Jerbal ko Rejjab Jim̦we Reban Wal̦o̦k ñan Indeeo!

“Kwõn kõttar Jeova im kõjparok ial̦ eo An . . . Ñe bukwel̦o̦k ro ri nana kwõnaaj loe.”​​—SAM 37:⁠34.

KWÕJ ke l̦õmn̦ak im ekkõl ñe eban jem̦l̦o̦k an wal̦o̦k jerbal ko rejjab jim̦we im m̦ool ãinwõt an elõñ armej ba? El̦aññe aet, eokwe jemel̦el̦e unin am̦ bõk l̦õmn̦ak in. Jãn iien ko etto ñan kiiõ, armej rar kajjioñ in kajutak elõñ kain kien ko. Bõtab, kien kein rejañin lo tõprak ñan kajem̦l̦o̦k an wal̦o̦k jerbal ko rejjab jim̦we im m̦ool. Ewõr ke juon iien me jemaroñ kõjatdikdik kake bwe aolep armej renaaj m̦ool aer jerbal ñan doon?

Ekam̦õn̦õn̦õ ñan jel̦ã bwe uwaak eo ilo Baibõl̦ ñan kajjitõk in ej aet! Baibõl̦ ej kwal̦o̦k bwe m̦õttan wõt jidik Anij enaaj kajem̦l̦o̦k an wal̦o̦k aolep jerbal ko rejjab m̦ool im jim̦we ilo lal̦ in. Ewi wãween an naaj kõm̦m̦ane men in? Eokwe, enaaj kõjerbale Aelõñ ak Kien eo an ilañ bwe en kõm̦m̦an oktak ko rel̦l̦ap ilo lal̦ in. Eñin ejja Kien eo wõt me Jijej ear katakin rũkal̦oor ro an bwe ren jar kake. Jet iien armej rej n̦aetan jar in, Jar eo an Irooj. Jijej ear ba ilo jar in: ‘En itok Am̦ aelõñ. Ren kõm̦anm̦an ankil Am̦ ioon lal̦.’​—Matu 6:⁠10.

Baibõl̦ ear kanaan kõn Jijej Kũraij eo ej Irooj eo an Kien in. Ej ba: “Ej lo̦mo̦o̦ren ro ri jeram̦õl ñe rej kũr ñane, kab ro ri aikuj im rejool. Ej tũriam̦okake ro rem̦õjn̦o̦ im ro rejeram̦õl; Ej lo̦mo̦o̦ren ro ri aikuj. Ej lo̦mo̦o̦ren er jãn ro relãj rej kaeñtaan er.” (Sam 72:​12-14, UBS) Ilo eoon kein jemaroñ lo bwe Jijej ej tũriam̦okake ro me rej eñtaan im jorrããn kõn an jab jim̦we im m̦ool an armej jerbal. Ejjab men in wõt, ak enaaj jol̦o̦k men kein renana me rej wal̦o̦k! Men in el̦ap an kaenõm̦m̦an kõj!

Jijej, eo el̦ap an tũriam̦o im kajoor enaaj tõl ilo Kien eo an Anij. Im ikijjeen tõl eo an, enaaj karreoiki lal̦ in jãn jerbal ko rejjab jim̦we im m̦ool. Ewi wãween? Ilo an naaj jol̦o̦k men ko jilu me rej wũnjãn jerbal ko rejjab jim̦we.

Jejjab Weeppãn

Rainin, kõj aolep jej aikuj kate kõj ñan jum̦ae kõn̦aan ko ad renana me rej wal̦o̦k kõn ad jab weeppãn. Kõn̦aan kein renana rej kõm̦m̦an bwe jen l̦õmn̦ak wõt kõn kõj make. (Rom 7:​21-​23) Meñe ãindein, ewõr ro rem̦m̦an me rekõn̦aan kõm̦m̦ani men ko rejim̦we. Rein rej jerbale tõmak eo aer ilo katok in mour eo an Jijej im tokjãn men in rej bõk jeorl̦o̦k bõd kõn men ko renana rekar kõm̦m̦ani. * (Lale kõmel̦el̦e eo itulal̦.) (1 Jon 1:​7, 9) Armej rot rein Anij ej yokwe er im renaaj lo jeraam̦m̦an jãn yokwe in an. Ilo Jon 3:16 (UBS) ej ba: “Bwe joñan an Anij yokwe lal̦,  ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.”

