Kom̦win Kõm̦m̦an Ãinwõt Ro Doon Aelõñ Eo!

“Mour ko ami ren ãinwõt mour eo ekkar ñan gospel.”​​—PILIPPAI 1:​27, UBS.

TA UWAAK EO AM̦?

Wõn ro remaroñ erom ro doon Aelõñ eo?

Ta mel̦el̦ein ñan katak kõn kajin eo an Aelõñ eo, kõn men ko rar wal̦o̦k m̦okta ñane, im kõn kien ko an?

Ewi wãween ro doon Aelõñ eo remaroñ kwal̦o̦k bwe rej yokwe kien ko an Anij?

1, 2. Etke ear aorõk bwe ro ilo eklejia eo ilo Pilippai ren kõm̦m̦an ãinwõt ro doon Aelõñ eo?

 RIJJELÕK Paul ear rõjañ eklejia eo ilo Pilippai bwe ‘mour ko aer ren ãinwõt mour eo ekkar ñan gospel.’ (Riit Pilippai 1:​27, UBS.) Naan ko ilo kajin Grik me kar ukote ñan naan kein ilõñ ej lukkuun mel̦el̦ein “kom̦win kõm̦m̦an ãinwõt ro doon Aelõñ eo.” Elukkuun kar aorõk bwe eklejia in ren kar kõm̦m̦ane men in. Etke? Ej kõnke kien eo an Rom ear kõtl̦o̦k an armej in Pilippai erom ro doon aelõñ in Rom im bwe ren maroñ bõk kõjparok jãn kien in. El̦ap an kar Ri Pilippai ro m̦õn̦õn̦õ in erom ro doon aelõñ in Rom kõnke ear wõr jeraam̦m̦an ko rar bũki jãn kien eo me ejjel̦o̦k an ro jet ilo tõre ko.

² Bõtab, ear wõr juon men em̦m̦anl̦o̦k me ro ilo eklejia eo ilo Pilippai rar maroñ m̦õn̦õn̦õ kake. Paul ear kakeememej Kũrjin ri kapit ro: “Ak kõj, jej ri aelõñ in lõñ.” (Pilippai 3:​20, UBS) Rein rar ro doon Aelõñ in Anij im el̦ap an men in em̦m̦anl̦o̦k jãn aer naaj kar ro doon aelõñ ko an armej. Aelõñ in Anij ear kõjparok er im lel̦o̦k jeraam̦m̦an ko me ejjel̦o̦k bar juon aelõñ an armej emaroñ kar lel̦o̦k.​​​—Epesõs 2:​19-22, UBS.

3. (1) Wõn ro remaroñ ro doon Aelõñ eo? (2) Ta eo jenaaj etale ilo katak in?

³ Ke Paul ear ba “kom̦win kõm̦m̦an ãinwõt ro doon Aelõñ eo,” ear kõnono ñan ro renaaj irooj ippãn Kũraij ilañ. (Pilippai 3:​20, UBS) Ak naan kein an remaroñ bar jerbal ñan ro renaaj mour ilo ijin ioon lal̦ me Aelõñ eo an Anij enaaj tõl er. Etke? Ej kõnke jej aolep jerbal ñan juon wõt Irooj, Jeova, im kien ko an rej juon wõt ñan aolep ri karejar ro an. (Epesõs 4:​4-6) Rainin, elõñ armej ro rej kate er bwe ren erom ro doon juon aelõñ me em̦weiie. Bõtab, ad maroñ erom ro doon Aelõñ eo ej juon jeraam̦m̦an el̦apl̦o̦k an em̦m̦an. Ñan ad mel̦el̦e etke ej ãindein, jen keidi jet men ko me rej menin aikuj ñan erom ro doon Aelõñ eo an Anij  im menin aikuj ko ñan erom ro doon aelõñ ko an armej. Jen bar etale jilu men ko me jej aikuj kõm̦m̦ani ñe jekõn̦aan wõnm̦aanl̦o̦k wõt im ro doon Aelõñ eo.

