Wõn Eo Ej Roñjake Jar ko Ad?

EL̦AÑÑE ewõr juon me ej roñjake jar ko ad, ealikkar bwe ej aikuj Eo ear kõm̦anm̦an kõj. Etke? Kõnke ejjel̦o̦k bar juon emaroñ riiti l̦õmn̦ak ko ad ijello̦kun Eo ear kõm̦anm̦an kõmãlij ko an armej. Bareinwõt, e wõt emaroñ uwaaki jar ko an armej im jipañ er ñe rej pãd ilo aikuj. Ak kwõmaroñ kajjitõk ippam̦ make, ‘Ewõr ke pedped in ad tõmak bwe ewõr juon Ri Kõm̦anm̦an?’

Elõñ armej rej l̦õmn̦ak bwe el̦aññe juon ej tõmak ilo Anij, ej aikuj kõjekdo̦o̦n menin kam̦ool ko me jaintiij ro ak ri mãlõtlõt ro rar loi im katak kaki. Ak ejjab m̦ool men in. Jen lale juon etale kar kõm̦m̦ane.

◼ Ilo raan kein, kar kajjitõk ippãn 1,646 ri kaki in science jãn 21 iaan college ko rem̦m̦antata ilo Amedka im lo bwe enañin 550 wõt iaaer rar ba naan kein “Ijjab tõmak ilo Anij.”

Men in ej kam̦ool bwe elõñ jaintiij ro rej tõmak bwe ewõr Anij.

Kein Kam̦ool ko bwe Ewõr Juon Ri Kõm̦anm̦an

Jej aikuj ke baj tõmak wõt bwe ewõr juon ej roñjake jar ko ad ak ejjel̦o̦k kein kam̦ool ko? Ejjab ñan jidik. Jet rej l̦õmn̦ak bwe rejjab aikuj kein kam̦ool ko ñan tõmak ilo Anij. Ak ejjab jim̦we l̦õmn̦ak in kõnke Baibõl̦ ej ba “tõmak ej ãinwõt lõke kõn men ko jej kõjatdikdik kõj kaki, im reel bũruod kõn men ko je jab loi.” (Hibru 11:⁠1) Ñan waanjoñak, jejjab maroñ lo kõto. Bõtab, unin ad jel̦ã bwe ewõr kõto ej kõnke jej lo an wõjke ko ellãle im em̦m̦akũtkũt. Eñin unin jej tõmak bwe ewõr kõto. Ilo ejja wãween in wõt, meñe jejjab maroñ lo Eo ej roñjake jar ko ad, jemaroñ lo menin kam̦ool ko me rej jipañ kõj ñan tõmak bwe ewõr Anij im ej roñjake kõj.

Ia eo jemaroñ lo kein kam̦ool ko bwe ewõr juon Anij? Jemaroñ lo men kein ilo ad kalimjek menin kõm̦anm̦an ko rej pãd ipel̦aakid. Baibõl̦ ej ba: “Bwe em̦ otemjej armej rej kalõki, a Eo ear  kalõk men otemjej, E Anij.” (Hibru 3:⁠4) Kwõj errã ke ilo naan kein? Bõlen kwõj kõl̦mãnl̦o̦kjen̦ kõn wãween kar kõm̦anm̦an iju ko ilañ, wãween an ejaak mour an juon armej, ak kõn an kabwilõñlõñ wãween kar kõm̦anm̦an kõmãlij ko an armej. Ñe kwõj l̦õmn̦ak kõn men kein, kwõj kile bwe ewõr juon emãlõtlõt im eutiejl̦o̦k jãn armej me ear kõm̦anm̦an men otemjej.

Bõtab ewõr joñan an menin kõm̦anm̦an kein katakin kõj kõn Anij. Ad ekkatak kõn menin kõm̦anm̦an ko ej ãinwõt ñe jej roñ em̦m̦õjãnjãn in neen juon armej ilo turin kõjãm eo ad ak jejaje wõn eo. Ñan ad maroñ jel̦ã wõn eo, jej aikuj kepel̦l̦o̦k kõjãm eo. Ãindein, ewõr juon men jej aikuj kõm̦m̦ane ñan ad maroñ jel̦ã wõn Eo ear kõm̦anm̦an men ko otemjej.

Baibõl̦ eo ej ãinwõt juon kõjãm. Ñe kwõnaaj kepel̦l̦o̦ke kwõnaaj jel̦ã kõn Anij. Ñe kwõnaaj etale jet iaan kanaan ko ie me rar jejjet kitieer, kwõnaaj lo kein kam̦ool ko bwe ewõr juon Anij. * (Lale kõmel̦el̦e eo itulal̦.) Ak el̦apl̦o̦k jãn men in, kwõnaaj loe wãween ko rem̦m̦an ippãn Anij ikijjeen am̦ riiti bwebwenato ko ie me rej kwal̦o̦k kõn wãween an Anij kar jerbal ippãn armej ro.

Ewi Wãween Eo im Ej Roñjake Jar?

