“Kwõn Katakin Eõ bwe In Kõm̦m̦an Ankilaam̦”

“Kwe wõt aõ Anij; Kwõn katakin eõ bwe in kõm̦m̦an ankilaam̦.”​​—SAM 143:​10, UBS.

JOUJ IM UWAAK:

Ta ko Devid ear kõm̦m̦ani im rej kaalikkar bwe l̦õmn̦ak ko an rar ãinwõt l̦õmn̦ak ko an Jeova?

Etke Devid ear jel̦ã ta ko Anij ear kõn̦aan bwe en kõm̦m̦ani?

Ta ko jen kõm̦m̦ani bwe Anij en m̦õn̦õn̦õ wõt ippãd?

1, 2. Ñe jejel̦ã ta eo Anij ekõn̦aan bwe jen kõm̦m̦ane, men in enaaj jipañ kõj ñan ta? Ewi wãween joñak eo an Kiiñ Devid emaroñ jipañ kõj?

 JEN ba bwe kwõj pãd ilo juon jikin kwõjjab jiniete im ilo jem̦l̦o̦kin l̦o̦k ijo kwõj etetal ie ewõr ruo ial̦ ko. Juon ial̦ ej ñan niñeañ im ial̦ eo juon ej ñan rõkeañ. Kiiõ, ial̦ ta eo kwõj aikuj bõke? Eokwe, kwõmaroñ kajjitõk ippãn juon eo ejiniete jikin eo bwe en jipañ eok. Ãindeinl̦o̦k wõt, ñe jej itõn kõm̦m̦ane juon pepe eaorõk, jej aikuj kajjitõk jipañ jãn Jeova kõnke ejel̦ã kõn men otemjej. Ñe jejel̦ã ankilaan Anij ak ta eo ekõn̦aan bwe jen kõm̦m̦ane, jenaaj etal ilo ial̦ eo ejim̦we me ekõn̦aan bwe jen etal ie l̦o̦k.​—Aiseia 30:⁠21.

² Ilo enañin aolepen mour eo an Kiiñ Devid, ear kate bwe l̦õmn̦ak ko an ren ãinwõt l̦õmn̦ak ko an Anij. Eñin unin Devid ear kõm̦m̦ani men ko rej ankilaan Anij. Devid ear karejar ñan Jeova kõn aolepen bũruon. Ilo katak in, jenaaj katak kõn ta ko Devid ear kõm̦m̦ani ke ear iiooni apañ ko im ewi wãween jemaroñ l̦oore joñak in an.​—1 Kiiñ 11:⁠4.

DEVID EAR KAORÕKE ETAN ANIJ

3, 4. (1) Etke Devid ear l̦õmn̦ak bwe emaroñ jum̦ae Golaiat? (2) Ta l̦õmn̦ak eo an Devid kõn etan Anij?

³ Ke Devid ear likao, ear etal im jum̦ae Ri Pilistia eo etan Golaiat. Etke Devid ear l̦õmn̦ak bwe emaroñ jum̦ae ri inea in me eaitokl̦o̦k jãn 9 ne im elõñ kein tarin̦ae ko ippãn? (1 Samuel 17:⁠4) Em̦ool bwe Devid ear peran im el̦ap an kar tõmak ilo Anij. Bõtab, unin an kar Devid l̦õmn̦ak bwe emaroñ jum̦ae Golaiat ej kõnke ear lukkuun kautiej Jeova im kaorõke Etan. Eñin unin el̦ap an kar Devid illu ke Golaiat ear kananaik armej ro doon Anij. Devid ear ba: “Wõn Ri Pilistia in e jab m̦wijm̦wij, bwe en kananaik jar in tarin̦ae ko an Anij e mour?”​—1 Samuel 17:⁠26.

