En Ami Naan Aet, Aet
En Ami Naan Aet, Aet
“En ami naan Aet, aet; Jab, jab.”—MATU 5:37.
JOUJ IM UWAAK:
Ta eo Jijej ear ba kõn kajje ak kõm̦m̦an kallim̦ur?
Jijej ear kajejjet an kallim̦ur ak an kõnnaan. Etke elukkuun em̦m̦an joñak in an?
Ta kallim̦ur ko jet raorõk jej aikuj bar m̦ool ñani im kajejjeti?
1. Ta eo Jijej ear ba kõn kajje ak kõm̦m̦an kallim̦ur? Etke?
KURJIN ro rejjab aikuj kajje ak kõm̦m̦an kallim̦ur ñan kam̦oole men ko rej ba. Etke? Ej kõnke rej l̦oore naan kein Jijej ear ba: “En ami naan Aet, aet.” Ta mel̦el̦ein naan kein? Ej mel̦el̦ein bwe juon armej en kwal̦o̦k m̦ool im en kajejjete men ko ej ba. M̦oktal̦o̦k jãn an kar Jijej ba naan kein, ear ba: “Kom̦win jab kajje” ak kõm̦m̦an kallim̦ur. Unin an kar ba men in ej kõnke elukkuun lõñ armej rar kõm̦m̦an aer kallim̦ur im jab kajejjeti. Ta eo enaaj wal̦o̦k ñe juon ej kallim̦ur kõn juon men ak ejjab kõm̦m̦ane? Eokwe, ej make kaalikkar bwe ejjab juon eo me epidodo lõke im ej kõtl̦o̦k an “eo enana” kapo e.—Riit Matu 5:33-37.
2. Etke ejjab aolep iien ebõd ñan kõm̦m̦an kallim̦ur?
2 Naan ko an Jijej ejjab mel̦el̦ein bwe enana ñan kajje ak kõm̦m̦an kallim̦ur. Ilo ad kar etale ilo katak eo l̦o̦k, Jeova Anij im ri karejar eo an etiljek, Ebream, erro ar kõm̦m̦an kallim̦ur kõn men ko raorõk. Bareinwõt, Kien eo an Anij ear kwal̦o̦k bwe ej menin aikuj ñan an juon armej kõm̦m̦an kallim̦ur bwe en kõm̦adm̦õde jet apañ ko. (Exodus 22:10, 11, UBS; Bõnbõn 5:21, 22) Innem, ewõr iien ri karejar ro an Anij remaroñ kõm̦m̦an kallim̦ur. Ñan waanjoñak, ñe juon ej pãd ilo jikin ekajet, emaroñ ekkar bwe en kallim̦ur bwe enaaj kwal̦o̦k m̦ool. Ak bõlen ej iioone juon apañ me ejeja an iioone im ej lo bwe ej aikuj in kõm̦m̦an kallim̦ur ñan kõm̦m̦an bwe ro jet ren lõke naan ko an. Ilo iien in, emaroñ ekkar ñan an kõm̦m̦ane men in. Ke Jijej ear pãd ilo jikin ekajet eo an Ri Ju ro, bũrij eo el̦ap ear kõm̦m̦an bwe Jijej en kallim̦ur ñan kwal̦o̦k m̦ool. Jijej ear kõm̦m̦ane men in im ear kwal̦o̦k m̦ool. (Matu 26:63, 64, UBS) Jijej ear jab aikuj kallim̦ur bwe ej kwal̦o̦k m̦ool kõnke aolep iien ej kõnono m̦ool. Bõtab, ekkã an kar ba, “Em̦ool, em̦ool, Ij ba ñan eok,” ñan an kaalikkar ñan ro jet bwe remaroñ lõke men ko ej ba. (Jon 1:51; 13:16, 20, 21, 38) Ilo katak in, ewõr bar men ko jet jenaaj katak kaki jãn joñak ko an Jijej, Paul, im ro jet me rar kwal̦o̦k m̦ool im kajejjeti kallim̦ur ko rar kõm̦m̦ani.
