1, 2. (1) Ewi wãween Setan ej kajjioñ in m̦on̦e armej ro? (2) Ta eo enaaj jipañ kõj ñan epaakel̦o̦k Anij?

 JEOVA ANIJ ear kõm̦anm̦an armej bwe ren aikuji im kõn̦aan pãd epaake e. Bõtab, Setan ekõn̦aan bwe jen l̦õmn̦ak bwe jejjab aikuji Jeova ilo mour eo ad. Setan ear kajjioñ kõm̦m̦an bwe armej ren tõmak men in jãn iien eo ear m̦on̦e Iv ilo jikin kallib in Iden. (Jenesis 3:4-6) Im jãn iien eo ñan kiiõ, elõñ armej rej tõmak bwe rejjab aikuji Anij.

² Bõtab, jemaroñ kõjparok kõj jãn ad po ilo riab in an Setan. Etke? Kõnke Baibõl̦ ej kwal̦o̦k ñan kõj ta ko Setan ej kõjerbali ñan kajjioñ in m̦on̦e armej ro. (2 Korint 2:11, UBS) Setan ej kajjioñ in kapoik kõj ñan kõm̦m̦ani pepe ko me renaaj kattol̦o̦k kõj jãn Jeova. Ilo katak eo l̦o̦k, ekar kwal̦o̦k kõn wãween jemaroñ kõm̦m̦ani pepe ko rem̦m̦an ikijjeen jerbal eo ad, iukkure im menin kam̦õn̦õn̦õ ko, im baam̦le eo ad. Im ilo katak in, enaaj kwal̦o̦k kõn men ko jet emãn Setan ej kõjerbali ñan kapoik kõj. Ta men kein emãn? Rej computer im men ko ãierl̦o̦k wõt, ãjmour, jããn, im utiej bõro. El̦aññe em̦m̦an pepe ko jej kõm̦m̦ani ikijjeen men kein emãn, jenaaj maroñ “ruwaakl̦o̦k” ak epaakel̦o̦k Anij.​—Jemes 4:8.

3. Jouj im kwal̦o̦k wãween ko rejim̦we ñan an juon kõjerbale computer ko im men ko ãierl̦o̦k wõt im wãween ko rejjab jim̦we an kõjerbali.

³ Elõñl̦o̦k armej ro rej kõjerbal computer, cell phone, tipi, im men ko ãierl̦o̦k wõt. Men kein remaroñ l̦ap aer jipañ kõj el̦aññe jej kõjerbali ilo wãween eo ejim̦we. Bõtab, el̦aññe ejjab jim̦we wãween ad kõjerbali, eokwe men kein remaroñ kattol̦o̦k kõj jãn Jemedwõj ilañ. Ñan waanjoñak, computer ko remaroñ l̦ap aer jipañ kõj. Ro jeid im jatid ilo tõmak rej kõjerbal computer ko ñan je im print bok eo Naan in Keeañ. Jemaroñ bar kõjerbale computer ko ñan kapok mel̦el̦e ko im ñan kõnnaan ak bwebwenato ippãn ro jet. Emaroñ limo ñe jej kõjerbale computer ko. Bõtab el̦aññe elukkuun em̦m̦an ippãd computer, emaroñ l̦ap jãn joñan iien ko jej jul̦o̦ki ñan l̦õmn̦ak kaki im kõjerbali. Elõñ menin karreelel ko rej kajjioñ in kõm̦m̦an ad l̦õmn̦ak bwe ej aikuj in wõr ippãd aolep men ko rekããl. Juon likao ear  kõn̦aan juon nejin computer. Joñan, ear wiakake juon iaan kidney ko an bwe en maroñ wiaiki computer eo im ear jab kõn̦aan bwe ro jet ren jel̦ã kake. El̦ap an kabũrom̦õjm̦õj men in!