⁴ Ke Devid ear wõnm̦aik Golaiat ear ba ñan e: “Kwõj itok ñan ippa, im ewõr am̦ jãje, im m̦ade, im m̦ade jol̦o̦k; a ña ij iwõj ilo etan Jeova an inelep eo, eo Anij an jar in tarin̦ae ko  an Israel, Eo kwaar kananaik E.” (1 Samuel 17:​45) Devid ear lõke bwe Anij eo em̦ool enaaj jipañe. Kõn men in, ear buwate Golaiat kõn juon wõt dekã im ekajju mej. Aolep iien Devid ear lõke bwe Jeova enaaj jipañ e im ear lukkuun kaorõk ãt eo ekwõjarjar etan Anij. Bareinwõt, Devid ear ba ñan Ri Israel ro jet bwe ren “kõmmejãje” kõn etan Anij, Jeova.​—Riit 1 Kronikel 16:​8-10.

5. Ta ko kwõj aikuj kõm̦m̦ani ñe armej ro rej kananaik Jeova ãinwõt kar Golaiat?

⁵ Kwõj ke m̦õn̦õn̦õ in kwal̦o̦k ñan ro jet bwe Jeova ej Anij eo am̦? (Jeremaia 9:​24) Jet iien armej ro rej kananaik Jeova im kajjirere kake Ri Kõnnaan ro an ãinwõt kar Golaiat. El̦aññe ro nukũm̦, ro kwõj jerbal ak jikuul̦ ippãer, im ro ilo bukwõn eo am̦ rej kõm̦m̦ane men in, ta eo kwõj kõm̦m̦ane? Kwõj ke jojomare etan Anij im lõke bwe enaaj jipañ eok? Meñe jet iien jej aikuj “ikõñ,” bõtab jen jab jook in kaalikkar bwe jej Ri Kõnnaan ro an Jeova im rũkal̦oor ro an Jijej. (Ekklisiastis 3:​1, 7; Mark 8:​38) Jej aikuj kwal̦o̦k jouj im jel̦ã m̦anit ñe jej kwal̦o̦k naan ñan armej ro me rejjab kõn̦aan roñjake. Bõtab, jen jab ãinwõt Ri Israel ro me rar “lõl̦ño̦ñ im kanooj mijak” naan ko an Golaiat. (1 Samuel 17:​11) En m̦õkaj ad jojomare Jeova im jen kaalikkar bwe jej kaorõke ãt eo ekwõjarjar etan. Jekõn̦aan bwe armej ro ren jel̦ã kajjien Jeova im kain Anij rot e. Eñin unin jej kõjerbal Baibõl̦ ñan jipañ armej ro kile aorõkin aer epaake Anij ak ruwaakl̦o̦k ñan e.​—Jemes 4:⁠8.

6. Ta eo ear l̦apl̦o̦k an aorõk ippãn Devid im ej unin an kar jum̦ae Golaiat? Ta eo ej aikuj aorõktata ñan kõj?

⁶ Jemaroñ katak bar juon men jãn bwebwenato in kõn Devid im Golaiat. Devid ear ettõrl̦o̦k ñan jikin tarin̦ae eo im ear kajjitõk: “Renaaj et ñan armej eo ej m̦an Ri Pilistia en̦, im bõkl̦o̦k men in kajjookok eo jãn Israel?” Armej ro rar uwaake im ba bwe ‘kiiñ eo enaaj kanooj kam̦m̦weiukiuk e im lel̦o̦k lio nejin’ ñan eo me enaaj m̦ane Golaiat. (1 Samuel 17:​25-27) Bõtab, Devid ear jab kõn̦aan bõk wõt jeraam̦m̦an kein jãn kiiñ eo. Ear wõr juon men me ear l̦apl̦o̦k an aorõk ippãn Devid. Ta in? Ej bwe en nõbare Anij eo em̦ool. (Riit 1 Samuel 17:​46, 47.) Ak ta kõn kõj? Ta men eo eaorõktata ñan kõj? Jej ke l̦õmn̦ak wõt kõn wãween ko me jemaroñ buñbuñ ippãn ro jet? Jej ke kate kõj bwe en lõñ ad jããn im bwe ro jet ren kautiej kõj? Jen jaab ãindein. Jen kajjioñe Devid ke ear al im ba: “Kom̦win rejetak eõ im kwal̦o̦k an Irooj utiej; Jen jim̦or nõbar etan.” (Sam 34:​3, UBS) Jej aikuj lõke bwe Anij enaaj jipañ kõj. Men eo eaorõktata ej bwe jen lel̦o̦k nõbar ñan etan Anij im kautiej e im jab kõj make.​—Matu 6:⁠9.