EO EM̦M̦ANTATA JOÑAK EO AN EJ JIJEJ
3. Ta eo Jijej ear kallim̦ur kake ilo jar eo an? Ta uwaak eo an Jeova ñan jar eo an Jijej?
3 “Lo em̦õj Aõ itok . . . bwe In kõm̦anm̦an ankil Am̦, O Anij.” (Hibru 10:7) Jar in ej an Jijej im ej kallim̦ur bwe enaaj kõm̦anm̦an ankilaan Anij. Mel̦el̦ein men in bwe enaaj kõm̦m̦ani aolep men ko kar kanaan kaki kõn Ine eo kar kallim̦ur kake. Men in ej koba kanaan eo bwe enaaj kõtl̦o̦k an Setan “ko̦kkure jim̦win neen.” (Jenesis 3:15) Ejjel̦o̦k bar juon armej ear ineek eddo in ekanooj l̦ap. Jeova ear uwaake jar in im ba bwe el̦ap an lõke Nejin. Jeova ear jab kajjitõk bwe Jijej en kallim̦ur bwe enaaj kajejjet men eo ear ba.—Luk 3:21, 22.
4. Ta eo Jijej ear m̦õn̦õn̦õ in kõm̦m̦ane ñan kajejjete kallim̦ur eo an?
4 Aolep iien Jijej ear m̦ool im ear kajejjeti men ko ear kallim̦ur kaki. Ear jab kõtl̦o̦k an jabdewõt men kõm̦ade jãn an kõm̦m̦ane jerbal eo Jemen ear lel̦o̦k bwe en kõm̦m̦ane. Ear kwal̦o̦k naan wõt kõn nuuj eo em̦m̦an kõn Aelõñ eo an Anij im jipañ armej ro me Jeova ear karuakl̦o̦k er ñan e bwe ren erom rũkal̦oor. (Jon 6:65, UBS) Jejel̦ã bwe Jijej ear kajejjete kallim̦ur eo an ñan kõm̦anm̦an ankilaan Anij kõnke Baibõl̦ ej ba: “E [Jijej] ej “Aet” eo ñan kallim̦ur ko otemjej an Anij.” (2 Korint 1:20, UBS) Em̦ool bwe joñak in an Jijej ej joñak eo em̦m̦antata kõn an kar kajejjeti aolep men ko ear kallim̦ur ñan Jemen. Ebar wõr juon eo jenaaj katak kake me ear kate e ñan l̦oore joñak eo an Jijej.
PAUL EAR KAJEJJET MEN KO EAR BA
5. Etke em̦m̦an joñak eo an Paul ñan kõj?
5 “Irooj, ta eo in kõm̦anm̦ane?” (Jerbal 22:10) Eñin kajjitõk eo an Saul ke Irooj Jijej ear wal̦o̦k ñan e ilo juon visõn. Jijej ear kõn̦aan bwe Saul en bõjrak jãn an ko̦kkure Kũrjin ro. Kõn men in, Saul ear ukel̦o̦k, peptaij im tokãlik ear m̦õn̦õn̦õ in bõk jerbal eo eaorõk. Jerbal in ej ñan kajedede nuuj eo em̦m̦an kõn Jijej ñan aolep aelõñ ko. Jãn iien in m̦aanl̦o̦k, Saul ãt eo etan tokãlik Paul, ear wõnm̦aanl̦o̦k im likũt Jijej bwe ej an “Irooj” ilo an kar pokake e. (Jerbal 22:6-16; 2 Korint 4:5; 2 Timote 4:8) Ro jet me rar likũt bwe Jijej ej aer Irooj rar jab kajejjete naan ko aer. Jijej ear ba kõn er: “Etke kom̦ij likũt Eta, ‘Irooj, Irooj,’ im jab kõm̦anm̦an men ko Ij ba kaki?” (Luk 6:46) Jijej ekõn̦aan bwe aolep armej ro me rej likũt e bwe ej aer Irooj ren kajejjet men ko rej ba renaaj kõm̦m̦ani ãinwõt kar rijjelõk Paul.
6, 7. (1) Etke Paul ear lem̦aanl̦o̦k iien lol̦o̦k eo an ñan Korint? Etke ear juon men ebõd ñan an armej ro kar jalõke Paul? (2) Ta eo jen kõm̦m̦ane ñan ro rej tõl kõj?