4. Ewi wãween an kar juon jeid im jatid m̦aan kabõjrak an jol̦o̦k el̦ap iien ñan kõjerbale computer eo nejin?

⁴ Enaaj l̦apl̦o̦k an kabũrom̦õjm̦õj el̦aññe jej kõtl̦o̦k bwe computer ko im men ko ãierl̦o̦k wõt ren ko̦kkure kõtaan eo ad ippãn Jeova. Men in emaroñ wal̦o̦k ñe jej jol̦o̦k el̦ap iien ñan kõjerbali men kein ak ñe jej kõjerbali ñan kõm̦m̦ani men ko renana. Juon jeid im jatid m̦aan etan Jon me 28 an iiõ, ear ba bwe ekar jol̦o̦k el̦ap iien ñan kõjerbale computer eo nejin, im ear jab katak Baibõl̦ ippãn make. * (Lale kõmel̦el̦e eo itulal̦.) Ekkã wõt an kar Jon emmej in boñ kõn an Internet. L̦ein ear ba bwe meñe ear lukkuun m̦õk, ak ear pen an bõjrak jãn an kõjerbal computer eo nejin ñan bwebwenato ippãn ro jet im alwõje pija ko meñe jet iaaer rekar ettoon im nana. Ak ear kõn̦aan bõjrak jãn m̦anit in an. Kõn men in, ear kõm̦m̦an bwe computer eo nejin en make kun ilo awa eo ej aikuj in kiki.​—Riit Epesõs 5:15, 16.

5, 6. (1) Ta men eo me rũtto ro rej aikuj peeke an ro nejier kõm̦m̦ane? (2) Ewi wãween rũtto ro remaroñ jipañ ro nejier ikijjeen kõm̦m̦ao ko rem̦m̦an?

⁵ Kom̦ ro jemen im jinen ajri ro, kom̦ij jab aikuj pepe kõn jabdewõt men me ajri ro nejõmi rej kõm̦m̦ani. Bõtab, kom̦ij aikuj peek wãween rej kõjerbale computer ko. Jab kõtl̦o̦k bwe ren etal ñan Website ko me rej kwal̦o̦k kõn mour ettoon, anijnij, im bubu. Bareinwõt, jab kõtl̦o̦k bwe ren iukkure kõn iukkure ko me rej kwal̦o̦k kõn kowadoñ im lãj im jab kõtl̦o̦k aer kõm̦m̦ao ippãn ri nana ro ilo Internet. El̦aññe kom̦ij anloke an ro nejõmi kõm̦m̦an jabdewõt men rekõn̦aan ilo computer eo kõnke kom̦ij jab kõn̦aan bwe ren kabn̦õn̦õik kom̦, remaroñ l̦õmn̦ak bwe men kein rejjab nana. Kõnke kom̦ij ro jemãer im jineer, ej eddo eo ami ñan kõjparok ajri ro im jodrikdrik ro nejõmi jãn jabdewõt men me emaroñ ko̦kkure kõtaan eo aer ippãn Jeova. Ñe menin mour ko rej lo bwe juon ej iten ko̦kkure koon ko nejier, renaaj ire im jojomare er. Rũtto ro bareinwõt rej aikuj kõm̦m̦ane men in ñe rej lo bwe ro nejier rej pãd ilo kauwõtata.​—Lale Hoseia 13:8.

⁶ Kom̦win jipañ ro nejõmi bwe ren kõm̦m̦ao ippãn ri tõmak ro m̦õttad me ekajjo iiõ ko aer jãn doon im rej kõm̦m̦ani pepe ko rem̦m̦an. Im keememej bwe ro me el̦aptata an aorõk bwe ro nejõmi ren kõm̦m̦ao ippãer ej kom̦ ro jemãer im jineer. Ro nejõmi rej aikuji kom̦ bwe kom̦win kõm̦m̦an ami iien ippãer! Kom̦win jerbal ippãer, iukkure ippãer, im kõm̦m̦ani men ko relimo ippãer. Men in enaaj jipañ kom̦ aolep bwe kom̦win epaake wõt Jeova. *​—Lale kõmel̦el̦e eo itulal̦.