7. Ta eo jen kõm̦m̦ane ñan an kajoorl̦o̦k tõmak eo ad bwe jen kwal̦o̦k naan wõt meñe armej ro rejjab m̦õn̦õn̦õ in roñjake?

⁷ Bwe Devid en peran im jum̦ae Golaiat, ear aikuj lukkuun tõmak im lõke bwe Jeova enaaj jipañe. Ilo iien ko ke Devid ear likao im ear lale jiip ko nejin jemen, ear reil̦o̦k ñan Jeova aolep raan bwe en jipañe. Kõn an kar imminene in kõm̦m̦ane men in, ear kajoor tõmak eo an. (1 Samuel 17:​34-37) Jej aikuj bar lukkuun tõmak im lõke bwe Jeova enaaj jipañ kõj. Ñe ekajoor tõmak eo ad, men in enaaj jipañ kõj ñan wõnm̦aanl̦o̦k wõt im kwal̦o̦k naan meñe armej ro rejjab m̦õn̦õn̦õ in roñjake. Ta eo jemaroñ kõm̦m̦ane bwe en kajoorl̦o̦k ad tõmak ilo Anij? Eokwe, jen reil̦o̦k ñan E aolep raan im lõke bwe enaaj jipañ kõj ilo aolep men ko jej kõm̦m̦ani. Ñan waanjoñak, ñe jej uwe ilo tããkji ak baj, jen bwebwenato ippãn armej ro ie kõn Baibõl̦. Bareinwõt, ñe jej kwal̦o̦k naan jãn em̦ ñan em̦ jej aikuj bwebwenato kõn Baibõl̦ ippãn armej ro me rej pãd iturin ial̦ ko.​​—Jerbal 20:​20, 21.

KÕN̦AAN KO AN ANIJ RAR AORÕKTATA IPPÃN DEVID

8, 9. Ilo iien ko Saul ear kajjioñ in m̦ane Devid, ta ko Devid ear kõm̦m̦ani me ej kaalikkar bwe kõn̦aan eo an Jeova ear aorõktata ippãn?

⁸ Devid ear kaalikkar bwe ear lõke Jeova ilo bar juon wãween. Ear errã ilo l̦õmn̦ak ko an Jeova kõn Saul, kiiñ eo m̦oktata an Ri Israel ro. Saul ear lukkuun ebanbane Devid im jilu alen ear kajjioñ in kõrraje kõn m̦ade. Bõtab ilo iien kein jilu, Devid ear jeer jãni im ear jab idenon̦e ak lel̦o̦k  pein ñan kiiñ eo. Tokãlik, Devid ear aikuj in ko jãn Saul. (1 Samuel 18:​7-11, UBS; 19:​10, UBS) Kõn men in, Saul ear kããlõt 3,000 em̦m̦aan jãn ibwiljin Ri Israel ro bwe ren aolep etal im pukote Devid ilo ãne jem̦aden. (1 Samuel 24:⁠2) Juon raan, Saul ear del̦o̦ñe juon roñ in tol̦ me Devid im ro m̦õttan rar kũttiliek ie. Em̦õj an Anij ba kadede bwe Devid enaaj kiiñ ãlikin Saul. Kõn men in, Devid emaroñ kar l̦õmn̦ak bwe epel̦l̦o̦k iien in ñan an m̦ane Saul. (1 Samuel 16:​1, 13) Ro m̦õttan Devid rar bar rõjañe bwe en m̦ane Saul. Bõtab, Devid ear ba: “Irooj en bõbrae aõ kõm̦m̦an jabdewõt menin jorrããn ñan ri utiej eo aõ, eo Irooj ear kããlõte bwe en kiiñ!” (Riit 1 Samuel 24:​4-7, UBS.) Jeova ekar kããlõte Saul im kapiti bwe en kiiñ im ejjañin kar jol̦o̦ke jãn an kiiñ ilo iien in. Eñin unin Devid ear jab kõn̦aan m̦ane Saul. Ak Devid ear m̦wijit wõt jidikin kopã eo an Saul. Men in ej kaalikkar bwe Devid ear jab l̦õmn̦ak in ko̦kkure Saul meñe emaroñ kar kõm̦m̦ane men in.​​—1 Samuel 24:⁠11.

