Ñe juon ej kaorõk bar juon kõn aolepen bũruon, mel̦el̦ein bwe ej yokwe e. Ñe juon ej yokwe ro jet, ej kaalikkar ilo naan im kõm̦m̦an ko an ke ej lukkuun kaorõke er. Ej kõm̦m̦ane men in meñe emaroñ pen ñane.

Moses ear kwal̦o̦k an yokwe Anij. Ilo wãween et? Eokwe, bõlen kwõj keememej naan ko ilo 1 Jon 5:3 (UBS). Ej ba: “Eñin mel̦el̦ein yokwe Anij: pokake kien ko an.” Kõnke Moses ear yokwe Anij, ear pokake kien ko an. Moses ear kõm̦m̦ani aolep men ko Anij ear kajjitõk bwe en kõm̦m̦ani meñe repen ak repidodo. Ñan waanjoñak, Anij ear kajjitõk ippãn Moses bwe en etal im wõnm̦ae Pero. Meñe emaroñ kar lukkuun pen im kaamijak ñane ak ear kõm̦m̦ane. Bareinwõt, ke Anij ear kajjitõk bwe en likũt jokon̦ eo an ñan lom̦al̦o eo, Moses ear pokake meñe emaroñ kar l̦õmn̦ak bwe ejjab lukkuun aorõk men in. Meñe ear pen ak pidodo men ko Anij ear ba ñan e, ear pokake wõt. Baibõl̦ ej ba: “Ekkar ñan men otemjej Jeova ear kaiñi, ãindein an kõm̦m̦ane.”​—Exodus 40:16.

Moses ear yokwe Ri Israel ro. Armej in Israel ro rar kile bwe Jeova ear kõjerbal Moses ñan tõl armej ro an. Kõn men in rar kepaake Moses bwe en jipañ er kõn apañ ko aer reoktak jãn doon. Baibõl̦ ej ba: “Armej ran̦ rar jutak iturin Moses jãn jibboñ ñan jota.” (Exodus 18:13-16) L̦õmn̦ak m̦õk kõn joñan an kar Moses m̦õk kõn an kar Ri Israel ro kwal̦o̦k aolep inepata im abõn̦õn̦õ ko aer ñane jãn jibboñ ñan jota! Meñe ãindein, ak Moses ear m̦õn̦õn̦õ in jipañ armej ro kõnke ear yokwe er.

Moses ear jab baj roñjake wõt abõn̦õn̦õ ko aer, ak ear bar jar kõn ro ear yokwe er. Ak ta kõn armej ro me ear jab em̦m̦an aer kõm̦m̦an ñan e? Ear bar jar kõn er! Ñan waanjoñak, lio jein etan Miriam ear ellotaane Moses. Kõn men in, Jeova ear kõm̦m̦an bwe Miriam en bõk nañinmej in lõba. Moses ear jab lañlõñ ke ear lo men in. Ear m̦õkaj im jar kake lio jein. Ear ba: “Kwõn kãjmour e, O Anij, ij akwel̦ap ñan Eok.” (Bõnbõn 12:13) Ealikkar bwe Moses ear yokwe Miriam im eñin unin ear jar kõn e.

Jemaroñ anõke Moses ilo ad kal̦apl̦o̦k ad yokwe Anij. Yokwe eo ad ñan Anij enaaj kõm̦akũt kõj ñan pokake kien ko an ‘jãn bũruod.’ (Rom 6:17) Ñe jej pokake Jeova jãn bũruod, men in enaaj kam̦õn̦õn̦õik bũruon. (Jabõn Kõnnaan 27:11) Jenaaj bareinwõt bõk elõñ tokjãn ko. Ñe jej karejar ñan Jeova kõnke jej lukkuun yokwe e, jenaaj kõm̦m̦ani men ko rem̦m̦an im rejim̦we. Ejjab men in wõt ak jenaaj m̦õn̦õn̦õ in kõm̦m̦ani men kein!​—Sam 100:2.

Bar juon wãween jemaroñ anõke Moses ej ilo ad kwal̦o̦k yokwe ñan ro jet im kaarmejjete kõj make. Ñe ro m̦õttad ak ro ilo baam̦le ko ad rej kepaake kõj ñan jipañ er kõn apañ ko aer, yokwe eo ad ñan er enaaj kõm̦akũt kõj ñan (1) lukkuun roñjake er, (2) kajjioñ in mel̦el̦e kõn eñjake ko aer, im (3) kwal̦o̦k ñan er ke jej kea kake er.

Ãinwõt Moses, jemaroñ jar kõn ro jej yokwe er. Jet iien jemaroñ jaje kilen jipañ er kõn apañ ko aer. Im kõn men in, jet iien jemaroñ ba, “Jol̦o̦k aõ bõd ak men eo wõt imaroñ kõm̦m̦ane ej jar kõn kwe.” Meñe ãindein, ak kwõn keememej: “Jar an juon ri wãnõk ekajoor im el̦ap tokjãn.” (Jemes 5:16, UBS) Jar ko ad remaroñ kõm̦akũt Jeova ñan jipañ armej eo ilo juon wãween me emaroñ kar jab l̦õmn̦ak in kõm̦m̦ane m̦okta. Kõn men in, men eo em̦m̦antata jemaroñ kõm̦m̦ane ñan jipañ ro jej yokwe er ej ñan jar kõn er. *

Kwõj ke errã bwe elõñ men ko jemaroñ katak jãn Moses? Meñe ear juon armej ãinwõt bar kõj, ak ear kõm̦m̦ane juon joñak em̦m̦an kõn tõmak, ettã bõro, im yokwe. El̦aññe el̦apl̦o̦k ad anõke joñak eo an, enaaj wõr tokjãn ko jenaaj loi im ro jet renaaj bar bõk tokjãn jãn men in.​—Rom 15:4.