Em̦õj ke am̦ iioon kalijekl̦o̦k jãn ro jet? Armej ro renañin ke jab uwaake juon am̦ kajjitõk, m̦akoko in jipañ eok, ak kwal̦o̦k aer dike eok kõn an oktak kil eo kilũm̦, aelõñ eo am̦, ak kõn an baam̦le eo am̦ ettã? El̦aññe aet, eokwe ebar lõñ armej ro rej iioon ejja men in wõt. Bõtab, eñin juon men ekaitoktoklimo ñan ad jel̦ã: Wãween kein rekalijekl̦o̦k me ekkã aer wal̦o̦k ilo lal̦ in, rejjab wal̦o̦k ilañ. Rijjelõk Piter ear ba bwe “ejjel̦o̦k kalijekl̦o̦k” ippãn Anij. Im Piter ear lukkuun tõmak men in.​—Riit Jerbal 10:34, 35, UBS.

Piter ear kwal̦o̦k naan kein ke ear pãd ilo m̦weo im̦õn em̦m̦aan eo etan Korniliõs. L̦ein ear jab juon Ri Ju. Bõtab, Piter ear juon Ri Ju. Im ear mour ilo juon iien me Ri Ju ro rar watõk armej in aelõñ ko jet ãinwõt men ko rettoon. Kõn men in, ejjel̦o̦k juon Ri Ju ear aikuj kepaak im pãd ippãn jabdewõt armej jãn aelõñ ko jet. Innem, etke Piter ear pãd ilo m̦weo im̦õn Korniliõs? Ej kõnke Jeova Anij ear karõk bwe erro en iioon doon! Ewi wãween? Piter ear lo juon visõn jãn Anij, im kar ba ñan e: “Kwõn jab kattone men eo em̦õj an Anij kaalikkar ke erreo.” Raan eo m̦oktal̦o̦k jãn iien in, Korniliõs ear bar lo juon visõn. Juon enjel̦ ear ba bwe Korniliõs en ijjilõkl̦o̦k jet armej bwe ren ilen pukottok Piter. Im ejjel̦o̦k an kar Piter jel̦ã kõn men in. (Jerbal 10:1-15, UBS) Innem ke Piter ear kile bwe Jeova eo ear tõl e ñan kõm̦m̦ane men in, ear jab ãliklik in kõnono.

Piter ear ba: “Em̦ool Anij ej kõm̦m̦an ñan armej otemjej ilo ejjel̦o̦k kalijekl̦o̦k.” (Jerbal 10:34, UBS) Naan in Grik eo me kar ukote ñan “kalijekl̦o̦k” ej mel̦el̦ein “l̦õmn̦ak kõn okõtan armej.” (Naan Ko Rejouj Ministries) Ikijjeen mel̦el̦ein naan in, juon eo etijemlok kõn kobban Baibõl̦ ear ba: “Ej jitõñl̦o̦k ñan juon ri ekajet eo im ej lale mejãn juon armej im ekajete armej in ekkar ñan wãween an l̦õmn̦ak kõn e el̦aññe em̦m̦an ippãn ak jaab. Ejjab ekajete ekkar ñan ta eo ear wal̦o̦k.” Ak Anij ejjab kaorõkl̦o̦k juon armej jãn bar juon kõn an oktak kilin, aelõñ eo an, an utiej, im men ko jet kõn paotokin armej in.

Bõtab, Jeova ej lale bũruod. (1 Samuel 16:7, UBS; Jabõn Kõnnaan 21:2, UBS) Piter ear wõnm̦aanl̦o̦k im ba: “Jabdewõt eo ej kautieje im kõm̦m̦an jim̦we, ej kabuñbũruon, jekdo̦o̦n ri aelõñ et.” (Jerbal 10:35, UBS) Jeova ej buñbũruon ippãn jabdewõt armej eo me ej kautieje jãn bũruon im ej kõm̦m̦ani men ko rejim̦we.​—Duteronomi 10:12, 13.

El̦aññe em̦õj am̦ iioon kalijekl̦o̦k jãn ro jet, eokwe naan kein an Piter kõn Anij remaroñ lukkuun kaenõm̦m̦an eok. Jeova ej bõktok armej ro jãn aelõñ ko otemjel̦o̦k ñan kabuñ eo em̦ool. (Jon 6:65, UBS; Jerbal 17:26, 27) Ej roñjake im uwaaki jar ko an ro im rej kabuñ ñan e jekdo̦o̦n ñe eoktak kil ko kilier, aelõñ ko aer, ak ñe rej ri utiej ak rũttã. (1 Kiiñ 8:41-43, UBS) Kõn men in, jej lõke bwe ñe Jeova ej reilal̦tak jãn lañ, ej loe bwe jej joñan wõt juon kõnke kõj aolep jej armej. Am̦ jel̦ã bwe Anij ejjab kalijekl̦o̦k, men in ejjab ke kõm̦akũt bũruom̦ ñan kal̦apl̦o̦k am̦ jel̦a kõn e?