7. Etke kõj wõj aolep jekõn̦aan kõjparok ãjmour eo ad?

⁷ Ekkã ad kajjitõk ippãn ro jet ejet aer mour. Armej rar jino nañinmej jãn iien eo Adam im Iv rar roñjake Setan im ko̦kkure kõtaan eo aer ippãn Jeova. El̦ap an Setan m̦õn̦õn̦õ ñe ej lo ad nañinmej. Etke? Kõnke ñe jej nañinmej, epen ad karejar ñan Jeova. Im el̦aññe jemej, jejjab maroñ karejar  ñan e. (Sam 115:17) Kõn men in, jekõn̦aan kate kõj joñan wõt ad maroñ ñan kõjparok ãjmour eo ad. * (Lale kõmel̦el̦e eo itulal̦.) Jen bar l̦õmn̦ak kõn ãjmour eo an ro jeid im jatid ilo tõmak.

8, 9. (1) Ewi wãween jemaroñ kõjparok bwe jen jab l̦õmn̦ak wõt kõn ãjmour eo ad? (2) Etke em̦m̦an bwe jen m̦õn̦õn̦õ wõt?

⁸ Meñe eaorõk ñan kõjparok ãjmour eo ad, bõtab men in en jab men eo wõt jej l̦õmn̦ak kake. Jet armej rej jol̦o̦k el̦ap iien ñan bwebwenato kõn kain m̦õñã ko rem̦m̦an ñan ãjmour ko aer, im uno ko im kein taktõ ko rem̦m̦an, kab men ko jet me rej kakõm̦anm̦an mejãer im ãnbwinnier. El̦ap aer kõjerbal iien ko aer ñan men kein jãn aer kwal̦o̦k naan kõn Aelõñ eo an Anij. Rein remaroñ l̦õmn̦ak bwe rej jipañ ro jet ñe rej wiakake men kein im karreelel kaki. Bõtab, ejjab ekkar bwe jen kõm̦m̦ane men in ñe jej pãd ilo Im̦õn Kweilo̦k eo im ilo iien kweilo̦k ko rel̦l̦ap. Etke?

⁹ Ñe jej kweilo̦k ippãn doon, ej iien ad bwebwenato kõn Baibõl̦ eo im kal̦apl̦o̦k ad lañlõñ. Lañlõñ in ej itok jãn kajoor eo an Anij. (Galetia 5:22) Innem, unin ad kweilo̦k ippãn doon ejjab bwe jen kõnono kõn uno ko im kein taktõ ko me rej kõjparok ãjmour eo ad. Jekdo̦o̦n ñe juon ekõn̦aan kõnnaan kõn men kein ak ejjab ekkar bwe jen kõnono kaki ilo iien kweilo̦k ko. Etke? Kõnke men in ej kõm̦m̦an bwe en dikl̦o̦k an ro jet m̦õn̦õn̦õ im lañlõñ. (Rom 14:17) Jen kõtl̦o̦k bwe ro jet ren make peek wãween eo renaaj kõjparok ãjmour eo aer. Ejjel̦o̦k juon armej ak juon taktõ emaroñ jol̦o̦k aolep nañinmej ko. Bareinwõt, ñe jej inepata kõn ãjmour eo ad aolep iien, men in eban jipañ kõj ñan jidik. (Luk 12:25, UBS) Bõtab, Baibõl̦ ej ba bwe “juon bõro e m̦õn̦õn̦õ” emaroñ kõm̦m̦an bwe en em̦m̦anl̦o̦k ad mour.​—Jabõn Kõnnaan 17:22.

10.(1) Ippãn Jeova, ta eo ej kõm̦m̦an an juon lukkuun aiboojoj? (2) Ñããt eo enaaj kanooj em̦m̦an ãjmour eo ad?

