1, 2. Visõn ko kõn doulul eo an Jeova rej kõm̦akũt kõj ñan ta?

 EL̦AP an kabwilõñlõñ bwe jej uwaan juon doulul me m̦õttan eo juon ej pãd ilañ im eo juon ej pãd ijin ilal̦. Elukkuun em̦m̦an an visõn ko jaar riiti ilo bok in Ezekiel jebta 1 im Daniel jebta 7 kwal̦o̦k kõn wãween an Jeova jerbal ñan kajejjet ankilaan. Jijej ej tõl m̦õttan eo juon an doulul eo an Jeova me ej pãd ijin ioon lal̦. E eo ej tõle ñan kõm̦m̦ane jerbal in kwal̦o̦k naan, ñan katakin im rõjañ ri kwal̦o̦k ro, im ñan jipañ ro jet bwe ren erom ro rej kabuñ ñan Jeova. Men in ej kõm̦akũt kõj ñan lõke doulul eo an Jeova.​—Matu 24:45.

² Kwõj ke l̦oor joñak eo an doulul eo ilo am̦ poub wõt ilo jerbal eo an Anij? Bõlen kwõj kile bwe ej jino dikl̦o̦k am̦ kijejeto. Men in ear wal̦o̦k ñan Kũrjin ro ilo iien ko an rijjelõk ro. Eñin unin rijjelõk Paul ear aikuj kakeememej er kõn joñak eo an Jijej kõn kijejeto. Paul ear ba bwe men in emaroñ jipañ er bwe ren jab “m̦õk im kijel̦o̦k” ak ebbeer. (Hibru 12:3) Ilo katak eo l̦o̦k, jaar kõnono kõn jerbal eo em̦m̦an doulul eo an Jeova ej kõm̦m̦ane rainin. Ãinwõt an kar joñak eo an Kũraij rõjañe Kũrjin ro ilo iien ko an rijjelõk ro, ãindein joñak eo an doulul eo an Jeova emaroñ jipañ kõj rainin ñan kijenmej ilo jerbal eo an Anij im ñan kijejeto wõt.

3. Ta eo jej aikuj kõm̦m̦ane bwe jen jab m̦õk ak dikl̦o̦k ad kijejeto? Ta ko jenaaj etali ilo katak in?

³ El̦aññe jejjab kõn̦aan bwe jen “m̦õk” ak dikl̦o̦k ad kijejeto ilo jerbal eo an Anij, ejabwe ñan ad baj kõl̦mãnl̦o̦kjen̦ wõt kõn joñak an doulul eo an Anij. Paul ear ba bwe jej aikuj wõnm̦aanl̦o̦k wõt im “kõm̦m̦an em̦m̦an.” (Galetia 6:9, UBS) Jen kiiõ etale l̦alem men ko jej aikuj kõm̦m̦ani bwe jen kijejeto wõt im l̦oor tõl eo jãn doulul eo an Jeova. Innem, jenaaj maroñ lale el̦aññe kõj make ak baam̦le eo ad enaaj aikuj kakõm̦anm̦anl̦o̦k ak jerbale jet iaan men kein.

4. Etke jemaroñ ba bwe aolep iien kweilo̦k ko rar aorõk ilo kabuñ eo em̦ool?

⁴ Iien kweilo̦k ko an ri karejar ro an Jeova rar baj aorõk wõt jãn jem̦aan. Ilo lañ, Jeova ej kweilo̦k ippãn enjel̦ ro an. (1 Kiiñ 22:19; Job 1:6; 2:1; Daniel 7:10) Ilo iien ko etto, Anij ear jiroñ Ri Israel ro ñan kweilo̦k ippãn doon “bwe ren roñjake, im bwe ren katak.” (Duteronomi 31:10-12) Ilo iien ko an rijjelõk ro, ekkã an kar Ri Ju ro etal ñan im̦õn kabuñ ko ñan riit jãn Jeje ko. (Luk 4:16; Jerbal 15:21) Bareinwõt, kweilo̦k ko rar aorõk ke ear ejaak eklejia eo jinointata, im ñan rainin kweilo̦k ko rej lukkuun aorõk ilo ad kabuñ ñan Anij. Kũrjin ro rem̦ool rej ‘l̦õmn̦ak kake doon im jipañ doon, bwe ren kwal̦o̦k yokwe ñan doon im kõm̦m̦an em̦m̦an.’ Jej aikuj wõnm̦aanl̦o̦k wõt im “kakajoor doon” kõnke jej mour ilo raan ko ãliktata.​—Hibru 10:24, 25, UBS.

