1, 2. Ta kanaan eo kõn raan ko ãliktata im bõlen rũkal̦oor ro rar l̦õmn̦ak kake, im etke?

 M̦OKTAL̦O̦K, Jijej ear jiroñ rũkal̦oor ro an bwe naaj ko̦kkure tampel̦ eo. Men in ear kõm̦m̦an an Piter, Jemes, Jon im Andru inepata im kõn̦aan jel̦ã mel̦el̦ein naan ko an. (Mark 13:1-4) Innem, ke rar makel̦o̦k iaaer ippãn Jijej rar kajjitõk ippãn: “Kwõn kõnnaanek kõm ñããt men kein renaaj wal̦o̦k? Im ta eo kakõl̦l̦en Am̦ naaj itok im jem̦l̦o̦kin lal̦?” (Matu 24:1-3) Ke Jijej ear uwaake er, ear jab kwal̦o̦k wõt kõn men ko me renaaj wal̦o̦k m̦okta jãn an naaj jorrããn Jerusalem. Ak ear bar kwal̦o̦k kõn men ko renaaj wal̦o̦k ilo raan ko ãliktata in jukjuk im pãd in an Setan. Jijej ear kanaan bwe enaaj wõr tarin̦ae, ñũta im enaaj l̦apl̦o̦k nana. Ear bar ba bwe enaaj wõr juon men em̦m̦an enaaj wal̦o̦k. Ear ba: “Naaj kwal̦o̦k gospel in an aelõñ in lañ iaolepen lal̦ kõn men in kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.”​—Matu 24:7-14.

² Em̦õj kadede an rũkal̦oor ro kar jino kwal̦o̦k naan kõn nuuj eo em̦m̦an kõn Aelõñ eo ippãn Jijej. (Luk 8:1; 9:1, 2) Im bõlen rar keememej an kar Jijej ba: “El̦ap jonikõn, ak eiet ri m̦adm̦õd in ainitok. Kom̦win akwel̦ap ñan irooj in jonikõn bwe en jilkinl̦o̦k elõñ ri jerbal in aini jonikõn eo an.” (Luk 10:2, UBS) Ak bõlen remaroñ kar l̦õmn̦ak: ‘Ewi wãween am naaj kwal̦o̦k naan “iaolepen lal̦” im “kõnnaan ñan aelõñ otemjel̦o̦k”? “Ri jerbal” ro renaaj itok jãn ia?’ Ejjel̦o̦k pere bwe rũkal̦oor rein renaaj kar bwilõñ ñe rar maroñ pãd im lo an jejjet kitien naan kein ilo Matu 24:14!

3. Ewi wãween naan ko an Jijej ilo Luk 21:34 rej jejjet kitieer raan kein? Ta eo jen kajjitõk ippãd make kake?

³ Kanaan in an Jijej ejejjet kitien ilo raan kein ad.  Elõñ milien armej rej kwal̦o̦k kõn gospel ak nuuj eo em̦m̦an kõn Aelõñ eo ipel̦aakin lal̦ in. (Aiseia 60:22) Jijej ear bar kaalikkar bwe enaaj pen an ro jet likũt bwe jerbal in kwal̦o̦k naan en aorõktata ilo mour ko aer. Renaaj m̦ad im kõn men in enaaj l̦ap jãn joñan men ko rej ineeki. (Riit Luk 21:34, UBS.) Jej lo an m̦ool im jejjet kitien naan kein an Jijej raan kein kõnke jet iaan ro doon Anij rejjab likũt m̦okta men ko raorõktata ilo mour ko aer. Jej lo men in ikijjeen pepe ko rej kõm̦m̦ani kõn jerbal, jibadek jikuul̦ ko reutiej, ak m̦weiuk ko. Jet el̦ap aer jol̦o̦k iien ko aer ñan iukkure ko ak menin kam̦õn̦õn̦õ ko. Jet rejjab lukkuun kate er ilo kwal̦o̦k naan kõnke etarjen joñan aer inepata kõn aikuj ko aer jãn raan ñan raan. Kajjitõk ippam̦ make: ‘Ij ke kate eõ? Ij ke likũt ankilaan Anij m̦oktata ilo mour eo aõ?’

4. (1) Ta eo Paul ear jar kake kõn Kũrjin ro ilo Pilippai? Etke ear aikuj jar kake men in? (2) Ta eo jenaaj etale ilo katak in im ilo katak eo tok juon? Im ta eo katak kein renaaj jipañ kõj kake?