6 Paul ear niknik im kijejeto ilo an kajedede ennaan eo kõn Aelõñ eo ilo aolep jikin ko ilo Esia Minor im ilo Europe. Ear jipañ kajutak elõñ eklejia ko ilo jikin kein im ear bar lol̦o̦ki. Jet iien ke ear jejel̦o̦k ñan er, ear kõm̦m̦an kallim̦ur kõnke en kaalikkar ñan er bwe em̦ool men ko ear je. (Galetia 1:20) Ewõr jet ilo Korint rar l̦õmn̦ak bwe Paul ej juon armej in jalõke. Kõn an kar Paul kõn̦aan bwe ren tõmak bwe em̦ool men ko ear jei, ear ba: “Ãinwõt Anij etiljek, am naan wõj ejab aet im jab.” (2 Korint 1:18) Ke Paul ear je naan kein, em̦õj an ilo̦k jãn Epesõs im ej kiiõ etal ilujen Masedonia l̦o̦k ñan Korint. Ak kar pepe eo an m̦oktal̦o̦k ej bwe en jepl̦aakl̦o̦k ñan Korint m̦okta jãn Masedonia. (2 Korint 1:15, 16) Jet iien, ewõr unin an oktak men ko jej ba jenaaj kõm̦m̦ani. Ñan waanjoñak, rainin ro me rej lol̦o̦k eklejia ko remaroñ ukot raan in lol̦o̦k ko aer ñan eklejia ko. Aer kõm̦m̦ane men in ejjab kõn un ko me ejej tokjãer im kõn kõn̦aan ko aer make ak ej kõn jet un ko me rejjab maroñ el̦l̦ã iooer. Ãindein, ear wõr unin an kar Paul lem̦aanl̦o̦k iien lol̦o̦k eo an ñan eklejia eo ilo Korint im men in ear jipañ ro ilo eklejia in. Ewi wãween?
7 Ilo iien eo me Paul ear pãd ilo Epesõs, ear roñ bwe ewõr apañ ilo eklejia eo ilo Korint. Kũrjin ro ilo eklejia in rar jab bõrokuk ippãn doon im ewõr juon eo ear mour in l̦õñ ak rar kõtl̦o̦k wõt an pãd ilo eklejia eo. (1 Korint 1:11; 5:1, UBS) Ilo lõta eo an Paul kein kajuon ñan Ri Korint ro, ear je naan in kakapilõk ko rekajoor bwe en jipañ er ñan kõm̦adm̦õdi apañ ko aer. Innem tokãlik, Paul ear jab kajju jerak jãn Epesõs ñan Korint. Ak ear peek ñan lel̦o̦k iien ñan an ri tõmak ro m̦õttan ilo Korint jerbali naan in kakapilõk ko m̦okta jãn an etal ñan ippãer. Ear kõm̦m̦ane men in kõnke ear kõn̦aan bwe iien eo ej lol̦o̦k er en juon iien me enaaj l̦ap an kakajoor er. Im ilo lõta eo an kein karuo ñan Ri Korint ro, ear jeje ñan er bwe eñin unin ear ukote iien lol̦o̦k eo an. Ear ba: “Ij kũr ñan Anij bwe en aõ ri kam̦ool, bwe elukkuun jel̦ã bũruõ! Unin aõ kããlõt bwe in jab iwõj ñan Korint, kõnke in jab kautam̦weik kom̦.” (2 Korint 1:23, UBS) Jen jab ãinwõt ro me rar kõrraate Paul. Ak jen kwal̦o̦k wõt kautiej ñan ro me em̦õj jitõñ er bwe ren tõl kõj. Alikkar bwe Paul ear kajejjet an kõnnaan. Jen l̦oore joñak in an Paul ãinwõt an kar bar l̦oore joñak eo an Kũraij.—1 Korint 11:1; Hibru 13:7.
RO JET ME EM̦M̦AN JOÑAK KO AER
8. Etke em̦m̦an joñak eo an Rebeka ñan kõj?
8 “Inaaj ilo̦k.” (Jenesis 24:58) Rebeka ear ba naan kein ke jinen im l̦eo jein rar kajjitõk ippãn el̦aññe ekõn̦aan m̦areik Aisak, l̦eo nejin Ebream. Rebeka ear aikuj in em̦m̦akũt jãn m̦weo im̦õn raan eo wõt im etetal 500 m̦ail̦ ippãn armej eo ejjab lukkuun jel̦ã kajjien. (Jenesis 24:50-58) Rebeka ear kam̦oole an kar kõnnaan. Ear juon kõrã ekanooj in em̦m̦an ñan Aisak im ear juon eo etiljek an jerbal ñan Anij. Jãn iien in m̦aanl̦o̦k, Rebeka ear juon ruwamãejet ej jokwe ilo em̦ nuknuk ilo Ãnen Kallim̦ur eo. Anij ear kajeraam̦m̦ane kõn an kar tiljek im m̦ool ñan men eo ear ba enaaj kõm̦m̦ane. Ta jeraam̦m̦an eo? Ej bwe Jijej Kũraij, eo ej Ine eo kar kallim̦ur kake ear itok jãn menmenbwij eo an.—Hibru 11:9, 13.