MENIN AIKUJ KO

4. Ta mel̦el̦ein “tieir ko rerreo” ak kajin eo erreo? Ta mel̦el̦ein ñan kõnono kajin in?

⁴ Katak kajin eo. Ilo jet aelõñ ko, el̦aññe juon ekõn̦aan erom doon aelõñ eo aer, eokwe armej in ej aikuj katak kajin eo. Jet armej rar aikuj kate er ium̦win elõñ iiõ bwe ren jel̦ã kõnono kajin eo ekããl meñe em̦õj aer kar bõk mãlim ñan erom ro doon aelõñ eo me rekõn̦aan pãd ie. Bõlen, ear m̦õkaj aer katak wãween ko rejim̦we ñan karõke naan ko aer ak rar aikuj wõt iien bwe ren lukkuun tijem̦l̦o̦k ilo aer kõnono kajin eo. Ej ãindein ippãn bar Aelõñ eo an Anij. Ro rekõn̦aan erom ro doon Aelõñ in ej aikuj bar katak juon kajin ekããl. Baibõl̦ eo ej n̦aetan kajin in “tieir ko rerreo.” (Riit Zepanaia 3:⁠9.) Ta mel̦el̦ein “tieir ko rerreo”? Ej mel̦el̦ein kajin eo erreo ilo Baibõl̦ me ej kõn katak ko rem̦ool kõn Anij im ankilaan. Ñan kõnono kajin in, ej mel̦el̦ein ñan pokake kien ko an Anij im naan in kakapilõk ko an. Ro doon Aelõñ in Anij remaroñ m̦õkaj aer jel̦ã katak ko repidodo ilo Baibõl̦ im peptaij. Ak ãlikin aer peptaij, rej aikuj lukkuun kate er bwe en em̦m̦anl̦o̦k aer kõnono kajin eo erreo. Ewi wãween bwe en lukkuun em̦m̦anl̦o̦k? Kõj kajjojo jej aikuj in wõnm̦aanl̦o̦k wõt im kate kõj jerbali men ko jej katak kaki jãn Baibõl̦ eo ilo mour ko ad.

5. Etke jej aikuj katak joñan wõt ad maroñ kõn armej ro doon Jeova ilo iien ko m̦okta?

⁵ Katak kõn men ko rar wal̦o̦k m̦okta. Juon armej me ekõn̦aan bwe en erom doon bar juon aelõñ emaroñ aikuj in katak kõn men ko rar wal̦o̦k m̦okta ñan kien eo an aelõñ eo. Ãindein, ñe jekõn̦aan bwe jen ro doon Aelõñ in Anij, jej aikuj katak kake joñan wõt ad maroñ. Em̦m̦an bwe jen l̦oore joñak eo an l̦õm̦aro nejin Kora me rar jerbal ilo Israel. Ear em̦m̦an ippãer Jerusalem im jikin kabuñ eo ie, im ear em̦m̦an ippãer kõnnaan kõn men ko rar wal̦o̦k m̦okta ilo jikin in. Unin an em̦m̦an ippãer ejjab kõn aiboojoj eo an jikin in im jikin kabuñ eo ie ak ej kõnke ear ijo “jikin kweilo̦k an Kiiñ eo el̦ap,” Jeova. Jikin kabuñ eo ilo Jerusalem kar ijo jikin an armej ro katak kõn kien ko an Jeova im kar bar jikin aer kabuñ ñan e. Armej ro me rar doon Kiiñ in Jerusalem kar armej ro me Jeova ear buñbũruon kake er im yokwe er. (Riit Sam 48:​1, 2, 9, 12, 13.) Ilo iien kein ad, ewõr bar juon doulul in armej ro me Anij ear kakuktok er. Ãinwõt kar l̦õm̦aro nejin Kora, jej aikuj bar kõn̦aan katak kõn ro doon Anij ilo iien ko m̦okta im karoñ ro jet kake. Ñe el̦apl̦o̦k ad katak kõn armej ro doon Jeova im wãween an kar jipañ er, enaaj l̦apl̦o̦k ad tõmak ilo Aelõñ eo an Anij. Men in enaaj kal̦apl̦o̦k ad kõn̦aan kwal̦o̦k  naan kõn nuuj eo em̦m̦an kõn Aelõñ in.​​​—Jeremaia 9:24; Luk 4:⁠43.