⁹ Ilo iien eo ãliktata an kar Devid lo Saul, ear bar kwal̦o̦k kautiej ñane ãinwõt eo me Jeova ear kããlõte. Juon iien, Devid im Ebishai rar tõpar jikin eo me Saul ej kiki ie. Ebishai ear l̦õmn̦ak bwe Anij ear tõl erro ñan ijin bwe Devid en m̦ane Saul. Ebishai ear bar ba bwe emaroñ etal im m̦ane Saul kõn juon m̦ade. Bõtab, Devid ear bõbraiki. (1 Samuel 26:​8-11) Devid ear reil̦o̦k wõt ñan Jeova bwe en tõl e. Kõn men in, Devid ear jab kõn̦aan ko̦kkure eo me Jeova ear kããlõte bwe en kiiñ jekdo̦o̦n ta ko Ebishai ear ba.

10. Ta eo emaroñ pen ñan kõj? Ta eo jemaroñ kõm̦m̦ane bwe jen kõm̦anm̦an wõt ankilaan Jeova?

¹⁰ Jet armej remaroñ rõjañ kõj ñan kõm̦m̦ani men ko rej l̦õmn̦ak bwe enaaj em̦m̦an ñan kõj im ejjab men ko Jeova ekõn̦aan. Bareinwõt, remaroñ rõjañ kõj bwe jen kõm̦m̦ane juon pepe m̦okta jãn ad kõl̦mãnl̦o̦kjen̦ kõn ta eo Jeova ekõn̦aan bwe jen kõm̦m̦ane. Emaroñ pen ñan kõj ñe armej ro rej kõm̦m̦ane men kein. Eñin ej men eo me Ebishai ear kõm̦m̦ane ñan Devid. Ta eo jemaroñ kõm̦m̦ane bwe jen ãinwõt Devid im jab l̦oore wõt l̦õmn̦ak ko an armej ro? Eokwe, jej aikuj lukkuun mel̦el̦e kõn l̦õmn̦ak ko an Jeova im peek ilo bũruod bwe jen kõm̦m̦ane wõt men ko ekõn̦aan bwe jen kõm̦m̦ani.

11. Ta eo Devid ear kõm̦m̦ane ñan kaalikkar wõt bwe kõn̦aan ko an Anij raorõktata ippãn? Ta eo jemaroñ kõm̦m̦ane bwe jen ãinwõt Devid?

¹¹ Devid ear jar ñan Jeova im ba: “Kwõn katakin eõ bwe in kõm̦m̦an ankilaam̦.” (Riit Sam 143:​5, 8, 10, UBS.) Devid ear jab l̦oore l̦õmn̦ak ko an make im ear jab baj kõm̦m̦ani wõt men ko me ro jet rar kõn̦aan bwe en kõm̦m̦ani. Ear kõn̦aan bwe Anij en katakin e. Kõn men in, Devid ear ‘kõl̦mãnl̦o̦kjen̦ kõn men ko otemjej Jeova ear kõm̦m̦ani; im l̦õmn̦ak kõn jerbal ko an otemjej.’ Jemaroñ jel̦ã ta ko Anij ekõn̦aan bwe jen kõm̦m̦ani ãinwõt kar Devid. Ewi wãween? Ej ilo ad katak  Baibõl̦ im kõl̦mãnl̦o̦kjen̦ kõn wãween ko me Jeova ear tõl im jipañ armej ro ilo iien ko etto.

