Ruwaakl̦o̦k ñan Eo Ej Roñjake Jar

ELÕÑ ro rej ba rej tõmak ilo Anij ak rejjab maroñ kõmel̦el̦eik unin aer tõmak. Rejjab maroñ bar kõmel̦el̦eik etke ekkã an kabuñ ko nana im etke Anij ej kõtl̦o̦k an wõr eñtaan. Men eo wõt remaroñ kõm̦m̦ane ej jar ñan juon Anij eo im rejjab lukkuun mel̦el̦e kake.

Bõtab, ijello̦kun am̦ baj tõmak wõt ilo Anij, kwõmaroñ bar kepaake. Am̦ jel̦ã kajjien enaaj kal̦apl̦o̦k am̦ tõmak im kõm̦m̦an bwe kwõn yokwe im kam̦m̦oolol e. Tõmak eo em̦ool ej pedped ioon menin kam̦ool ko. (Hibru 11:⁠1) El̦aññe kwõj katak m̦ool eo kõn Anij, kwõmaroñ jel̦ã kajjien im kwõnaaj kõnono ñan e ãinwõt juon jeram̦ eo kwõj epaake. Jen etale bwebwenato kein an jet ro im rekõn jar meñe rej pere bwe ewõr Anij.

◼ Patricia, eo kar kõnono kake ilo katak eo kein kajuon, ear ba: “Juon raan iar pãd ippãn joñoul ro m̦õtta im rar kõnono kõn kabuñ. Iar ba ñan er bwe juon iien, juon iaan Ri Kõnnaan ro an Jeova ear itok ñan m̦weo im kwal̦o̦k naan ippãn jema, eo im ejjab tõmak ilo Anij. Ke iar roñ aerro kõnono kõn Baibõl̦ eo, iar diwõjl̦o̦k jãn m̦weo bwe in jab roñjake. Juon iaan ro ilo kumi in kõjañjañ eo ear ba, ‘Bõlen Ri Kõnnaan ro an Jeova rem̦ool.’

“Bar juon iaaer ear ba, ‘Etke jejjab etal ñan juon iaan kweilo̦k ko aer im lale?’ Im eñin men eo kõmar kõm̦m̦ane. Meñe kõmar jab lukkuun jel̦ã el̦aññe katak ko aer rem̦ool, jet iaamim ar wõnm̦aanl̦o̦k wõt im etal ñan kweilo̦k ko aer kõnke rar lukkuun jouj.

“Bõtab, juon Jabõt iar roñ juon katak me ear ukot wãween aõ l̦õmn̦ak. Ri kõnono eo ear kõmel̦el̦eik etke armej rej eñtaan. Ij kab jel̦ã bwe Anij ear kõm̦anm̦an armej ro ilo jinoin bwe ren weeppãn im bwe jerawiwi im mej ear ijjino ippãn juon armej im ajeededl̦o̦k ioon armej otemjej. Ri kõnono eo ear bar kõmel̦el̦eik aorõkin mej eo an Jijej im ewi wãween mej eo an enaaj bar kajepl̦aaktok mour eo eweeppãn Adam ear luuji. * (Lale kõmel̦el̦e eo itulal̦.) (Rom 5:​12, 18, 19) Iar kiiõ mel̦el̦e. Im iar tõmak bwe ewõr juon Anij im ej kea kõn kõj. Iar wõnm̦aanl̦o̦k im katak Baibõl̦, im tokãlik ij kab kile ilo mour eo aõ bwe imaroñ jar ñan juon eo im ej roñjake jar ko aõ.”

◼ Allan, eo im kar bar kwal̦o̦k ilo juon iaan katak ko m̦oktal̦o̦k, ear ba: “Juon raan, jet Ri Kõnnaan ro an Jeova rar itok ñan m̦weo im̦õ im kõrã eo ippa ear kadel̦o̦ñtok er kõnke ear itoklimo kõn men ko rej kõnono kaki kõn mour indeeo ilo lal̦ in. Iar kitõtõ. Innem, ke rej kõnnaan wõt, iar bõk lio ippa ñan jikin kõmat eo am̦ro im iar ba ñan e, ‘Kwõn jab bwebwe jen jar kan̦ im jab tõmak men kan̦ rej ba!’