6. Etke jen kõtmãne bwe Jeova ekõn̦aan bwe jen katak im pokake naan in kakapilõk ko an im kien ko an?

⁶ Jel̦ã kien ko. Kien ko an armej rekõn̦aan bwe ro dooer ren katak kakien ko aer im pokaki. Ãindein, jen kõtmãne bwe Jeova ebar kõn̦aan bwe ro rej doon Aelõñ eo an ren katak im pokake naan in kakapilõk ko an im kien ko an. (Aiseia 2:3; Jon 15:10; 1 Jon 5:⁠3) Kakien ko an armej relikjab im remaroñ jab em̦m̦an. Ak “kien Jeova e weeppãn.” (Sam 19:⁠7) Em̦m̦an ke ippam̦ riit Baibõl̦ kajjojo raan im katak kõn kien ko an Anij im naan in kakapilõk ko an? (Sam 1:​1, 2) Kõj kajjojo jen kate kõj ñan katak kien ko an Anij. Ejjel̦o̦k bar juon enaaj kõm̦m̦ane men in ñan kõj.

RO DOON AELÕÑ EO REJ YOKWE KIEN KO AN ANIJ

7. Etke armej ro doon Aelõñ eo rej pokake kien ko an Anij?

⁷ Ñan ad wõnm̦aanl̦o̦k wõt im ro doon Aelõñ eo an Anij, jejjab baj jel̦ã wõt kõn kien ko an ak jej aikuj bar yokwi. Armej ro doon aelõñ ko jet rej ba bwe rej errã ippãn kakien ko an aelõñ ko aer. Ak ñe ejjab em̦m̦an ippãer juon iaan kakien ko, innem renaaj rupe kien eo ilo aer jab pokake. Im rej kõm̦m̦ane men in kõnke rej l̦õmn̦ak bwe ejjel̦o̦k ej lo er. Im ekkã wõt an armej ro pokake kien ko kõnke rekõn̦aan kam̦õn̦õn̦õik ro jet. (Kolosse 3:​22) Bõtab, armej ro doon Aelõñ in Anij rejjab ãindein. Rej pokake kien ko an Anij kõnke rej yokwe Jeova. Eñin unin jej m̦õn̦õn̦õ in pokake kien ko an ekoba iien ko me ejjel̦o̦k armej rej lo kõj.​​​—Aiseia 33:22; riit Luk 10:⁠27.

8, 9. Ewi wãween am̦ jel̦ã el̦aññe kwõj m̦ool in yokwe kien ko an Anij?

⁸ Ewi wãween am̦ jel̦ã el̦aññe kwõj m̦ool in yokwe kien ko an Anij? Ej ilo am̦ etale kõm̦m̦an ko am̦. Ñan waanjoñak, l̦õmn̦ak m̦õk kõn ta eo kwõj kõm̦m̦ane ñe juon ej kakapilõk eok. Bõlen men eo ej kakapilõk eok kake ej kõn juon men me kwõmaroñ ba bwe ej an juon armej make pepe, ãinwõt ikijjeen wãween kõn̦ak nuknuk. M̦okta jãn am̦ kar jel̦ã m̦ool eo, bõlen kwõkõn jab kanooj l̦õmn̦ak kõn wãween am̦ nuknuk. Ak bõlen kwokõn kar kõn̦ak nuknuk ko me rekabwilo̦klo̦k mej. Ak ke kwaar jino yokwe Anij, kwaar kiiõ katak ñan kõn̦ak nuknuk ko me rej lel̦o̦k nõbar ñan e. (1 Timote 2:​9, 10; 1 Piter 3:​3, 4) Kiiõ, kwõmaroñ l̦õmn̦ak bwe ejjel̦o̦k jorrããn ilo wãween am̦ nuknuk. Ak ta el̦aññe juon iaan em̦m̦aan ro rej lale eklejia eo ej kepaake eok im ba bwe elõñ ro jeid im jatid rej l̦õkatip kõn wãween am̦ nuknuk? Ta eo kwõnaaj kar kõm̦m̦ane? Kwõnaaj ke kõm̦m̦an jekpen, illu ak m̦akoko in ukote wãween am̦ nuknuk? Juon iaan kien ko me reaorõk im ro doon Aelõñ eo rej aikuj pokake ej kien eo bwe jen anõke Kũraij. (1 Piter 2:​21) Paul ear ba bwe Kũraij “ear jab make kabuñbũruon,” kõn men in, jen bar ãindein. Kõj kajjojo “jen kabuñbũruon doon ilo em̦m̦an, ñan kalõk” doon. (Rom 15:​2, 3) Aolep iien juon Kũrjin en m̦õn̦õn̦õ in bõbrae an kõm̦m̦ani men ko me renaaj kal̦õkatip ro jet. Ilo wãween in, enaaj wõr wõt aenõm̦m̦an ilo eklejia eo.​​​—Rom 14:​19-21, UBS.

