Kajjitõk 2: Ta eo Enaaj Wal̦o̦k Ñe Imej?

KE ROMAN ear juon l̦addik jidikdik, ear mej juon iaan ro m̦õttan ilo juon wa me ear kũrããj. Roman ej ba: “Iar lukkuun mijak ke eo m̦õtta ear mej. Jãn wõt kar jorrããn in ear wal̦o̦k, iar kajjitõk ippa make ium̦win elõñ iiõ kõn ta eo ej wal̦o̦k ñan kõj ñe jej mej.”

Etke jet rej bõkm̦aantak kajjitõk in? Kõnke ejjel̦o̦k armej ekõn̦aan mej. Jekdo̦o̦n ñe jerũtto ak jedik, kõj aolep jejjab kõn̦aan mej. Eñin unin elõñ rej mijak kõn ta eo enaaj wal̦o̦k ñan er ñe remej.

Ta uwaak eo an jet kõn kajjitõk in? Elõñ rej tõmak bwe ñe juon armej ej mej aan ej mour m̦aanl̦o̦k wõt. Rej tõmak bwe armej ro rem̦m̦an renaaj etal ñan lañ, ak armej ro renana renaaj bwil im eñtaan ñan indeeo kõn jerawiwi ko aer. Ro jet rej ba bwe jem̦l̦o̦k eo an juon armej ej mej im ejjabto armej ro renaaj mel̦o̦kl̦o̦k er.

Ta eo uwaak kein an armej ro rej kaalikkare? Uwaak eo kein kajuon ej kaalikkar bwe ilo l̦õmn̦ak ko an armej ro, meñe juon armej ej mej ak ilo m̦ool ejjab lukkuun mej. Uwaak eo kein karuo ej kaalikkar bwe armej ro jet rej l̦õmn̦ak bwe ejjel̦o̦k unin ad mour bwe jenaaj baj mej wõt. Rein me rej l̦õmn̦ak bwe ejjel̦o̦k unin ad mour remaroñ bõk l̦õmn̦ak in: “Jen m̦õñã im idaak, bwe ilju jemej.”​—1 Korint 15:⁠32.

Ta eo Baibõl̦ ej ba? Baibõl̦ ejjab ba bwe ãlikin an juon armej mej aan ej mour m̦aanl̦o̦k wõt. Anij ear kõm̦akũt Kiiñ Solomon ñan je naan kein: “Ro remour rejel̦ã bwe renaaj mej; a ro remej ejjel̦o̦k aer jel̦ã.” (Ekklisiastis 9:⁠5) Ro me “ejjel̦o̦k aer jel̦ã” rejaje ta ko rej wal̦o̦k ipel̦aakier. Rejjab eñjake jabdewõt men im rejjab maroñ kõm̦m̦an jabdewõt. Innem, ro remej rejjab maroñ jipañ ak ko̦kkure ro remour.

Elõñ armej rej tõmak bwe ej ankilaan Anij mej. Ak ear jab pepe im karõk eo in an Anij bwe armej ro ren mej. Ear kõm̦anm̦an armej eo m̦oktata Adam bwe en mour  ñan indeeo ioon lal̦ in. Anij ear jiroñ Adam bwe enaaj mej ñe ejjab pokake. Eñin iien eo wõt me Anij make ear kõnono kõn mej. Ear kamo an Adam m̦õñã jãn leen juon wõt wõjke im ear kakkõl e bwe ñe enaaj m̦õñã jãne enaaj “mej otem mej.” (Jenesis 2:​17) El̦aññe Adam im Iv rar pokake, erro jim̦or ekoba aolep ro nejier me rar tiljek ñan Anij, renaaj kar mour ioon lal̦ in ñan indeeo.

Adam ear kããlõt ñan jab pokake naan in kakkõl eo an Anij. Ear jerawiwi ke ear jab pokake Anij. Innem ear mej. (Rom 6:​23) Ke Adam ear mej, aan ear jab mour m̦aanl̦o̦k wõt. Jãn an ãindein, Adam ear mej im jako. Anij ear ba ñan Adam: “Kõn menokadu in mejam̦ kwõnaaj m̦õñã ekkan, ñan iien eo kwõj jepl̦aak ñan bwidej, bwe ar bõk eok jãn e; bwe bwidej kwe, im ñan bwidej kwõnaaj jepl̦aak.” (Jenesis 3:​19) Kõnke aolep armej rar itok jãn Adam, jej jolõt jerawiwi im mej.​—Rom 5:⁠12.

Meñe Adam ear kããlõt ñan jab pokake, Anij enaaj kajejjet wõt Ankilaan jãn jinoin ñan kobrak lal̦ in kõn ro ineen Adam. (Jenesis 1:​28; Aiseia 55:​11) M̦õttan jidik, Jeova enaaj kõmour enañin aolep armej ro rar mej. Ikijjeen iien in, rijjelõk Paul ear ba: “Ro rem̦m̦an im ro renana, renaaj jerkak jãn mej.”​—Jerbal 24:​15, UBS.

Ñan kal̦apl̦o̦k am̦ mel̦el̦e kõn ta eo ej wal̦o̦k ñe juon ej mej, lale katak 6 ilo bok eo etan Katak ko Rem̦ool jãn Baibõl̦ Eo. Kwõmaroñ copy jãn Internet ilo www.pr418.com

[Kamelele in juõn pija ilo page 7]

Ta eo Jijej Ear Ba kõn Mej?

Jijej ear jab errã ippãn ri tõl in kabuñ ko ilo raan ko an me rar ba bwe ejjel̦o̦k jerkakpeje. (Luk 20:​27) Bareinwõt, ear jab katakin armej ro bwe ñe juon ej mej, aan ej mour m̦aanl̦o̦k wõt. Jãn an ãindein, Jijej ear katakin armej ro kõn men kein itulal̦.

Mej ej ãinwõt kiki. Ke ear mej l̦eo m̦õttan Jijej etan Lazerõs, ear ba: “Jerad Lazerõs ej kiki; a Ij ilo̦k bwe In ko̦ruj e jãn kiki.” Rũkal̦oor ro an Jijej rar jab mel̦el̦e kõn ta mel̦el̦ein naan kein an. Rar ba ñan e: “Irooj, el̦aññe ej kiki enaaj mour.” Bwebwenato in ilo Baibõl̦ ej kwal̦o̦k bwe “Jijej ej kõnono kõn an mej, a rej l̦õmn̦ak bwe Ear kõnono kõn kakkije ilo kiki.” Innem Jijej e ba ñan er ilo alikkar, “Lazerõs e mej.”​—Jon 11:​11-14.

Ro remej renaaj bar mour. Ke Jijej ear tõparl̦o̦k bukwõn eo an Lazerõs, ear kaenõm̦m̦ane Marta, lio jein im jatin Lazerõs ilo an ba: “Jeim̦ im jatim̦ m̦aan enaaj bar jerkak.” Innem Jijej ear kallim̦ur im ba: “Ña jerkakpeje eo im mour eo. Eo ej lõke Eõ, meñe e mej, enaaj bar mour.” Naan kein an Jijej rar jab naan bajjek. Jijej ear kõmour Lazerõs im̦aan mejãn armej ro meñe Lazerõs ear mej ium̦win emãn raan.​​—Jon 11:​23, 25, 38-​45.

Ilo kar visõn eo an rijjelõk Jon me ej wal̦o̦k ilo bok in Revelesõn, Jijej ear bar kallim̦ur bwe ro remej renaaj bar mour. Ear kwal̦o̦k kõn juon iien me aolep renaaj rõl̦o̦k jãn mej.​—Revelesõn 20:​13, UBS.