⁴ Kũrjin ro ilo jinoin rar aikuj lukkuun kate er bwe jerbal eo aer ñan Anij en aorõk wõt ak m̦oktata ilo mour ko aer. Eñin unin rijjelõk Paul ear jar bwe Ri Pilippai ro ren “kããlõt men ko rem̦m̦antata” ak raorõktata. (Riit Pilippai 1:9-11, UBS.) Ãinwõt kar rijjelõk Paul, enañin aolep Kũrjin ro rar “kanooj peranl̦o̦k in kõnono naan in Anij im jab lõl̦ño̦ñ.” (Pilippai 1:12-14) Ãindein bar kõj raan kein, enañin aoleped wõj jej kwal̦o̦k naan kõn Naan in Anij ilo peran. Meñe jej kõm̦m̦ane men in ak ad etale katak in enaaj jipañ kõj bwe jen kate wõt kõj. Katak in ej kõmel̦el̦e kõn wãween an Jeova kõjerbal doulul eo an rainin bwe en maroñ kajejjet kitien naan ko ilo Matu 24:14. Men in enaaj kal̦apl̦o̦k ad kijejeto wõt ilo jerbal in kwal̦o̦k naan. Ta eo doulul eo an Jeova ej kõm̦m̦ane? Im ta eo men in en kar kõm̦akũt kõj im baam̦le eo ad ñan kõm̦m̦ane? Ilo katak eo tok juon, jenaaj etale ta eo enaaj jipañ kõj ñan kijejeto wõt ilo jerbal eo an Anij im ñan l̦oore tõl eo jãn doulul eo an Jeova.

5, 6. (1) Etke Jeova ear kwal̦o̦k visõn ko kõn m̦õttan eo juon in doulul eo an me ej pãd ilañ? (2) Ta eo Ezekiel ear loe ilo juon visõn?

⁵ Elõñ men ko Jeova ear jab kobaiki ilo Baibõl̦. Ñan waanjoñak, ear jab kwal̦o̦k ilo tipdikin wãween an jerbal kõmãlij ko an armej ak kõn men ko ilañ im lal̦. Bõtab, men eo wõt Jeova ear kwal̦o̦ke ej mel̦el̦e ko jej aikuji ñan ad jel̦ã kõn ankilaan im bwe jen pokake e. (2 Timote 3:16, 17) Kõn men in, elukkuun em̦m̦an bwe Jeova ear kããlõt ñan kwal̦o̦k ñan kõj kõn m̦õttan eo juon in doulul eo an me ej pãd ilañ. Jej m̦õn̦õn̦õ in riit kõn men in ilo bok in Aiseia, Ezekiel, Daniel, im ilo Revelesõn. (Aiseia 6:1-4; Ezekiel 1:4-14, 22-24; Daniel 7:9-14, UBS; Revelesõn 4:1-11, UBS) Etke Jeova ear kõtl̦o̦k ad jel̦ã kõn jet iaan men ko me rej wal̦o̦k ilañ?

⁶ Jeova ekõn̦aan bwe aolep iien jen keememej bwe jej uwaan doulul eo an me ej pãd ilañ im ilal̦. M̦õttan eo juon in doulul eo an me ej pãd ilañ ej buul̦ jerbal ñan kõm̦anm̦an ankilaan Jeova. Ñan waanjoñak, Ezekiel ear loe ilo juon visõn kõn juon jariot ekilep me ej kõkkar kõn m̦õttan eo juon in doulul eo an Jeova me ej pãd ilañ. Jariot in elukkuun iim̦ im emaroñ m̦õkaj an jeer. (Ezekiel 1:15-21) Ear bar loe Rittõr eo an jariot in. Ezekiel ej ba: ‘Iar lo juon men ãinwõt mããl ebwil im ãinwõt kijeek ipel̦aakin.’  Ear etal wõt im ba: “Ãindein wãween aiboojoj an Jeova.” (Ezekiel 1:25-28) Ezekiel emaroñ kar lukkuun bwilõñ kõn visõn in ear loe. Ear loe bwe Jeova eo ej kõjbwebweik doulul eo an im ej tõle ikijjeen an kõjerbal kajoor eo an. Jariot in me ej ettõr ej pijaik an m̦õttan eo juon an doulul eo an Jeova me ej pãd ilañ jerbal.