5. Ewi wãween jemaroñ rõjañ doon ilo kweilo̦k ko ad?

⁵ Juon wãween eaorõk jemaroñ rõjañ doon ilo kweilo̦k ko ad ej ikijjeen ad uwaak. Ñan waanjoñak, jemaroñ uwaake juon kajjitõk an juon pãrokõrããp, kõmel̦el̦e im kwal̦o̦k kõn juon eoon, ak kwal̦o̦k kõn juon bwebwenato me ej kaalikkar kõn ewi wãween naan in tõl ko ilo Baibõl̦ remaroñ jipañ kõj. (Sam 22:22; 40:9, UBS) Aolep uwaak ko jej roñjaki ilo kweilo̦k ko jãn ro rerũtto im ro reddik el̦ap aer kõketak kõj. Kõj aolep jej errã bwe jãn jinoin ad kar pãd ilo kweilo̦k ko ñan kiiõ men in ear lukkuun kõketak kõj.

6. Ta jet iaan wãween ko kweilo̦k ko rej jipañ kõj?

⁶ Kweilo̦k ko ekoba kweilo̦k ko rel̦l̦ap rej jipañ kõj ilo elõñ wãween ko. Ñan waanjoñak, rej kaperan kõj ñan kwal̦o̦k naan meñe armej ro ilo jikin ko jej kwal̦o̦k naan ie rej jum̦ae ak jab kõn̦aan roñjake. (Jerbal 4:23, 31) Katak ko im rej pedped ioon Baibõl̦ rej kakajoore tõmak eo ad. (Jerbal 15:32; Rom 1:11, 12, UBS) Ad pãd ippãn ro jeid im jatid ilo tõmak ej kam̦õn̦õn̦õik im kaenõm̦m̦an kõj. (Sam 94:12, 13) Kamiti in Katakin eo an Kumi eo ej Lale Eklejia ko ipel̦aakin lal̦ ej loloorjake katak ko me rej wal̦o̦k ilo iien kweilo̦k ko an armej ro an Jeova. El̦ap ad kam̦m̦oolol kõn katak kein jej bũki ilo kweilo̦k ko kajjojo wiik ilo aolep iiõ.

7, 8. (1) Ta unleplep in ad pãd ilo kweilo̦k ko? (2) Ewi wãween kweilo̦k ko rar jipañ eok?

⁷ Bõtab, unin ad etal ñan kweilo̦k ko ejjab bwe jen bõk wõt tokjãn. Unleplep in ad pãd ilo kweilo̦k ko ej bwe jen kabuñ ñan Jeova. (Riit Sam 95:6.) Ej juon jeraam̦m̦an bwe jemaroñ al kõn al in nõbar ko ñan Anij eo ad me ekanooj em̦m̦an! (Kolosse 3:16) Bareinwõt, jej nõbar Jeova ilo ad uwaak ilo iien kweilo̦k ko. Ej tõllo̦kũn Jeova bwe jen kabuñ ñan e ilo wãween kein. (Revelesõn 4:11) Innem, jemel̦el̦e kiiõ etke eaorõk bwe jen aolep iien pãd ilo kweilo̦k ko.​—Hibru 10:25, UBS.

⁸ Kweilo̦k ko ad rej menin letok jãn Jeova ñan jipañ kõj kijenmej m̦ae iien eo enaaj ko̦kkure jukjuk im pãd in enana. Eñin ke wãween am̦ watõk kweilo̦k ko? El̦aññe aet, jenaaj kate kõj ñan pãd ilo aolep kweilo̦k ko jekdo̦o̦n ñe el̦ap ad poub. (Pilippai 1:10, UBS) Jen jab jako jãn juon kweilo̦k m̦ae iien eo elukkuun wõr unin.