“Innem ear ba, ‘Eokwe, kwõn etal m̦õk im lale  el̦aññe mel̦el̦e kan̦i am̦ rem̦ool jãn mel̦el̦e kan̦ aer.’

“Ilo m̦ool, iar jab maroñ kariab er joñan an jim̦we im m̦ool men ko rej ba. Ak rar lukkuun jouj. Rar letok juon aõ bok me ej kwal̦o̦k kõn wãween an kar mour ijjino im el̦aññe men otemjej rar jide im wal̦o̦k ke ak jaab. Mel̦el̦e ko ie rar lukkuun alikkar im men in ear kõm̦m̦an bwe in kõn̦aan kal̦apl̦o̦k aõ jel̦ã kõn Anij. Iar jino katak Baibõl̦ ippãer, im tokãlik iar kile bwe men ko iar katak kaki jãn Baibõl̦ relukkuun oktak jãn kar l̦õmn̦ak ko aõ m̦okta kõn kabuñ. Ilo aõ katak kõn Jeova, iar jino jar ñan e im kwal̦o̦k bũruõ ñan e. Jet iien ekõn utiej bũruõ, kõn men in iar jar bwe Jeova en jipañ eõ. Ij eñjake im lo bwe Jeova ear uwaake jar ko aõ.”

◼ Andrew, eo im ej jokwe ilo Iñlen, ear ba: “Ear lukkuun pen ippa bwe ejjel̦o̦k Anij im el̦ap aõ kar itoklimo in ekkatak kõn science. Meñe ãindein, unin aõ kar tõmak katak eo an ri mãlõtlõt ro bwe men otemjej rar jide im wal̦o̦k ej kõnke armej ro rar ba bwe em̦ool men in. Iar jab kõn̦aan tõmak ilo Anij kõn wõt an lõñ men ko renana rej wal̦o̦k ilo lal̦ in.

“Ak jet iien ij kajjitõk ippa make: ‘Ñe ewõr  juon Anij ilañ, innem ikõn̦aan jel̦ã ta unin jej mour. Etke el̦ap nana im tarin̦ae?’ Ke iar iioon wãween ko reppen, jet iien iar jar im kappok jipañ ak iar jab jel̦ã wõn eo ij jar ñan e.

“Juon iien juon armej ear lel̦o̦k an kõrã eo ippa juon peba jidikdik me Ri Kõnnaan ro an Jeova rar je. Taitõl̦ in peba in ej ba: Lõl In Enaj Ke Elle Jen Kokkure? Eñin kajjitõk eo ekkã aõ kar l̦õmn̦ak kake. Peba in ear kõm̦m̦an menin aõ l̦õmn̦ak im ba ‘Baibõl̦ eo emaroñ ke uwaaki kajjitõk ko aõ?’ Tokãlik, ilo juon raan in kakkije jãn jerbal im jikuul̦, juon armej ear letok bok eo etan, Baibõl̦ eo​​—Naan an Anij Ke ak Armej? (The Bible​​—God’s Word or Man’s?) * (Lale kõmel̦el̦e eo itulal̦.) Ke iar kile bwe Baibõl̦ eo ej errã ippãn jet katak an science, iar kõn̦aan kal̦apl̦o̦k aõ katak kõn Baibõl̦ eo. Innem, juon iaan Ri Kõnnaan ro an Jeova ear kajjitõk el̦aññe im̦õn̦õn̦õ in katak Baibõl̦ im iar ba em̦m̦an. Ke iar jel̦ã im mel̦el̦e kõn ankilaan Jeova kõn armej, iar eñjake aõ jel̦ã kajjien ãinwõt juon jera, eo im imaroñ kwal̦o̦k bũruõ ñan e ilo jar.”

◼ Jan, eo im ear dik im rũttol̦o̦k ilo kabuñ in Bũrotijen ilo London, ear ba: “An etao kõm̦m̦an ko an kabuñ ko im an l̦ap eñtaan, men kein rar kõm̦m̦an bwe en jako aõ itoklimo ilo kabuñ. Iar bõjrak jãn aõ college im jino kõm̦m̦an aõ jããn ikijjeen aõ al im kũta. Eñin iien eo iar iioone Pat. Ear juon Katlik ke ear dik im rũttol̦o̦k ak tokãlik ear jako an itoklimo kõn kabuñ ãinwõt ña.