7. Ewi wãween visõn eo Daniel ear loe ej kõm̦m̦an ad lõke Jeova im Jijej?

⁷ Daniel ear bar lo juon visõn im ej kõm̦m̦an ad lõke Jeova im Jijej. Ear loe Jeova, “eo ekar mour indeeo,” im ej jijet ioon juon tũroon me ewõr wiil̦ in neen. (Daniel 7:9, UBS) Jeova ear kõn̦aan bwe Daniel en jel̦ã bwe doulul eo An ej jerbal ñan kajejjet ankilaan. Innem, Daniel ear lo “juon ãinwõt Nejin Armej,” eo ej Jijej. Im em̦õj lel̦o̦k ñane “kajoor, aiboojoj, im bwe en irooj.” Iien in me Jijej ej irooj ejjab juon iien ekadu kitien me enaaj wal̦o̦k ium̦win jet wõt iiõ. Bõtab, enaaj irooj “ñan indeeo eo eban jako, im aelõñ eo An eban jorrããn.” (Daniel 7:13, 14) Visõn in ej kõm̦m̦an ad lõke Jeova im ej jipañ kõj ñan mel̦el̦e im jel̦ã kõn men ko ej kõm̦m̦ani. Im kõnke Jeova ear lel̦o̦k ñan Jijej maroñ bwe en tõl m̦õttan doulul eo an ilal̦, men in ej kõm̦m̦an ad lõke ri tõl eo ad Jijej.

8. Ta kar l̦õmn̦ak ak eñjake ko an Ezekiel im Daniel ke rar lo visõn ko kõn doulul eo an Jeova? Visõn kein ren kar kõm̦akũt kõj ñan ta?

⁸ Visõn kein kõn doulul eo an Jeova ren kar kõm̦akũt kõj ñan ta? Ejjel̦o̦k pere ãinwõt kar Ezekiel, el̦ap ad bwilõñ kõn men ko Jeova ej kõm̦m̦ani. (Ezekiel 1:28) Ri kanaan Aiseia ear bar lo men ko rej wal̦o̦k ilañ ilo juon visõn. Ke kar kajjitõk wõn eo ekõn̦aan jiroñ ro jet kõn men ko Jeova ej kõm̦m̦ani, ilo m̦õkaj ear  uwaak im ba bwe em̦õn̦õn̦õ in kõm̦m̦ane men in. (Riit Aiseia 6:5, 8.) Aiseia ear jel̦ã bwe ikijjeen jipañ eo jãn Jeova, ejjel̦o̦k jabdewõt men enaaj kabõjrake jãn an jerbal in ri kanaan. Ãindein, ãinwõt Aiseia jej m̦õn̦õn̦õ in rejetake doulul eo an Jeova. Ewi wãween? Ilo ad kal̦apl̦o̦k kun̦aad ilo jerbal eo an Anij. Ad jel̦ã bwe jej uwaan doulul eo an Jeova me el̦ap an poub in kõm̦anm̦an ankilaan ej lukkuun kõketak kõj.

9, 10. Etke kar aikuj ejaake m̦õttan eo juon an doulul eo an Jeova ijin ioon lal̦?

⁹ Ikijjeen Nejin, Jeova ear ejaake m̦õttan eo juon an doulul eo an me ej pãd ijin ilal̦. Im m̦õttan in ej jerbal ippãn m̦õttan eo juon ilañ. Kar aikuj ejaake m̦õttan eo ilal̦ an doulul eo an Jeova ñan katõprake jerbal eo me Matu 24:14 ej kanaan kake. Etke? Jen etale jilu un ko.

¹⁰ Kein kajuon, Jijej ear ba bwe rũkal̦oor ro an renaaj kwal̦o̦k naan “ñan ãne eo ettol̦o̦k tata ilal̦.” (Jerbal 1:8) Kein karuo, ri kwal̦o̦k naan ro renaaj aikuj naan in tõl jãn Baibõl̦ im naan in rõjañ. (Jon 21:15-17) Kein kajilu, renaaj aikuj ippãn doon im kweilo̦k ñan aer kabuñ ñan Jeova im katak kilen kwal̦o̦k naan. (Hibru 10:24, 25, UBS) Ñan katõprak un kein jilu, ear aikuj wõr juon laajrak im karõk ekon̦ ñan rũkal̦oor ro an Jijej.