¹⁰ Ebar aorõk bwe jen l̦õmn̦ak kõn paotokid. Bõtab, ejjab mel̦el̦ein bwe jen buul̦ kõjerbali men ko me renaaj kaalikkar ad jab rũttol̦o̦k. Baibõl̦ ej ba: “Uwan̦ in juon armej ej pãllin aiboojoj, el̦aññe rej loe ilo ial̦ in wãnõk.” (Jabõn Kõnnaan 16:31) Ippãn Jeova, eaorõkl̦o̦k kobban bũruon juon armej jãn paotokin im en bar ãindein wãween ad l̦õmn̦ak. (Riit 1 Piter 3:3, 4.) Kõn men in, jen jab likũt mour eo ad ilo kauwõtata ilo ad kõjerbali kein taktõ ko ak etal im m̦wijm̦wij ilo jikin taktõ ko ñan kakõm̦anm̦anl̦o̦k paotokid. Jekdo̦o̦n ewi joñan dettad ak ewi joñan an em̦m̦an ãjmour eo ad, men eo ej kõm̦m̦an ad aiboojoj ippãn Jeova ej ñe jej “lañlõñ.” Lañlõñ in ej itok jãn e. (Nihimaia 8:10) Ilo jukjukun pãd eo ekããl, enaaj kanooj em̦m̦an ãjmour eo ad, im wãween paotokid im turin mejãd enaaj ãinwõt ke jaar bar jodrikdrik. (Job 33:25; Aiseia 33:24) Kõn men in, jen kõm̦m̦an pepe ko rem̦m̦an ikijjeen ãjmour eo ad im tõmak ilo kallim̦ur ko an Jeova m̦ae iien eo enaaj wal̦o̦k iien in. Men kein renaaj kõm̦m̦an ad m̦õn̦õn̦õ wõt kiiõ im jab inepata wõt kõn ãjmour eo ad.​—1 Timote 4:8.

11. Ewi wãween jããn emaroñ kattol̦o̦k kõj jãn Jeova?

¹¹ Ejjab nana ñe ewõr ad jããn im ejjab bar nana ñe jej kajjioñ in kõm̦m̦an jããn. (Ekklisiastis 7:12; Luk 19:12, 13, UBS) Bõtab, el̦aññe jej arõk m̦ani, men in enaaj kattol̦o̦k kõj jãn Jeova. (1 Timote 6:9, 10) Ta mel̦el̦ein ñe juon ej ‘inepata kõn mour in’? Ej mel̦el̦ein ñe ej l̦ap jãn joñan an inepata kõn men ko ej aikuji. Men in emaroñ bar kattol̦o̦k kõj jãn Jeova. Ñe jej “yokwe m̦weiuk ko,” men in emaroñ m̦on̦e kõj ñan l̦õmn̦ak bwe jããn enaaj kõm̦m̦an ad m̦õn̦õn̦õ im jokwane. (Matu 13:22, UBS) Jijej ear ba bwe “ejjel̦o̦k armej” emaroñ karejar ñan Anij im m̦weiuk ilo juon wõt iien.​—Matu 6:24.

12. Ta ko armej ro rej kajjioñ in kõm̦m̦ani bwe en m̦õkaj an lõñ aer jããn? Ewi wãween jemaroñ bõbrae kõj jãn ad kõm̦m̦ani pepe ko rejjab em̦m̦an ikijjeen jããn?

¹² El̦aññe jej l̦õmn̦ak bwe jããn ej men eo el̦aptata an aorõk, men in emaroñ kapo kõj ñan kõm̦m̦ani men ko rebõd. (Jabõn Kõnnaan 28:20) Jet rar wia aer tũkõt in raffle ak iukkure bingo kõnke rar kõn̦aan bwe en m̦õkaj an lõñ aer jããn. Jet ro jeid im jatid rar bõk kun̦aaer ilo peejnej ko me rar l̦õmn̦ak enaaj kar kõm̦m̦an bwe en m̦õkaj an lõñ aer jããn. Rein rar bar jiroñ ro jet ilo eklejia bwe ren kobal̦o̦k ippãer ilo men in kõnke en bar lõñ aer jããn. Ewõr ro jeid im jatid rar kajjitõk ippãn ro ilo  eklejia ñe remaroñ m̦uri jããn ippãer ñan kajutak juon aer peejnej. Im rar kallim̦uri er bwe ñe renaaj kõl̦l̦ãik m̦uri eo aer, enaaj l̦apl̦o̦k jãn joñan jããn eo rar m̦uri ippãer. El̦aññe jej kũbbon̦, bõlen jemaroñ pepe ñan bõk kun̦aad ilo juon peejnej me emaroñ kõm̦m̦an bwe en l̦ap jããn ko jej luuji. Kõn men in, kõjparok eok bwe kwõn jab kũbbon̦. Ekkã an armej jab maroñ lo tõprak ñe rej kajjioñ in kõm̦m̦an bwe en m̦õkaj an lõñ aer jããn.

