bwe aujiid in kõn arõk m̦weiuk en jab kautameik eok?​​—Riit 1 Timote 6:​9, 10.

8. Ta waanjoñak ko ilo Baibõl̦ im remaroñ jipañ kõj ñan etale wãween ad mour?

⁸ El̦aññe jejjab kõn̦aan bwe aujiid eo kõn arõk m̦weiuk en kautameik kõj, eokwe jej aikuj keini ad etale wãween ad mour. Jen jab ãinwõt kar Iso, eo ear jab kaorõk kallim̦ur ko an Jeova. (Jenesis 25:34; Hibru 12:​16) Im jen jab bar ãinwõt ri m̦weiie eo me Jijej ear kajjitõk ippãn ñan wiakake aolep m̦weiuk ko an im aji jããn ko an ñan ro rejeram̦õl, innem l̦oore. Em̦m̦aan in ear jab kõm̦m̦ane men in, ak el̦ap an bũrom̦õj kõn m̦weiuk ko an im ear ilo̦k. (Matu 19:​21, 22) M̦weiuk ko an l̦ein rar menin aujiid ñan e im ear po ie. L̦ein en kar l̦oore Jijej, armej eo em̦m̦antata ear mour ijin ioon lal̦, men in ear juon jeraam̦m̦an el̦ap ak ear kajekdo̦o̦ne. Jej aikuj kõjparok bwe jen jab kõjekdo̦o̦n jeraam̦m̦an eo ñan erom rũkal̦ooran Jijej Kũraij.

9, 10. Ekkar ñan ta eo Baibõl̦ ej ba, en kar ta l̦õmn̦ak eo am̦ kõn m̦weiuk ko?

⁹ Jen roñjake naan in jiroñ eo an Jijej el̦aññe jejjab kõn̦aan bwe jen l̦orak ilo aujiid eo kõn m̦weiuk. Jijej ear ba: “Kom̦win jab inepata bũruomi im ba, ‘Ta je naaj m̦õñã?’ Ak ‘ta je naaj idaak?’ Ak ‘ta eo jenaaj kõn̦ake?’ Bwe ro ri aelõñ ko rej pukot men kein otemjej; bwe Jememwõj i lañ E jel̦ã ami aikuj men kein otemjej.”​​—Matu 6:​31, 32; Luk 21:​34, 35.

¹⁰ Bwe jen jab po ilo aujiid in kõn m̦weiuk, jej aikuj l̦õmn̦ak ãinwõt kar ri jeje Baibõl̦ eo etan Agur. Ear ba: “Kwõn kõm̦m̦an bwe in jab m̦weiie ak jeram̦õl. Kõn men in kwõn letok ñan eõ kijõ joñan wõt aõ aikuj.”(Jabõn Kõnnaan 30:​8, UBS) Agur ear mel̦el̦e bwe ear aikuj jããn ñan an mour im ear bar mel̦el̦e bwe kõn̦aan eo ñan m̦weiie ej juon aujiid. Inepata kõn mour in im yokwe m̦weiuk remaroñ kajorrããn kõtaan eo ad ippãn Jeova. El̦aññe el̦ap ad em̦m̦weiukuk, emaroñ kõm̦m̦an an dik ad iien ñan likũt men ko an Aelõñ eo m̦oktata ilo mour ko ad. Bareinwõt, emaroñ bar kõm̦m̦an bwe en ejjel̦o̦k ad kajoor im ad kõn̦aan ñan kõm̦m̦ane men in. Innem, jen kõjparok bwe jen jab l̦orak ilo aujiid in an Setan kõn arõk m̦weiuk.​​​—Riit Hibru 13:​5, UBS.

LEJEN AK ELLOLO EJ ROÑ IN AUJIID EO EN̦OJAK

11, 12. Ewi wãween Kũrjin ro remaroñ po ilo aujiid eo kõn mour in lejen ilo jikin jerbal ko aer?