DEVID EAR MEL̦EL̦E KÕN UNIN AN WÕR KIEN KO

12, 13. Etke Devid ear lutõkl̦o̦k dãn eo me l̦õm̦aro m̦õttan rar lel̦o̦k ñane?

¹² Ebar wõr juon men jemaroñ katak jãn men ko me Devid ear kõm̦m̦ani. Ta in? Devid ear mel̦el̦e unin an kar Anij lel̦o̦k kien ko ñan er. Eñin unin ear mel̦el̦e kõn naan in tõl im kakapilõk ko an Anij im ear kõn̦aan l̦oori. Jemaroñ bar l̦oore joñak in an Devid. Naan in kakapilõk ko remaroñ jipañ kõj ñan kõm̦m̦ani pepe ko rem̦m̦an. Rej bar jipañ kõj ñan mel̦el̦e kõn l̦õmn̦ak ko an Jeova. Jenaaj jel̦ã kilen jerbale naan in kakapilõk ko ñe jej mel̦el̦e kõn unin an Jeova letok kien ko. Ñan waanjoñak, juon raan ke Devid ear maro ear ba bwe ear kõn̦aan ‘limen dãn jãn aebõj lal̦ eo ilo Betleem.’ Bõtab, Betleem ear pãd ium̦win kajoor eo an Ri Pilistia ro ilo tõre eo. Jilu iaan l̦õm̦aro m̦õttan Devid rar likũt mour ko aer ilo kauwõtata ke rar etal ñan Betleem im ebbõk limen Devid. Ak Devid ear m̦akoko in idaake dãn in im ear “lutõkl̦o̦k dãn eo” ñan Jeova. Ejaam̦ kõm̦m̦ane men in? Devid ear ba: “Ijjab maroñ ilim dãn in! Enaaj ãinwõt ñe iar ilim bõtõktõkin l̦õm̦aro rar likũt mour ko aer ilo kauwõtata.”​—1 Kronikel 11:​15-19, UBS.

¹³ Devid ear jel̦ã bwe Kien Moses ear kakien er bwe ren jab m̦õñã bõtõktõk ak ren lutõkl̦o̦ke ñan Jeova. Ear bareinwõt mel̦el̦e kõn unin an kar Anij lel̦o̦k kien in ñan er. Devid ear jel̦ã bwe “mour ej pãd ilo bõtõktõk.” Bõtab, men eo l̦õm̦aro m̦õttan Devid rar lel̦o̦k ñan e ej limen dãn im ejjab bõtõktõk. Innem, etke Devid ear m̦akoko in idaake dãn in? Ej kõnke ear jel̦ã taunin an kar Jeova lel̦o̦k kien eo kõn bõtõktõk im l̦õmn̦ak ko an rar ãinwõt Jeova. Devid ear jel̦ã bwe el̦ap an Jeova kaorõke bõtõktõk. L̦õm̦arein remaroñ kar mej kõn wõt aer etal im bõk dãn in. Kõn men in, Devid ear l̦õmn̦ak bwe el̦aññe ej idaake dãn in, ejjab kaalikkar bwe ej kaorõke bõtõktõkier ak mour ko aer. Eñin unin ear jab idaake dãn in ak ear lutõkl̦o̦k n̦a ioon bwidej.​—Livitikõs 17:​11, UBS; Duteronomi 12:​23, 24.