9. Ewi wãween an kar Rut tiljek ñan naan ko an?
9 “Jaab, kõmij iwõj ippam̦ wõj ñan ippãn armej ro am̦.” (Rut 1:10, UBS) Rut im Orpa ruo kõrã jãn Moab me ejako l̦õm̦aro pãleer rekabde ba naan kein ñan Neomai, kõrã eo jinen kar l̦õm̦aro pãleer. Neomai ear pojak in ilo̦k jãn aelõñ in Moab im jepl̦aak ñan Betleem, ijo kapijukunen. Ear akwel̦ap ñan erro bwe ren ro̦o̦l im tokãlik Orpa ear ro̦o̦l ak Rut ear pãd wõt ippãn. Rut ear tiljek wõt ñan naan ko an. (Riit Rut 1:16, 17.) Ear tiljek ñan Neomai im pãd wõt ippãn meñe men in ear mel̦el̦ein bwe eban bar loe baam̦le eo an im enaaj jako an bar pãd ilo kabuñ eo eriab an Ri Moab. Rut ear kabuñ ñan Jeova ilo aolepen mour eo an m̦aanl̦o̦k im Jeova ear kajeraam̦m̦ane. Ta jeraam̦m̦an eo? Eokwe, Rut ej juon iaan kõrã ro l̦alem me Matu ear je bwe Kũraij ear itok jãn menmenbwij eo aer.—Matu 1:1, 3, 5, 16.
10. Etke em̦m̦an joñak eo an Aiseia ñan kõj?
10 “Ña e; Kwõn jilkinl̦o̦k eõ.” (Aiseia 6:8) M̦okta jãn an kar Aiseia ba naan kein, ear lo juon visõn ekanooj em̦m̦an jãn Jeova. Ej loe an Jeova jijet ioon tũroon eo An. Im ilo lukwal̦penl̦o̦k visõn in, Aiseia ear roñ an Jeova ba: “Wõn eo In jilkinl̦o̦k e, im wõn eo ekõn̦aan ilo̦k kõn Kõm?” Jeova ear kajjitõk bwe juon en ilo̦k im kwal̦o̦k ennaan eo An ñan armej ro an me rejjab pokake. Ke Aiseia ej ba, “Ña e; Kwõn jilkinl̦o̦k eõ” ej ãinwõt ñe ear ba, “Aet, inaaj etal im kõm̦m̦ane jerbal eo kwõj letok.” Aiseia ear kam̦ool an kõnnaan kõnke ear kõm̦m̦ane men eo ear ba enaaj kõm̦m̦ane. Innem, Aiseia ear kanaan elõñl̦o̦k jãn 46 iiõ bwe Anij enaaj kaje armej ro An rejjab pokake. Im ear bar kanaan bwe tokãlik Anij enaaj bar kajepl̦aaktok er ñan jikin eo ekõn̦aan bwe ren pãd ie im kabuñ ñan E.
11. (1) Etke eaorõk bwe jen kam̦oole men ko jej ba jenaaj kõm̦m̦ani? (2) Wõn ro me waanjoñak ko aer rej kein kakkõl ñan kõj?
11 Etke Jeova ear kõn̦aan bwe waanjoñak kein ren pãd ilo Baibõl̦? Ewi joñan an aorõk bwe jen kam̦oole men ko jej kallim̦ur kaki bwe jenaaj kõm̦m̦ani? Baibõl̦ ej ba bwe armej eo me ejjab m̦õn̦õn̦õ in ‘kõjparok kallim̦ur ko an’ ej “dien mej.” (Rom 1:31, 32, UBS) Jet iaan ro im rar jab kam̦ool aer kõnnaan ej Pero jãn Ijipt, Kiiñ Zedekaia jãn Juda, Ananaias im Sappaira. Kõn men in, er aolep rar lo jorrããn. Waanjoñak ko aer rej kein kakkõl ñan kõj.—Exodus 9:27, 28, 34, 35, UBS; Ezekiel 17:13-15, 19, 20, UBS; Jerbal 5:1-10, UBS.
12. Ta eo enaaj jipañ kõj ñan kajejjet ad kõnnaan?
12 Jej mour ilo “raan ko ãliktata,” kõn men in, jej mour ibwiljin armej ro me rejjab tiljek ak rej “riab.” Bareinwõt, armej rej ba bwe rej kijejeto im jerbal ñan Anij ak ilo m̦ool rejjab. (2 Timote 3:1-5) Jen kate kõj ñan jab aetõl armej rot rein. Ak jen kobal̦o̦k wõt ippãn ro me rej kate er aolep iien ñan kajejjet aer kõnnaan.—Hibru 10:24, 25.