¹¹ Ñe ri kakidudu ro rekõn̦aan aujiidi juon menin mour ekilep im kajoor, jet iien rej kõbiji juon roñ ilo ijo ekkã an menin mour eo etetal ie. Im ekkã aer kalibubuik mejãn roñ eo kõn al̦al̦ im likũt meno̦kno̦k ioon. Juon iaan aujiid ko an Setan me ekkã an lo tõprak ie ej ãinl̦o̦k wõt in. Ta aujiid in? Ej lejen ak ellolo. (Jabõn Kõnnaan 22:14; 23:​27) Ewõr jet Kũrjin rar po ilo aujiid in. Etke? Ej kõnke rar make likũt er ilo wãween ko me ear kõm̦m̦an an pidodo aer po. Jet ri pãlele ro me rej Kũrjin rar mour in lejen ãlikin wõt aer kar kõtl̦o̦k bwe en wõr aer eñjake ñan bar juon me ejjab pãleer.

¹² Eñjake ko ñan juon eo im ejjab pãleem̦ emaroñ jino wal̦o̦k ilo jikin jerbal eo am̦. Ñan waanjoñak, kar kõm̦m̦ane juon etale ippãn kõrã im m̦aan ro me rar mour in lejen. Etale in ej kwal̦o̦k bwe elõñ iaan kõrã rein im enañin aolep em̦m̦aan rein rar ellolo ilo jikin jerbal ko aer. El̦aññe kwõj juon kõrã, kwõj ke jerbal ippãn em̦m̦aan, im el̦aññe kwõj juon em̦m̦aan, kwõj ke jerbal  ippãn kõrã? El̦aññe aet, elemen kõtaan eo am̦ ippãer? Ewõr ke men kwõj kõm̦m̦ane ñan am̦ bõbrae an jino wõr am̦ eñjake ñan ri jerbal eo kwõj jerbal ippãn? Ñan waanjoñak, bõlen juon jeid im jatid kõrã ekkã an kõnnaan ippãn em̦m̦aan eo ej jerbal ippãn. Im bõlen kiiõ ejinoe epaake l̦eo im joñan an l̦ap an lõke ej kwal̦o̦kl̦o̦k apañ ko ej iiooni ilo mour in m̦are eo an. Ak bõlen juon m̦aan jeid im jatid ej m̦õttaik juon kõrã ilo jikin jerbal eo an. Em̦m̦aan in jeid im jatid emaroñ jino ba: “Ãinwõt liin ej errã ilo l̦õmn̦ak ko aõ im ej roñjake eõ aolep iien ñe ij kõnnaan ñan e im ej kautiej eõ. Yokwe bwe en kar ãindein lien pãleeõ!” Kwõj ke kile an Kũrjin rein pãd ilo kauwõtata im emaroñ tõll̦o̦k er ñan mour in lejen?

13. Ta eo emaroñ kõm̦m̦an an ro ilowaan eklejia ko jino wõr aer eñjake ñan juon eo ejjab pãleen?

¹³ Ilo lowaan eklejia ko, emaroñ wõr ro rej jino wõr aer eñjake ñan juon eo me ejjab pãleer. Jen etale ta eo ear wal̦o̦k ñan ruo ri pãlele. Daniel im Sera rej jim̦or regular pioneer. * (Lale kõmel̦el̦e eo itulal̦.) Daniel ear bareinwõt juon iaan em̦m̦aan ro rej lale eklejia eo im ear poub ilo aolep eddo ko rej lel̦o̦k ñan e ilo eklejia eo. Ear katak Baibõl̦ ippãn l̦alem likao ro im jilu iaaer rar peptaij. Rein rekããl rar lukkuun aikuji juon bwe en roñjake er ñe ej wõr aer apañ. Im ekkã an Sera jipañe rein kõnke el̦ap an Daniel poub kõn eddo ko an ilo eklejia eo. Sera ear bar aikuji an juon roñjake e ñe ej wõr an apañ, im ri katak rein an Daniel rekõn kar jipañe ilo men in. Men in ear etal im juon aujiid ekanooj kauwõtata. Daniel ej ba: ‘Jãn allõñ ñan allõñ in an lio pãleeõ kate ñan jipañ ro jet. Men in ear kõm̦m̦an an lio ippa oktak im bar aikuj kõketak im an juon jipañe ak rejetake. Iar likjab jãne ilo iien kein ear pãd ilo aikuj, im men in ear tõll̦o̦k ñan an wal̦o̦k jorrããn. Lio ippa ear loe juon iaan likao ro iar katak ippãer. Joñan aõ kar lukkuun poub iar jab kile bwe kõtaan eo an Sera ippãn Jeova ear jino m̦õjn̦o̦l̦o̦k.’ Ewi wãween bwe kwõn maroñ bõbrae an men in wal̦o̦k?