14. Ta ko ear jipañ Devid bwe en kõm̦m̦ani pepe ko me rar kabuñbũruon Jeova?

¹⁴ Ear lukkuun aorõk kien ko an Anij ilo mour eo an Devid. Ear al im ba: “O aõ Anij, el̦ap wõt aõ kõn̦aan kõm̦m̦an ankilaam̦! Ij dãpij wõt naan in katak ko am̦ ibũruõ.” (Sam 40:​8, UBS)  Devid ear katak kõn kien ko an Anij im ear kõl̦mãnl̦o̦kjen̦ kõn men kein. Ear tõmak bwe enaaj jeraam̦m̦an el̦aññe ej pokake kien kein an Jeova. Devid ear jab baj pokake kien ko ilo Kien Moses ak ear bareinwõt jerbale naan in kakapilõk ko me rar ekkejell̦o̦k ñan kien kein. Jej aikuj bar kõm̦m̦an ãindein. Ñe jej katak Baibõl̦, jen kõl̦mãnl̦o̦kjen̦ kõn mel̦el̦ein eoon ko. El̦aññe jej kõm̦m̦ane men in, jenaaj jel̦ã kilen jerbale naan in kakapilõk ko ilo mour ko ad. Jenaaj bareinwõt kõm̦m̦ani pepe ko me rej kabuñbũruon Jeova.

15. Ilo wãween et Solomon ear rupe kien ko an Anij?

¹⁵ Jeova ear lel̦o̦k elõñ jeraam̦m̦an ko ñan l̦eo nejin Devid etan Solomon. Bõtab tokãlik, Solomon ear rupe kien ko an Anij. Ñan waanjoñak, Jeova ear kakien bwe en jab lõñ pãleen kiiñ ro an Ri Israel ro. Ak Solomon ear jab pokake kien in. (Duteronomi 17:​17, UBS) Solomon ear pãleek elõñ kõrã ro jãn aelõñ ko jet. Ke ear rũttol̦o̦k im l̦al̦l̦ap, kõrã rein pãleen rar kareel e bwe en kabuñ ñan “anij ro jet.” Bõlen Solomon ear kõm̦m̦an elõñ jekpen kõn unin an kar jab pokake kien ko an Anij. Ak jekdo̦o̦n ta jekpen ko ear kõm̦m̦ani, jejel̦ã bwe ‘Solomon ear kõm̦m̦ane men eo enana im̦aan mejãn Jeova, im ear jab kanooj l̦oor Jeova, ãinwõt Devid jemen.’ (1 Kiiñ 11:​1-6) Jej aikuj pokake kien ko im naan in kakapilõk ko an Anij me jej katak ilo Baibõl̦! Ekanooj aorõk bwe jen kõm̦m̦ane men in ñe jej jino l̦õmn̦ak in kapok pãleed.

16. Ta eo jej katak jãn kien eo an Jeova ñan m̦are “ilo Irooj wõt”?

¹⁶ Jouj im l̦õmn̦ak kõn men in: Jen ba bwe juon armej me ejjab juon iaan Ri Kõnnaan ro an Jeova ej kwal̦o̦k bwe ekõn̦aan kwe. Kwõnaaj ta? Kwõnaaj ke ãinwõt Devid im l̦õmn̦ak kõn ta eo Anij ekõn̦aan bwe kwõn kõm̦m̦ane? Ke ta, kwõnaaj ãinwõt Solomon im kõjekdo̦o̦n kien ko an Jeova? Em̦õj an Jeova ba ñan ro me rej kabuñ ñan e bwe ren m̦are “ilo Irooj wõt.” (1 Korint 7:​39) Ta mel̦el̦ein men in? Mel̦el̦ein bwe ñe juon ekõn̦aan m̦are, en kããlõt eo wõt me ej juon iaan Ri Kõnnaan ro an Jeova. Kien in ej bar jipañ kõj mel̦el̦e bwe Jeova ejjab kõn̦aan bwe jen jerãik (date) ro me rejjab Ri Kõnnaan ro an. Eñin unin jeban m̦are ak pãleek juon eo me ejjab kabuñ ñan Jeova. Bareinwõt, jeban kõtl̦o̦k wõt an armej in kõm̦m̦ani men ko me emaroñ kareel kõj ñan kõn̦aan e.