⁹ Ak kiiõ, ewi am̦ l̦õmn̦ak kõn mour in m̦are im pãd ippãn doon? Ro rejjab ro doon Aelõñ in Anij remaroñ l̦õmn̦ak bwe ejjel̦o̦k jorrããn ñe em̦m̦aan rej pãlele em̦m̦aan im kõrã ñan kõrã, ekoba alwõj pija ko rettoon, lejen ak ellolo im jepel. Bõtab, ro doon Aelõñ eo rar katak ñan l̦õmn̦ak m̦okta kõn men ko renaaj wal̦o̦k jãn kõm̦m̦an ko aer im ewi wãween enaaj jelõt ro jet. M̦okta jãn aer kar katak men in, elõñ iaaer rar mour in l̦õñ. Ak kiiõ, remel̦el̦e bwe mour in m̦are im pãd ippãn doon ej menin letok jãn Anij. Rein rej yokwe kien ko an Jeova im rejel̦ã bwe ro rejjab pokake kien ko an Anij kõn mour in m̦are im pãd ippãn doon rejjab maroñ erom ro doon Aelõñ eo. (1 Korint 6:​9-11) Rebar jel̦ã bwe bũruon juon armej emaroñ m̦on̦e e ñan kõm̦m̦ani men ko rejjab jim̦we. (Jeremaia 17:⁠9) Innem, rein el̦ap aer kam̦m̦oolol bwe rej bõk  naan in kakkõl ko ñan jipañ er bwe ren pokake wõt kien ko an Anij.

RO DOON AELÕÑ EO EL̦AP AER KAM̦M̦OOLOL KÕN NAAN IN KAKKÕL KO

10, 11. Ta naan in kakkõl ko raorõk me Aelõñ in Anij ej litoki? Ta am̦ l̦õmn̦ak kõn naan in kakkõl kein?

¹⁰ Kien ko an armej rej kakkõl armej ro dooer kõn nañinmej ko im kõn jet m̦õñã im uno ko me renana. Em̦ool bwe ejjab aolep m̦õñã im uno remaroñ kajorrããne kõj. Ak ñe ewõr men eo ekauwõtata, kien eo ej kakkõl ro doon im ej an eddo ñan lel̦o̦k naan in kakkõl. Aelõñ eo an Anij ej bar lil̦o̦ki naan in kakkõl ko ñan armej ro doon. Ej kakkõl kõj kõn men ko remaroñ kõm̦m̦an ad jab pokake kien ko an Anij im ko̦kkure kõtaan eo ad ippãn. Ñan waanjoñak, elõñ armej rej kõjerbal Internet ñan eo̦roñ ennaan ko, ebbõk mel̦el̦e ko im kõjerbale ñan iukkure. Doulul eo an Anij ej bar kõjerbal Internet ñan kõm̦m̦ani elõñ men ko rem̦m̦an. Bõtab, ewõr jet website ko ilo Internet me rekauwõtata ñan ro im rej kõn̦aan kõm̦m̦ane wõt men eo ejim̦we. Website ko me rej kwal̦o̦k pija ko rettoon relukkuun kauwõtata. Elõñ iiõ ko in an ri karejar eo etiljek im mãlõtlõt kakkõl kõj kõn men kein ilo Internet, im el̦ap ad kam̦m̦oolol kõn naan in kakkõl kein.

