Ebõd Ke ñan Kajjitõkin Anij kõn Abn̦õn̦õ ko Ad?

JET rej ba bwe ejjab jim̦we ñan ad kajjitõkin Anij kõn abn̦õn̦õ ko ad. Rej ba bwe jejjab kwal̦o̦k kautiej el̦aññe jej kajjitõk ippãn Anij etke ej kõtl̦o̦k bwe jet men ren wal̦o̦k im jet men ren jab wal̦o̦k. Ãindein ke am̦ bar l̦õmn̦ak?

El̦aññe ãindein am̦ l̦õmn̦ak, kwõnaaj bwilõñ ñe kwõj katak im lo bwe elõñ armej ro rem̦m̦an rar bõkm̦aantak kajjitõk im abn̦õn̦õ ko aer ñan Anij. Jen lale jet iaan kajjitõk ko me armej rein rar kajjitõk ippãn Anij:

Em̦m̦aan eo etiljek Job ear ba: “Etke Anij ej kõtl̦o̦k bwe ro ri nana ren mour? Etke ej kõtl̦o̦k bwe en to aer mour im jeraam̦m̦an?”​—Job 21:​7, UBS.

Ri kanaan eo etiljek Habakkuk ear ba: “Etke Kwõj likũt ro rej kõm̦m̦an menin m̦on̦ bwe ren pãd, im Kwõj ikõñ ke ro renana rej orañl̦o̦k ro rewãnõk jãn er?”​—Habakkuk 1:⁠13.

Jijej Kũraij ear ba: “Aõ Anij, Aõ Anij, etke Kwaar ilo̦k jãn Eõ?”​—Matu 27:⁠46.

El̦aññe jej riiti jebta ko me eoon kein rej itok jãni, kwõban lo bwe Jeova * Anij ear illu ke rein rar bõkm̦aantak kajjitõk rot kein. (Lale kõmel̦el̦e eo itulal̦.) Ejjab juon menin bwilõñ ke Anij ear kõtl̦o̦k bwe rein ren kwal̦o̦k kajjitõk rot kein. Ñan waanjoñak, Anij ejjab inepata ñe jej kajjitõk ippãn bwe en kabwe aikuj ko ad bwe jen maroñ ãjmour. Ej m̦õn̦õn̦õ in letok aikuj ko ad. (Matu 6:​11, 33) Bareinwõt, ej m̦õn̦õn̦õ in letok mel̦el̦e ko im remaroñ kaenõm̦m̦an bũruod im l̦õmn̦ak ko ad. (Pilippai 4:​6, 7) Ilo m̦ool, Jijej ear ba ñan rũkal̦oor ro an: “Kajjitõk, im naaj lewõj ñan kom̦.” (Matu 7:⁠7) El̦aññe jej riiti eoon ko jet iturin eoon in, jenaaj lo bwe Jijej ear jab baj kõnono wõt kõn an Anij naaj letok men ko jej aikuji, ak ear bar kõnono kõn an naaj uwaaki kajjitõk ko jej bũkm̦aantak.

El̦aññe kwõn kar kajjitõk juon kajjitõk ippãn Anij, ewi wõt iaan men kein kwõn kar kajjitõk ippãn kake?

● Ewõr ke unin aõ mour?

● Ta eo enaaj wal̦o̦k ñe imej?

● Etke kwõj kõtl̦o̦k bwe in eñtaan im bũrom̦õj?

Kõnke “jeje ko otemjej em̦õj letok kõn kakũrm̦ool an Anij,” ejjel̦o̦k pere bwe kwõnaaj lo uwaak ko jãn Anij ilo naan ko an ilo Baibõl̦. (2 Timote 3:​16) Jen lale etke jet rar bõkm̦aantak kajjitõk kein ilõñ im jen lale uwaak ko jãn Baibõl̦ ñan kajjitõk kein.

[Kamelele ko itulal]