11. Ewi wãween jemaroñ rejetake doulul eo an Jeova?

¹¹ Ewi wãween jemaroñ rejetake doulul eo an Jeova? Juon wãween elukkuun aorõk im jemaroñ kõm̦m̦ane men in ej ilo ad lõke em̦m̦aan ro rej tõl jerbal in kwal̦o̦k naan. Jeova im Jijej rej lõke em̦m̦aan rein im jej aikuj bar lõke er. Rein remaroñ kar kõjerbal iien im kajoor ko aer ñan n̦amejal̦an apañ ko ilo lal̦ in, bõtab rejjab kõm̦m̦ane men in. Jen kiiõ etale ta eo im el̦ap an m̦õttan in me ej pãd ijin ioon lal̦ poub in kõm̦m̦ane ñan kiiõ.

12, 13. (1) Ewi wãween an em̦m̦aan ro rej lale eklejia loloorjake eddo eo aer? (2) Etke men in ej kõketak eok?

¹² Kar kappeik jet em̦m̦aan ro me ewõr aer imminene in lale eklejia ko bwe ren loloorjake im karõk jerbal in kwal̦o̦k naan ilo aelõñ ko rej pãd ie. Ñe rej kõm̦m̦ani pepe ko, rej kappok naan in tõl jãn Baibõl̦. Ilo wãween in, rej kõm̦m̦an bwe Baibõl̦ en ãinwõt juon ‘l̦aam̦ ñan neer im meram ñan aer ial̦.’ Bareinwõt, em̦m̦aan rein rej jar bwe Jeova en tõl er.​—Sam 119:105; Matu 7:7, 8.

¹³ Em̦m̦aan ro ilo iien ko an rijjelõk ro me rar lale eklejia eo rar likũt “jerbal in kwal̦o̦k naan” bwe en men eo eaorõktata. Em̦m̦aan ro rej lale im karõk jerbal in kwal̦o̦k naan rainin rej bar kõm̦m̦ane ejja men in wõt. (Jerbal 6:4, UBS) El̦ap aer m̦õn̦õn̦õ ñe rej lo tõprak ko ilo jerbal in kwal̦o̦k naan ilo aelõñ ko rej jerbal ie. Rej bar m̦õn̦õn̦õ kõn tõprak ko ilo aelõñ ko ipel̦aakin lal̦ in. (Jerbal 21:19, 20) Em̦m̦aan rein rejjab kõm̦m̦an bwijin kien ñan armej ro an Anij. Ak rej l̦oor Baibõl̦ im tõl eo jãn kajoor eo an Anij ilo aer kõm̦m̦ani karõk ko me enaaj jipañ kajeded nuuj eo em̦m̦an. (Riit Jerbal 15:28, UBS.) Ilo aer ãindein, em̦m̦aan rein rej likũt juon joñak em̦m̦an ñan aolep ro jeier im jatier ilo eklejia ko rej jerbal ie.​—Epesõs 4:11, 12.

14, 15. (1) Ta jerbal ko elõñ rej kõm̦m̦ani ñan rejetake jerbal in kwal̦o̦k naan ipel̦aakin lal̦? (2) Ewi am̦ eñjake kõn men eo kwõj kõm̦m̦ane im ej rejetake jerbal in kwal̦o̦k naan?

¹⁴ Aolep raan elõñ ro jeid im jatid rej  kõpooji katak ko ilo bok ko, kweilo̦k ko im ekoba kweilo̦k ko rel̦l̦ap. Ñan waanjoñak, elõñ to̦ujin ro me rej m̦õn̦õn̦õ in bõk kun̦aaer im kate er ukoti bok ko ñan elõñl̦o̦k jãn 600 kajin ko. Kõn men in, elõñ armej rej maroñ in katak kõn “men ko rel̦l̦ap an Anij” ilo kajin ko aer make. (Jerbal 2:7-11) Ewõr jiroñ im likao ro jeid im jatid el̦ap aer kijejeto ilo aer jerbal ilo jikin kõm̦m̦an bok ko. Ãlikin, rej jilkinl̦o̦ki bok kein ñan eklejia ko ekoba eklejia ko ilo aelõñ ko me relukkuun ettol̦o̦k.