14, 15. Ta eo emaroñ jipañ Kũrjin ri pãlele ro bwe ren bõbrae mour in lejen?

¹⁴ Ñan bõbrae an wal̦o̦k mour in lejen, kwõn lukkuun kõl̦mãnl̦o̦kjen̦ kõn ta mel̦el̦ein ñan tiljek ñan eo pãleem̦. Jijej ear ba: “Men eo Anij ear kobaik, armej en jab kõjepele.” (Matu 19:⁠6) Jab l̦õmn̦ak bwe eddo ko am̦ ilo eklejia eo eaorõkl̦o̦k jãn eo pãleem̦. Ñe ekutkut am̦ jako jãn eo pãleem̦ kõn jet un ejettokjeir, eokwe kõtaan eo amiro enaaj m̦õjn̦o̦l̦o̦k. Men in emaroñ tõll̦o̦k ñan kõm̦m̦an mour in lejen.

¹⁵ Kwõn lale eddo ko am̦ ilo eklejia ñe kwõj juon iaan em̦m̦aan ro rej lale eklejia eo. Rijjelõk Piter ear ba: “Kom̦win s̃eperd bwijin Anij ej pãd ippemi, im lale e, jab ilo m̦akoko, a kõn ami kõn̦aan, ekkar ñan ankilaan Anij; jab kõn on̦ãn tal̦a, a kõn ami kõn̦aan jipañ.” (1 Piter 5:⁠2) Jab kajekdo̦o̦ne ro uwaan eklejia eo. Bõtab, am̦ kate eok ilo am̦ lale eklejia eo en jab kautameik am̦ lale eddo eo am̦ ñan lio pãleem̦. Ñe kwõj kamaat am̦ maroñ ñan jipañ ri tõmak ro jeõm im jatõm̦ ak kwõj kajekdo̦o̦ne lio pãleem̦ n̦a im̦weo, men in emaroñ kauwõtata ñan kõtaan eo amiro. Daniel, eo kar kwal̦o̦k kake m̦oktal̦o̦k, ej ba, ‘Jab poub kõn eddo ko ilo eklejia eo ñan joñan eo me kwõj kajekdo̦o̦ne baam̦le eo am̦.’

16, 17. (1) Ta eo Kũrjin ri pãlele ro ren kõm̦m̦ane bwe ri jerbal ro jet ren jel̦ã bwe rejjab kõn̦aan bwe en wõr aer eñjake ñan ro me ejjab pãleer? (2) Kwal̦o̦k ta ko bok ko ad rej kwal̦o̦ki im enaaj jipañ Kũrjin ro ñan bõbrae mour in lejen.

¹⁶ Bok eo Naan in Keeañ ekoba bok eo Awake! rej letok naan in kakapilõk ko rekanooj em̦m̦an ñan jipañ ri pãlele ro rej Kũrjin ñan bõbrae aer mour in lejen. Imõniaroñroñ eo an Jeptõmba 15, 2006, ej kakkõl  kõj kõn men ko ilo jikin jerbal ko ak jikin ko jet me remaroñ kõm̦m̦an bwe juon en jino wõr an eñjake ñan juon eo me ejjab pãleen. Ñan waanjoñak, el̦aññe kwõj juon kõrã im kwõj jerbal el̦e jãn awa ippãn juon em̦m̦aan, men in emaroñ kõm̦m̦an an wal̦o̦k eñjake ko rejjab jim̦we. Men in emaroñ bar wal̦o̦k ñan em̦m̦aan ro me rej jerbal ippãn kõrã ro. El̦aññe kwõj juon ri pãlele, wãween am̦ kõnnaan im kõm̦m̦an ko am̦ ren kalikkar bwe kwõjjab itoklimo ñan jidik. Jab kattoojoj ñan kõm̦m̦an an armej reiwaj ak kalimjek eok kõn wãween am̦ nuknuk im tõreejab. Likũt pijain baam̦le eo am̦ ilo ijo kwõj jerbal ie. Men in enaaj kakeememej kwe im ro jet bwe baam̦le eo am̦ el̦ap aer aorõk ippam̦. Kwõn jab kõtl̦o̦k an jabdewõt kareel eok im jab kõm̦m̦an jabdewõt men me enaaj rõjañe ñan an wõnm̦aanl̦o̦k wõt im kõm̦m̦ane men in.