¹¹ Jet iiõ rej kab mootl̦o̦k tok ñan kiiõ, elõñ rar jino kõjerbal jet website ko ilo Internet. Ilo website kein, armej rej kwal̦o̦k kajjier ñan doon, kwal̦o̦k pija ko aer, bwebwenato ippãn doon, im men ko ãierl̦o̦k wõt. Emaroñ wõr tokjãn ad kõjerbali website kein, bõtab remaroñ bar kõm̦m̦an bwe jen iioon jorrããn. Ñe jej kããlõt ñan kõjerbali, jej aikuj lukkuun kõjparok kõnke jemaroñ oktak im bwebwenato ippãn ro me ejjab em̦m̦an kõm̦m̦ao ko aer. (1 Korint 15:​33) Eñin unin ri karejar eo etiljek im mãlõtlõt ej letok naan in kakkõl ko ñan jipañ kõj bwe en jim̦we ad l̦õmn̦ak kõn website kein ilo Internet. Kwõnañin ke riiti aolep katak ko me ri karejar eo etiljek im mãlõtlõt ear litoki kõn kõjerbali men kein ilo Internet? Cell phone ko remaroñ bar juon men em̦m̦an el̦aññe ejim̦we ad kõjerbali. Kwõnañin ke riiti aolep katak ko me ri karejar eo etiljek im mãlõtlõt ear litoki kõn kõjerbale cell phone ko? Emaroñ kauwõtata ñe jej kõjerbale website kein ilo Internet ak kõjerbale cell phone ko ak jejjab m̦okta riiti katak ko kõn men kein. * (Lale kõmel̦el̦e eo itulal̦.) Ej ãinl̦o̦k wõt ñe jej kajju idaake juon kain uno ak jejjab m̦okta riiti kõmel̦el̦e ko ilo kilin bato in uno eo.

12. Etke ej juon men ebõd ñan kajekdo̦o̦ni naan in kakkõl ko?

¹² Ro rej kajekdo̦o̦ni naan in kakkõl ko jãn ri karejar eo etiljek im mãlõtlõt renaaj bõktok jorrããn ñan ro rejitõnbõro ippãer im ñan bar er make. Jet rej lukkuun imminene in alwõji pija ko rettoon ak rar jerawiwi ilo aer mour in l̦õñ. Rej l̦õmn̦ak bwe Jeova ejjab loi men ko rej kõm̦m̦ani. Ej menin bwebwe ñan l̦õmn̦ak bwe jemaroñ n̦ooji men ko jej kõm̦m̦ani jãn Jeova. (Jabõn Kõnnaan 15:3; riit Hibru 4:13.) Ñe armej rej rupi kien ko an juon aelõñ, enaaj jako aer ro doon aelõñ eo. Ãindein, ñe armej ro rej wõnm̦aanl̦o̦k wõt im kajekdo̦o̦ni kien ko an Jeova, innem Jeova eban kõtl̦o̦k bwe ren ro doon Aelõñ eo an. (1 Korint 5:​11-​13) Bõtab, Jeova el̦ap an tũriam̦o im ej kõjerbale em̦m̦aan ro rej lale eklejia ko bwe ren kajjioñ jipañe ro rar kõm̦m̦an bõd ko rel̦l̦ap. (Galetia 6:⁠1) Ro rej ukel̦o̦k im jab bar kõm̦m̦ani  men ko rebõd remaroñ bar erom ro jeran Jeova im erom ro doon Aelõñ eo an. (2 Korint 2:​5-8, UBS) El̦ap ad jeraam̦m̦an bwe jej karejar ñan juon Irooj eo me el̦ap an yokwe!

EAORÕK EKKATAK IPPÃN ARMEJ RO DOON AELÕÑ EO

13. Ewi wãween an aorõk ekkatak ippãn armej ro doon Aelõñ eo?

¹³ Elõñ kien ko el̦ap aer kate er ñan kajel̦ãl̦o̦kjen̦ armej ro dooer. Rej kalõk im̦õn jikuul̦ ko bwe armej ren ekkatak. Armej ro doon Aelõñ eo an Anij rej m̦õn̦õn̦õ kõn jikuul̦ kein bwe remaroñ ekkatak kilen riit im jeje. Bareinwõt, remaroñ ekkatak men ko jet me enaaj jipañ er ilo jerbal. Rej kate er ñan bõk tokjãn jãn jikuul̦ kein. Ak el̦apl̦o̦k aer m̦õn̦õn̦õ kõn jikuul̦ eo me rej ekkatak jãne im ej itok jãn Jeova ikijjeen doulul eo an. Ñan waanjoñak, doulul eo an ej rõjañe kõj ñan riit im ej bar rõjañe rũtto ro bwe ren riit ñan ajri ro nejier. Kajjojo allõñ ri karejar eo etiljek im mãlõtlõt ej kõm̦m̦ani bok ko me rej pedped ioon Baibõl̦. Ñe kwõnaaj riiti juon ak ruo peij ilo juon raan, kwõnaaj bõk tokjãn jãn jel̦ãl̦o̦kjen̦ eo Jeova ej letoke.