13. Ewi wãween Jeova ekõn̦aan bwe jen watõk jããn?

¹³ El̦aññe jej likũt m̦oktata “aelõñ in Anij, im kwõjarjar eo An,” eokwe Jeova enaaj kajeraam̦m̦an ad kate kõj ñan kabwe aikuj ko ad. (Matu 6:33; Epesõs 4:28) Jeova ejjab kõn̦aan bwe jen kiki ilo iien kweilo̦k ko kõn an l̦ap ad jerbal ilo jikin jerbal ko ad. Ejjab kõn̦aan bwe jen inepata kõn jããn ñe jej pãd ilo Im̦õn Kweilo̦k eo. Elõñ armej ilo lal̦ in rej l̦õmn̦ak bwe rej aikuj in buul̦ kate er ñan kõm̦m̦an jããn kõnke ñe rerũttol̦o̦k enaaj wõr kadede aer jããn im rejjab aikuj jerbal tokãlik ilo mour ko aer. Ekkã aer jiroñ ajri ro nejier bwe ren bar kõm̦m̦ane men in. Bõtab, Jijej ear kaalikkar bwe l̦õmn̦ak rot in ejjab jim̦we. (Riit Luk 12:15-21, UBS.) Gihezai ear l̦õmn̦ak bwe enaaj em̦m̦an wõt kõtaan eo an ippãn Jeova meñe enaaj kũbbon̦.​—2 Kiiñ 5:20-27.

14, 15. Etke ebõd l̦õmn̦ak eo bwe jããn enaaj kõjparok im jipañ kõj? Kwal̦o̦k juon waanjoñak.

¹⁴ Ewõr bao ikõl̦ rar mal̦oñ ke rar kajjioñ in ko̦jeke ek ko rel̦l̦ap. Ãindein l̦o̦k wõt, ñe jej buul̦ kate kõj ñan kõm̦m̦an bwe jen m̦weiie, jemaroñ jorrããn. Alex juon em̦m̦aan ej lale eklejia ear ba bwe m̦okta ekkã an kar lukkuun kõjparok jããn ko an. Joñan an l̦ap an kõjparok jããn, ekõn kakkõnkõn bwe en jab m̦õkaj an maat shampoo eo an. Ak ear l̦õmn̦ak bwe el̦aññe enaaj kõm̦m̦an elõñ jããn, emaroñ kam̦õje jãn jerbal eo an im jino pioneer. Kõn men in, ear katak kõn wãween eo emaroñ koorl̦o̦k jããn ko an ilo peejnej ko. Innem, ear kõjerbal aolep jããn ko an ilo men in. Joñan, ear m̦uri jããn ippãn ro jet bwe en bar kõjerbale ñan men in. Bõtab, ear jab orl̦o̦k jããn ko an ilo peejnej ko. Alex ear ba bwe enaaj kate e ñan bõke jããn ko ear kõjerbali ñan peejnej ko. Ear l̦õmn̦ak bwe el̦aññe enaaj kõttar wõt, bõlen enaaj orl̦o̦k jããn ko an.