KALLIM̦UR EO AM̦ EAORÕKTATA
13. Ta kallim̦ur eo eaorõktata me rũkal̦oor ro an Jijej Kũraij rej kõm̦m̦ane?
13 Kallim̦ur eo eaorõktata ej kallim̦ur eo me jej ajel̦o̦k kõj make ñan Anij. Ewõr jilu iien ko rej kwal̦o̦k kajjitõk ko ñan ro rekõn̦aan erom rũkal̦ooran Jijej ñan lale el̦aññe relukkuun kõn̦aan kõm̦m̦ane men ko rej aikuj kõm̦m̦ani. (Matu 16:24) Kein kajuon, ñe ruo em̦m̦aan ro rej lale eklejia rej kõnono ippãn juon eo ekõn̦aan erom ri kwal̦o̦k, rej kwal̦o̦k kajjitõk in ñan e, “Kwõlukkuun kõn̦aan ke bwe kwõn juon Ri Kõnnaan ro an Jeova?” Kein karuo, ñe armej in ej kõm̦m̦an wõnm̦aanl̦o̦k im ekõn̦aan peptaij, rej kwal̦o̦k kajjitõk in ñan e, “Em̦õj ke am̦ ajel̦o̦k mour eo am̦ ñan Jeova ilo jar?” Kein kajilu, ilo iien eo rej kwal̦o̦k katak eo kõn peptaij, ri kõnono eo ej kajjitõk ippãn ro rej pojak in peptaij, “Ikijjeen katok in mour eo an Jijej Kũraij, em̦õj ke am̦ ukel̦o̦k jãn jerawiwi ko am̦ im ajel̦o̦k eok make ñan Jeova bwe kwõnaaj kõm̦anm̦an ankilaan?” Innem, rein rej uwaak im ba “Aet,” im̦aan aolep ro rej pãd ilo iien in. Mel̦el̦ein uwaak in aer ej bwe rej kaalikkar ñan aolep bwe em̦õj aer kar kallim̦ur bwe renaaj jerbal ñan Anij ñan indeeo.
14. Ta kajjitõk ko jen kajjitõkin kõj kaki aolep iien?
14 Jekdo̦o̦n ñe kwõj juon eo im ej kab peptaij ak juon eo me eto an karejar ñan Anij, kwõmaroñ kajjitõkin eok make aolep iien im ba: ‘Ij ke wõnm̦aanl̦o̦k wõt im kajejjete men eo iar kallim̦uri Jeova kake ãinwõt kar Jijej? Ij ke likũt wõt bwe jerbal in kwal̦o̦k naan im kõm̦m̦an rũkal̦oor ren jerbal ko raorõktata ilo mour e aõ ãinwõt an kar Jijej jiroñ kõj ñan kõm̦m̦ane?’—Riit 2 Korint 13:5.
15. Ta kallim̦ur ko jet raorõk jej aikuj bar m̦ool ñani im kajejjeti?
15 Ñan ad maroñ kajejjete wõt kallim̦ur eo ad ñan Anij, jej aikuj bar m̦ool ilo ad kajejjete kallim̦ur ko jet ad me raorõk. Ñan waanjoñak, ñe em̦õj am̦ m̦are, kwõn kajejjete wõt kallim̦ur eo kwaar kõm̦m̦ane bwe kwõnaaj yokwe im kaorõk wõt eo kwaar m̦areiki. Ñe kwaar kõm̦m̦an kon̦ ilo juon peejnej, eokwe kwõn kõm̦m̦an ekkar ñan am̦ kar kallim̦ur. Ñe kwaar jaini juon peba ilo eklejia eo ak ilo doulul in kõn juon eddo ak jerbal, eokwe kwõn m̦ool ñan men eo kwaar ba kwõnaaj kõm̦m̦ane. Ak ta el̦aññe juon eo ejjab lukkuun m̦weiie ej kũr eok ñan kõjota ippãn im kwõj ba aet ak tokãlik ebar wõr juon ekõn̦aan kõjota ippam̦ im armej in ejaadin m̦weiie? Eokwe, em̦õj am̦ ba aet ñan eo m̦oktal̦o̦k, kõn men in, kwõn kam̦ool am̦ kar uwaak. Bareinwõt, ñe kwaar kwal̦o̦k naan ñan juon armej im kwaar ba bwe kwõnaaj bar jepl̦aak ippãn, kwõn kam̦ool am̦ kar kõnnaan. Kwõn jepl̦aak ãinwõt am̦ kar ba. Jeova enaaj kajeraam̦m̦an eok ilo am̦ kwal̦o̦k naan.—Riit Luk 16:10.