14. (1) Ta jikuul̦ eo armej ro doon Aelõñ eo rej ekkatak jãne? (2) Ta katak ko em̦õj am̦ kõjerbali me rej rõjañe kõj ñan katak kaki ilo Iien Kabuñ an Baam̦le eo?

¹⁴ Ro doon Aelõñ eo rej ekkatak kajjojo wiik ilo kweilo̦k ko an eklejia eo. Ñan waanjoñak, ewõr juon jikuul̦ etan Jikuul̦ in Kwal̦o̦k Naan. Jikuul̦ in ej jipañ er bwe en em̦m̦an aer katakin ro jet kõn Naan in Anij. Elõñl̦o̦k jãn 60 iiõ ko in aer kõm̦m̦ane jikuul̦ in. Kwõj ke bõk kun̦aam ilo jikuul̦ in? Ri karejar eo etiljek im mãlõtlõt ej bar kwal̦o̦k ñan kõj bwe elukkuun aorõk bwe baam̦le ko ren katak ippãn doon ilo jota kajjojo wiik. Men in ej kõm̦m̦an bwe baam̦le eo en l̦apl̦o̦k aer bõrokuk ippãn doon. Kwõnañin ke kar kõjerbali katak ko me rej rõjañe kõj ñan katak kake ilo Iien Kabuñ an Baam̦le eo me rej pãd ilo bok ko ad? *​​​—Lale kõmel̦el̦e eo itulal̦.

15. Ta jeraam̦m̦an eo ewõr ippãd?

¹⁵ Elõñ ro doon juon aelõñ rej kajjioñ in kõm̦m̦an an ro jet rejetake juon bade ilo kien eo. Jet rej etal jãn em̦ ñan em̦ im kareel armej ro bwe ren rejetake er. Armej ro doon Aelõñ eo an Anij ipel̦aakin lal̦ in rej rejetake Aelõñ eo an Anij. Ewi wãween? Ej ilo aer kwal̦o̦k naan jãn em̦ ñan em̦ im ilo kãbon ial̦ ko. Ñan waanjoñak, unin bok eo Naan in Keeañ ej ñan kwal̦o̦k kõn Aelõñ eo an Jeova. Im katak eo m̦oktal̦o̦k ear kwal̦o̦k bwe bok in ej bok eo kiiõ im el̦aptata aer leto letak ilo pel̦aakin lal̦. Ej juon jeraam̦m̦an ñan kwal̦o̦k ñan ro jet kõn Aelõñ in Anij. Kwõj ke kijejeto im kwal̦o̦k kõn nuuj eo em̦m̦an kõn Aelõñ eo?​​​—Matu 28:​19, 20.

16. Ewi wãween kwõmaroñ kam̦oole bwe kwõj juon iaan ro rem̦m̦an doon Aelõñ in Anij?

¹⁶ M̦õttan jidik, kien eo wõt an Aelõñ in Anij enaaj tõl aolepen lal̦ in. Naaj kakien ko wõt an Aelõñ in im armej ro renaaj l̦oori. Kwõnaaj ke juon iaan ro rem̦m̦an doon Aelõñ in Anij ilo naaj iien in? Ej iien kiiõ ñan kam̦oole bwe kwõnaaj. Ewi wãween? Eokwe, ilo aolep pepe ko kwõj kõm̦m̦ani kajjojo raan, kwõn kõm̦m̦ani bwe kwõn lel̦o̦k nõbar ñan Jeova. Ilo wãween in, kwõj kam̦ool bwe kwõj juon iaan ro rem̦m̦an doon Aelõñ in Anij.​​​—1 Korint 10:⁠31.   

[Kamelele eo itulal]

[Kajitõk ko ñan katak]

[Pija ilo peij 21]

Kwõj ke roñjaki naan in kakkõl ko jãn ri karejar eo etiljek im mãlõtlõt kõn kõjerbal Internet?

[Pija ilo peij 19]

Ãinwõt l̦õm̦aro nejin Kora, kwõj ke kaorõk kabuñ eo em̦ool im kõn̦aan jel̦ã kõn men ko rar wal̦o̦k m̦okta kõn kabuñ eo em̦ool?

[Pija ilo peij 22]

Iien Kabuñ an Baam̦le eo emaroñ jipañ kwe im ro ilo baam̦le eo am̦ ñan erom ro rem̦m̦an doon Aelõñ eo