¹⁷ Ilo juon iaan bok ko ad etan Awake! an Eprõl̦ 2009, ewõr juon katak me ej kwal̦o̦k bwe ejjab jim̦we ñan an juon ejaake l̦õmn̦ak ko kõn pãd ippãn juon eo ejjab pãleen. Katak eo ilo bok in ej bar ba bwe ñe juon ej l̦õmn̦ak kõn men kein, innem enaaj tõll̦o̦k e ñan an kõm̦m̦an mour in lejen. (Jemes 1:​14, 15) Ej juon men em̦m̦an bwe ri pãlele ro ren riiti katak ko ippãn doon kõn men in. Mour in m̦are ekwõjarjar kõnke Jeova eo ear ejaake. En wõr iien amiro eo pãleem̦ bwebwenato ippãn doon kõn pãd eo amiro. Men in enaaj kalikkar bwe men ko rekwõjarjar ippãn Anij reaorõk ippam̦.​​​—Jenesis 2:​21-24.

18, 19. (1) Ta jorrããn ko renaaj wal̦o̦k ñe kwõnaaj mour in lejen? (2) Ta jeraam̦m̦an ko renaaj wal̦o̦k ñe kwõnaaj tiljek wõt ñan eo pãleem̦?

¹⁸ Ñe kwõj jino reel ñan kõn̦aan ellolo, kwõn l̦õmn̦ak kõn jorrããn ko renaaj wal̦o̦k ñe kwõnaaj kõm̦m̦an mour in lejen. (Jabõn Kõnnaan 7:​22, 23; Galetia 6:⁠7) Ro rej lejen rejjab kam̦õn̦õn̦õik Jeova im rej kõmetak bũruon ro rejetaer im er make. (Riit Malakai 2:​13, 14.) Kõl̦mãnl̦o̦kjen̦ m̦õk kõn jeraam̦m̦an ko renaaj wal̦o̦k ñe kwõj dãpij am̦ mour erreo. Enaaj wõr am̦ kõjatdikdik ñan mour indeeo. Enaaj em̦m̦an am̦ mour kiiõ im kwõjjab abn̦õn̦õ kõnke kwõjel̦ã bwe kwõj erreo im̦aan mejãn Jeova.​​​—Riit Jabõn Kõnnaan 3:​1, 2.

¹⁹ Ri jeje sam ear ba bwe armej ro rej yokwe Anij im pokaki kien ko an renaaj lukkuun aenõm̦m̦an im ejjel̦o̦k aujiid renaaj l̦orak e. (Sam 119:​165, UBS) Kõn men in, kwõn yokwe m̦ool eo im ‘kanooj lale ekõjkan am̦ etetal, jab ãinwõt ri jaje, a ãinwõt ri mãlõtlõt.’ (Epesõs 5:​15, 16) Rainin, elõñ aujiid ko Setan ej kõjerbali ñan ko̦jeke ro em̦ool aer kabuñ ñan Anij. Bõtab, Jeova ej letok aolep men ko jej aikuji ñan ad jutak pen im kõjparok kõj make bwe jen jab po ilo aujiid ko an Setan.​​​—Epesõs 6:​11, 16, UBS.

[Kamelele eo itulal]

[Kajitõk ko ñan katak]

[Pija ilo peij 29]

Arõk m̦weiuk emaroñ ko̦kkure kõtaan eo am̦ ippãn Jeova. Jab kõtl̦o̦k bwe men in en wal̦o̦k ñan eok

[Pija ilo peij 32]

Kattoojoj im ad kõtl̦o̦k an ro jet kattoojoj ñan kõj emaroñ tõll̦o̦k ñan mour in lejen