Anij enaaj kõm̦m̦ani men ko rekanooj in em̦m̦an ñan ro im rej tiljek im m̦ool. Ilo naaj jukjuk im pãd eo ekããl, enaaj jol̦o̦k an rein jerawiwi ak jab weeppãn. Jidik kõn jidik rein retiljek renaaj weeppãn im wãnõk im̦aan mejãn Anij. (Aiseia 26:9; 2 Piter 3:​13) Ilo iien in, ejjel̦o̦k juon enaaj jerbal ilo jab jim̦we im jab m̦ool kõnke renaaj aolep weeppãn. Ium̦win tõl eo an Kien eo an Anij, enaaj jako an ro retiljek ‘ri kam̦akoko ñan m̦anit ko renana.’​—2 Piter 2:​19, UBS.

Kapo ko jãn Armej ro Jej Mour Ibwiljier

Ekabũrom̦õjm̦õj bwe elõñ armej rainin rekõn̦aan kajorrããn ro jet. Rejjab m̦ool aer jerbal ñan ro rettã ak ro rejeram̦õl im rej kapo ro jet bwe ren bar kõm̦m̦ani jerbal ko rejjab jim̦we im m̦ool. Baibõl̦ ej kakapilõk armej rot rein ilo an ba: “Ro ri nana ren oktak jãn wãween mour ko aer im bareinwõt jãn l̦õmn̦ak ko aer.” El̦aññe rein rej ukel̦o̦k im jab bar kõm̦m̦ani jerbal ko rejjab m̦ool, Baibõl̦ ej kallim̦ur bwe Anij enaaj ‘jeorlok aer bõd.’​—Aiseia 55:​7, UBS.

Bõtab, ñe armej ro remakoko in oktak jãn jerbal ko aer renana, eokwe Anij enaaj aikuj in jol̦o̦k er. Kien eo an Anij enaaj kajejjet kallim̦ur eo ilo Baibõl̦ me ej ba: “Kwõn kõttar Jeova im kõjparok ial̦ eo An.  . . Ñe bukwel̦o̦k ro ri nana kwõnaaj loe.” * (Lale kõmel̦el̦e eo itulal̦.) (Sam 37:​34) Innem, ilo iien in me enaaj jako ri nana ro me rar jab kõn̦aan oktak, ri karejar ro retiljek an Anij reban bar iioon eñtaan im jorrããn jãn jerbal ko rejjab jim̦we im m̦ool.

Kapo ko jãn Setan Tepil̦

Eo el̦aptata an nana iaan aolep ri nana ro ej Setan Tepil̦. El̦ap ad kam̦m̦oolol Jeova bwe m̦õttan jidik enaaj kalbuuji Setan. Kõn men in, eban maroñ kapoik armej ro. Innem, ri nana in im elukkuun lãj eban bar kapoik armej ro ñan jerbal ko rejjab jim̦we im m̦ool kõnke tokãlik Anij enaaj jol̦o̦ke.

Bõlen l̦õmn̦ak eo bwe Anij enaaj jol̦o̦k aolep men ko rej wũnjãn jerbal ko rejjab jim̦we ej juon l̦õmn̦ak bajjek im kwõj ba ejjab m̦ool. Bõlen kwõj l̦õmn̦ak, ‘Anij enaaj ke lukkuun kõm̦m̦ani men kein? El̦aññe enaaj, eokwe etke ejjañin kõm̦m̦ani?’ Kajjitõk kein rem̦m̦an im Baibõl̦ ej letok uwaak ko me renaaj kajubũruod. * (Lale kõmel̦el̦e eo itulal̦.) Kõmij rõjañ eok ñan etale ta eo Baibõl̦ ej katakin kõj kake kõn raan ko rej pãd im̦aan ñe aolep jerbal ko rejjab jim̦we renaaj jako ñan indeeo.

[Kamelele ko itulal]