“Kõmro kar jokwe ilo juon em̦ ettol̦o̦k im emake iaan ippãn bar jet me rar jol̦o̦k aer college. Rein rar itoklimo kõn kabuñ ko ãinwõt Muslim im kabuñ in Budda. Ilo boñ, kõmij emmej ium̦win elõñ awa im kõbauwe kõn ta unin jej mour. Meñe kõmro Pat kar jab tõmak ilo Anij, kõmro kar kile bwe ej aikuj wõr juon eo ear kõm̦anm̦an mour ko ad.

“Ãlikin am̦ro kar em̦m̦akũtl̦o̦k ñan Iñlen im kappok jerbal ãinwõt ri kõjañjañ ro, ear l̦otak juon nejimro l̦addik. Juon boñ ear nañinmej. Iar ilbõk ke iar make jar ñan Anij meñe iar jab tõmak ilo e. Tokãlik, ear jab em̦m̦an pãd eo am̦ro Pat. Kõn men in, iar bõk l̦addik eo nejimro im etal jãn m̦weo. Iar bar jar im kappok jipañ meñe ijaje el̦aññe ewõr juon ej roñjake. Iar jab jel̦ã bwe Pat ear bar kõm̦m̦ane men in.

“Ilo ejja raan eo wõt, ruo iaan Ri Kõnnaan ro an Jeova rar kal̦l̦al̦l̦al̦ ilo kõjãm eo an Pat im kwal̦o̦k ñan e jet naan in kakapilõk jãn Baibõl̦ me relukkuun jejjet ñan apañ ko jej iiooni. Pat ear calle eõ im kajjitõk el̦aññe iar kõn̦aan kobal̦o̦k ippãn ilo an katak Baibõl̦ ippãn Ri Kõnnaan ro an Jeova. Tokãlik, kõmro kar katak bwe ñan kabuñbũruon Anij, kõmro ar aikuj m̦are. Ear jaad in pen ñan kõm̦m̦ane men in kõn an kar jab em̦m̦an pãd eo am̦ro.

“Kõmro kar kõn̦aan kal̦apl̦o̦k am̦ro jel̦ã kõn wãween an jejjet kitien kanaan ko ilo Baibõl̦, etke ej wõr eñtaan, im mel̦el̦ein Aelõñ eo an Anij. Jidik kõn jidik, kõmro kar kile bwe Anij ej kea kõn kõj, im kõmro kar kõn̦aan pokake kien ko an. Innem kõmro kar m̦are. Naan in Anij ear jipañ kõmro ñan katakin ajri ro jilu nejimro ilo jim̦we im mãlõtlõt. El̦ap am̦ro tõmak bwe Jeova ear roñjake jar ko am̦ro.”

Make Etale Menin Kam̦ool Ko

Elõñ milien armej ro ãinwõt rein kar kwal̦o̦k ilo katak in, rar jab pilo jãn katak ko an kabuñ ko reriab. Im rar katak im mel̦el̦e unin an Anij kõtl̦o̦k an wõr eñtaan. Kwaar ke kile bwe ilo kajjojo bwebwenato ko an rein ilo katak in, men eo me ear jipañ er ñan lukkuun tõmak bwe Jeova ej roñjake jar ko aer, ej katak ko rem̦ool jãn Baibõl̦?

Kokõn̦aan ke katak kõn menin kam̦ool ko im rej kwal̦o̦k bwe ewõr Anij? Ri Kõnnaan ro an renaaj m̦õn̦õn̦õ in jipañ eok ñan katak m̦ool eo kõn Jeova im wãween kwõmaroñ kepaake Eo ej “roñjake jar.”​​—Sam 65:⁠2.

[Kamelele eo itulal]

[Pija ilo peij 10]

“Ke iar jel̦ã im mel̦el̦e kõn ankilaan Jeova kõn armej, iar eñjake aõ jel̦ã kajjien ãinwõt juon jera, eo im imaroñ kwal̦o̦k bũruõ ñan e ilo jar”

[Pija ilo peij 9]

Tõmak eo em̦ool ej pedped ioon menin kam̦ool ko im kõn̦aan eo ñan jel̦ã m̦ool eo kõn Anij