9. Ewi wãween ad jel̦ã bwe jerbal in kwal̦o̦k naan elukkuun aorõk?

⁹ El̦aññe jekõn̦aan l̦oor tõl eo jãn doulul eo an Jeova, jej aikuj kijejeto ilo kwal̦o̦k naan. Jijej ear jino kõm̦m̦ane jerbal in kwal̦o̦k naan ke ear pãd ijin ioon lal̦. (Matu 28:19, 20) Jãn kar iien  in m̦aanl̦o̦k, jerbal in kwal̦o̦k naan im kõm̦m̦an rũkal̦oor ro ear juon iaan jerbal ko el̦aptata aer aorõk ilo aolepen doulul eo an Jeova. Elõñ bwebwenato ko rej kwal̦o̦k bwe enjel̦ ro rej rejetake jerbal in im rej jipañ kõj ñan pukote armej ro me renaaj m̦õn̦õn̦õ in roñjake m̦ool eo. (Jerbal 13:48; Revelesõn 14:6, 7) Bareinwõt, unin kar ejaake m̦õttan eo ilal̦ an doulul eo an Jeova ej ñan loloorjake im rejetake jerbal in kwal̦o̦k naan. Jerbal in ej ke bar juon iaan jerbal ko el̦aptata aer aorõk ilo mour eo am̦?

10. (1) Ta eo juon jeid im jatid em̦m̦aan ej kõm̦m̦ane bwe an yokwe m̦ool eo en kajoor wõt? (2) Ewi wãween jerbal in kwal̦o̦k naan ear jipañ eok bwe am̦ yokwe m̦ool eo en kajoor wõt?

¹⁰ Ñe jej kijejeto ilo ad kwal̦o̦k naan, yokwe eo ad ñan m̦ool eo enaaj kajoor wõt. Ãindein l̦õmn̦ak eo an juon em̦m̦aan eo eto an lale eklejia im ej regular pioneer. Ear ba: “Em̦m̦an ippa kõnnaan ippãn armej ro kõn m̦ool eo. Ñe ij kõl̦mãnl̦o̦kjen̦ kõn juon katak ekããl ilo bok in Naan in Keeañ ak Ruj! (Awake!), el̦ap aõ bwilõñ kõn jel̦ãl̦o̦kjen̦ im mãlõtlõt eo ej wal̦o̦k ilo kajjojo bok kein im ejejjet wãween aer kõmel̦el̦e im ejjel̦o̦k kalijekl̦o̦k ie. Ekõm̦m̦an menin aõ kõn̦aan etal im kwal̦o̦k naan im lale ewi wãween an armej ro l̦õmn̦ak im wãween imaroñ kaitoklimoik er.” L̦ein ear bar ba bwe an kwal̦o̦k naan ej jipañe ñan likũt men ko raorõktata m̦okta ilo mour eo an. Im ej kõjparok bwe ejjel̦o̦k juon men en kõm̦ad e jãn an kõjerbal iien ko an ñan jerbal in. Kõj bareinwõt jemaroñ  kijenmej ilo raan kein ãliktata el̦aññe jej poub wõt ilo jerbal eo an Anij.​—Riit 1 Korint 15:58, UBS.

11. Etke jej aikuj riiti bok ko im kõl̦mãnl̦o̦kjen̦ kõn men ko jej riiti?

¹¹ Juon wãween Jeova ej kakajoor kõj ej ikijjeen bok ko me doulul in ear je im kõm̦m̦ani. Bõlen kwõj keememej juon iien ke kwaar riiti juon iaan bok kein im kwaar ba ippam̦ make, ‘Elukkuun jejjet katak in ñan ña! Ãinwõt ñe Jeova ear kõm̦m̦ane katak in ñan ña!’ Eokwe, ewõr unin am̦ kar bõk l̦õmn̦ak ak eñjake in. Jeova ej kõjerbal bok ko ñan katakin kõj im tõl kõj. Ear ba: “Inaaj kõjjel̦ãik eok im katakin eok ilo ial̦ eo kwõnaaj etal ie.” (Sam 32:8) Innem, jej ke kate kõj ñan riiti aolep bok ko kar litok im kõl̦mãnl̦o̦kjen̦ kõn men ko jej riiti? Men in enaaj jipañ kõj ñan kijenmej im ñan kijejeto wõt ilo jerbal eo an Anij ilo raan kein ãliktata.​—Riit Sam 1:1-3; 35:28; 119:97.