JIJEJ EO EJ IROOJ IM BŨRIJ EO AD EL̦AP ENAAJ JIPAÑ KÕJ
16. Ta eo jen kõm̦m̦ane ñe jaar likjab in kajejjete men eo jaar kallim̦ur bwe jenaaj kõm̦m̦ane?
16 Baibõl̦ ej ba bwe kõn ad jab weeppãn, “emmakijkij ad bõd” ak kõm̦m̦an bõd el̦aptata ilo ad kõnnaan. (Jemes 3:2, UBS) Ta eo jen kõm̦m̦ane ñe jej kile bwe jaar likjab in kajejjete men eo jaar kallim̦ur bwe jenaaj kõm̦m̦ane? Ilo kar Kien eo an Anij ñan Ri Israel ro, ñe juon armej ejjab kajejjete men ko ej ba, kar kwal̦o̦k tũriam̦o ñan e. (Livitikõs 5:4-7, 11) Ãindein kõj raan kein, jej bar bõk tũriam̦o ak jeorl̦o̦k bõd ñe jej likjab in kajejjete kallim̦ur ko jaar kõm̦m̦ani. Ñe jej kwal̦o̦k ñan Jeova bwe jaar likjab in kam̦oole kallim̦ur ko ad, innem enaaj kwal̦o̦k tũriam̦o im jeorl̦o̦k ad bõd. Bũrij eo ad el̦ap Jijej Kũraij enaaj jipañ kõj bwe Jeova en bar m̦õn̦õn̦õ ak buñbũruon ippãd. (1 Jon 2:1, 2) Bwe Jeova en wõnm̦aanl̦o̦k im m̦õn̦õn̦õ ippãd, jej aikuj m̦ool ad ukel̦o̦k jãn bõd eo jaar kõm̦m̦ane. Ewi wãween jemaroñ kõm̦m̦ane men in? Jen kõjparok bwe en jab juon ad m̦anit ñan rupe kallim̦ur ko jej kõm̦m̦ani im jen lukkuun kate kõj ñan kõm̦adm̦õde apañ ko rar wal̦o̦k itok wõt jãn ad jab kajejjete naan ko ad. (Jabõn Kõnnaan 6:2, 3, UBS) Elukkuun aorõk bwe jen l̦õmn̦ak m̦okta jãn ad kõm̦m̦ane juon kallim̦ur me jemaroñ jab kajejjete.—Riit Ekklisiastis 5:2, UBS.
17, 18. Ta ilju im jekl̦aj eo an ro rej kate wõt er ñan kajejjete aer kõnnaan?
17 Ekanooj in em̦m̦an ilju im jekl̦aj eo an ro me rej kate wõt er bwe en m̦ool aer kõnnaan. Ri kapit ro 144,000 renaaj bõk juon mour ejjab wabanban ñan indeeo ilañ, ijo im renaaj irooj ak tõl ippãn Jijej ium̦win 1,000 iiõ. (Revelesõn 20:6) Enaaj bar lõñ milien armej ro renaaj mour ilo Pedetaij eo ijin ilal̦. Ilo iien eo Kũraij enaaj tõl ilo Aelõñ eo an Anij, e im ro renaaj tõl ippãn renaaj jipañ armej ro bwe en weeppãn mour ko aer ekoba l̦õmn̦ak ko aer.—Revelesõn 21:3-5.
18 Ilo jem̦l̦o̦kin an naaj Jijej tõl, enaaj wal̦o̦k mãlejjoñ eo ãliktata. Ro wõt me renaaj tiljek renaaj mour wõt ilo Pedetaij. Im aolep renaaj lõke doon. (Revelesõn 20:7-10) Aolep men ko rej ba renaaj kõm̦m̦ani renaaj kajejjeti kõnke renaaj l̦oore Jeova, Anij eo aer el̦ap an yokwe. E ej “Anij in m̦ool.”—Sam 31:5.
[Kajitõk ko ñan katak]
[Caption ilo page 29]
Jãn ke Jijej ear peptaij ñan iien eo ear mej, ear kajejjete aolep kallim̦ur ko an
[Caption ilo page 31]
Kwõj ke kajejjete kallim̦ur eo am̦ eaorõktata?