¹⁵ Aolep iien Alex ear l̦õmn̦ak kõn jããn ko ear likũti ilo peejnej ko. Innem, ear pen an likũt jerbal eo an Jeova m̦oktata im ear jaje kiki in boñ. Bõtab, ear jab orl̦o̦k jããn ko an ilo peejnej ko. Kõn men in, ear luuji aolepen jããn ko an im ear aikuj wiakake m̦weo im̦õn. Alex ear ba bwe men in me ear kõm̦m̦ane ear bõktok elõñ apañ ko ñan baam̦le eo an. Bõtab, ear katak juon men eaorõk jãn men in. Ear ba bwe jabdewõt eo im ej lõke bwe men ko ilo jukjukun pãd in an Setan remaroñ kõjparok er im jipañ er lo m̦õn̦õn̦õ, eokwe renaaj inepata im bũrom̦õj tokãlik. (Jabõn Kõnnaan 11:28) El̦aññe jej atartar ioon jããn ko ad ak kapeel im maroñ eo ad ñan kõm̦m̦an jããn, ilo m̦ool jej atartar ioon Setan eo ej “anij in lal̦ in.” (2 Korint 4:4; 1 Timote 6:17) Em̦õj an Alex kõm̦m̦an oktak ko ilo mour eo an bwe en bar maroñ in kal̦apl̦o̦k iien ko an ñan kwal̦o̦k naan kõn nuuj eo em̦m̦an. Men in ear kõm̦m̦an bwe e im baam̦le eo an ren bar m̦õn̦õn̦õ im epaakel̦o̦k Jeova.​—Riit Mark 10:29, 30.

16. Ta men eo jej m̦õn̦õn̦õ im utiej bũruod kake? Ta eo emaroñ wal̦o̦k ñe el̦ap ad l̦õmn̦ak wõt kõn kõj make?

¹⁶ Jen m̦õn̦õn̦õ im utiej bũruod bwe jej Ri Kõnnaan ro an Jeova. (Jeremaia 9:24) Kõnke jej m̦õn̦õn̦õ im utiej bũruod kõn men in, aolep iien jej kate kõj ñan kõm̦m̦ani pepe ko rem̦m̦an im l̦oor kien ko an Anij. Bõtab, jej aikuj kõjparok bwe jen jab oktak im utiej bũruod ilo ad l̦õmn̦ak bwe el̦apl̦o̦k ad jel̦ã jãn Jeova. Etke? Kõnke men in emaroñ bar kattol̦o̦k kõj jãn Jeova.​—Sam 138:6; Rom 12:3, UBS.

17, 18. (1) Wõn eo me Baibõl̦ ej kwal̦o̦k bwe ear ettã bũruon? Wõn ro me ear l̦ap an utiej bũrueer? (2) Ta eo juon jeid im jatid m̦aan ear kõm̦m̦ane ñan kõjparok bwe utiej bõro en jab kattol̦o̦k e jãn Jeova?

¹⁷ Baibõl̦ ej kwal̦o̦k ñan kõj kõn armej ro me ear utiej bũrueer im ro me ear ettã bũrueer. Kiiñ Devid ear kõttãik bũruon ke ear kajjitõk ippãn Jeova bwe en tõl e im kõn men in, Jeova ear kajeraam̦m̦ane. (Sam 131:1-3) Kõnke ear utiej bũruon Kiiñ Nebukadnezar im Kiiñ Belshazzar, Jeova ear kajeik erro. (Daniel 4:30-37; 5:22-30) Jet iien jej iioon wãween ko reppen me remaroñ mãlejjoñe kõj el̦aññe jej utiej bõro ak ettã bõro. Ñan waanjoñak, juon  eo me ej ri jipañ ilo eklejia etan Ryan im 32 an iiõ, ear em̦m̦akũtl̦o̦k ñan bar juon eklejia. Ke ear em̦m̦akũtl̦o̦k ñan eklejia in ekããl, ear l̦õmn̦ak bwe enaaj m̦õkaj aer jitõñe bwe en juon iaan em̦m̦aan ro rej lale eklejia in. Bõtab, ãlikin juon iiõ rejañin jitõñe ñan jerbal in. Ryan ear ke utiej bũruon im illu ippãn em̦m̦aan ro rej lale eklejia kõn aer jab jitõñe ñan jerbal in? Ear ke bõjrak jãn an etal ñan kweilo̦k ko im kõtl̦o̦k bwe men in en kattol̦o̦k e jãn Jeova im jãn ro ilo eklejia eo? Ta eo kwõnaaj kar kõm̦m̦ane el̦aññe kwe eo kwaar iioone wãween in?