12. Ta eo emaroñ jipañ kõj ñan kaorõk bok ko an doulul in?

¹² Enaaj l̦apl̦o̦k ad kaorõk bok ko an doulul in el̦aññe jej l̦õmn̦ak kõn aolep jerbal ko rej kõm̦m̦ani bwe jen maroñ bõk bok kein. Aolep bok ko rej printi ak likũti ilo Web site eo ad ear kitibuj aer aikuj kappok mel̦el̦e ko, jeje, kõm̦m̦an kajim̦we, likũt pija ko, im ukoti ñan kajin ko. Kamiti in Jeje eo an Kumi eo ej Lale Eklejia ko ipel̦aakin lal̦ in ej loloorjake men kein. Innem, ra ko me rej print bok ko rej jilkinl̦o̦k bok kein ñan elõñ eklejia ko me rej loloorjake er. Etke rej kõm̦m̦ani aolep jerbal kein? Ej kõnke armej ro an Jeova ren maroñ bõk katak ko im naan in tõl ko rej aikuji bwe ren maroñ tiljek wõt. (Aiseia 65:​13) Jen riiti bok ko doulul eo an Jeova ej litok im kõl̦mãnl̦o̦kjen̦ kake men ko jej riiti.​—Sam 119:27.

13, 14. Wõn ro ilañ rej rejetake doulul eo an Jeova? Ewi wãween jemaroñ bar rejetake doulul in?

¹³ Ilo kar juon visõn, Jon ej lo an Jijej uwe ioon juon kidia emouj im ej ilo̦k bwe en bõk anjo̦ ioon ro rej jum̦ae Jeova. (Revelesõn 19:11-15) Ear bar lo an ri kapit ro retiljek me rar jerkakpeje ñan lañ im enjel̦ ro retiljek uwe ioon kidia ko im rej l̦oore Jijej. Men in ej kwal̦o̦k bwe rein rej rejetake Jijej, Ri Tõl eo aer. (Revelesõn 2:26, 27) Joñak in aer em̦m̦an ej katakin kõj bwe jen kwal̦o̦k ad rejetake ro im kar jitõñ er ilo doulul eo an Jeova.

¹⁴ Ilo ejja wãween in wõt, jar eo el̦ap ej kwal̦o̦k an lukkuun rejetake jerbal eo an ri kapit ro jatin Kũraij ijin ioon lal̦. (Riit Zekaraia 8:23.) Ewi wãween kwõmaroñ kwal̦o̦k am̦ rejetake doulul eo an Jeova? Juon wãween ej ilo am̦ pokake ro kar jitõñ er ñan bõk eddo ko ilo doulul eo. (Hibru 13:7, 17) Men ko jej ba kõn em̦m̦aan ro rej lale eklejia eo rej ke rõjañ ro jet ñan kautiej er im rejetake jerbal ko rej kõm̦m̦ani? Jej ke katakin ajri ro nejid ñan kautiej em̦m̦aan rein retiljek im ñan roñjake naan in kakapilõk ko aer? Elõñ bar wãween ko jet jemaroñ kwal̦o̦k ad rejetake doulul eo an Jeova. Ñan waanjoñak, jej ke kõm̦m̦an karõk ãinwõt juon baam̦le ñan rejetake jerbal in kwal̦o̦k naan ilo ad jaba? (Jabõn Kõnnaan 3:9; 1 Korint 16:2, UBS; 2 Korint 8:12, UBS) Bareinwõt, jej ke karreo im kõjparok Im̦õn kweilo̦k eo? Ñe Jeova ej lo ad rejetake doulul eo an ilo wãween kein, ej letok kajoor eo an. Im kajoor eo an ej kakajoor kõj bwe jen maroñ kijenmej ilo raan kein ãliktata.​—Aiseia 40:29-31, UBS.