Baibõl̦ ej kwal̦o̦k bwe kwõmaroñ jel̦ã kajjien Eo ej roñjake jar ãinwõt am̦ jel̦ã kajjien juon armej. Armej wõt remaroñ roñjake im mel̦el̦e ñe juon ej kõnnaan. Ej men in kaenõm̦m̦an kõj ñe jej riiti naan kein: “O Kwe kwõj roñjake jar, ñan  Kwe kanniõk otemjej enaaj itok.” (Sam 65:⁠2) Anij ej roñjake ro rej jar ñane im tõmak bwe enaaj jipañ er. Im ewõr juon etan. Baibõl̦ ej ba: “Jeova ej ettol̦o̦k jãn ri nana; a Ej eo̦roñ jar an rũ wãnõk.”​​—Jabõn Kõnnaan 15:⁠29.

Ewõr an Jeova eñjake. Ej “Anij in yokwe” im juon “Anij e m̦õn̦õn̦õ.” (2 Korint 13:11; 1 Timote 1:​11) Juon iien, ke lal̦ in ear obrak kõn nana, Baibõl̦ eo ej ba bwe ear “eddo bũruon.” (Jenesis 6:​5, 6) An armej ba bwe Anij ej mãlejjoñe kõj ñe jej eñtaan, ejjab m̦ool. Baibõl̦ ej ba: “En ettol̦o̦k jãn Anij bwe En kõm̦m̦an nana.” (Job 34:​10) Bõtab, kwõmaroñ kajjitõk ippam̦ make, ‘El̦aññe Anij ej Ri Kõm̦anm̦an eo ekajoor otem kajoor, etke ej kõtl̦o̦k bwe en wõr eñtaan?’

Jeova ear lel̦o̦k ñan armej maroñ eo ñan kõm̦m̦an jokãlõt ko, im men in ej kalikkar ñan kõj kõn kain Anij rot e. Jej ke kõjerbal maroñ in ilo jim̦we ilo wãween ad mour? Ekabũrom̦õjm̦õj bwe elõñ armej rej kõjerbal anemkwoj in kããlõt eo aer ilo wãween ko rebõd, im eñin unin an wal̦o̦k eñtaan ko ñan er make im ro jet. Ak kajjitõk eo in jej aikuj lukkuun kõl̦mãnl̦o̦kjen̦ kake: Ewi wãween an Anij maroñ jol̦o̦k eñtaan ko ilo an jab bõk maroñ in jokãlõt ko an armej? Jenaaj etale kajjitõk in ilo katak in tok juon.

[Kamelele eo itulal]

[Box ilo peij 5]

Kabuñ ko Rej Ke Kõm̦m̦an Am̦ Jab Tõmak ilo Anij?

Ekabũrom̦õjm̦õj bwe kabuñ ko rej kõm̦m̦an bwe armej ren pere bwe ewõr juon Anij el̦ap an tũriam̦o im ej roñjake jar ko an armej. Kabuñ ko rej bõk kun̦aaer ilo tarin̦ae, rej rejetake ri nana ro me rej kaamijak armej kõn baam̦, im rejjab kabõjrak an armej ko̦kkure ajri ro. Men kein rej kõm̦m̦an bwe armej ro ekoba ro rekijejeto ilo aer jar ren ba, “Ijjab tõmak ilo Anij.”

Etke ekkã an nana etan kabuñ ko ippãn armej? Kõnke ri nana ro rej kõm̦m̦ani men ko renana ilo etan kabuñ ko aer. Baibõl̦ eo ear kanaan bwe jet armej me rej ba rej Kũrjin renaaj kõjerbale kabuñ eo aer ñan kõm̦m̦ani men ko me rejjab ekkar ñan ankilaan Anij. Rijjelõk Paul ear jiroñ em̦m̦aan ro rar tõl eklejia ko: “Jet iaami renaaj jutak, im kõnono men ko re ankeke, bwe ren kareel ro rũkal̦oor il̦okwaer.”​​—Jerbal 20:​29, 30.

Anij ekanooj dike kabuñ ko reriab. Ilo m̦ool, Naan in Anij, Baibõl̦ eo, ej ba bwe Anij enaaj ekajete kabuñ ko reriab kõn “bõtõktõkin . . . ro otemjej kar m̦an er ioon lal̦.” (Revelesõn 18:​24) Ewõr ruõn kabuñ ko reriab im̦aan mejen Anij kõn aer likjab in katakin armej ro kõn Anij eo em̦ool im el̦ap an yokwe.​​—1 Jon 4:⁠8.

Eo im ej roñjake jar ko an armej ej bũrom̦õj im mel̦el̦e kõn eñjake ko an ro rej eñtaan im jorrããn jãn kõm̦m̦an ko renana an kabuñ ko. M̦õttan jidik, yokwe eo an Anij ñan armej ro enaaj kõm̦akũt e bwe en kõjerbal Jijej ñan ekajete aolep armej in kabuñ ko im retao. Jijej ear ba: “Elõñ renaaj ba ñan Eõ ilo raan eo, ‘Irooj, Irooj, kõm ar jab rũkaanij kõn Etam̦ ke?’ . . . Innem Inaaj ba ñan er, I ar jaje kom̦; kom̦win ilo̦k jãn Eõ, kom̦ rej kõm̦m̦an nana.”​​—Matu 7:​22, 23.