¹⁵ Bareinwõt, elõñ rej m̦õn̦õn̦õ in kõm̦m̦ane jerbal ko ñan jipañ kõj poub wõt ilo jerbal in kwal̦o̦k naan ilo jikin ko jej pãd ie. Ñan waanjoñak, elõñ to̦ujin rej m̦õn̦õn̦õ in bõk kun̦aaer ñan kalõk Im̦õn Kweilo̦k ko ekoba m̦oko jej kõm̦m̦ani kweilo̦k ko rel̦l̦ap ie. Ro jet rej jipañ ilo aelõñ ko rejorrããn kõn l̦añ ko rel̦l̦ap ak jipañ ro jeid im jatid ñe rej jelm̦ae apañ ko kõn taktõ. Bareinwõt, jet rej jipañ loloorjake kweilo̦k ko rel̦l̦ap im jet rej jipañ katakin ilo jikuul̦ in Baibõl̦ ko. Ta unin aer kõm̦m̦ani aolep jerbal kein? Ej ñan jipañ kõj ilo jerbal in kwal̦o̦k naan kõn nuuj eo em̦m̦an. Bareinwõt, rej kakajoor tõmak eo an ro rej kõm̦m̦ane jerbal kein im jipañ elõñ armej bwe ren erom ro rej kabuñ ñan Jeova. Em̦ool bwe ñan kiiõ m̦õttan eo juon an doulul eo an Jeova me ej pãd ijin ioon lal̦ ej likũt men ko raorõk bwe ren m̦oktata!

16. Ta eo kwõmaroñ pukot mel̦el̦e ko kake ilo iien kabuñ an baam̦le eo am̦ ak ñe kwõj katak ippam̦ make?

¹⁶ Jenañin ke baj bõk iien im kõl̦mãnl̦o̦kjen̦ kõn men ko doulul eo an Jeova ej kõm̦m̦ani ñan kiiõ? Kwõmaroñ kappok mel̦el̦e kõn doulul in ilo iien kabuñ eo an baam̦le eo am̦ ak ñe kwõj katak ippam̦ make. Innem, em̦m̦an bwe kwõn kõl̦mãnl̦o̦kjen̦ kõn men eo kwõj katak kake. Ñan baj waanjoñak, enaaj lukkuun em̦m̦an ñan katak kõn visõn ko Aiseia, Ezekiel, Daniel im Jon rar loi. Jemaroñ bar jel̦ã kõn men ko rem̦m̦an kõn doulul eo an Anij ñe jej alwõje pija ko me rej kwal̦o̦k kõn doulul in. Jemaroñ bar lale bok eo (Jehovah’s Witnesses​—Proclaimers of God’s Kingdom) me ej kõnono kõn doulul eo an Anij.

17, 18. (1) Ewi wãween katak in ear jipañ eok? (2) Ta kajjitõk ko kwõn kajjitõk ippam̦ make kaki?

¹⁷ Em̦m̦an bwe jen kõl̦mãnl̦o̦kjen̦ kõn wãween an Jeova kõjerbal doulul eo an ñan rejetake jerbal in kwal̦o̦k naan. Jen juon wõt ippãn doulul in an Jeova im likũt men ko raorõktata m̦okta. Ilo wãween in, jenaaj pen wõt im kajoor ãinwõt kar Paul, eo ear ba: “Ilo an Anij tũriam̦o ear letok jerbal in ñan kõm, innem kõmij jab ebbeer.” (2 Korint 4:1, UBS) Bareinwõt, Paul ear rõjañ ro jein im jatin ilo an ba: “Jen jab m̦õk in kõm̦m̦an em̦m̦an, bwe el̦aññe jejjab ebbeer, jenaaj m̦adm̦õd ilo iien jonikõn.”​—Galetia 6:9, UBS.

¹⁸ Ewõr ke jabdewõt men kwe ak baam̦le eo am̦ ej aikuj kõm̦m̦an oktak ie bwe men ko raorõktata ren m̦okta ilo mour ko ami kajjojo raan? Kwõmaroñ ke kadikl̦o̦k men ko rej kõm̦m̦an am̦ poub im m̦ad bwe kwõn maroñ kal̦apl̦o̦k kun̦aam̦ ilo kwal̦o̦k naan? Ilo katak eo tok juon, jenaaj etale l̦alem men ko im renaaj jipañ kõj ñan l̦oore joñak eo an doulul eo an Jeova im bwe jen kijejeto wõt ilo jerbal eo an Anij.