15. Etke jej aikuj wõnm̦aanl̦o̦k wõt im kate kõj ñan kõm̦m̦ane men eo ejim̦we?

¹⁵ El̦aññe jekõn̦aan kijenmej im l̦oor tõl eo jãn doulul eo an Jeova, jej aikuj mour ilo wãween eo ej kabuñbũruon Jeova. (Epesõs 5:10, 11, UBS) Setan im lal̦ in enana, ekoba ad jab weeppãn rej un ko unin an lukkuun pen ñan ad kõm̦m̦ane men eo ejim̦we. Jet iaami kom̦ij kate kom̦ kajjojo raan ñan kõjparok kõtaan eo ami ippãn Jeova. Men in el̦ap an kõm̦m̦an bwe Jeova en yokwe kom̦. Innem, kom̦win jab ebbeer! Ñe jej mour ilo wãween eo ej kabuñbũruon Jeova, enaaj l̦ap ad m̦õn̦õn̦õ im jemaroñ lõke bwe Jeova ej buñbũruon ippãd.​—1 Korint 9:24-27, UBS.

16, 17. (1) Ta eo jej aikuj kõm̦m̦ane el̦aññe jaar kõm̦m̦an juon bõd el̦ap? (2) Ta eo jemaroñ katak jãn joñak eo an Anne?

¹⁶ Bõtab, ta eo kwõj aikuj kõm̦m̦ane el̦aññe kwaar kõm̦m̦ane juon bõd el̦ap? Eokwe, kwõn jab kajjioñ n̦ooje. Kwõn m̦õkaj im kappok jipañ. Keememej eñjake eo an kar Devid ke ear kajjioñ n̦ooje jerawiwi ko rel̦l̦ap ear kõm̦m̦ani. Ear ba: “Iar m̦õjn̦o̦l̦o̦k kõn aõ jañ jãn jibboñ ñan boñ.” (Sam 32:3, UBS) El̦aññe jej kajjioñ n̦ooje bõd ko rel̦l̦ap jaar kõm̦m̦ani, jeban m̦õn̦õn̦õ im bõlen enaaj jorrããn kõtaan eo ad ippãn Jeova. Bõtab, el̦aññe jej kwal̦o̦k bõd ko jaar kõm̦m̦ani, naaj kwal̦o̦k “tũriam̦o” ñan kõj.​—Jabõn Kõnnaan 28:13.

¹⁷ L̦õmn̦ak m̦õk kõn joñak in an Anne. * (Lale kõmel̦el̦e eo itulal̦.) Ke ear juon jiroñ, ear jerbal in regular pioneer ak tokãlik ekar jino kõm̦m̦ani men ko renana. Men in ear kõm̦m̦an an abn̦õn̦õ im nana an mour. Ear ba: “Iar jab m̦õn̦õn̦õ im iar lukkuun bũrom̦õj aolep iien.” Bõtab, juon iien kweilo̦k kar kwal̦o̦k kõn eoon eo ilo Jemes 5:14, 15. Anne ear kiiõ kile bwe ear aikuj jipañ. Innem, ta eo ear kõm̦m̦ane? Ear l̦oor naan in kakapilõk eo ilo eoon in im kõnnaan ippãn em̦m̦aan ro rej lale eklejia eo. Ear jab juon men epidodo ñan an kõm̦m̦ane, ak ear ba bwe ear ãinwõt ñe ear nañinmej im Jeova ear lel̦o̦k limen wũno. Anne ej kõmel̦el̦e im ba: “Ear jab pidodo ñan orañl̦o̦k wũno eo, bõtab men in ear kãjmour eõ.” Kiiõ, Anne ej bar kijejeto ilo jerbal eo an Anij im ejako an abn̦õn̦õ im nana an mour.

18. Ta ko jej aikuj kate kõj ñan kõm̦m̦ani?

¹⁸ Jej aikuj keememej bwe ej juon jeraam̦m̦an ñan ad uwaan doulul eo an Jeova ilo raan kein ãliktata! Jen kate kõj ippãn baam̦le eo ad ñan keini ad pãd ilo kweilo̦k ko, kijejeto ilo ad kwal̦o̦k naan, im riiti bok ko ad im kõl̦mãnl̦o̦kjen̦ kõn men ko jej riiti. Jen bareinwõt kwal̦o̦k ad rejetake ro kar jitõñ er ñan lale eddo ko ilo doulul eo an Jeova im jen mour ilo wãween eo ej kabuñbũruon. El̦aññe jej kõm̦m̦ani men kein, jenaaj l̦oor tõl eo jãn doulul eo an Jeova im jeban ebbeer.