¹⁸ Ryan ear katak kõn ta eo emaroñ jipañe ñan jel̦ã kõttar. (Jabõn Kõnnaan 13:12) Ear ba: “Iar jino kile bwe iar aikuj katak ñan kijenmej wõt im kõttar im ñan kõttãik bũruõ. Iar aikuj kõtl̦o̦k bwe Jeova en katakin eõ.” Kõn men in, Ryan ear jino kal̦apl̦o̦k an l̦õmn̦ak kõn wãween emaroñ jipañ ro jet ilo eklejia eo im armej ro ej iioone er ñe ej kwal̦o̦k naan. Ejjabto tokãlik, ear lõñ an ri katak me em̦m̦an aer wõnm̦aanl̦o̦k. Ear ba, “Joñan aõ kar m̦õn̦õn̦õ kõn aõ kõm̦m̦ane jerbal in kwal̦o̦k naan, ear jako aõ kar inepata kõn jerbal eo iar kõn̦aan bõke ilo eklejia eo. Eñin unin iar ilbõk ke rar rar jitõñ eõ bwe in juon ri lale eklejia eo. Men in ear wal̦o̦k juon jimattan iiõ tokãlik.”​—Riit Sam 37:3, 4, UBS.

19, 20. (1) Ewi wãween jemaroñ kõjparok bwe men ko jiljilimjuon jaar katak kaki ren jab kattol̦o̦k kõj jãn Jeova? (2) Wõn ro ilo Baibõl̦ me rar pãd epaake wõt Jeova?

¹⁹ Men ko jiljilimjuon me kar kwal̦o̦k kaki ilo katak eo l̦o̦k im katak in rejjab nana. Jej m̦õn̦õn̦õ im utiej bũruod bwe jej Ri Kõnnaan ro an Jeova. Jej lañlõñ ñe baam̦le eo ad ej m̦õn̦õn̦õ ippãn doon im ñe em̦m̦an ãjmour eo ad. Jerbal im jããn rejjab nana kõnke jej aikuji men kein ñan kabwe aikuj ko ad make im an baam̦le eo ad. Im em̦m̦an ñan kõj ñe jej kõm̦m̦ani iukkure ko im menin kam̦õn̦õn̦õ ko. Computer ko im men ko ãierl̦o̦k wõt rebar em̦m̦an kõnke remaroñ jipañ kõj. Bõtab, jen keememej bwe el̦aññe jej kõm̦m̦ane juon iaan men kein ilo wãween eo ebõd, ilo joñan eo ejjab ekkar im enana awa ak iien eo jej kããlõt ñan kõm̦m̦ane, men in emaroñ kattol̦o̦k kõj jãn Jeova.

²⁰ Setan ekõn̦aan bwe kwõn kattol̦o̦k eok jãn Jeova. Bõtab, kwõmaroñ bõbrae men in ñe kwõj kate eok ñan kõjparok kwe im baam̦le eo am̦! (Jabõn Kõnnaan 22:3) Kõm̦m̦an bwe kwõn epaakel̦o̦k Jeova im pãd epaake wõt e. Elõñ ro me Baibõl̦ ej kwal̦o̦k bwe rar kõm̦m̦ane men in. Inok im Noa rar “etetal ippãn Anij.” (Jenesis 5:22; 6:9) Joñan an kar Moses tõmak ilo Anij ej ãinwõt ñe ear loe. (Hibru 11:27) Im aolep iien Jijej ear kõm̦m̦ani men ko Jemen ear kõn̦aan bwe en kõm̦m̦ani. Kõn men in, Anij ear kajeraam̦m̦ane. (Jon 8:29) Jen l̦oore joñak ko an rein. ‘En jab jokwõd ad jar ak ilo men ko otemjej jen kam̦m̦oolol.’ (1 Tessalonika 5:16-18) Jen jab kõtl̦o̦k bwe jabdewõt men en kattol̦o̦k kõj jãn Jeova!