17. Ta eo emaroñ jipañ kõj bwe jen jab alwõji pija ko rejekkar im rettoon?

¹⁷ Jen bar kõl̦mãnl̦o̦kjen̦ kõn joñak eo an Devid im wãween an kar kaorõk l̦õmn̦ak ko an Jeova. Men in emaroñ jipañ kõj ñan jum̦ae kõn̦aan eo ñan alwõj ak lale pija ko rettoon. Jouj im riiti eoon kein itulal̦. Ãlikin am̦ riiti, kõl̦mãnl̦o̦kjen̦ kõn ta mel̦el̦ein naan in kakapilõk ko ie. Innem, kate eok bwe kwõn kile l̦õmn̦ak im eñjake ko an Jeova kõn pija ko rejekkar im rettoon. (Riit Matu 5:​28, 29; Kolosse 3:​5, UBS.) Jen kõl̦mãnl̦o̦kjen̦ kõn kien ko rewãnõk an Jeova. Men in enaaj jipañ kõj bwe jen jab alwõj ak lale pija ko rejekkar im rettoon.

JEN KATE KÕJ BWE JEN L̦OORE L̦ÕMN̦AK KO AN ANIJ AOLEP IIEN

18, 19. (1) Meñe Devid ear jab weeppãn, etke Anij ear m̦õn̦õn̦õ wõt ippãn? (2) Ta ko kwõj peek ilo bũruom̦ ñan kõm̦m̦ani?

¹⁸ Devid ej juon joñak em̦m̦an, bõtab ear kõm̦m̦an elõñ bõd ko rel̦l̦ap. (2 Samuel 11:​2-4, 14, 15, 22-​27; 1 Kronikel 21:​1, 7) Meñe ãindein ak aolep iien ear ajl̦o̦k im bũrom̦õj kõn bõd ko ear kõm̦m̦ani. Kõn men in, ear jar jãn aolepen bũruon bwe Jeova en jol̦o̦k an bõd. Ear “jim̦we im wãnõk” bũruon Devid. Mel̦el̦ein bwe ear karejar ñan Anij kõn aolepen bũruon. (1 Kiiñ 9:⁠4) Jejaam̦ ba men in? Ej kõnke Devid ear kate wõt e bwe l̦õmn̦ak ko an ren ãinwõt l̦õmn̦ak ko an Jeova. Bareinwõt, ear kate wõt e bwe en kõm̦m̦ani men ko me Jeova ear buñbũruon kaki.

¹⁹ Meñe jejjab weeppãn ak Jeova emaroñ m̦õn̦õn̦õ wõt ippãd. Kõn men in, jen wõnm̦aanl̦o̦k wõt im katak kõn Naan in Anij. Bareinwõt, jen kõl̦mãnl̦o̦kjen̦ kõn ta ko jej katak jãni im jen m̦õkaj in jerbali. El̦aññe jej kõm̦m̦ani men kein, jenaaj ãinwõt ri jeje sam eo me ear kõttãik bũruon ñan Jeova im ba: “Kwõn katakin eõ bwe in kõm̦m̦an ankilaam̦.”

[Kajitõk ko ñan katak]

[Pija ilo peij 10]

Elõñ iien ear pel̦l̦o̦k ñan Devid bwe en m̦ane Saul ak ear jab kõm̦m̦ane men in. Etke?

[Pija ilo peij 11]

Ta eo jej ekkatak jãn an kar Devid m̦akoko in idaake dãn eo limen me l̦õm̦aro m̦õttan rar bõkl̦o̦k ñane?